Lucas 12

Puraj uya fariseokuna

(Mt 10.26-27)

1Waranqa waranqa runakuna Jesusman tantakamorqanku, anchata k'iskikamuspataj, sarunakusharqanku. Jesustaj ñawpajta yachachisqankunata nerqa: Sumajta qhawakuychej fariseokunaj levadurankumanta. Chay niyta munan puraj uya kayninkumanta. 2Tukuy pakasqa kajpis jinallataj mana sut'inchasqa kajpis sut'inchakonqapuni. 3Chayrayku, imatachus laqhapi nisqaykichejqa sut'i p'unchaypi uyarikonqa. Imatachus wasi ukhupi chhichiykusqaykichejpis wasi patamantapacha qhaparikonqa tukuy uyarinankupaj.

Pitataj manchachikunari?

(Mt 10.28-31)

4Munasqa kawsaqeykuna, qankunaman niykichej: Ama manchachikuychejchu qankunata wañuchejkunata, imaraykuchus chaymanta astawanqa manaña imatapis ruwayta atisunkichejchu. 5Noqarí pitachus manchachikunaykichejta nisqaykichej: Pichus runata wañuchiytawankama, atiyniyoj kashan nina lawrayman wijch'unanpaj, paytamin manchachikuychej.

6Manachu runakuna phishqa p'isqokunata iskay phatallapi vendenku? Chaywanpis, Dios ni ujninkumantapis qonqanchu. 7Ajinallataj Diospis qankunamanta mana qonqanchu. Umaykichejpi chujchaykichej mashkhachus kasqankuta yachallantaj. Chayrayku ama manchachikuychejchu, imaraykuchus qankuna aswan valorniyoj kankichej ashkha p'isqokunamanta nisqaqa, nispa.

Mana manchachikuspa Jesusmanta willana

(Mt 10.32-33; 12.32; 10.19-20)

8Jesús nillarqataj: Noqaqa niykichej: Sichus pipis runaj ñawpaqenpi yachachisqay kasqanta rimarenqa chayqa, noqa Runaj Churinpis Diospa angelninkunaj ñawpaqenpi nillasajtaj: Payqa noqajtamin, nispa. 9Runakunaj ñawpaqenpichus pipis mana rejsiwaj tukonqa chayqa, noqapis payta Diospa angelninkunaj ñawpaqenpi mana rejsisqayta nisaj.#Mc 8.38; Lc 9.26; 2 Ti 2.12.

10Sichus pipis Runaj Churinpa contranta millayta riman chayqa, Dios chay juchata pampachayta atin. Sichus pipis Santo Espíritoj contranta millayta riman chayrí, Diosqa chay juchanta manapuni pampachanqachu.

11Runakuna tantakuna wasipi, juezkunaman, kurajkunaman ima apachisojtiykichej, ama phutikunkichejchu imaynatachus kutichikunaykichejmanta, chayrí, imatachus ninaykichejmanta. 12Chaypacha Santo Espiritumin imatachus parlanaykichejta yachachisonqachej, nispa.

Wampu qhapaj runamanta rijch'anachina

13Jinapi runakuna ukhumanta ujnin nerqa: Yachachej Wiraqochíy, wawqeyman niripuway chayaqeykuta rak'inawanta, nispa.

14Jesustaj kuticherqa: Wawqéy, pitaj noqata juezpaj churawarqa, chayrí chayaqeta rak'ejta jinari? nispa.

15Chantá nillarqataj: Qankunaqa tukuy imata astawan astawan munanamanta sumajta qhawakuychej. Mana yuyanachu qhapaj kayqa allin kawsayman runata apasqanta, nispa.

16Chaypacha Jesús uj rijch'anachinata willarqa: Uj qhapaj runa kasqa, chajrantaj ashkhata poqosqa. 17Jinapi chay runa sonqonpi nisqa: Imanasajtajri? Manaña maymanpis poqoy oqharisqayta waqaychayta atinichu, nispa. 18Chantá nillasqataj: Kayta ruwasaj. Pirwaykunata phaskaspa, aswan jatuchajta ruwasaj, chaypitaj chajra poqochisqayta, tukuy kapuyniytawan waqaychasaj. 19Chantá sonqoypi nisaj: Kunanqa kapuwasqan ashkhaña, sumaj jallch'asqataj unaypaj. Chayrayku kunanqa chhika patapi kawsakuspa mikhusaj, ujyasaj, kusikusajtaj, nispa.

20Diostajrí payta nisqa: Wampu runa, kunan ch'isipacha wañunki. Jinaqa pipajtaj kanqa chay tukuy ima tantasqaykiri? nispa. 21Ajinallataj kanqa, pichus payllapaj kay pachapi tukuy imata tantaspa, Diospa ñawpaqenpi mana imayoj rikhurin, chay runapaj,#Sal 39.6,7; 49.10,11; Jer 17.11. nispa.

Diosqa wawankunata qhawarin

(Mt 6.25-34)

22Chantá Jesús yachachisqankunata nerqa: Chayrayku niykichej: Kawsanaykichejpaj imatachus mikhunaykichejmanta ama phutikuychejchu, nitaj imawanchus p'achallikunaykichejmantapis. 23Kawsashaspa imaynatachus purinanchejta aswanpaj qhawananchej tiyan, imatachus mikhunanchejmanta, imawanchus p'achallikunanchejmanta nisqaqa. 24Qhawariychej: P'isqokunaqa mana tarpunkuchu nitaj ruthunkuchu, nillataj mikhuna jallch'ananku kanchu, nitaj pirwankupis. Chaywanpis Dios paykunata mikhuchin. Manachu qankuna aswan valorniyoj kankichej chay p'isqokunamanta nisqaqa? 25Mayqentaj qankunamanta anchata phutikuspa, khuskan metrota jina sayayninman yapaykukunmanri? 26Sichus chayllatapis mana ruwayta atinkichejchu chayqa, imaraykutaj phutikunkichej waj imamantari?

27Jinallataj qhawariychej imaynatachus t'ikakuna campopi wiñasqankuta. Chaykuna mana llank'ankuchu nitaj phushkankuchu. Chaywanpis ñawpa kuraj kamachej Salomón may qhapaj kashaspapis, manapuni ujnin t'ika jinallapis p'achallikorqachu. 28Sichus Dios chay jinata campo qhorata p'achallichin, mayqenchus kunan wiñan q'ayataj ninapi ruphachisqa kanqa chayqa, qankunamanpis astawan sumajta p'achallichisonqachej. Jina kajtenqa, imaraykutaj paypi mana atinikunkichejchuri?

29Chayrayku ama llakikuychejchu imatachus mikhunaykichejmanta, chayrí ujyanaykichejmantapis. Amallataj chay imakunarayku phutikuychejchu. 30Diosman mana kutirikojkuna chay tukuy imata astawan mask'anku. Tataykichejrí yachanña imatachus pisichikusqaykichejta. 31Aswanpis, qankuna Diospa kamachiyninpi sonqoykichejta churaychej, jinapitaj Dios chay waj imakunata yapata jina qosonqachej.

Janaj pachapi qhapaj kanapaj

(Mt 6.19-21)

32Qankuna pisi t'aqa oveja jinalla kaspapis, ama manchachikuychejchu, imaraykuchus Tataykichej kamachishaspa, mayta munan paywan khuska kamachinaykichejta.

33Chayrayku kapuyniykichejta vendeychej, chay qolqeta pisichikojkunaman rak'inaykichejpaj. Ajinamanta mana thantakoj wayaqata ruwakunkichej, kapuyniykichejtataj janaj pachapi waqaychankichej. Chaypeqa kapuyniykichej mana tukukonqachu, manataj suwapis yaykonqachu, nitaj thutapis k'utonqachu. 34Chayta ruwaychej, imaraykuchus maypichá kapuyniykichej kashan, chayllapitaj sonqoykichejpis kanqa.

Jesús kutimunanpaj wakichisqa kanamanta rijch'anachina

35Chumpiykichej mat'isqa kachun, lamparaykichejpis jap'ichisqa. 36Qankunaqa casarakuymanta patronninkuta suyaj kamachikuna jina kaychej. Paykuna suyanku, patronninku chayamuspa wajyajtinkama, punkuta kicharinankupaj. 37Kusikuyniyojmin kanqanku chay kamachikuna, pikunatachus patronninku chayamuspa, rijch'arisqata taripanqa, chaykuna. Sut'ita niykichej: Kikin patronninku paykunata tiyaykuchispa, mikhunata jaywanqa. 38Jinapeqa patrón chawpi tutatapis jamuchun, chayrí sut'iyayllatañapis. Paykunatachus rijch'ashajta taripanqa chayqa, chay kamachikuna kusikuyniyojmin kanqanku.

39Kaytawan allinta yachaychej: Sichus wasiyoj ima phanitachus suwa jamunanta yachanman chayqa, mana puñuspa suyaykunman, manataj suwachikunmanchu. 40Ajinallatataj qankunapis wakichisqa kanaykichej tiyan, imaraykuchus mana suyashajtillaykichej Diospa Churin ujtawan jamonqa, nispa.#Mt 24.43-44; 1 Ts 5.2; 2 P 3.10; Ap 3.3; 16.15. Ajinata Jesús yachachisqankunaman yachacherqa.

Mana allinta ruwaj mayordomomanta rijch'anachina

(Mt 24.45-51)

41Chantá Pedro taporqa: Tukuyta Kamachej Jesús, chay rijch'anachinaqa noqallaykupajchu karqa, chayrí tukuypajchu? nispa.

42Tukuyta Kamachej Jesustaj kuticherqa: Chay karqa allin yuyayniyoj mayordomo jina kajpaj. Paytaqa patronnin churan wasi qhawajta, maychus tiemponpi kamachin masinkunaman mikhuchinanpaj. 43Chay mayordomo kusikuyniyojmin kanqa, sichus patronnin ajinata ruwashajta taripanqa chayqa. 44Sut'ita niykichej: Chay jina mayordomotaqa patronnin tukuy kapuyninta qhawananpaj churanqa, nispa.

45Chaywanpis ichapis chay mayordomo sonqonpi ninman: Patronneyqa manaraj chayamonqachu, nispa. Chantá kamachi masinkunata maqayta qallarinman, jinallatataj warmi kamachikunatapis. Chantá mikhunman, ujyanmantaj machanankama. 46Jinallapi patronnin kutimonqa mayordomoj mana suyasqan p'unchaypi, nitaj yachasqan phanipi. Chayamuspataj, payta sinch'ita jasut'iytawan, mana kasojkunawan khuska kananpaj qharqonqa.

47Ima kamachipis patronninpa munayninta yachashaspa, sichus mana wakichinkuchu, nitaj patronninpa munayninta ruwanchu, chayqa, pay manchay jasut'isqa kanqa. 48Pichus mana yachaspalla juchachakun chayrí, mana chhika jasut'isqachu kanqa. Pimanchus ashkhata jaywasqamantaqa ashkhallataj mañasqa kanqa. Pimanchus ashkhata qonku qhawananpaj, paymantapis ashkhallatataj mañanqanku, nispa.

Jesusrayku t'aqanaku

(Mt 10.34-36)

49Chantá Jesús nillarqataj: Noqaqa kay pachapi ninata jap'iykuchej jamuni. Jinataj mayta munayman lawrashanantaña. 50Ñak'arinayqa may sinch'i kanqa, noqataj manchayta phutikushani junt'akunankama. 51Qankuna yuyankichejchu kay pachaman allin kawsayta apamoj jamusqayta? Mana. Astawanpis runakunata t'aqanachej jamuni. 52Kunanmanta ñawpajmanqa, uj wasipi phishqa tiyakojkuna t'aqanakonqanku: Kinsaqa iskaypa contranpi kanqanku, iskaytaj chay kinsaj contran. 53Tataqa churinpa contranpi kanqa, churintaj tatanpa contran. Mamaqa ususinpa contranpi kanqa, ususintaj mamanpa contran. Suegrapis ñojch'anpa contrallanpitaj kanqa, ñojch'apis suegranpa contrallantaj, nispa.#Miq 7.6.

Tiempo kashajtin, Dioswan allinyakapuna

(Mt 16.1-4; Mc 8.11-13)

54Jesús tantasqa runakunaman nillarqataj: Qankuna inti yaykuynejpi phuyuta oqharikojta rikuspa, ninkichej: Paranqa, nispa, parantaj. 55Uranejmanta wayramojtintaj, ninkichej: Ruphamonqa, nispa, ruphantaj. 56Puraj uya kankichej. Qankuna sumajta rejsinkichej janajpa rijch'ayninta, kay pachajtapis, icharí? Chaywanpis mana reparayta atinkichejchu Dios imatachus kunan tiempo ruwashasqanta.

57Imaraykutaj mana qankuna kikiykichej reparankichejchu imachus cheqan kasqantari? 58Piwanpis quejapi kaspaqa, corregidorpaman rej jina ñanllapiraj paywan allinyakapuy. Manachayqa juezpaman apasunkiman, paytaj carcelta qhawajwan jap'ichisuspa, wisq'aykuchisunkiman. 59Noqataj niyki: Chaymanta mana llojsimunkichu tukuy manuykita paganaykikama, nispa.

Currently Selected:

Lucas 12: DQPC

Highlight

Copy