Lucas 16
16
Mana allin mayordomomanta rijch'anachina
1Jesús yachachisqankunata nillarqataj: Uj qhapaj patronpata mayordomon kasqa, paytataj ch'ataykusqanku patronninpa kapuyninta manakajpi tukuchisqanmanta. 2Chayrayku patronnin payta wajyaspa, nisqa: Imatataj qanmanta uyarishaniri? Mayordomo kasqaykimanta cuentata qoway, imaraykuchus manaña kapuyniymanta mayordomo kayta atinkichu, nispa.
3Jinapi mayordomoqa yuyaycharikuspa, sonqonpi nisqa: Imanasajtaj kunanri? Patronneyqa mayordomo ruwanayta qhechuwan. Llank'anaypajpis manaña kallpay kanchu, wajkuna yanaparinawankuta mañakuytapis p'enqakullanitaj. 4Chaywanpis patronniy wijch'uwajtin, imatachus ruwanayta yachaniña, kawsaqeykuna wajyarinawankupaj jina, nispa.
5Chantá mayordomoqa, pikunachus patronninman manu karqanku, chaykunata ujmanta uj wajyaspa, ñawpaj kajta tapusqa: Patronniyman mashkha manutaj kankiri? nispa. 6Paytaj kutichisqa: Pachaj p'uñu aceite manu kani, nispa. Mayordomotaj nisqa: Manu kasqaykimanta kay qhelqasqata jap'ikapuy. Chantá waj papelta qhelqay phishqa chunka p'uñu aceitellamantaña manu kasqaykimanta, nispa.
7Chantá mayordomoqa wajtañataj tapusqa: Qanrí, patronniyman mashkha manutaj kankiri? nispa. Paytaj nisqa: Pachaj tupu trigomanta manu kani, nispa. Paytaj kutichisqa: Manu kasqaykimanta kay qhelqasqata jap'ikapuspa, waj papelta qhelqay, pusaj chunka tupullamantaña manu kasqaykimanta, nispa. 8Chayta yachaspa, patronqa mana allin mayordomota jatunchasqa, yuyayniyoj kasqanmanta. Noqataj niykichej: Diosman mana kutirikoj runakunaqa imata ruwanapaj aswan yuyayniyoj kanku Diospa wawankunamanta nisqaqa. 9Chayrayku qankunapis kay pachapi kapuyniyoj kasqaykichejwan wajta yanapaspa kawsaqekunata mask'akuychej. Ajinamanta kapuyniykichej tukukojtin, wiñaypaj tiyakunapi kusiywan jap'eqasqa kankichej.
10Pichus pisi imawan maychus kajta ruwajqa ashkhawanpis maychus kajta ruwallanqataj. Pisiwan mana cheqanta ruwajrí manallataj ashkhawanpis cheqanta ruwanqachu. 11Jinallataj sichus kay pachapi kapuyniykichejwan mana allinta ruwankichej chayqa, pitaj aswan valorniyoj janaj pachaj qhapaj kayninta qosunkichejmanri? 12Sichus wajpa kapuyninwan mana allintachu ruwarqankichej chayqa, pitaj imatapis qosunkichejman qankunajta kananpaj?
13Mana pipis iskay patronkunaj kamachiyninpi ujllapi kayta atinchu, imaraykuchus ujninta chejnenqa, ujnintataj munakonqa. Chayrí ujnin patronman k'askakonqa, ujnintatajrí qhesachanqa. Ajinallataj qankunapis ujllapi qolqejta, Diospatawan mana wata runan kayta atiwajchejchu, nispa.
14Chantá fariseokunaqa chay tukuyta uyarispa, Jesusta asipayarqanku, qolqeta munapayasqankurayku. 15Chayrayku Jesús paykunatañataj nerqa: Qankuna runa masiykichejpa ñawpaqenpi cheqan runaman tukunkichej. Chaywanpis Dios sonqoykichejta sumajta rejsin. Ajinaqa imatachus runakuna maypaj qhawanku, chayta Dios millaypaj qhawan, nispa.
Diospa kamachiynin
16Jesús nillarqataj: Diospa ñawpa kamachisqankuna, Diosmanta sut'inchajkunaj nisqankuwan ima runata yuyaycharqanku Bautizaj Juan chayamunankama. Chaymantapacha Diospa kamachiyninmanta chay sumaj willay willakun, tukuytaj atisqankuta ruwanku kamachiyninman yaykunankupaj.
17Chaywanpis Diospa kamachisqanqa sayashallanpuni. Janajpis, kay pachapis chinkayta atinkuman. Diospa kamachisqanmantatajrí mana uj simillapis chinkayta atinmanchu, tukuynin junt'akonqapuni, nispa.
Jesús qhari warmi t'aqanakunamanta parlan
(Mt 19.1-12; Mc 10.1-12)
18Jesús nillarqataj: Pi qharillapis warminmanta t'aqakuspa, sichus waj warmiwan casarakun chayqa, pay khuchichakun. Ajinallataj pichus qosanmanta t'aqasqa warmiwan casarakojpis khuchichakullantaj, nispa.
Qhapaj runawan, wajcha Lazarowan
19Chantá Jesús nerqa: Uj qhapaj runa karqa. Payqa linomanta awasqa may sumaj puka p'achawan p'achallikoj, sapa p'unchaytaj jatun mikhuyta wayk'uchej. 20Uj wajcha runa Lázaro sutiyoj kallarqataj. Pay sarnalla karqa, jinataj qhapaj runaj wasi punkullanpi sirikoj. 21Payqa qhapaj runaj mikhunan puchusqanta mikhuyta munarqa. Alqokunapis qayllaykuspa, sarnanpa k'irisqanta llajwaraj kanku.
22Uj p'unchay chay wajcha runa wañuporqa, angelkunataj almanta pusarqanku, maypichus Abraham kashan, chayman. Qhapaj runapis wañupullarqataj, runakunataj payta p'ampamorqanku. 23Chaymanta qhapaj runaj almanqa, maymanchus wañusqakuna rinku, chay ñak'ariyman chayarqa. Chantá qhawarispa, karupi Abrahamta rikorqa, Abrahampa qayllanpitaj Lazarota tiyashajta. 24Chantá qhapaj runa qhaparerqa: Tata Abraham, khuyariway ari. Lazarota kacharimuway ruk'ana puntallantapis yakupi joq'ocharispa qalluyta thasnurinawanpaj, imaraykuchus kay nina lawraypi anchatapuni ñak'arishani, nispa.
25Abrahamtajrí kuticherqa: Yuyarikuy wawáy, qan kawsashaspa tukuy imayoj karqanki. Lazarorí mana walejpichu karqa. Kunanqa pay sonqochasqa kashan, qantaj ñak'arishanki. 26Chantapis uj ukhu laqha wayq'o t'aqashawanchej. Chayrayku kaymanta qankunaman riyta munajkunaqa mana atiykuchu, nitaj chaymanta noqaykuman chimpamuyta atillankichejtajchu, nispa.
27Chantá qhapaj runa mañakullarqataj: Tata Abraham, ama jinachu kay, tataypa wasillanmanpis Lazarota kacharinaykita mañarikuyki. 28Jaqaypi phishqa wawqeykunaman kay tukuymanta willarimpuwachun, ama paykuna kayman ñak'arej jamunankupaj, nispa. 29Abrahamtajrí kuticherqa: Chaypaj tiyan Moisespa qhelqasqan, chantá Diosmanta sut'inchajkunaj qhelqasqankupis. Chaytamin kasuchunku, nispa. 30Qhapaj runatajrí kuticherqa: Chayta mana uyarenqankuchu, Tata Abraham. Chaywanpis wañusqakunamanta uj rejtenqa, wawqeykuna juchankumanta Diosman kutirikunkuman, nispa. 31Abrahamtajrí nerqa: Manachus Moisespa qhelqasqanta, Diosmanta sut'inchajkunaj qhelqasqanta ima kasonqanku chayqa, manallataj wañusqakunamanta kawsarimojtapis kasonqankuchu, nispa.
Currently Selected:
Lucas 16: DQDC
Highlight
Share
Copy
Want to have your highlights saved across all your devices? Sign up or sign in
Revisión Biblia Quechua Boliviano © Sociedad Bíblica Boliviana, 2017.
