Lucas 17

Juchallichejkunamanta

(Mt 18.6-7,21-22; Mc 9.42)

1Uj kuti Jesusqa yachachisqankunata nerqa: Ashkha imakunanejta runaqa juchallinanpaj tanqasqa kayta atinman. Chaywanpis ay, imallachus kanqa, pichus wajkunata juchallichejqa. 2Sichus pillapis kay juch'uykunamanta ujninta juchallichinman chayqa, chay runa sinch'i jasut'isqapuni kanqa. Paypaj aswan allin kanman molino rumita kunkanman warkhuykuspa, mama qochaman choqaykunankoqa. 3Chayrayku qankuna kikiykichejta allinta qhawarikuychej.

Chantá wawqeyki qanpa contraykita mana allinta ruwaspa juchallikojtenqa, payta k'amiy. Mana walejta ruwasqanta reparakojtintaj, juchanta pampachay. 4Ichapis wawqeyki qanchis kutita uj p'unchaypi contraykita juchallinman. Jinapi sichus qanchis kutillataj qanman kutimunman: Qhespichiway, nispa chayqa, paypa juchanta pampachay, nispa.

Jesucristopi atinikunapuni

5Jesuspa kuraj kachankunaqa payta nerqanku: Yanapawayku qanpi astawan atinikunaykupaj, nispa.

6Tukuyta Kamachej Jesustaj kuticherqa: Noqapi atinikusqaykichejchus uj mostaza muju jinallapis kanman chayqa, kay sach'ata niyta atiwajchej: T'irakuspa, mama qochapi saphichakuy, nispa. Chay sach'ataj kasusunkichejman, nispa.

Kamachi imatachus ruwanan tiyan

7Jesús nillarqataj: Ujnin kamachiykichej campopi llank'asqanmanta, chayrí uywata qhawasqanmanta kutimojtin, payta niwajchejchu: Yaykumuy, mikhunaykipaj tiyaykukuy, nispa? 8Manachu astawanqa niwajchej: Mikhunata wayk'upuway. Chantá mikhunata, ujyanata ima jaywawanki noqa mikhunaypaj. Chaymantaraj qanqa mikhunki, ujyankitaj, nispa? 9Patrontaj manallataj kamachinta pachis ninchu nisqanta kasusqanmanta. 10Ajinallatataj qankunapis Diospa tukuy kamachisqanta ruwayta tukuytawankama, ninaykichej: Mana walej kamachichu kanchej, imaraykuchus ruwanallanchejta junt'anchej, nispa.

Jesusqa llejti onqoyniyojkunata qhaliyachin

11Jesusqa Jerusalenman rishaspa, Galilea jap'iy maypichus Samaria jap'iywan tinkun, chayninta pasarqa. 12Uj ranchoman qayllaykushajtintaj, llejti onqoyniyoj chunka runakuna payta taripaj llojsimorqanku. Paykunataj karullapi sayaspa, 13qhaparerqanku: Yachachej Wiraqochi Jesús, khuyariwayku ari, nispa.

14Paykunata rikuspa, Jesús nerqa: Riychej, sacerdotekunawan qhawachikamuychej qhaliyachisqa kasqaykichejta yachanankupaj, nispa. Paykunataj rishaspallaraj, chay llejti onqoymanta qhaliyachisqa rikhurerqanku.

15Jinallapi paykunamanta ujnin kaj qhaliyachisqa kasqanta reparakuspa, Jesusman kutirimorqa, Diosta maytapuni jatunchaspa. 16Jesuspa ñawpaqenman wijch'uykukuspataj, qhaliyachisqanmanta pachis nispa nerqa. Chay runataj Samariamanta karqa.

17Chantá Jesús taporqa: Manachu chunka runatapuni qhaliyacherqani? Maypitaj chay jisq'on kashankuri? 18Kay waj llajtayojllachu Diosta jatunchaj kutimun? nispa. 19Chaymantataj Jesús chay runata nerqa: Sayarispa, ripullay. Noqapi atinikusqaykirayku qhaliyachisqa kanki, nispa.

Imaynatachus Diospa kamachiynin chayamunan

(Mt 24.23-28,36-41)

20Uj kuti fariseokunaqa Jesusta taporqanku: Mayk'ajtaj Diospa kamachiynin chayamonqari? nispa. Jesustaj kuticherqa: Diospa kamachiynenqa mana tukuypa rikunantachu jamonqa. 21Nitaj runakuna nenqankuchu: Kaypi kashan, nispa, chayrí: Jaqaypi kashan, nispa. Manachayqa Dios qankuna ukhupi kamachishanña, nispa.

22Chantá Jesús yachachisqankunata nillarqataj: Uj p'unchay chayamonqa, chaypachataj qankuna Runaj Churinta uj p'unchayllatapis kamachishajta rikuyta munankichej, manataj rikunkichejchu. 23Chaypacha wakin runakuna nisonqachej: Runaj Churin kaypi kashan, nispa, chayrí: Jaqaypi kashan, nispa. Ajinata nejtinkupis, ama riychejchu, nitaj paykunata qhatiychejchu. 24Manachayqa imaynatachus lliuj lliujqa janajpa ujnin k'uchunmanta ujnin k'uchunkama k'ancharimun, ajinallataj kanqa Runaj Churinpa jamunan p'unchayqa. 25Chaywanpis ñawpajtaqa Runaj Churin anchataraj ñak'arinan kanqa, kay tiempopi kawsajkunataj payta qhesachanqanku.

26Imaynachus Noejpa tiemponpi karqa, ajinallataj kanqa Runaj Churinpa kutimunan p'unchaypis. 27Chaypacha runakuna mikhusharqanku, ujyasharqanku, casarakusharqanku, ususinkutapis casarachisharqanku, Noé jatun barcoman yaykunan p'unchaykama. Jatun para chayamuspataj, tukuyninkuta chinkacherqa.

28Jinallataj karqa Lotpa tiemponpipis. Chaypacha runakuna mikhusharqanku, ujyasharqanku, rantisharqanku, qhatusharqanku, tarpusharqanku, wasikunatapis ruwasharqanku 29Sodoma llajtamanta Lot llojsimunankama. Chaymantataj janajmanta azufreyoj nina para paramorqa, tukuyninkutataj tukucherqa. 30Ajinallataj kanqa Runaj Churinpa rikhurimunan chay p'unchaypi.

31Chaypacha, pichus wasi patapi kashajqa ama urayk'amuchunchu wasinmanta imallatapis orqhokapoj. Jinallataj, pichus chajrapi kashajpis nillataj wasinman kutimuchunchu. 32Lotpa warminmanta yuyarikuychej. 33Chaypacha pichus kawsayninmanta ch'ipakojqa chinkachenqa. Pichus noqarayku kawsayninmanta mana ch'ipakojrí wiñay kawsayman yaykonqa.

34Chayrayku niykichej: Chay ch'iseqa iskay ukhu uj puñunallapi kashajtinku, ujnin oqharisqa kanqa, ujnintaj saqerparisqa. 35Iskay warmikunapis khuska jak'ushajtinku, ujnin oqharisqa kanqa, ujnintaj saqerparisqa. 36Iskay qharikunapis chajrapi kashajtinku, ujnin oqharisqa kanqa, ujnintaj saqerparisqa, nispa.

37Chantá Jesuspa yachachisqankuna taporqanku: Tukuyta Kamachej Jesús, maypitaj chay tukuy kanqari? nispa. Paytaj kuticherqa: Maypichus aya tiyan, chayman suwintukuna tantakonqanku, nispa.

Currently Selected:

Lucas 17: DQDC

Highlight

Copy