Juan 20

Jesús kawsarimpun

(Mt 28.1-10; Mc 16.1-8; Lc 24.1-12)

1Semana qallariy p'unchay sut'iyashajtin, María Magdalena rerqa, Jesús maypichus p'ampasqa karqa, chayman. Jinapi aya p'ampana punkupi rumitaqa tanqarparisqata rikorqa. 2Chantá María usqhay usqhayta Simón Pedroman rerqa, Jesuspaj munasqa yachachisqanmanwan ima. Paykunatataj nerqa: Tukuyta Kamachej Jesuspa ayanta pikunachari apakapusqanku, manataj yachaykuchu maymanchus churasqankuta, nispa.

3Chayta uyarispa, Pedrowan, chay yachachisqawan ima aya p'ampanaman rerqanku. 4Iskayninku phawitalla rerqanku, chay uj yachachisqarí astawan phawaspa, Pedrota atiparqa, ñawpajtataj aya p'ampanaman chayarqa. 5Chantá k'umuykuspa, aya p'ampanata qhawaykorqa, jinaspataj sabanata suk'asqata rikorqa. Chaywanpis mana yaykorqachu. 6Qhepanta Simón Pedro chayaspataj, aya p'ampana ukhuman yaykuykorqa. Paypis sabanata chaypi churasqata rikullarqataj. 7Jesuspa uman qhatasqa karqa, chay pañotapis mana sabanawan khuskatachu rikorqa, aswanpis wajnejpi suk'asqata. 8Chaymanta pichus ñawpajta aya p'ampanaman chayasqa, chay yachachisqapis yaykullarqataj. Chantá sabanata, uma qhatanatawan rikuspa, Jesús kawsarimpusqanta creerqa. 9Chaykama paykunaqa Diospa Qhelqachisqanpi imatachus nisqanta manaraj entiendeyta aterqankuchu, Jesús wañusqamanta kawsarimpunan kasqanmanta. 10Chantá yachachisqakunaqa sapa ujninku wasinkuman kutiporqanku.

Jesusqa María Magdalenaman rikhurin

(Mc 16.9-11)

11Chaykama María Magdalena aya p'ampana qayllapi waqasharqa. Waqan waqan k'umuykuspataj, aya p'ampana ukhuta qhawaykorqa. 12Chantá yuraj p'achayoj iskay angelkunata tiyashajta rikorqa, maypichus Jesuspa ayan churasqa karqa, chaypi, ujninta sawnananpi, ujnintataj jayt'ananpi. 13Angelkunataj payta taporqanku: Warmisita, imaraykutaj waqashankiri? nispa.

Chantá María kuticherqa: Tukuyta Kamachej Jesusniypa ayanta apakapusqanku, manataj yachanichu maymanchus churasqankuta, nispa.

14Chayta niytawan María tijrarikuspa, Jesusta rikorqa. Chaywanpis Jesús kasqanta mana repararqachu. 15Jinapi Jesusqa payta taporqa: Warmisita, imaraykutaj waqashankiri? Pitataj mask'ashankiri? nispa.

Mariataj huertata qhawaj runa kasqanta yuyaspa, nerqa: Wiraqochi, qanchus ayata aparqanki chayqa, willaway maymanchus churasqaykita, apakapunaypaj, nispa.

16Chantá Jesús nerqa: María, nispa. Mariataj allinta qhawaspa, hebreo rimaypi nerqa: Raboni, nispa. Chayqa “Yachachej Wiraqochi” niyta munan.

17Jesustaj nerqa: Ama jap'iwaychu, imaraykuchus patapi kashaj Tatayman manaraj rinirajchu. Astawanqa wawqeykunaman nimuy: Pay nisunkichej: Tatayman, Tataykichejman, Diosniyman, Diosniykichejmantaj rishani, nispa.

18Jinapi María Magdalena rispa, Tukuyta Kamachej Jesusta rikusqanta yachachisqakunaman willarqa, jinallataj Jesús imatachus nisqantawan.

Jesús yachachisqankunaman rikhurin

(Mt 28.16-20; Mc 16.14-18; Lc 24.36-49)

19Chay kikin semana qallariy p'unchay ch'isiyaykuytaña, Jesuspa yachachisqankuna uj wasipi tantasqa kasharqanku. Judiokunaj kurajninkukunata manchachikusqankurayku wasej punkun sumaj wisq'asqa kasharqa. Jinapi Jesús rikhuriytawan, chawpinkupi sayarqa, paykunatataj napaykorqa: Diospa sonqo tiyaykuynin qankunawan kachun, nispa.

20Chayta niytawan, clavoj jusk'usqan makinta, lanzaj qhallasqan wallak'unta ima rikuchikorqa. Yachachisqankunataj Tukuyta Kamachej Jesusta rikuspa, mayta kusikorqanku. 21Chantá Jesús ujtawan paykunata nerqa: Diospa sonqo tiyaykuynin qankunawan kachun. Imaynatachus Tata Diosniy noqata kay pachaman kachamuwarqa, ajinallatataj qankunatapis kay pachapi tukuy runaman kachaykichej, nispa.

22Chayta niytawan, paykunaman phukuspa, nillarqataj: Santo Espirituta jap'iychej. 23Pikunaj juchankutachus pampachankichej, chaykunaj juchanku pampachasqa kanqa. Pikunajtatajchus mana pampachankichejchu, chaykunaj juchanku manallataj pampachasqachu kanqa, nispa.

Tomasqa Jesús kawsarimpusqanta mana creenchu

24Tomasqa chunka iskayniyoj yachachisqakunamanta ujnin kaj karqa. Payqa Dídimo sutiwan rejsisqallataj karqa. Paytaj mana chay waj yachachisqakunawanchu kashasqa, maypachachus Jesús paykunaman rikhurisqa, chaypacha. 25Chantá yachachisqakuna payta nerqanku: Tukuyta Kamachej Jesusta kawsashajta rikuyku, nispa.

Tomastajrí paykunata nerqa: Sichus makinpi clavoj jusk'usqanta mana rikusajchu chayqa, mana creesajchu. Manatajchus ruk'anayta clavoj jusk'usqanman sat'iykusaj, nillataj wallak'unpi lanzawan t'ojsisqaman makiyta churaykusaj chayqa, manapuni creesajchu, nispa.

26Pusaj p'unchayninman Jesuspa yachachisqankuna ujtawan wasipi tantakorqanku. Tomaspis paykunawan kasharqa. Wasej punkun sumaj wisq'asqa kashajtin, Jesús ujtawan chawpinkupi rikhurispa, paykunata napaykorqa: Diospa sonqo tiyaykuynin qankunawan kachun, nispa.

27Chantá Tomasta nerqa: Ruk'anaykita kayman churay, makiytataj qhawariy. Jinataj makiykita kay wallak'uyman churay. Amaña iskayrayaychu, manachayqa noqa kawsashasqayta creey, nispa.

28Tomastaj kuticherqa: Qanmin Kuraj Kamachejniy kanki, Diosniytaj, nispa.

29Jesustajrí payta nerqa: Tomás, kawsashajta rikuwasqaykiraykuchu noqapi atinikunki? Jinapis mana rikuwaspalla noqapi atinikojkunaqa kusisqamin kanqanku, nispa.

Imapajchus kay tukuy qhelqasqa karqa

30Yachachisqankunaj rikunanta Jesús waj ashkha t'ukuna imakunatawanraj ruwarqa. Chaykunataj kay p'anqapi mana qhelqasqachu kashan. 31Kaykunarí qhelqasqa kashan, qankuna creenaykichejpaj Jesusqa Diospa Churin Cristo kasqanta, ajinamanta paypa atiyninnejta wiñay kawsayniyoj kanaykichejpaj.

Currently Selected:

Juan 20: DQDC

Highlight

Copy