Jang 14

Hìu Bèp dê jơnau lùp Thôma mơ Philip dê

1“Nùs bol mê bañ dơrcul: Neh dòn Yàng Tom Trồ, kung dòn tĕ Añ sơl. 2Tòm hìu Bèp Añ gơs oă tiah ơm; dilah ò behơ̆ Añ neh đơs mơ bol mê rau, bơh Añ lòt rcang lài bol mê in dô bă tiah. 3Tŭ Añ lòt mơ rcang lài bol mê in dô bă tiah rau, gen Añ rơp rê wơl nàng rò bol mê rê bal mơ Añ, tồ Añ ơm tiah lơi gen bol mê kung ơm bal tềng hơ̆ sơl. 4Tiah Añ lòt, bol mê git gùng tai sơl.”

5Thôma đơs lah: “Ơ Yàng, bol hi ò git Yàng lòt tiah lơi, gen mbe rgơi git gùng taih?” 6Yàng Jesu đơs lah: “Añ la gùng lòt, jơnau song, mơ bơta kis; ò bơh Añ gen ò gơs cau lơi geh lòt tus hơ Bèp. 7Dilah bol mê neh git Añ, gen kung neh git Bèp Añ sơl. Bơh di tŭ do bol mê git Kơnràñ mơ kung neh gŏ Kơnràñ sơl.”

8Philip đơs lah: “Ơ Yàng, dan sơnio Bèp bol hi in, gen tơl rau.” 9Yàng Jesu đơs lah: “Ơ Philip, Añ ơm mơ bol mê neh jŏ rau, mơ mê òhềt git Añ ơ? Cau lơi neh gŏ Añ la neh gŏ Bèp rau. Mbe mê đơs lah: ‘Dan sơnio Bèp bol hi in, taih’? 10Mê ò dòn lah Añ ơm tòm Bèp mơ Bèp ơm tòm Añ ò ơ? Ală jơnau Añ đơs mơ bol mê, ò di bơh Añ đơs is Añ jê, mơya hơ̆ la Bèp ơm tòm Añ mơ lơh broă Kơnràñ dê. 11Dòn tĕ lah Añ ơm tòm Bèp mơ Bèp ơm tòm Añ, dilah ò gen bơh ală broă hơ̆ mơ dòn tĕ Añ. 12Di ngan, di ngan, Añ đơs mơ bol mê, cau lơi dòn Añ, gen rơp lơh ală broă Añ lơh sơl; mơ khai rơp lơh ală broă dờng rlau tai, tài bơh Añ rê wơl hơ Bèp. 13Bol mê ai sơnđan Añ mơ dan bơta lơi, gen Añ rơp lơh, nàng Bèp in geh gơklŏ dê Kòn. 14Dilah bol mê ai sơnđan Añ nàng dan bơta lơi, gen Añ rơp lơh.”

Yàng Jesu ho ai Yàng Hwềng Goh

15“Dilah bol mê kòñ gơboh di Añ, gen rơp prap gàr ală bơta sồr lam Añ jê. 16Añ rơp dan mơ Bèp, Kơnràñ rơp ai bol mê in dô Bơtau Pơndòm pơniang#14:16 Hala cau dong kòl. ndai, nàng ơm mơ bol mê sùm sùm. 17Hơ̆ la hwềng Jơnau song dê mơ dunnia ò rgơi dòp, bơh ò gŏ Kơnràñ, kung ò git Kơnràñ sơl; ai bol mê gen git Kơnràñ, bơh Kơnràñ ơm sùm#14:17 hala ơm digùl. mơ bol mê, mơ rơp ơm tòm bol mê sơl. 18Añ rơp ò lòi bol mê ơm kòn đòi ò, Añ rơp lòt tus hơ bol mê. 19Gam dô êt jŏ tai gen dunnia ò gŏ Añ tai, mơya bol mê rơp gŏ Añ; tài bơh Añ kis, gen bol mê kung rơp kis sơl. 20Tòm ngai hơ̆ bol mê rơp git lah Añ ơm tòm Bèp Añ, bol mê ơm tòm Añ mơ Añ ơm tòm bol mê. 21Cau lơi gơs ală bơta sồr lam Añ jê mơ prap gàr, hơ̆ la cau kòñ gơboh di Añ; cau lơi kòñ gơboh di Añ gen rơp geh Bèp Añ kòñ gơboh wơl, Añ kung rơp kòñ gơboh di khai, mơ yal tơlik să tòm Añ khai in.”

22Juda (ò di la Iskariôt) đơs mơ Kơnràñ lah: “Ơ Yàng, gơs ñchi bơta gơlik gơs mơ Kơnràñ rơp yal tơlik să tòm Kơnràñ bol hi in, mơ ò yal tơlik să tòm Kơnràñ dunnia in taih?” 23Yàng Jesu ho lah: “Dilah cau lơi kòñ gơboh di Añ, gen rơp prap gàr jơnau Añ jê, Bèp Añ rơp kòñ gơboh di khai, bol hi rơp lòt tus hơ khai mơ ơm sùm mơ khai. 24Ai cau lơi ò kòñ gơboh di Añ gen ò prap gàr ală jơnau Añ jê; mơ jơnau bol mê kơno hơ̆, ò di la jơnau Añ jê, mơya la jơnau Bèp dê, la Bơtau neh sồr Añ lòt tus.

25Añ neh đơs ală bơta hơ̆ mơ bol mê tòm tŭ Añ gam ơm mơ bol mê. 26Mơya Bơtau Pơndòm pơniang, hơ̆ la Yàng Hwềng Goh mơ Bèp rơp ai sơnđan Añ mơ sồr lòt tus, Bơtau hơ̆ rơp bơto sồr bol mê jơh ală bơta, mơ tơngkah wơl bol mê in jơh ală bơta Añ neh đơs mơ bol mê. 27Añ lòi wơl bơta lơngap lơngai bol mê in; Añ ai bơta lơngap lơngai Añ jê bol mê in; Añ ai bol mê in ò di be dunnia ai. Nùs bol mê bañ dơrcul mơ bañ rngòt. 28Bol mê neh kơno Añ đơs mơ bol mê lah: ‘Añ lòt, mơ Añ rê wơl hơ bol mê.’ Dilah bol mê kòñ gơboh di Añ, gen rơp hòn chò tài bơh Añ rê wơl hơ Bèp, bơh Bèp dờng rlau mơ Añ. 29Tŭ do Añ neh đơs ală bơta hơ̆ mơ bol mê lài mơ tŭ òhềt gơlik gơs, nàng tòm tŭ ală bơta hơ̆ gơlik gơs gen bol mê dòn. 30Añ rơp ò tai đơs oă mơ bol mê, bơh bơtau dunnia do rơp tus; khai ò gơs bơta lơi di Añ. 31Mơya nàng dunnia in git lah Añ kòñ gơboh di Bèp, mơ Bèp neh sồr Añ be lơi gen Añ lơh jat behơ̆. Ntào tĕ, bol he lòt bơh do.”

Currently Selected:

Jang 14: KPM2018

Highlight

Copy