Sơnròp Gơlik Gơs 24
24
Abraham sồr cau dĭ lòt tus hơ Mesôpôtami nàng jòi bau Isak in
1Abraham neh kra, sơnam neh jòng, mơ tòm jơh ală bơta Yàng Jehôwa neh ai lơngai lơngò khai in. 2Abraham đơs mơ cau dĭ ơm jŏ rlau jơh tòm hìu khai#24:2 Digơlan do la Eliese neh geh đơs tòm 15:2. mơ gơs gơnoar hơđang jơh ală phan mơna khai dê, mơ lah: “Dan ơn tê di bơnô añ,#24:2 Do la bơta srat să jơh nùs. 3mơ añ rơp sồr mê ai sơnđan Yàng Jehôwa la Yàng trồ mơ tiah dê mơ ho bal lah mê ò jòi bau kòn klau añ in tòm ală cau ơruh làng bol Kanaan dê, hơ̆ la làng bol mơ bol he ơm ing nàng tòmbau mơ kòn klau añ, 4mơya pal rê hơ lơgar añ, tòm hìu nhă añ mơ jòi bau Isak kòn klau añ in.” 5Cau dĭ đơs lah: “Digơlan cau ơruh ò bài jat añ rê hơ lơgar do, behơ̆ añ rơp lam kòn klau ồng lòt tus hơ lơgar ồng neh lik di sơl ơ?” 6Abraham ho lah: “Kơrhia tĕ, bañ lam kòn añ rê hơ lơgar hơ̆! 7Jehôwa la Yàng Tom Trồ hơđang trồ, la Bơtau neh lam añ lik bơh di hìu nhă añ mơ bơh lơgar añ, neh đơs mơ ho lah: ‘Añ rơp ai jơi bơtiàn mê in lơgar do!’ Să tòm Kơnràñ rơp sồr cau gơnrơh lòt lài mơ mê, mơ tềng hơ̆ mê jòi tĕ bau kòn klau añ in. 8Dilah cau ơruh ò bài jat, gen mê rơp ò kòl bơh jơnau añ sồr mê ho bal, mìng bañ lam kòn añ rê hơ hơ̆.” 9Mơ cau dĭ ơn tê di bơnô Abraham, cau tòm khai dê, mơ ho bal rơp lơh jat be jơnau Abraham neh sồr.
Cau dĭ tìp mơ Rebeka
10Gen cau dĭ kup jơt nơm làkđa tòm mpồl cau tòm khai dê, cèng bal tơl ală phan mơna cau tòm neh ai, gen khai ñă lòt tus hơ Mesôpôtami, tus hơ ƀòn Nakôr dê. 11Khai lòi làkđa in cùn gơltang rlô di gah ƀòn, rềp di tơrlung dà, trồ mho, di tŭ ală cau ùr lik lòt bơ̆ dà. 12Khai đơs lah: “Ơ Jehôwa, Yàng Tom Trồ Abraham cau tòm añ jê! Dan ai añ in tìp gŏ tòm ngai do bơta añ jòi, mơ ai bơta nđàc Abraham in la cau tòm añ jê. 13Do, añ ntào rềp di tơrlung do, ală cau ùr bơh tòm ƀòn rơp lik bơ̆ dà. 14Dan ai cau ùr lơi mơ añ rơp đơs be do: ‘Dan sơrkềng yang dà ai añ in’ mơ khai ho lah: ‘Hùc tĕ gen añ rơp ai ală làkđa mê in hùc sơl,’ la să tòm cau Yàng neh sac ai Isak cau dĭ Kơnràñ in, mơ kơnòm di bơta hơ̆ añ rơp git lah Yàng neh ai bơta nđàc cau tòm añ in.”
15Cau dĭ òhềt lồi đơs, ne, Rebeka đoa yang di pơnì lik lòt. Khai la kòn ùr Bethuel dê, kòn klau Milka bau Nakôr, oh klau Abraham dê. 16Cau ùr hơ̆ hàng mơnĕ ngan, gam ơruh, òhềt ròm dô nă cau lơi. Khai mù di tơrlung, bơ̆ dà bềng yang, gen guh wơl. 17Gen cau dĭ ntoat tus di đap khai mơ đơs lah: “Dan ai añ in hùc dô êt dà tòm yang.” 18Cau ơruh ho lah: “Ơ ồng, hùc tĕ,” gen jus mhar yang tus di tê mơ ai khai in hùc. 19Tòm tŭ cau ơruh neh ai khai in hùc rau, gen khai đơs tai lah: “Añ kung bơ̆ dà ai ală làkđa ồng in hùc sơl, jơl tus di gơ hùc hòm.” 20Cau ơruh sơrbac sơrbang tuh dà yang tòm bòng gen ntoat tus di tơrlung bơ̆ dà tai ai jơh ală làkđa in hùc. 21Ai khai ơm mŏ mŏ mơ kư̆ sền cau ơruh nàng git dilah Yàng Jehôwa lơh gơlik gơs broă mơ khai lòt do hala ò.
22Tŭ làkđa neh sir hùc rau, gen cau dĭ ai dô nơm sơmbiat màh kơnjơ̆ nggùl sieklơ#24:22 pơgap bàr cìh. mơ dô yô kòng kơnjơ̆ jơt sieklơ,#24:22 pơgap pe kơi. 23mơ đơs lah: “Ai la kòn ñcau, dan yal añ in git. Tòm hìu bèp ai gơs tiah añ in bic mang sơl?” 24Cau ơruh ho lah: “Añ la kòn ùr Bethuel, kòn klau Milka mơ Nakôr dê.” 25Mơ đơs tai lah: “Hìu bol hi gơs oă rhe mơ ñhơt, mơ kung gơs tiah ơm bic sơl.” 26Gen cau dĭ kun bồ mơ tơmbic să di đap Yàng Jehôwa, 27mơ đơs lah: “Pal jòng ro Yàng Jehôwa la Yàng Tom Trồ Abraham cau tòm añ jê! Kơnràñ ò sang bơta kòñ nđàc mơ jơnau song Kơnràñ dê bơh cau tòm añ jê. Ai să tòm añ, Yàng Jehôwa neh lam añ tus hơ hìu oh mi cau tòm añ jê.”
28Cau ơruh hơ̆ ntoat rê, yal wơl jơnau do tòm hìu mè bèp khai dê.
Laban mơ Bethuel lòt rò cau dĭ
29Mơ Rebeka gơs dô nă bi klau sơnđan la Laban. Laban ntoat tus di cau dĭ ơm di gah tơrlung dà. 30Dơ̆ khai gŏ sơmbiat màh mơ dô yô kòng di tê oh ùr khai, mơ neh kơno jơnau Rebeka yal wơl lah: “Cau do đơs behơ̆!” gen lòt tus di khai ntào rềp di ală làkđa, di gah tơrlung. 31Mơ khai đơs lah: “Ơ cau neh geh Yàng Jehôwa ai lơngai! Mut tòm hìu, mbe lơh ơm di tiah be do taih? Añ neh rcang wàs hìu mơ dô bă tiah ală làkđa in rau.” 32Gen cau dĭ mut tòm hìu, Laban hồ ừn làkđa, cèng ñhơt mơ rhe ai gơ in, gen ai dà nàng rào jơng cau dĭ mơ ală cau lòt bal in. 33Gen cau tòm hìu yò sào khai, mơ cau dĭ đơs lah: “Añ ò sa lài mơ tŭ añ òhềt đơs ală jơnau añ pal đơs.” Laban ho lah: “Đơs tĕ!”
34Gen khai đơs lah: “Añ la cau dĭ Abraham dê. 35Yàng Jehôwa neh ai lơngai cau tòm añ in oă ngan, khai gơs pas sơm, Kơnràñ ai cau tòm añ in belàt, kơnrồ, priă, màh, dĭ ùr, dĭ klau, làkđa mơ alàng. 36Mơ Sara, bau ùr cau tòm añ jê, tòm tŭ khai neh kra, neh deh dô nă kòn klau khai in. Abraham neh ai jơh phan mơna kòn klau hơ̆ in. 37Cau tòm añ jê sồr añ ho bal lah: ‘Mê bañ tòmbau kòn klau añ mơ dô nă cau ơruh lơi tòm ală cau ơruh Kanaan dê, la lơgar añ ơm ing. 38Mơya rê tĕ hơ hìu bèp añ, tòm hìu nhă añ mơ tòmbau kòn klau añ in mơ dô nă cau ơruh tềng hơ̆.’ 39Añ đơs mơ cau tòm añ lah: ‘Digơlan cau ơruh ò bài jat añ rê.’ 40Cau tòmho lah: ‘Yàng Jehôwa la Bơtau mơ añ lòt di đap, rơp sồr cau gơnrơh lòt bal mơ mê, lơh gơlik gơs broă mê dê, mơ mê rơp tòmbau kòn klau añ in mơ dô nă cau ơruh tòm hìu nhă añ, mơ tòm hìu bèp añ. 41Behơ̆, dilah tŭ lơi mê rê hơ hìu nhă añ mơ bol khai ò bài ai cau ơruh, gen mê rơp ò kòl bơh jơnau ho bal mơ añ.’ 42Ngai do, tòm tŭ tus di tơrlung dà, añ neh hòi dan lah: ‘Khoai Jehôwa Yàng Tom Trồ Abraham cau tòm añ jê, dilah Kơnràñ lơh gơlik gơs broă añ lòt do, 43gen do, añ nggui rềp di gah tơrlung dà do, dan cau ơruh lơi rơp lik lòt bơ̆ dà mơ añ lùp khai hơ̆: “Dan ai añ in hùc dô êt dà tòm yang,” 44mơ cau hơ̆ rơp ho lah: “Hùc tĕ gen añ rơp bơ̆ dà ai ală làkđa mê in hùc sơl,” dan ai cau ơruh hơ̆ gơlik gơs bau mơ Yàng Tom Trồ neh sac kòn klau cau tòm añ in.’ 45Añ òhềt jơh đơs tòm nùs gen Rebeka đoa yang dê pơnì lik lòt, mù hơ tơrlung mơ bơ̆ dà. Añ đơs mơ khai lah: ‘Dan ai añ in hùc dô ềt dà.’ 46Khai jus mhar yang bơh pơnì mơ đơs lah: ‘Hùc tĕ gen añ rơp ai ală làkđa mê in hùc sơl,’ behơ̆ añ neh hùc mơ khai kung ai ală làkđa in hùc sơl. 47Gen añ lùp khai lah: ‘Ai la kòn ùr ñcau taih?’ Khai ho: ‘Añ la kòn ùr Bethuel, kòn klau Nakôr mơ Milka dê.’ Añ tơndò mo sơmbiat di muh mơ dô yô kòng di tê khai. 48Gen añ kun bồ mơ tơmbic să di đap Yàng Jehôwa, jòng ro Jehôwa Yàng Tom Trồ Abraham cau tòm añ jê mơ neh lam añ tòm gùng song ngan, nàng ai kòn klau khai in kòn ùr oh cau tòm añ jê.
49Mơ tŭ do, dilah ală ồng gơs nùs niam mơ dòn song mơ cau tòm añ jê, dan yal bơta hơ̆; dilah ò kung yal nàng añ in rơp sĕ đah ma hala sĕ đah kiau.”
50Laban mơ Bethuel đơs lah: “Bơta hơ̆ la bơh di Yàng Jehôwa mơ gơs, bol hi ò rgơi đơs mơ mê la tìs hala di. 51Ne, Rebeka ơm di đap mê, lam khai lòt tĕ nàng khai bau mơ kòn klau cau tòm mê dê jat be jơnau Yàng Jehôwa neh đơs.” 52Dơ̆ cau dĭ Abraham kơno jơnau bàr nă khai neh đơs rau gen khai tơmbic să di đap Yàng Jehôwa. 53Khai ai phan ngui mơ priă, mơ màh, mơ ồi ào ai Rebeka in, khai kung ai ală phan màng ai bi klau mơ mè Rebeka in.
54Tơnơ̆ mơ hơ̆ cau dĭ mơ ală cau lòt bal nggui sào sa, gen bic tềng hơ̆. Ngai hìng, tòm tŭ bol khai neh guh bic, cau dĭ đơs lah: “Dan ai añ in rê wơl hơ cau tòm añ.” 55Bi klau mơ mè đơs lah: “Lòi cau ơruh ơm mơ bol hi dô êt ngai tai, tòm jơt ngai gen khai rơp lòt.” 56Cau dĭ đơs lah: “Bañ lơh añ in òbat bơh Yàng Jehôwa neh lơh gơlik gơs broă añ lòt do.” 57Bol khai đơs lah: “Bol hi hòi cau ơruh hơ̆ mơ lùp mbe khai kòñ.” 58Gen bol khai hòi Rebeka mơ lùp lah “Ai kòñ lòt mơ khai sơl?” Khai ho lah: “Añ kòñ.” 59Gen bol khai ai Rebeka, oh ùr bol khai dê, mơ ai cau ròng khai dê, rê bal mơ dĭ Abraham mơ ală cau lòt bal. 60Bol khai ai lơngai Rebeka in mơ đơs lah: “Ơ oh ùr hi dê, dan ai in gơlik gơs mè tơlak tơmàn cau dê, mơ ai jơi bơtiàn ai in pìt sơmbrơt mpồng ală cau sò tơm dê!” 61Rebeka mơ ală cau ùr dĭ khai dê ñă hào làkđa lòt jat cau klau hơ̆. Behơ̆, cau dĭ lam Rebeka lòt.
Rebeka bau mơ Isak
62Tŭ hơ̆ Isak ơm đah đơm,#24:62 Gơs sră bơh yau ƀà cih tơlik: Isak tus bơh ƀlàng bràs. khai rê bơh tơrlung dà Lacairoi. 63Tòm mho, khai lik bơdìh tòm ƀlàng nàng kơlôi sơnơng, khai pò mat sền gŏ tus làkđa. 64Rebeka kung pò mat sền gŏ Isak gen khai mù mo bơh làkđa. 65Mơ khai lùp cau dĭ lah: “Cau klau lòt tòm ƀlàng hơ̆ tus mơ bol he la ñcau taih?” Cau dĭ ho lah: “Hơ̆ la cau tòm añ.” Gen cau ơruh ai chèo mơ kìng mat khai. 66Cau dĭ yal mơ Isak jơh ală broă khai neh lơh. 67Gen Isak lam Rebeka mut tòm sàl Sara, mè khai dê; khai bau mơ Rebeka, mơ kòñ gơboh dê bau khai. Behơ̆ Isak rài moat jrùng tơnơ̆ mơ tŭ mè khai neh chơt.
Currently Selected:
Sơnròp Gơlik Gơs 24: KPM2018
Highlight
Share
Copy
Want to have your highlights saved across all your devices? Sign up or sign in
© 2018 United Bible Societies. All rights reserved.
