Marcos 10
10
Qhari warmi mana t'aqanakunamanta
(Mt 19.1-12; Lc 16.18)
1Jesús Cafarnaunmanta riporqa Judea cheqaman, Jordán mayu chimpaman. Jinapi watejmanta ashkha runakuna Jesusman jamorqanku, Jesustaj paykunaman ujtawan Diosmanta yachachillarqataj, yachasqa kasqanman jina. 2Chaypacha wakin fariseokunaqa Jesusman chimpaykorqanku, payta pantachiyta munaspataj, taporqanku: Niwayku, qhareqa warminmanta t'aqakuyta atillanmanchu? nispa.
3Jesustajrí paykunaman kutichispa, tapullarqataj: Imatataj Moisés chaymanta kamacherqa? nispa.
4Paykunataj kuticherqanku: Moisés nerqa qhareqa t'aqanaku papelta warminman jaywananta, chaymantataj kachapunanta,#Dt 24.1-4; Mt 5.31. nispa.
5Jesustajrí paykunata nerqa: Moisés chayta kamachisorqachej qankuna rumi sonqo kasqaykichejrayku. 6Chaywanpis kay pachaj qallarikuyninpi Diosqa qharitawan, warmitawan ruwarqa.#Gn 1.27; 5.2. 7Chayrayku qhareqa tatanta, mamanta ima saqespa, warminwan khuskachakapun. 8Iskayninkutaj ujllaña kanku. Ajinapeqa manaña iskaychu kanku, manachayqa ujllaña.#Gn 2.24. 9Chayrayku Diospa ujchasqantaqa ama pipis t'aqachunchu, nispa.
10Chantá, Jesús wasipiña kashajtin, yachachisqankuna chayllamantataj Jesusta watej taporqanku. 11Jesustaj paykunata nerqa: Pi qharillapis warminmanta t'aqakuspa, sichus waj warmiwan casarakun chayqa, pay khuchichakun ñawpaj kaj warminpa contranpi. 12Ajinallatataj sichus warmipis qosanmanta t'aqakuspa waj qhariwan casarakun chayqa, paypis khuchichakullantaj, nispa.
Jesús wawakunata saminchan
(Mt 19.13-15; Lc 18.15-17)
13Uj p'unchay, wakin tata mamakuna wawankukunata Jesusman pusamorqanku, llankhaykuspa Diospa sutinpi saminchananpaj. Jesuspa yachachisqankunatajrí wawankuta pusamojkunata k'amerqanku. 14Jesús chayta rikuspa, yachachisqankunapaj phiñakorqa, nerqataj: Wawakunata noqaman jamojta saqeychej, amataj jark'aychejchu, imaraykuchus kay wawakuna jina kajkunalla Diospa kamachiyninman yaykonqanku. 15Kayta sut'ita niykichej: Pichus mana wawa jina Diospa kamachiyninta jap'ikojqa mana jayk'aj chayman yaykonqachu, nispa.
16Chantá Jesús wawakunata marq'ariykukorqa, umankuman makinta churaspataj, paykunata Diospa sutinpi samincharqa.
Qhapaj runaqa Jesuswan parlarikun
(Mt 19.16-30; Lc 18.18-30)
17Jesús Jerusalenman puririshajtinña, uj runa usqhayllata payman chimparqa. Jesuspa ñawpaqenman qonqoriykukuspataj, payta taporqa: K'acha Yachachej Wiraqochíy, imata ruwaspataj wiñay kawsayta tariymanri?#Lc 10.25. nispa.
18Jesustaj payta nerqa: Imaraykutaj K'acha Yachachej niwankiri? Mana pipis k'acha kanchu. Diosllamin k'acha. 19Chaywanpis tapuwasqaykiman kutichisqayki. Diospa kamachisqankunata qan yachanki: Ama runata wañuchinkichu, ama khuchichakuspa qhenchachakunkichu, ama suwakunkichu, ama pimantapis llullakuspa parlankichu, ama pitapis ch'awkiyankichu, chantá tataykita, mamaykitawan jatunpaj qhawanki,#Ex 20.12-16; Dt 5.16-20. nispa. 20Chay runataj Jesusman kuticherqa: Yachachej Wiraqochíy, chay tukuy imataqa wayna kasqaymantapacha junt'ani, nispa.
21Chantá Jesusqa may munakuywan payta qhawaspa, nerqa: Jina chayqa, kaytawanraj ruwanayki tiyan wiñay kawsayniyoj kanaykipaj. Tukuy kapuyniykita vendespa, wajchakunaman chay qolqeta rak'iray. Ajinamanta janaj pachapi tukuy imayoj kanki. Chaymantataj kutimuspa, yachachisqay kanaykipaj noqawan jamuy, nispa. 22Chayta uyarispa, chay runaqa phutisqa, llakisqataj riporqa, imaraykuchus may jina qhapaj karqa.
23Chantá Jesusqa muyuyninta qhawarispa, yachachisqankunata nerqa: Qhapajkunaqa ñak'ayllata Diospa kamachiyninman yaykonqanku,#Pr 11.28; Eclo 5.1. nispa.
24Jesuspa yachachisqankuna chay nisqanmanta t'ukorqanku. Chaywanpis Jesús watejmanta paykunata nerqa: Wawaykuna, manamin atikoj jinallachu Diospa kamachiyninman yaykunaqa. 25Astawanqa camelloraj yarwej ninrinta yaykuyta atinman, Diospa kamachiyninman qhapaj runa yaykunanmanta nisqaqa, nispa.
26Chayta uyarispa, Jesuspa yachachisqankuna astawanraj t'ukorqanku, paykunapurataj ninakusharqanku: Chay jina kajtenqa, pitaj qhespichisqa kayta atinmanri? nispa. 27Jesustajrí paykunata qhawarispa, nerqa: Runapajqa chay mana atikunchu. Diospajrí atikun, imaraykuchus Dios tukuy imata ruwayta atin,#Gn 18.14; Job 42.1-2; Zac 8.6. nispa.
28Jinapi Pedro parlayta qallarerqa: Noqaykoqa qanwan purinaykupaj tukuy tiyapuwasqaykuta saqerpariyku, nispa.
29Jesustaj kuticherqa: Kayta sut'ita niykichej: Wakinkunaqa noqarayku, sumaj willayraykutaj wasinkuta saqerparinku, wawqenkukunata, panankukunata, tatankuta, mamankuta, wawankukunata, jallp'ankukunata ima. 30Paykunataj pachaj jinatawanraj kay pachapi wasikunata jap'enqanku, wawqekunata, panakunata, mamakunata, wawakunata, jallp'akunata ima. Jinallataj may ñak'arichisqa, chantá qhatiykachasqa ima kallanqankutaj. Jamoj p'unchaypitajrí wiñay kawsayta jap'enqanku. 31Chaywanpis pikunachus kunan jatunpaj qhawasqa kanku, chaykunaqa qhepaman pisipaj qhawasqa kanqanku. Pikunachus kunan pisipaj qhawasqa kajkunarí, chay p'unchaypi jatunpaj qhawasqa kanqanku,#Mt 20.16; Lc 13.30. nispa.
Jesús wañunanmanta ujtawan sut'inchan
(Mt 20.17-19; Lc 18.31-34)
32Jerusalén llajtaman rishajtinku, Jesús yachachisqankunaj ñawpaqenkuta risharqa. Paykunataj t'ukuspa, mancharisqataj qhepanta risharqanku. Chantá Jesús chunka iskayniyoj yachachisqankunata wajnejman wajyaspa, ujtawan imachus payta qhatirinanmanta willayta qallarerqa. 33Pay nerqa: Kunanqa Jerusalén llajtaman rishanchej, chaypitaj Runaj Churinta kuraj sacerdotekunaj makinkuman jaywaykonqanku, Diospa kamachisqanmanta yachachejkunaman ima. Paykunataj payta wañuchinankupaj juchachanqanku, jinaspataj, mana judío kajkunaj makinkuman jaywaykonqanku. 34Chantá paymanta alqochakonqanku, thoqaykonqanku, jasut'enqanku, jinataj payta wañuchenqanku. Chaywanpis kinsa p'unchayninman pay wañusqamanta kawsarimponqa, nispa.
Santiagowan Juanwan ujta mañakunku
(Mt 20.20-28)
35Chaypacha Zebedeoj churinkuna Santiago, Juanwan ima Jesusman qayllaykuspa, nerqanku: Yachachejniyku, mañakusqaykuta qonawaykuta munaykuman, nispa.
36Paytaj paykunata taporqa: Imatataj qankunarayku ruwanayta munankichejri? nispa. 37Paykunataj kuticherqanku: Kamachinayki tiyanapi may jatunchasqa kamachishajtiyki, qanwan khuska tiyachinawaykuta munaykuman, ujniykuta pañaykipi, ujniykutataj lloq'eykipi, nispa.
38Chantá Jesús paykunata nerqa: Qankuna imatachus mañakusqaykichejta mana yachankichejchu. Noqa imaynatachus ñak'arisaj, ajinata ñak'ariyta atiwajchejchu? Noqa imaynatachus wañusaj, ajinata wañuyta atiwajchejchu? nispa. 39Paykunataj kuticherqanku: Arí, atisqayku, nispa.
Chantá Jesús paykunata nillarqataj: Arí, cheqatapuni qankunaqa noqa jina ñak'arinkichej, wañunkichej ima. 40Chaywanpis pañaypi, lloq'eypitaj qankunata tiyachinayqa mana noqamantachu. Chaytaqa Dioslla wakichin, pikunatachus pay ajllarqa, chaykunapaj, nispa.
41Jinallapi chunka yachachisqankuna chayta uyarispa, Santiagopaj, Juanpajwan phiñakorqanku. 42Jesustajrí tukuynin yachachisqankunata tantaspa, nerqa: Yachankichej jina, llajtakunata kamachejkunaqa atiyniyoj kasqankuta rikuchispa, munayninkuman jina runakunata apaykachanku. Ajinallatataj kurajkunapis atiyninkuwan, munajta mana munajta runankukunata kamachillankupuni. 43Qankuna ukhupirí mana jinachu kanan tiyan. Manachayqa, pichus qankunamanta kurajpaj qhawasqa kayta munajqa kamachiykichej jina kanan tiyan. 44Pitajchus qankuna ukhupi ñawpaj kaj kayta munajqa tukuyniykichejpa wata runan kanan tiyan.
45Chayqa ajina, imaraykuchus noqa Runaj Churinpis mana sirvichikunaypajchu jamorqani. Aswanpis wajkunaj kamachin jina kanaypaj jamorqani, kawsayniytataj qoj, ashkha runakuna qhespichisqa kanankupaj, nispa.
Jesusqa ñawsa Bartimeota qhawarichin
(Mt 20.29-34; Lc 18.35-43)
46Chantá Jesús yachachisqankunawan khuska Jericó llajtaman chayarqanku, chaymanta llojsishajtinkutaj, ashkha runakuna paykunata qhaterqanku. Chay ñan kantullapitaj uj runa, Timeoj churin, ñawsa Bartimeo mañakuspa tiyasharqa. 47Jinapi Bartimeoqa Nazaretmanta Jesús jamushasqanta uyarispa, qhapariyta qallarerqa: Jesús, Davidpa Churin, khuyarikuway ari, nispa.
48Chaypi kajkunamanta ashkha ch'inyachiyta munaspa, payta k'amerqanku. Paytajrí aswan sinch'ita qhaparerqa: Jesús, Davidpa Churin, khuyarikuway ari, nispa.
49Chantá Jesús payta uyarispa, sayarqa, nerqataj: Payta wajyamuychej, nispa. Runakunataj ñawsata nerqanku: Kusirikuy, sayariy. Jesús wajyashasunki, nispa.
50Jinapi Bartimeoqa qhatananta wijch'uspa, ujta sayariytawan Jesusman chimparqa. 51Jesustaj nerqa: Imatataj qanrayku ruwanayta munankiri? nispa. Ñawsa runataj Jesusta nerqa: Yachachej Wiraqochíy, qhawarichinawaykita munani, nispa.
52Chantá Jesusqa payta nerqa: Ripullay, noqapi atinikusqaykirayku qhaliyasqaña kanki, nispa. Nisqantawankamataj, ñawsa runaqa qhawarerqa. Chantá Jesuswan khuska rerqa.
Currently Selected:
Marcos 10: DQDC
Highlight
Share
Copy
Want to have your highlights saved across all your devices? Sign up or sign in
Revisión Biblia Quechua Boliviano © Sociedad Bíblica Boliviana, 2017.
