Lucas 18

Warmisapamanta juezmantawan rijch'anachina

1Uj kuti Jesusqa uj rijch'anachinata willaspa, yachacherqa mana sayk'uspa Dioswan parlarikunapuni kasqanta. 2Paytaj nerqa: Uj llajtapi uj juez kasqa. Payqa Diosta mana manchachikojchu, nitaj pitapis kasuta ruwajchu. 3Chay llajtapi uj warmisapa kallasqataj. Payqa justiciata mañakuspa, juezpaman rillajpuni: Justiciata ruwaspa awqaypa makinmanta kacharichiway, nispa. 4Jueztajrí unayta chay warmita mana uyariyta munasqachu. Chaymantaña sonqonpi yuyaychakuspa, nisqa: Noqaqa Diosta mana manchachikunichu, nitaj pitapis kasuta ruwanichu. 5Kay warmisaparí, mana samarejta saqeshawanchu justiciata ruwapunayta mañawaspa. Chayrayku justiciata ruwasaj, amaña ajinata sapa kuti umayta nanachiwaj jamunanpaj, nispa.

6Chantá Tukuyta Kamachej Jesús nerqa: Chay mana allin juezpa ruwasqanmanta allinta yachakuychej. 7Diospa ajllakusqankuna tuta p'unchay paymanta justiciata mañakushajtinku, manachu paykunapaj justiciata ruwanqa? Payqa unaytarajchu suyachikonqa? Mana, icharí? 8Noqa niykichej: Mana suyachikuspa, Dios justiciata ruwanqapuni. Chaywanpis Diospa Churin kay pachaman kutimuspa, mashkha runatataj Diospi atinikushajta tarenqari? nispa.

Fariseomanta impuestota cobrajmantawan rijch'anachina

9Chaymanta Jesús waj rijch'anachinata nillarqataj, pikunachus allin runa kasqankuta yuyakuspa, wajkunata pisipaj qhawanku, chaykunamanta. Paytaj nerqa: 10Iskay runakuna Temploman Diosmanta mañakoj risqanku. Ujnin kasqa fariseo, ujnintaj impuestota cobraj. 11Jinapi fariseo kajqa sayarikuspa, kay jinata Dioswan parlarikusqa: Diosníy, pachis niyki, imaraykuchus mana wakinkuna jina suwachu, sajrachu, qhenchachu kani, nillataj kay impuesto cobraj jinachu. 12Noqaqa semanapi iskay kutita ayunani, tukuy kapuyniymantataj sapa chunkamanta ujta qoni, nispa.

13Impuesto cobraj runatajrí karullapi sayaspa, manchachikuywan mana patallamanpis qhawariyta munasqachu. Manachayqa qhasqonta takakuspa, nisqa: Diosníy, noqa juchasapata khuyarikuway ari, nispa. 14Noqataj niykichej: Chay impuesto cobraj runaqa juchan pampachasqa wasinman kutipusqa. Fariseoj juchanrí mana pampachasqachu karqa, imaraykuchus Diosqa jatunchakojkunata k'umuykuchenqa, k'umuykojtatajrí jatunchanqa, nispa.

Jesús wawakunata saminchan

(Mt 19.13-15; Mc 10.13-16)

15Uj kuti wakin runakuna Jesusman juch'uy wawakunata pusamorqanku, llankhaykuspa Diospa sutinpi saminchananpaj. Jesuspa yachachisqankunatajrí chayta rikuspa, wawa pusamojkunata k'amerqanku. 16Jesustajrí wawakunata wajyaspa, yachachisqankunaman nerqa: Wawakunata noqaman jamojta saqeychej, amataj jark'aychejchu, imaraykuchus kay wawakuna jina kajkunalla Diospa janaj pacha kamachiyninman yaykonqanku. 17Kayta sut'ita niykichej: Pichus mana wawa jina Diospa kamachiyninta jap'ikojqa mana jayk'aj chayman yaykonqachu, nispa.

Qhapaj runa

(Mt 19.16-30; Mc 10.17-31)

18Waj kutipi judío kurajkunamanta ujnin kaj Jesusta taporqa: K'acha Yachachej, imata ruwaspataj wiñay kawsayta tariymanri? nispa.

19Jesustaj nerqa: Imaraykutaj K'acha Yachachej niwankiri? Mana pipis k'achaqa kanchu, manachayqa Dioslla. 20Qan yachankiña Diospa kamachisqankunata: Ama khuchichakuspa qhenchachakunkichu, ama runa masiykita wañuchinkichu, ama suwakunkichu, ama runa masiykej contranta llullakuspa parlankichu. Chantá tataykita, mamaykitapis jatunpaj qhawanki,#Ex 20.12-16; Dt 5.16-20. nispa.

21Chay runataj nerqa: Chay tukuy imataqa wayna kasqaymantapacha junt'ani, nispa.

22Chayta uyarispa, Jesús payman nerqa: Jina chayqa, uj imatawanraj ruwanayki tiyan: Tukuy kapuyniykita vendespa, wajchakunaman chay qolqeta rak'iray. Ajinata ruwaspa, janaj pachapi tukuy imayoj kanki. Chaymantataj kutimuspa, yachachisqay kanaykipaj noqawan jamuy, nispa. 23Chayta uyarispa, runaqa mayta llakikorqa, may jina qhapaj kasqanrayku.

24Jesustaj chay runa llakikusqanta rikuspa, nerqa: Qhapajkunaqa may ñak'ayllata Diospa kamachiyninman yaykonqanku. 25Astawanqa camelloraj yarwej ninrinta yaykuyta atinman, Diospa kamachiyninman qhapaj runa yaykunanmantaqa, nispa.

26Chantá chayta uyarejkuna taporqanku: Jina kajtenqa, pitaj qhespichisqa kayta atinmanri? nispa. 27Jesustaj nerqa: Runapajqa chay mana atikunchu, Diostajrí tukuy imata ruwayta atin, nispa.

28Jinapi Pedro nerqa: Noqaykoqa qanwan purinaykupaj tukuy kapuyniykuta saqerparerqayku, nispa.

29Jesustaj kuticherqa: Kayta sut'ita niykichej: Sichus pipis wasinta, chayrí warminta, tatanta, mamanta, wawqenkunata, wawankunatapis Diospa kamachiyninrayku saqen chayqa, 30kunan kay kawsaypi aswan ashkhatapuni jap'enqa, jinataj jamoj p'unchaypi wiñay kawsayta jap'enqa, nispa.

Jesusqa wañunanmanta ujtawan willan

(Mt 20.17-19; Mc 10.32-34)

31Jesús chunka iskayniyoj kuraj kachankunata wajnejman pusaspa, paykunata nerqa: Kunanqa Jerusalenman rishanchej, chaypi Runaj Churinmanta imatachus Diosmanta ñawpa sut'inchajkunaj qhelqasqanku, chay tukuy junt'akunanpaj. 32Chaypi judío kajkuna mana judío kajkunawan payta jap'ichenqanku, chaymantataj payta asipayanqanku, p'enqayta k'umuykachachenqanku, thoqaykonqanku ima. 33Jasut'iytawantaj, payta wañuchenqanku. Chaywanpis kinsa p'unchayninman pay wañusqakunaj chawpinmanta kawsarimponqa, nispa.

34Jesuspa yachachisqankunarí imatachus nisqanta mana tumpallatapis entienderqankuchu, nitaj yacharqankuchu imamantachus parlashasqanta.

Jesusqa ñawsa runata qhawarichin

(Mt 20.29-34; Mc 10.46-52)

35Jericó llajtaman Jesús chayashajtin, uj ñawsa runa ñan patapi mañakuspa tiyakusharqa. 36Ashkha runata rishajta uyarispataj, ñawsa runaqa imachus chay ch'ajwa kasqanta tapukorqa. 37Willarqankutaj: Nazaretmanta Jesús kayninta jamushan, nispa. 38Chantá ñawsa runa qhapariyta qallarerqa: Jesús, Davidpa Churin, khuyarikuway ari, nispa.

39Ñawpajta rejkunatajrí payta k'amerqanku: Ch'in kay, nispa. Chaywanpis ñawsa runa aswan sinch'ita qhaparerqa: Davidpa Churin, khuyarikuway ari, nispa.

40Chantá Jesús sayaspa, ñawsa runata pusachimorqa, chayamojtintaj, taporqa: 41Imatataj ruwapusunayta munankiri? nispa. Paytaj kuticherqa: Wiraqochíy, qhawarichinawaykita munani, nispa.

42Jesustaj nerqa: Ñawiyki rikuchun, noqapi atinikusqaykirayku qhaliyachisqaña kanki, nispa. 43Jesús chayta nisqantawankama, ñawsa runa qhawarerqapacha. Chantá Diosta jatunchaspa, pay Jesuspa qhepanta rerqa. Tukuy runapis chayta rikuspa, Diosta jatunchallarqankutaj.

Currently Selected:

Lucas 18: DQDC

Highlight

Copy