luka 10
10
popeosmuhnu tomo mpʉtvʉhʉ ueso ci cou 'o iesu
1o'amo noana'o, mo eh'unu epei to mo mpʉtvʉhʉ ueso#1 secu ho 17 secu <mpʉtvʉhʉ ueso> panto piyo ci tposʉ noana'o isi yainca <mpʉtvʉhʉ>. ci cou 'o nooe'oca, popeoskuna ho poa emoyafo, mayoyoso ho popeoueva uhto tasi usa ci macocono hosa. 2isi mi'usni ho yainca: <mo man'i 'e heʉheʉm'ʉ, at'inghi kakutia 'e leyaahioa. ko'koeno, temu uhto tauke to ezoyʉ ho m'eya asuhca poa botngonʉ 'emo a'pʉ'pʉyʉ ta heʉm'ʉsi. 3e'ohʉcu! ho os'o popeoskuna muu ho poa yuyafo, mais'a oko no moatʉ'nʉ isi so'upa no av'u yʉn'ʉ. 4'ote mahafo no tvopeisua; 'ote mahafo no keʉpʉ; 'ote mahafo no sapiei; maezo 'ote tosvo ta ceonʉ ho mi'usnu to cou ho meuoteozu, 5upena hocimu uhno emoo no siya, la auyu mainca: <<soanono'sio na mimu cono emoo!>> 6hoci panola kokaebʉ moususeomʉ ci cou no ic'o, i'e imu p'enia ci soanono tesi tanua; hoci o'te maica. temu tanvonvi na tooyokeo. 7hotemu yono emoo no siya, la ana na tehe ayocneni ci 'oanʉ, maica 'ola yaahioa 'alaeno anana'o yaa hnooa. 'ote i'mi ta emoo tan'e ho noezuhu no emoo no mocmo. 8upena hocimu uhno hosa nenu, hoci pano te tiou muu, ayocneni no temu ana ci cuma, 'a temueno bonʉ no cuma, 9a'vinano aotothoma namo tma'congo no ic'o, mi'usni ho eʉsvʉta: <<'o hpʉhpʉngʉ to hamo tec'u mon'i esmi ta taicomu.>> 10at'inghi, hocimu sʉc'ʉhʉ no conci hosa, o'aihe tiova no cou no ic'o na muu, temu uhto papae'ohsa ho yainca: 11<<a'upa 'emo cʉnghʉ ta caphʉmia ci yonpuhu ta hosamu, temia yaeza topsʉpseni. maihoci mi'usni muu ho engahva, at'inghi temu atatalʉa, 'o hpʉhpʉngʉ to hamo tec'u mon'i esmi!>> 12te'o eʉsvʉta muu. to hiesi no yʉsvʉtʉ, 'o ohe elʉa to cousotoma ci patvovei, te sop'ohe to tenahe elʉa ho tiova ci patvovei to hosa ne'e!>
o'te tmaa'uzo ci hosa
(matai 11:20-24)
13<kolasin, tekocu ku'kuici! posaita. tekocu ku'kuici! 'e o'u hioa ta taicomu ci po'e. hoci o'u hioa ne tailo ho ine saitong, i'o cou ne'e ma tec'u noana'o yusuhngu ta ceoa, sisava ho tomfu, pa'teni na hiahe ciha na kokuzo hocu yuovei mituhcu! 14no hiesi no yʉsvʉtʉ. 'o ohe elʉa to tailo ho saitong ci patvoveiya, maten'a sop'ohe ta temu elʉa! 15inacu suu, kapenong, tekon'asi hoepzeni si iachi? mateko noa to'seni ne vooecʉvcana!>
16isi ivaha mi'usni to iesu 'o tesi ho yainca: <siya namo tmalʉ muu 'amoeno tmalʉ a'o, siya namo bʉʉpsʉpsʉ muu 'amoeno bʉʉpsʉpsʉ a'o; namo bʉʉpsʉpsʉ a'o. 'amoeno bʉʉpsʉpsʉ tomo popeosmuhnu a'o ci ic'o.>
yuovei 'omo mpʉtvʉhʉ ueso ci cou
17'omo mpʉtvʉhʉ ueso ci cou mo kokaekaebʉ ho esvovei, eʉsvʉta ho yainca: <nooe'oca, mimia boemi to ongkosu ho mashʉyʉ, a'upu 'o hicu ho meo'uzo a'mi!>
18isi mi'usni to iesu ho yainca: <os'o aiti 'o satan mo i'mi ne pepe mais'a moi'hocʉ ho supeohʉ. 19temu talʉi! os'ocu pafi to tonʉ na muu, peelʉi p'ecihi 'o fkoi ho eepa, maezo atpʉtʉ no afu'u tonʉ no hangʉ, uk'a na ci te meelʉ akuzkuzo muu. 20at'inghi, 'ote i'mi homo peteozu muu na h'aokuv'o ho kaebʉ, temu nomio ho isi tposi ne pepe na ongkomu ho kokaekaebʉ.>
kokaekaebʉ 'o iesu
(matai 11:25-27; 13:16-17)
21tuhcusi ne mio, yono isi poot'ova to seilei#'e <seilei> panto piyo ci tposʉ noana'o uk'a ci <sei>; panto piyo ci h'unasi ci tposʉ noana'o isi yainca <iachi piepiya>. 'o iesu mo na'no kokaekaebʉ, yainca: <amopepe, nooe'oca ta pepe ho ceoa, te'o to'aveoveoyʉ suu; maica 'e ohsula efʉefʉnga tamo mau'to'tohʉngʉ, ho motposʉ ci hi'hioa, osko paavneni ta o'amo mau'to'tohʉngʉ ho o'te motposʉ ci cou. 'aeno a'ʉmtʉ, amo, 'emo maica ci matoyange mo acʉhʉ i'mi no yonghu ci koyusu!
22<'o amo'u isicu acʉha faeni a'o 'e acʉcʉhʉ. tapeoha 'o amo, uk'a ci te bochio zou siya na oko; tapeoha 'o oko ho ina isi 'ucia paavi to oko ci cou, maezo uk'a ci te bochio zou siya 'o amo.>
23micu miezuhu 'o iesu ho mi'usnu to tesi, auc'oc'ova mi'usni ho yainca: <ho imu peelʉi teolʉi 'e acʉcʉhʉ eni a'ʉmtʉs'a ʉm'ʉmnʉ! 24te'o eʉsvʉta muu, botngonʉ ci eyongensa ho honte ohela 'ucia aiti 'e imu aiti, o'a ohe so'eʉc'ʉha, 'ucia talʉi 'e imu talʉi, o'a ohe tac'ʉhi.>
epo'usa to ʉmnʉ ci cousamalia
25panto cihi ci lema'cohio hoolicu mo esmi ho hʉsvʉta 'o iesu, yainca: <sensei, cumana nte'o hioa niante meelʉ elʉ no 'auesiesi nsou?>
26yainca to iesu: <cuma na isi engha to tposʉ no hoolicu? mo mainenu na lako hia eʉsvʉsvʉtʉ?>
27isi yut'inga to ic'o: <tekola acʉcʉha na 'tohʉngʉ, yu'ausna, tonʉ, koyu ho himngonghi to nooe'oca - to hamosu, yaeza ngohia na ehuehungu, totiski hola ngohia 'e iachi.>
28isi mi'usni to iesu ho yainca: <emio co hiasu yut'ingi, maicac'o ho hioa, tec'u meelʉ elʉ no 'auesiesi nsou.>
29'o lema'cohio hoolicu. mion'a iachi micinanaeno emio, cu tuocosi 'o iesu: <zou siya na ehuehungu'u?>
30yainca to iesu: <panto cihi ci cou mo i'mi ne 'elusalemu te uhne 'eliko, to ceonʉ mo yupteilʉ to yaksai. ihe tomaesih'a 'o yʉsʉsi, ti'usna ho nia'te timcoza, cu ciha to ic'o. 31'oc'ocic'o panto cihi ci saisi mo mita ceonʉ; ne isi aiti, mo aha'o ma'iyo ho sucaefi. 32totiski, mo cihi ci coulevi mo sucaefi to ic'o; isin'a ohcum'a ho mi'mi'usni, mioc'o maezo ma'iyo ho sucaefi. 33at'inghi panto cihi ci cousamalia mo mito isi yoni, ne isi aiti, mo aot'ou 'o ma'cocoveoyi ci 'tohʉngʉ. 34isi usa ho boemi to s'os'o ho ito emi ho siesa 'o oho timzi, cfua na'a, isicu e'oca ho poa smopayo to iachisi snoecavʉ, hafa uhto tosofa, yonto ic'o ho aʉt'ʉt'ʉca. 35micu hucma, mo mayo tomo yuso ci peisu no nging ho faeni to tauke to tosofa, yainca: <<tekon'a aʉt'ʉca na'a. totea ho ta'u yuovei mitan'e, ta'u acʉha phini na isi afu'a tititha.>> >
36isi cu tuocosi to iesu: <ieni no hiasu baito, ta taico tamo tuyu tan'e, siya na ehuehungusi ta ohe ti'usna no yaksai?>
37yut'inga to lema'cohio hoolicu: <'ai'o moeno boemi no ma'cocacni ho aʉt'ʉcʉ ci cou.>
yainca to iesu: <'a tekoeno peis'ofeihni!>
baito to maata ho maliya 'o iesu
38'o iesu ho i'o tesi mo emo'cʉ'cʉnʉ to tehe mia ci ceonʉ, esmi tomo conci you. to ic'o panto cihi ci mamespingi zou maata 'o ongkosi, isi poa yonto emoosi 'o iesu ho aʉt'ʉt'ʉca. 39panto cihi ci ohaesasi to maata zou maliya 'o ongkosi. 'o maliya mo yusuhngu to yaa t'ango to iesu, ho tmalʉ homo eʉsvʉsvʉtʉ. 40at'inghi maica homo man'i 'o tesi hi'hioa to maata, mo ma'pap'ʉcʉ 'o 'tohʉngʉsi, cu uso ho mainca: <nooe'oca, si ohaesa'u isi poa peihcachi tamo man'i ci hioa na a'o, uk'a ci eno ake'isu 'tohʉngʉ? teko'so poa uso ho to'to'usni a'o!>
41yut'inga to nooe'oca: <maata! maata! miko nomio ta man'i ci hi'hioa ho ma'pap'ʉcʉ. 42at'inghi moc'o coni 'omo kuzo hoci uk'a. 'e maliya isicu epeiya 'omo atva'esi ʉmnʉ; uk'a cite meelʉ i'mi ta emucusi ho ti'einga.>
Currently Selected:
luka 10: bsnfe
Highlight
Share
Copy
Want to have your highlights saved across all your devices? Sign up or sign in
The Bible Society in Taiwan © 台灣聖經公會版權所有 2014
