Juan 18

Kurajkuna Jesusta jap'ichinku

(Mt 26.47-56; Mc 14.43-50; Lc 22.47-53)

1Tata Dioswan parlarikuyta tukuytawan, Jesusqa yachachisqankunawan ima Cedrón wayq'o chimpaman rerqanku. Chaypi olivo sach'ayoj huerta karqa, chaymantaj Jesús, yachachisqankunawan ima yaykorqanku. 2Jesusta jap'ichej Judaspis chay cheqata rikullasqataj, imaraykuchus Jesús, yachachisqankunawan ima ashkha kutita chaypi tantakoj kanku. 3Chayrayku Judasqa chaypi kaj Romamanta ashkha soldado pusarisqa chayamorqa, Templota qhawaj soldadokunawan ima. Chaykunata fariseokuna, chantá kuraj sacerdotekuna ima kachamusqanku. Paykuna nina jachonniyoj, lamparakunayoj, chantá armayoj ima jamorqanku. 4Jesusrí chay tukuy ima payta qhatirinanta yacharqaña. Chayrayku ñawpaykuspa, paykunata taporqa: Pitataj mask'ashankichejri? nispa.

5Paykunataj kuticherqanku: Nazaretmanta Jesusta mask'ashayku, nispa. Jesustaj kuticherqa: Noqa kani chay, nispa.

Jesusta jap'ichej Judaspis paykunawan kashallarqataj. 6Noqa kani chay, Jesús nejtinkama, tukuyninku ithirispa, pampaman choqakorqanku. 7Chantá Jesús ujtawan tapullarqataj: Pitataj mask'ashankichejri? nispa.

Paykunataj kuticherqanku: Nazaretmanta Jesusta mask'ashayku, nispa.

8Jesustaj ujtawan nerqa: Noqa kani, nispa nerqaykichejña. Noqatachus mask'ashawankichej chayqa, kay yachachisqaykuna ripunankuta saqeychej, nispa. 9Ajina karqa Jesuspa kay nisqan junt'akunanpaj: Tatáy, pikunatachus qowarqanki, chaykunamanta mana ujtapis chinkacherqanichu, nispa.

10Chaypacha Simón Pedroqa Jesusman kutikuspa, espadanta sik'erqa. Chantá kuraj kaj sacerdotej wata runan Malco sutiyojpa paña ninrinta wajtaspa, qholurparerqa. 11Jesustajrí Pedrota nerqa: Espadaykita waqaychakapuy. Sichus Tatay ñak'arinayta kamachiwan chayqa, manachu yuyanki ñak'arinaypaj wakichisqa kashasqayta? nispa.

Jesusta kuraj kaj sacerdoteman pusanku

(Mt 26.57-58; Mc 14.53-54; Lc 22.54)

12Chaymantataj Romamanta soldadokuna, kamachejninku, jinataj Templota qhawaj soldadokuna ima Jesusta jap'ispa, makinta watarqanku. 13Chantá Jesusta ñawpajta Anaspa wasinman pusarqanku. Anasqa Caifaspa suegron karqa, Caifastaj chay wata kuraj sacerdote jina kasharqa. 14Paymin judiokunaj kurajninkukunaman yuyayta qosqa: Walej kanman tukuy runarayku uj runalla wañunan, nispa.

Pedroqa Jesusta mana rejsejman tukun

(Mt 26.69-70; Mc 14.66-68; Lc 22.55-57)

15Jinapi Pedrowan, Jesuspa waj yachachisqanwan ima Jesuspa qhepanta rerqanku. Chay yachachisqataj kuraj kaj sacerdotej rejsisqan kasqanrayku, Anaspa wasinpa pationman Jesuswan yaykorqa. 16Pedrotajrí calle punkullapi qhepakorqa. Chantá Jesuspa yachachisqan, pichus kuraj kaj sacerdotej rejsisqan kaj, chay llojsimuspa, punkuta qhawaj warmita parlapayarqa, jinataj Pedrota pusaykorqa. 17Chay warmitajrí Pedrota nerqa: Manachu qanpis chay runaj yachachisqankunamanta ujnin kankiri? nispa. Pedrotajrí nerqa: Mana chaychu kani, nispa.

18Chaypacha chiri karqa, jinataj, Anaspa kamachinkuna, chantá Templota qhawaj soldadokuna ima ninata jap'ichispa, q'oñikusharqanku. Pedropis paykunawan khuska q'oñikushallarqataj.

Anasqa Jesusta tapun

(Mt 26.59-66; Mc 14.55-64; Lc 22.66-71)

19Chantá kuraj kaj sacerdoteqa Jesusta taporqa pikunachus yachachisqankuna kasqankumanta, chantá imatachus yachachisqanmantawan. 20Jesustajrí payman kuticherqa: Tukuypa rikunanta runakunaman parlarqani. Yachacherqanitaj tantakuna wasikunapi, Templopi ima, maypichus runakuna tantakunku chaypi, manataj imatapis pakayllapi parlarqanichu. 21Jinaqa imaraykutaj noqata tapuwankiri? Parlasqayta uyariwajkunata tapuy ari, paykuna imatachus parlasqayta yachanku, nispa.

22Chayta Jesús nisqantawan, Templota qhawaj soldadokunamanta ujnenqa Jesusta uyanpi laq'arqa: Ajinatachu kuraj kaj sacerdoteman kutichina? nispa.

23Jesustaj payta nerqa: Sichus mana allinta parlani chayqa, niway ari mayqen parlasqaychus mana allinchu kasqanta. Sichus parlasqay allin chayrí, imaraykutaj laq'awankiri? nispa.

24Chantá Anasqa kuraj kaj sacerdote Caifasman makin watasqata Jesusta pusacherqa.

Pedro ujtawan Jesusta mana rejsejman tukun

(Mt 26.71-75; Mc 14.69-72; Lc 22.58-62)

25Chaykama Pedro ninapi q'oñikushajtin, wakin nerqanku: Manachu qanpis chay runaj yachachisqan kanki? nispa. Pedrotajrí nerqa: Mana chaychu kani, nispa.

26Chantá kuraj kaj sacerdotej ujnin kamachin, mayqenpatachus ninrinta Pedro qholurparisqa, chay runaj ujnin ayllun Pedrota nerqa: Manachu qanta huertapi Jesustawan khuska rikorqayki? nispa.

27Jinapi Pedroqa ujtawan kuticherqa: Manapuni payta rejsinichu, nispa. Chayta nisqantawantaj, gallo waqarqa.

Jesusta kamachej Pilatoman pusanku

(Mt 27.1-2,11-14; Mc 15.1-5; Lc 23.1-5)

28Chantá sut'iyamushajtinña, judiokunaj kurajninkukunaqa Caifaspa wasinmanta Jesusta Pilatoj#18.28 Pilato: Pilato sutiyoj kamachejqa Judea jap'iypi Romapi kuraj kamachejpa sutinpi kamacherqa. kamachinan wasiman pusarqanku. Chay pusajkunarí mana Pilatoj kamachinan wasiman yaykorqankuchu, imaraykuchus mana munarqankuchu mana llimphupaj qhawasqa kayta, ajinamanta Pascua mikhuyta mikhunankupaj. 29Chantá kamachej Pilato llojsimuspa, paykunata taporqa: Kay runa imatataj ruwarqa noqaman apamunaykichejpajri? nispa. 30Paykunataj kuticherqanku: Manachus millayta ruwaj runa kanman chayqa, mana qanman pusamuykumanchu karqa, nispa.

31Chantá kamachej Pilato paykunata nerqa: Jina kajtenqa, payta pusaspa, kamachisqa qhelqaykichejman jina juzgaychej, nispa.

Judiokunaj kurajninkukunatajrí nerqanku: Noqaykoqa mana pitapis wañuchisqa kananpaj juchachayta atiykuchu, nispa. 32Ajinata Jesuspa nisqan junt'akorqa, imaraykuchus Jesús imaynatachus wañunanta nisqaña.

33Chantá kamachej Pilato kamachinan wasiman kutiykorqa, Jesusta wajyaspataj, taporqa: Qanchu judiokunaj kuraj kamachejninku kanki? nispa.

34Jesustaj payta nerqa: Qanllamantachu chayta ninki, chayrí wajkunachu noqa kuraj kamachej kasqayta nerqasunku? nispa.

35Chantá kamachej Pilato Jesusman kuticherqa: Noqa judiochu kani, imatajri? Llajta masiykikuna, chantá kuraj sacerdotekuna ima kayman pusamusunku, noqa juzgasunaypaj. Imatataj ruwarqankiri? nispa.

36Jesustaj kuticherqa: Noqaqa mana kay pachapi kamachejkuna jinachu kani. Kay pachapichus kamachiyta munayman chayqa, noqata qhatiwajkuna maqanakunkuman judiokunaj kurajninkukuna ama jap'inawankupaj. Noqarí mana kay pachapi kamachejkuna jinachu kani, nispa.

37Chaymanta kamachej Pilato payta taporqa: Chantá qanqa kuraj kamachejchu kanki? nispa.

Jesustaj kuticherqa: Qan nishanki noqa kuraj kamachej kasqayta. Noqatajrí kay pachaman jamorqani cheqa kajmanta willanaypaj. Cheqa kajta tukuy kasojkunaqa nisqayta uyarinku, nispa.

38Chantá kamachej Pilato tapullarqataj: Chay cheqa kaj imatajri? nispa.

Jesusta wañuchisqa kananpaj juchachanku

(Mt 27.15-31; Mc 15.6-20; Lc 23.13-25)

Chayta niytawan, Pilatoqa jawapi kashaj judiokunaman kutispa, nerqa: Kay runata juchachanapaj jina mana imatapis tarinichu. 39Chaywanpis qankuna usuykichejman jina yachankichej, Pascua raymipi uj presota kacharinapuni kasqanta. Qankuna munawajchejchu kuraj kamachejniykichejta kacharipunayta? nispa.

40Chayta Pilato nejtinrí, tukuy qhaparerqanku: Chay runataqa ama, Barrabasta kachariy, nispa. Barrabasqa runa wañuchi, suwataj karqa.

Currently Selected:

Juan 18: DQDC

Highlight

Copy