Lucas 13
13
Diosman kutirikuna
1Chaypachallataj wakin runakuna Jesusman qayllaykuspa, willarqanku imaynatachus Galilea llajtayoj runakuna, Templopi Diosman q'olachispa jaywashajtinku, Pilatoqa wakinta wañuchichisqanta. 2Jesustajrí kuticherqa: Yuyankichejchu chaykuna ajina wañuchisqa kasqankuta, tukuy Galilea llajtayojkunamanta nisqaqa aswan juchasapa kasqankurayku? 3Manapuni, aswanpis ajinallataj qankunawanpis kanqa, manachus Diosman kutirikunkichej chayqa.
4Jinallataj yuyarikuychej jaqay chunka pusajniyoj runakunamanta, pikunatachus Siloepi torre urmaykuspa p'altarparerqa, chaykunamanta. Qankuna yuyankichejchu paykuna aswan juchasapa kasqankuta Jerusalenpi tiyakojkunamanta nisqaqa? 5Noqarí niykichej mana jinachu kasqanta. Manachus Diosman kutirikunkichej chayqa, ajinallataj qankunawanpis kanqa, nispa.
Mana poqoj higo sach'amanta rijch'anachina
6Jesús uj rijch'anachinatawan nillarqataj: Uj runajta higo sach'an kasqa uva huertanpi. Paytaj poqoyninta pallaj rispa, mana uj higollatapis tarisqachu. 7Chantá huerta qhawajman nisqa: Kinsa watataña jamuni kay sach'api higota mask'aj, manataj tarinichu. K'uturpariy ari. Imapajtaj qhasi manakajta jallp'ata usuchillanqapuniri? nispa. 8Huertata qhawajrí kutichisqa: Patronníy, kay sach'a kay watatawan kallachunraj ari. Noqataj muyuyninta allaspa, wanuchaykurisaj. 9Chantá poqonqachus chayqa, allin kanqa. Manapuni poqojtinrí, k'uturparichillanki, nispa.
Samarina p'unchaypi Jesús uj warmita qhaliyachin
10Ujpacha Jesús samarina p'unchaypi tantakuna wasipi yachachisharqa. 11Chaypitaj uj warmi kasharqa, pichus k'umpullamantaña purej, nitaj imaynamanta cheqanta sayayta atejchu, chunka pusajniyoj watataña uj supay ajinata payta onqochisqanrayku. 12Chantá Jesús chay warmita rikuytawan, payta wajyaspa, nerqa: Warmisita, onqoyniykimanta qhaliyachisqaña kanki, nispa. 13Jesús makinwan warmita llankhaykojtinkamataj, chay warmi cheqanta sayaspa, Diosta mayta yupaychayta qallarerqa. 14Chaywanpis tantakuna wasita qhawajqa phiñakorqa, Jesús samarina p'unchaypi chay warmita qhaliyachisqanmanta. Jinataj runakunaman nerqa: Semanapi sojta p'unchay tiyan imallatapis ruwanapaj. Chay p'unchaykunallapi jampichikoj jamuychej, amataj samarina p'unchaypeqa, nispa.
15Tukuyta Kamachej Jesustajrí payman kuticherqa: Qankuna puraj uya kankichej. Manachu mayqenniykichejpis samarina p'unchaypi wakaykichejta, chayrí burroykichejtapis phaskaraspa yakuta ujyachimunkichej? 16Kay warmirí Abrahampa mirayninmanta kajtinpis, Supay Satanás chunka pusajniyoj watataña kay onqoywan payta watasqa. Jina kajtenqa, manachu payta phaskaranay karqa samarina p'unchay kashajtinpis? nispa.
17Chayta Jesús nisqanrayku, payta tukuy chejnejkuna p'enqaypi rikhurerqanku. Chaywanpis, runakunaqa kusikorqanku may t'ukuna imakunata Jesús ruwasqanrayku.
Mostaza mujumanta rijch'anachina
(Mt 13.31-32; Mc 4.30-32)
18Chaymanta Jesús nillarqataj: Imaynataj kanman Diospa kamachiynin? Ima rijch'anachinawantaj chaymanta yachachisunmanri? 19Diospa kamachiynenqa mostaza mujuman rijch'akun, mayqentachus uj runa jallp'anpi tarpusqa, chayman. Chay mujoqa wiñasqa sach'ayanankama, p'isqokunataj thansankunapi thapachakusqanku, nispa.
Levaduramanta rijch'anachina
(Mt 13.33)
20Ujtawan Jesús nillarqataj: Diospa kamachiyninmanta yachachishaspa, imawantaj rijch'anachiymanri? 21Diospa kamachiynin levaduraman rijch'akun, mayqentachus uj warmi kinsa arroba jak'uman chajruykusqa tukuynin masata poqochinanpaj, chayman, nispa.
K'ullku punkumanta rijch'anachina
(Mt 7.13-14,21-23)
22Jerusalenman rej jina Jesús llajtakunapi, ranchokunapi ima yachacherqa. 23Uj kutitaj uj runa taporqa: Wiraqochíy, pisi runallatachu Dios qhespichenqa? nispa.
Jesustaj kuticherqa: 24Atisqaykichejta ruwaychej Diospa kamachiyninman k'ullku punkunejta yaykunaykichejpaj, imaraykuchus Diospa kamachiyninman ashkha yaykuyta munanqanku, manataj atenqankuchu. 25Wasiyoj runa punkuta wisq'ajtinña, qankunaqa jawapi rikhurispa, punkuta takankichej: Tukuyta Kamachej, kichaririwayku, nispa. Paytajrí kutichisonqachej: Mana rejsiykichejchu, manataj yachanichu maymantachus kasqaykichejta, nispa. 26Chaypacharaj qankunaqa ninkichej: Qanwan khuska mikhorqayku, ujyarqaykutaj. Llajtaykoj callenkunapipis qan yachacherqanki, nispa. 27Paytajrí nisonqachej: Mana yachanichu maymantachus kasqaykichejta. Millayta ruwajkuna, noqamanta karunchakuychej, nispa.
28Chaypachamá waqayqa, kiru k'arukuypis kanqa, imaraykuchus Dios kamachishajtin, chaypi qankuna Abrahamta, Isaacta, Jacobta, Diosmanta tukuy sut'inchajkunata ima rikunkichej. Qankunarí jawaman wijch'usqa kankichej. 29Chaypachallataj ashkha runakuna inti llojsimuynejmanta, inti yaykuynejmanta, wichaynejmanta, uranejmanta ima jamonqanku, chantá Diospa kamachiyninpi mikhoj tiyarikonqanku. 30Kaytawan yachaychej: Kunan qhepapi kajkunaqa chaypacha ñawpajpi rikhurenqanku. Ñawpajpi kajkunatajrí qhepapi rikhurenqanku, nispa.
Jesús Jerusalenrayku waqan
(Mt 23.37-39)
31Chay p'unchayllapitaj wakin fariseokuna chayamuspa, Jesusta nerqanku: Ripuy kaymanta, imaraykuchus kuraj kamachej Herodes wañuchisuyta munashan, nispa.
32Jesustajrí kuticherqa: Rispa, jaqay atoj jina runaman kayta willamuychej: Jesús nisunki: Noqaqa kunan, q'ayapis supaykunata runamanta qharqosaj, onqosqakunatataj qhaliyachisaj ima. Minchhatajrí ruwanayta tukusaj. 33Chaywanpis noqa purinayraj tiyan kunan, q'aya, minchhatawan ima, imaraykuchus Diosmanta sut'inchajqa mana wañuyta atinmanchu Jerusalenmanta jawapeqa, nispa.
34Ay Jerusalén, qanqa Diosmanta sut'inchajkunata wañuchej llajta kanki. Qanman Diospa kachamusqankunatapis rumiwan ch'anqaykuspa, wañuchillankitaj. Mashkha kutitachus wawaykikunata tantayta munarqani, imaynatachus wallpa chillwinkunata lijran uraman tantaykun, ajinata. Qantajrí mana munarqankichu. 35Kunanrí qhawariychej: Wasiykichejqa ch'inpacha qhepakonqa. Chayrayku niykichej: Manaña ujtawan rikuwankichejchu, ninaykichejkama: Tukuyta Kamachej Diospa sutinpi jamojta jatunchaychej, nispa.#Sal 118.26; Mt 21.9.
Currently Selected:
Lucas 13: DQPC
Highlight
Share
Copy
Want to have your highlights saved across all your devices? Sign up or sign in
Revisión Biblia Quechua Boliviano © Sociedad Bíblica Boliviana, 2017.
