Juan 19

1Chantá Pilatoqa Jesusta jasut'icherqa. 2Soldadokunataj khishkamanta uj pilluta simp'aspa, Jesuspa umanman churaykorqanku, chantá puka patanchanatawan churaykullarqankutaj. 3Chantá alqochakuspa, qhaparerqanku: Jallalla, judiokunaj kuraj kamachejninku, nispa. Jinallataj Jesusta uyanpi laq'arqanku.

4Chaymanta kamachej Pilato ujtawan llojsimuspa, tantasqa judiokunata nerqa: Kunan kay runata ujtawan jawaman pusamusaj. Chaywanpis sut'ita niykichej: Noqaqa kay runajta mana ima juchantapis tarinichu, nispa. 5Jesustaj llojsimorqa, umanpi khishka pilluyoj, chantá puka patanchanawan qhatasqa. Pilatotaj nerqa: Kaymá chay runaqa, nispa.

6Chaypacha kuraj sacerdotekuna, chantá Templota qhawaj soldadokuna ima Jesusta rikuytawan, kutin kutinta qhaparerqanku: Cruzman chakatasqa kachun, nispa.

Jinapi Pilato nerqa: Qankuna apakapuychej, cruzmantaj chakataychej. Noqarí kay runapi mana ima juchantapis tarinichu, nispa.

7Judiokunaj kurajninkukunatajrí kuticherqanku: Diosqa kamachisqankunata qhelqasqata qowarqayku, chayman jinataj kay runa wañuchisqapuni kanan tiyan, Diospa Churin kasqanta nisqanrayku, nispa.

8Chay nisqankuta uyarispa, Pilato astawan mancharikorqa. 9Kamachinan wasiman Jesusta pusaspataj, payta taporqa: Maymantataj qan kankiri? nispa. Jesustajrí mana ni imata kuticherqachu.

10Chantá Pilato nerqa: Manachu imatapis niwanki? Manachu yachanki noqa atiyniyoj kasqayta kacharichisunaypaj, chayrí cruzman chakatachisunaypajpis? nispa.

11Jesustaj kuticherqa: Mana imatapis contraypi ruwayta atiwajchu, manachus Dios atiyta qosunkiman chayqa. Chayrayku pichus noqata qanman jaywaykuwajqa qanmanta aswan juchayoj, nispa.

12Chaymantapacha Pilatoqa Jesusta kacharipuyta munasharqa. Judiokunatajrí qhaparerqanku: Chay runatachus kacharinki chayqa, mana Romapi kuraj kamachej Cesarman sayasqachu kanki. Pillapis kuraj kamachej kasqanta nejqa Cesarman contranpi kashan, nispa.

13Chayta uyariytawan, Pilatoqa watej jawaman Jesusta pusarqa. Chantá maypichus justiciata ruwananpaj tiyakoj, chaypi tiyarikorqa, rumiwan losasqa cheqapi. Chaynejta hebreo rimaypi “Gabata”, nispa sutichaj kanku. 14Chaypacha Pascua raymita ruwanapaj wakichikuna p'unchay karqa, chawpi p'unchay jina. Pilatotaj judiokunata nerqa: Kayqa kuraj kamachejniykichej, nispa.

15Paykunatajrí qhaparerqanku: Llajtamanta jawaman orqhospa, cruzman chakatachimullayña, nispa. Pilatotaj paykunata nerqa: Kuraj kamachejniykichejtachu cruzman chakatachisaj? nispa.

Kuraj sacerdotekunataj kuticherqanku: Mana waj kuraj kamachejniyku kanchu Romapi kuraj kamachej Cesarmanta astawanqa, nispa.

16Chantá Pilatoqa judiokunaj kurajninkukunaj nisqankuta kasuspa, Jesusta soldadokunaman jaywaykorqa cruzman chakatanankupaj. Paykunataj Jesusta jap'ispa, chakatanankupaj aparqanku.

Jesusta cruzman chakatanku

(Mt 27.32-44; Mc 15.21-32; Lc 23.26-43)

17Chantá Jesús cruznin lijrarisqa llajtamanta llojserqa, T'ojlu Moqo nisqa cheqaman. Chaynejta hebreo rimaypi “Gólgota” nillajtaj kanku. 18Chaypitaj Jesusta cruzman chakatarqanku. Jinallataj iskay runakunata chakatallarqankutaj, ujninta pañanman, ujnintataj lloq'enman, Jesustataj chawpiman. 19Pilatotaj cruzman uj qhelqasqata churacherqa. Chay qhelqasqa ajinata nisharqa: “Kayqa Nazaretmanta Jesús, judiokunaj kuraj kamachejninku”, nispa. 20Ashkha runa chay qhelqasqata ñawirerqanku, imaraykuchus llajta qayllapi Jesusta chakatasqanku. Chay qhelqasqataj kinsa rimaypi qhelqasqa karqa: Hebreo rimaypi, latinpi, chantá griego rimaypi ima. 21Judiokunaj kuraj sacerdotenkunarí Pilatota nerqanku: Ama qhelqaychu: Judiokunaj kuraj kamachejninku, nispa. Aswanpis qhelqawaj: Noqaqa judiokunaj kuraj kamachejninku kasqayta nini, nispa nisqanta.

22Pilatorí paykunaman kuticherqa: Mana. Imatachus qhelqasqayqa qhelqasqaña. Ajinalla kakuchun, nispa.

23Jesusta cruzman chakataytawan, soldadokunaqa p'achanta tawaman t'aqaspa, rak'inakorqanku, sapa ujpaj ujkama. Jinapis ukhunchana p'achanqa patamanta urakama uj awasqalla karqa, manataj sirasqachu. 24Chayrayku soldadokuna ninakorqanku: Kaytaqa ama llik'inachu. Walej kanman suerteta choqananchej, pipajchus kananta yachananchejpaj, nispa.

Ajinata junt'akorqa, imachus Diospa Qhelqachisqanpi nin, chay: P'achayta rak'inakorqanku, p'achayraykutaj suerteta choqarqanku,#Sal 22.18. nispa. Soldadokunataj ajinata ruwarqanku.

25Jesús cruzpi chakatasqa kasharqa, chay qayllapi kasharqanku maman, mamanpa ñañan, Cleofaspa warmin María, chantá María Magdalena ima. 26Jinapi Jesús mamanta chaypi sayashajta rikorqa, rikullarqataj paypa qayllanpi munasqa yachachisqan kashajta. Chantá mamanta nerqa: Mamáy, kunanmantapacha pay churiyki jina kanqa, nispa.

27Chantá yachachisqantañataj nerqa: Payqa kunanmantapacha mamayki jina kanqa, nispa. Chaymantapacha Jesuspa yachachisqanqa Mariata wasinman pusakaporqa.

Jesús wañun

(Mt 27.45-56; Mc 15.33-41; Lc 23.44-49)

28Chay qhepata Jesús imachus ruwanan tukuychasqaña kasqanta yachaspa, Diospa Qhelqachisqan junt'akunanpaj nerqa: Yakumanta ch'akishawan, nispa.

29Chaypi k'allku vinoyoj uj yuru kasharqa. Chantá chaypi kajkunamanta ujninkoqa esponjata chay k'allku vinoman chhapuykuytawan, k'aspiman wataykuspa, Jesuspa siminman qayllaykucherqa. 30Jesustaj chay k'allku vinota llamiytawan, nerqa: Imachus ruwanayta tukuychaniña, nispa. Chantá umanta liwiykuspa, wañuporqa.

Jesusta lanzawan t'ojsinku

31Chaypacha Pascua raymi ruwana ñawpaj p'unchay karqa. Chayrayku judiokuna samarina p'unchaypi ayakuna cruzpi warkhurayananta mana munarqankuchu, paykunapaj ancha jatun p'unchay kasqanrayku. Chayrayku judiokunaj kurajninkukuna Pilatomanta mañakorqanku kamachinanta chakatasqakuna usqhayta wañunankupaj chakinkuta p'akiranankuta, chaymantataj ayakunata cruzmanta urayk'uchinankuta. 32Soldadokunataj rispa, pikunachus Jesuswan khuska chakatasqa karqanku, chaykunaj chaki senqankuta ujmanta uj p'akirarqanku. 33Jesusman qayllaykusparí, payta wañusqataña tariparqanku. Chayrayku chaki senqanta manaña p'akerqankuchu. 34Chaywanpis ujnin soldado lanzawan Jesuspa wajtannin chaynejta t'ojserqa, chay kikinpachataj yawar, yaku ima surumorqa. 35Chayta rikojqa testigo jina imatachus rikusqanta willarqa, chay willasqantaj mana llullachu. Payqa maychus kajta parlan, qankuna chayta jap'ikunaykichejpaj. 36Chay karqa Diospa Qhelqachisqanpi nisqan junt'akunanpaj: Tullunmanta ni ujpis p'akisqachu kanqa,#Ex 12.46; Nm 9.12; Sal 34.20. nispa. 37Diospa Qhelqachisqanpi wajnejpi nillantaj: Pitachus lanzawan t'ojsisqankuta qhawanqanku,#Zac 12.10. nispa.

Jesuspa ayanta p'ampanku

(Mt 27.57-61; Mc 15.42-47; Lc 23.50-56)

38Chay tukuy ima qhepata, Arimatea llajtayoj José Jesuspa ayanta apakapunanpaj Pilatomanta mañakorqa. Joseqa judiokunaj kurajninkukunata manchachikusqanrayku pakayllamanta Jesusta qhatisqa. Chantá Pilatoqa Josejpa mañakusqanta uyarerqa, Josetaj Jesuspa ayanta apakaporqa. 39Nicodemopis jamullarqataj, pichus uj tuta jamuspa Jesusta watukusqa, chay. Payqa kinsa chunka kilo jina mirrata, aloetawan chajrusqata apamorqa. 40Paykunataj Jesuspa ayanta jap'iytawan, chay chajrusqa sumaj q'apashaj jawinawan churaykuspa, sabanawan mayt'uykorqanku, imaynatachus judiokuna ayata p'ampayta yachaj kanku, chay usuman jina. 41Chantá, maypichus Jesusta chakatarqanku, chaynejpi uj huerta karqa. Chaypitaj mosoj aya p'ampana karqa, chaymantaj mana pitapis p'ampasqankurajchu. 42Jinapi judiokuna Pascua raymita ruwanapaj wakichikuna p'unchay kasqanrayku, Jesuspa ayanta chay aya p'ampanaman churarqanku, imaraykuchus qayllallapi karqa.

Currently Selected:

Juan 19: DQDC

Highlight

Copy