Marcos 11
11
Jesús Jerusalén llajtaman yaykun
(Mt 21.1-11; Lc 19.28-40; Jn 12.12-19)
1Jesuswan, yachachisqankunawan ima Jerusalén llajtaman qayllashaspa, Betfagué, Betania llajtaman ima chayarqanku, Olivos sutiyoj orqo chimpanejman. Chaymantataj Jesusqa iskay yachachisqankunata kachaspa, nerqa: 2Jaqay chimpa ranchoman riychej, chayman yaykuspataj, maltón burrota watasqata tarinkichej. Chay burromanqa manaraj pipis lloq'anchu. Qankunataj phaskaraspa, kayman aysamuychej. 3Sichus pipis tapusunkichej: Imapajtaj chay burrota phaskarashankichej? nispa, chayqa, qankuna kutichiychej: Wiraqochiyku Jesús kay burrota munan, chaymantataj kutichimpusonqapacha, nispa.
4Chantá chay iskay yachachisqakunaqa ranchoman rispa, maltón burrota ñan patapi tarerqanku wasi punkupi watasqata, chantá phaskararqanku. 5Chaypi kajkunamantarí wakin taporqanku: Imapajtaj chay burrota phaskarashankichej? nispa. 6Yachachisqakunataj Jesuspa kamachisqanman jina kuticherqanku, chay runakunataj apajta saqellarqanku. 7Jinapi burrota Jesusman aysaytawan qhatanankuwan caronaykorqanku. Chantá Jesús burroman lloq'aykorqa Jerusalenman yaykunanpaj.
8Ashkha runa qhatananku p'achakunata ñanman mast'ararqanku Jesuspa ñawpaqenman. Wajkunataj sach'akunamanta thansata k'uturaspa, mast'allata ñanman churallarqankutaj. 9Jinaspataj, Jesuspa ñawpaqenta rejkuna, qhepanta jamojkuna ima qhaparerqanku:
Diosta jatunchaychej ari.
Tukuyta Kamachej Diospa sutinpi jamojta jatunchaychej.#Sal 118.25-26.
10Dios saminchachun ñawpa tatanchej Davidpa jamoj kamachiyninta.
Janaj pachapipis qhespichej Dios jatunchasqa kachun, nispa.
11Chantá Jesús Jerusalenman chayaspa, Temploj pationman yaykorqa. Muyuyninpi tukuy imata qhawaspataj, chunka iskayniyoj yachachisqankunawan Betaniaman kutirerqa, imaraykuchus inti yaykusharqaña.
Jesús higo sach'ata maldicin
(Mt 21.18-19)
12Q'ayantin Betaniamanta llojsimushajtinku, Jesús yarqhachikorqa. 13Karumantataj uj higo sach'ata rikorqa q'omer laqheyojta. Poqoyta tariyta munaspataj, higo sach'aman qayllaykorqa. Chaywanpis mana poqoyta tarerqachu, manachayqa laqhellata, imaraykuchus manaraj higo poqona tiempochu karqa. 14Chantá Jesús higo sach'ata nerqa: Qanmantaqa amaña pipis poqoyta mikhuchunchu, nispa. Yachachisqankunataj chay nisqanta uyarerqanku.
Jesús qhatojkunata Templomanta qharqon
(Mt 21.12-17; Lc 19.45-48; Jn 2.13-22)
15Chaymantaqa Jerusalenman chayamorqanku. Chantá Jesús Temploj pationman yaykuspa rantejkunata, vendejkunatawan ima jawaman qharqoyta qallarerqa. Qolqe chhalajkunaj mesankunata tijrararqa, jinallataj urpikunata qhatojkunaj tiyanankutapis. 16Manataj pitapis Temploj pationnejta imallatapis apaykachajta saqerqachu. 17Chantá Jesusqa runakunaman yachacherqa: Manachu Diospa Qhelqachisqanpi nin: Waseyqa noqawan parlarikuna wasimin,#Is 56.7. nispa? Chaywanpis qankunaqa suwa thapaman tukuchisqankichej, nispa.
18Chantá kuraj sacerdotekuna, Diospa kamachisqanmanta yachachejkuna ima Jesús imatachus ruwasqanmanta uyarispa, imaynamantapis payta wañuchinankuta mask'arqanku. Chaywanpis Jesusta manchachikorqanku, imaraykuchus tukuy runakuna yachachisqanta uyarispa, t'ukoj kanku.
19Ch'isiyaykuytataj Jesús, yachachisqankunawan ima Jerusalén llajtamanta llojserqanku.
Maldicisqa sach'a ch'akipun
(Mt 21.20-22)
20Q'ayantenqa tutamanta Jesuswan, yachachisqankunawan ima ñanta rishaspa, chay maldicisqa higo sach'ata saphinmantapacha ch'akipusqanta rikorqanku. 21Pedrotaj Jesuspa nisqanta yuyarikuspa, nerqa: Yachachej Wiraqochíy, qhawariy, maldicisqayki higo sach'a ch'akipusqa, nispa.
22Chantá Jesús kuticherqa: Diospi tukuy sonqo atinikuychej. 23Kayta sut'ita niykichej: Sichus pipis kay orqota ninman: Jatariy, mama qochaman wijch'uykukuy, nispa, sonqonpitaj mana iskayrayaspa Diospi atinikun chayqa, paypa nisqan ruwasqa kanqa. 24Chayrayku noqa niykichej: Diosmanta imatapis mañakuspaqa, jap'inaykichejtapuni creeychej, jap'inkichejtaj.#Jn 14.13-14; 15.7. 25Chaywanpis Diosmanta mañakushaspa, sichus pillawanpis phiñanasqa kawajchej chayqa, contraykipi juchallisqanta ñawpajta pampachaychej. Ajinamanta, janaj pachapi kaj Tataykichejpis contranpi juchallisqaykichejta pampachallanqataj.#Mt 6.14-15; Eclo 28.2-5. 26Manachus qankuna runa masiykichej contraykichejta juchallisqankuta pampachawajchej chayqa, nillataj janaj pachapi kaj Tataykichejpis contranpi juchallisqaykichejta pampachanqachu, nispa.
Jesusta atiyninmanta tapunku
(Mt 21.23-27; Lc 20.1-8)
27Chantá Jesuswan, yachachisqankunawan ima Jerusalenman kutirerqanku. Chaypeqa Jesús Temploj pationpi purishajtin, kuraj sacerdotekuna, Diospa kamachisqanmanta yachachejkuna, kurajkuna ima payman chimpamorqanku. 28Paykunataj Jesusta taporqanku: Ima atiywantaj kay tukuy imata ruwankiri? Pitaj atiyta qosorqa kayta ruwanaykipajri? nispa.
29Jesustaj paykunaman kuticherqa: Noqapis ujta tapullasqaykichejtaj. Sichus chayman kutichiwankichej chayqa, noqapis willallasqaykichejtaj ima atiywanchus kay imakunata ruwasqayta. 30Niwaychej: Pitaj Juanman bautizananpaj atiyta qorqa: Janaj pachapi kaj Dioschu, chayrí runallachu? nispa.
31Chantá paykunapura ninakorqanku: Janaj pachapi kaj Dios atiyta qorqa nisun chayqa, pay niwasun: Imaraykutaj chantá mana paypa nisqanta jap'ikorqankichejchuri? nispa. 32Manallataj nisunmanchu runakunalla Juanman atiyta qorqanku, nispa. Paykuna mana chayta niyta munarqankuchu, imaraykuchus runakunata manchachikorqanku. Tukuy runataj yuyaj kanku Juan Diosmanta sut'inchajpuni kasqanta. 33Chayrayku Jesusman kuticherqanku: Mana yachaykuchu, nispa.
Chaymantataj Jesús paykunata nerqa: Noqapis manallataj nisqaykichejchu pichus atiyta qowasqanta kay imakunata ruwanaypaj, nispa.
Currently Selected:
Marcos 11: DQDC
Highlight
Share
Copy
Want to have your highlights saved across all your devices? Sign up or sign in
Revisión Biblia Quechua Boliviano © Sociedad Bíblica Boliviana, 2017.
