Juan 21

Jesús qanchis yachachisqankunaman rikhurin

1Chay qhepata, Tiberias qocha qayllapi Jesús ujtawan yachachisqankunaman rikhurerqa. Kay jina karqa: 2Chaynejpi Jesuspa kay yachachisqankuna tantasqa kasharqanku: Simón Pedro, Dídimo nisqa Tomás, Galileapi Caná llajtamanta Natanael, Zebedeoj iskaynin churinkuna, chantá iskay yachachisqakunapiwan ima. 3Jinapi Simón Pedro paykunata nerqa: Challwata jap'ej rishani, nispa. Paykunataj nerqanku: Noqaykupis qanwan risqayku, nispa.

Chantá rispa, uj boteman wicharerqanku. Chaywanpis chay tutantin mana uj challwallatapis jap'erqankuchu. 4Sut'iyashajtinña, Jesús qocha kantupi rikhurerqa. Yachachisqankunatajrí Jesús kasqanta mana repararqankuchu. 5Chantá Jesús paykunata nerqa: Kawsaqekuna, challwata jap'inkichejñachu? nispa. Paykunataj nerqanku: Mana, ni ujtapis jap'iykuchu, nispa.

6Jesús paykunata nillarqataj: Ch'ipata botej pañannejman choqaykuychej, chaypitaj jap'inkichej, nispa. Yachachisqankunataj ch'ipata choqaytawan, mana orqhoyta aterqankuchu may ashkha challwayoj kasqanrayku.

7Jinapi, pitachus Jesús munakorqa, chaymin Pedrota nerqa: Payqa Tukuyta Kamachej Jesús, nispa. Simón Pedrotaj Tukuyta Kamachej Jesús kasqanta nejta uyarispa, q'ara wasalla kashasqanrayku patanchana p'achanta churaykukorqa. Chantá usqhayta qocha kantuman chayananpaj yakuman phinkiykorqa. 8Wakin yachachisqakunataj botepi jamorqanku, ch'ipa junt'a challwata aysamuspa, imaraykuchus qocha kantuman pachaj metro jinallaña karqa.

9Chantá qocha kantuman chayaspa, paykuna t'antata rikorqanku, nina k'aja patapitaj uj challwa churasqata. 10Jesustaj paykunata nerqa: Kunan jap'isqaykichej challwakunamanta wakinta apamuychej, nispa. 11Chantá Simón Pedro boteman wicharispa, qocha kantuman ch'ipata orqhorqa, jatuchaj challwakunawan junt'ata. Chay ch'ipapi 153 challwakuna karqanku. Chay chhika challwawanpis ch'ipaqa mana llik'ikusqachu.

12Jinataj Jesús yachachisqankunata nerqa: Jamuychej, mikhurikuychej ari, nispa. Mana mayqenninkupis taporqankuchu: Pitaj kanki? nispa, imaraykuchus yachallarqanku Tukuyta Kamachej Jesuspuni kasqanta. 13Jesustaj paykunaman qayllaytawan, t'antata oqharispa jaywarqa, jinallataj challwatapis. 14Kaywanqa Jesús wañusqamanta kawsarimpuytawan yachachisqankunaman rikhurisqanqa kinsa kutiña karqa.

Jesusqa Simón Pedrowan parlan

15Mikhuyta tukusqankutawan, Jesusqa Simón Pedrota nerqa: Jonaspa churin Simón, kaykunamanta astawanchu munakuwanki? nispa. Pedrotaj kuticherqa: Arí, Tukuyta Kamachej, munakususqayta qan yachanki, nispa. Jesustaj nerqa: Ajina chayqa, corderoykunata michipuway, nispa.

16Chantá Jesús ujtawan Pedrota taporqa: Jonaspa churin Simón, munakuwankichu? nispa. Pedrotaj kuticherqa: Arí, Tukuyta Kamachej, munakususqayta qan yachanki, nispa. Jesús nillarqataj: Jina chayqa, ovejaykunata michipuway, nispa.

17Ujtawanpis Jesús tapullarqataj: Jonaspa churin Simón, munakuwankichu? nispa. Pedrotaj llakiywan oqharichikorqa, kinsa kutikama: Munakuwankichu? nispa Jesús nisqanmanta. Chantá kuticherqa: Tukuyta Kamachej Jesusníy, qan tukuy imata yachanki. Qanta munakususqaytapis yachallankitaj, nispa.

Jesustaj payta nerqa: Jina chayqa, ovejaykunata michipuway. 18Kayta sut'ita niyki: Waynallaraj kashaspaqa, qan chumpillikoj kanki, munasqaykiman jinataj purej kanki. Machuña kaspatajrí, makiykita oqharinki, wajtaj p'achaykita churasonqa, maymanchus mana munasqaykimantaj pusasonqa, nispa.

19Chayta Jesús nerqa, Pedro imaynata wañuspachus Diosta jatunchananmanta yachayta qonanpaj. Chayta niytawantaj, Jesús nillarqataj: Qhepayta jamuy, nispa.

20Jinapi Pedro qhepata qhawarispa, rikorqa Jesuspa munasqa yachachisqanta jamushajta. Payllataj cenapi Jesusman atiykukuspa, tapusqa: Tukuyta kamachej, pitaj jap'ichisonqari? nispa. 21Pedrotaj chay yachachisqata rikuspa, Jesusta nerqa: Tukuyta Kamachej Jesús, paywanrí, imataj kanqari? nispa.

22Jesustaj kuticherqa: Sichus kutimunaykama pay kawsananta munani chayqa, qanpata ima ruwanayki tiyan? Qanrí noqata qhatiwaypuni, nispa.

23Jesús ajinata nisqanrayku, Jesusta qhatejkuna aswan qhepaman paykunapura ninakorqanku chay yachachisqa mana wañunanta. Jesusrí mana nisqachu: Mana wañonqachu, nispaqa. Aswanpis nisqa: Sichus kutimunaykama pay kawsananta munani chayqa, qanpata ima ruwanayki tiyan? nispa.

24Jesuspa chay yachachisqanqa chay tukuyta willarqa, qhelqarqataj. Yachanchejtaj imatachus nisqanqa ajinapuni kasqanta.

25Jesuspa ruwasqanqa may chhikaraj tiyan. Chaykunachus ujmanta uj qhelqasqa kanman chayqa, yuyani tukuy kay pacha mana wakinmanchu chay qhelqasqa p'anqakunata churanapaj.

Currently Selected:

Juan 21: DQDC

Highlight

Copy