Locya 12
12
Paziman na ni Yeso do tanwasiwasi a tao
1No kanang am meycyalaklaksa o tao a meysilisilin. Am ori o nipacizasazasag da so ai. Meyratateng am panomanomahen na ni Yeso o kananao na so macinanao jya. Maniring am, “Azimanen nyo o iyangay da no tao a macyagom do Vadisay. Ta akmey yapya do cittan sya am beken a manoyong sira an. 2O taywen rana vazay am abwata o ji meytotwaw. O ji meycicicyan a vazay am akman sang a katenngan da no tao. 3O taywen nyo a ciring nyo am akmey ciring nyo do maraw, apya amyamizngan da no tao. O ciriciring nyo do kavahayan nyo am ipeylimwang da a patwawen no aro a tao.
Si Ama ta do to o ikanyahey ta
(Matay 10:28-31)
4“Ko pa ciring jinyo manga keypong am ji nyo anyaheyan o omwakwak so kataotao nyo a tao an. Ta ji da wakwak o pahad nyo. So ji nyo a mogawi. 5Ko pa ciring jinyo am sino manoyong a ikanyahey nyo. O ikanyahey nyo am o mahap so pahad nyo a kawalit na pa nya do kararatan. Ori rana am si Ama ta do to ori. So ika iya na no ikanyahey nyo. 6Jyabo kahamang na jinyo ni Ama ta do to a. Kakwakwan da no likta meyyasasalap ori a na manakem ni Ama ta do to am imanngo kamo. 7Am ori an, ji nyo anyaheyan. Ta yarakorako o nakenakem na jinyo a kano meyyasasalap. Tana avok nyo am na nimimin rana nivilangan.
Omanoyong ji Yeso a kano ji nganoyong jya
(Matay 10:19-20,32-33; 12:31-32; Make 3:28-29; 8:38)
8“Ko pa ciring jinyo am omanoyong jyaken do tangain no tao am anoyngan ko ori do tangain ni Ama ta do to a kano aro a tinsi. 9Omalalas jyaken do tangain no tao am alalasan ko ori do tangain ni Ama ta do to a kano aro a tinsi. 10Omraherahet jyaken no ciring a Nipamnekan na ni Ama ta do to am mavonas pa ori. Am o omraherahet sya no ciring so Seyzi am to rana meyyonong a jyavonas o akman sang a raraten.
11“Tana rakpen da inyo a yangay do peyneynozyan a kangay da ninyo a pacicin do tangain no panipanirsirngen am ji nyo alawan o ipasapa nyo jira an. 12Ta nanawen na inyo no Seyzi a mapasapa jira.”
Omagom so peymeymasaodan a tao
13Amyan do aro a tao so asa a mapacici si Yeso. Maniring am, “Mo Mangnanao, ipanci mo pa o kakteh ko a kavonong namen so nimataid ji ama icyalaw an.” 14Maniring si Yeso am, “Mo kahakay, sino yamanci nimo a tomeneng jyaken a omvonong so kangangay nyo.” 15Maniring jira am, “Azimanen nyo kaji nyo mangagoman so meykamadadayan an. Ta tana meynakem o tao ori am beken a ikapintek na do karawan ori.”
16Meyratateng am mangononong si Yeso so payyaingan na sya. Maniring am, “Amyan so asa ka katenngan a tao. Iya rana ori am tey yaro nihakawan na. 17Manakenakem do onowned na am, ‘Meypanngonngo ko ya, ta jyabo kapakangay no asyasi no nihakawan ko do vahay ko a. 18No komwan am peyparakwen ko saon o vahay ko a sokzan ko so asyasi no nihakawan ko a kano aro a warawara ko, 19a kanakenakem ko sya do onowned ko so, Yajyarahet o aro a peymasaodan ko a. O yamasokoz do vahay ko am tana to ko na valivalyat do awawan a kakan so naknakmen am ikongo ikarahet ko pa.’ 20Am no maniring si Ama ta do to jya am, ‘Oyod mo kasagpyan a tao. Sicyamahep rana ya am komavos rana o allag no kataotao mo. Manngwa, sino omamoon so aro a peymeymasaodan mo a yamasokoz do kavavahay mo ang.’ ” 21Pakavosen ni Yeso o ciring na am ipanci na o, “Sira rana o yamanokoz no kataotao da so peymeymasaodan da am beken a katenngan a tao do tangain ni Ama ta do to o akman sang a tao an.”
Ipeyhanhan si Ama ta do to
(Matay 6:25-34)
22Maniring si Yeso do macinanao jya am, “Ko pa ciring jinyo am ji nyo a ratan o kanen nyo a kano ayob nyo. 23Ta maharahara pa o ipeyigegen nyo do karawan a kano kanen nyo. Meyneynakem pa o kataotao nyo a kano ayob nyo. 24To nyo nita o meyyasasalap an. Ta sira ji hakaw, sira ji manlangi, yabo da panonokozan so kankan da. Ta na avyavyain sira ni Ama ta do to an. Jyabo nyo kajyakdekdengan pa kano meyyasasalap a. 25Manngwa, ikapintek nyo o kalaw nyo no kawakwak nyo? 26No si anoyngan nyo ori am ikongo peypeypangayan no kaozoz nyo no makakaday a vazay nyo. 27Citahen nyo pala o vonitan. Ta yaji meyvazay a yaji ninon so ayob na. Am ko pa ciring jinyo am apyapya pa o vonitan a citahen a kano mina aywayob na no meyngaran so Solomen a panirsirngen no kakwa. 28O tamek rana am amyan pa sicyaraw eya. Am simaraw am mahayo rana a kapasleb rana sya do apoy. Tana akman sang o tamek a ji meyyonownay do tana am yana padketan ni Ama ta do to so na ikazway a savong na. Kakwakwan na rana no tamek am imanngo kamo na. Ta jyabo kaji na mantan ninyo so ayob nyo a. Am nyo kaji makanetan so nakenakem ji Ama ta do to. 29Am ori o ji nyo alawi no kanen nyo a kano yopen nyo. 30Ta ori rana am naknakmen da no ji manaralay a tao. Am inyo rana am na katenngan ni Ama ta do to o nyo kakzeben no nakem. 31So ikapinsan na no kakza nyo no katalamozong na ninyo ni Ama ta do to. Ta ori o torwan na nya jinyo so apyahen nyo no nakem.
Peymasaodan do teyngato
(Matay 6:19-21)
32“Inyo rana a macilolo jyaken am ji kanyo anyahey an. Ta isaray na ni Ama ta do to o katalamozong na ninyo. 33Ipanazang nyo o peymeymasaodan nyo a isidong nyo so ji makahakaw a tao. So ikanoyong nyo amyan do teyngato so peymasaodan a kano kangangay, ta abo dang o tao a tomakaw sya. Abo dang o vozsok a koman sya. So ikanoyong na no peymeymasaodan do dang a ji nyo a giji. 34Ta o yanan no peymeymasaodan nyo am pacilolwan no onowned nyo an.
Omnanala si Yeso a meysinaoli pa mai
35“Inyo rana am azimanen nyo o iwawalam nyo, 36akman so lamlamsoy a tao a omnanala so lawpan da nimapo do mamaring so kanen a nimeysinmo a tao. Ta no makaranes do vahay na o lawpan am iwangan da no lamlamsoy na o pazevngen. 37Meysinaoli o lawpan am macita na o lamlamsoy na a yapiya so nakenakem. Ori o nisarayan na nira. Ko pa ciring jinyo am jyabo kaji na meyyaywayob no lawpan a mapalisna sira a kangay na tomaotao so lamlamsoy na. 38Tana mahay o lawpan a mai kapiya no nakenakem da am isaray na sira a ipanlanlag an. 39Naknakmen nyo o yameykasayan. Ta no katenngan no mapeyvahay sya o araraw no yai no manakaw a tao am jyabo kapakatakaw no manakaw ang. 40Am ori o ipeytataziman nyo an. Ta ji nyo a tenngi o araraw no ipeysinaoli ko do teyrahem a Nipamnekan na ni Ama ta do to a tao.”
Ipeyhanhan a kano ji meyhanhanan a lamlamsoy
(Matay 24:45-51)
41Maniring si Pite am, “Mo pakacirngen jyamen ori an? No mo pakacirngen do karwan no tao.” 42Maniring si Yeso am, “Sino o ipeyhanhan a tey mapatak a lamlamsoy. Iya rana am ipeyhanhan no lawpan a omaponged no vahay na do kapeyyangangay na so isovo da kanen no karwan no lamlamsoy na. 43No mai o lawpan a kapakacita na so lamlamsoy na makapeyvazay so vazay na am manoyong ori a ipanlanlag na. 44To ko na macitangayan jinyo am manoyong rana o akman sang a lamlamsoy a pahanhanen no lawpan a tomalamozong no peymeymasaodan na. 45Am no maniring o onowned no lamlamsoy na am, ‘Cyaha, ta yapa mahay o lawpan ko a yamai. Sipsipzotan ko o aro a lamlamsoy na a kapaciyoyop ko so saki.’ 46No to ngai o lawpan do araw no nang am jyabo kaji na pakarwan so lamlamsoy na. Ji na bakbaki ori a pazanoden do ji na meyhanhanan a tao a. 47Ta o ji ngonot do ciring na no lawpan a lamlamsoy am tey rako oyaoyyan na no akman sang. 48Am o ji makateneng do ciring no lawpan a keyyan no marahet a vazay na am alikelikey o oyyan na nya. Akman sang, ta no aro nipahanhan na jimo a vazay ni Ama ta do to am aro kakdain na jimo.
Yapwan no ipeyvwak no tao
(Matay 10:34-36)
49“O ko nyai am ko peyhekasen o apoy do teyrahem. Inaoy no si manoyong rana masleb. 50Ko akmey todaliliw o yamai jyaken a rako a alalaw ko. Do na yanam pa no alalaw ko am yako tey mazikna so onowned. 51Nyo ipanci yaken a yameygegcin no ikapya nyo so nakem do icyatatao nyo an? Beken a ori o ko nyai, ta ko nyai do karawan o ikasyasyay nyo. 52Ta papwen sicyakwaya o ikasyasyay da no lalima do vahay da. O tatlo am ji sira macipaswasovoy do rarwa jira. 53So yanam no kapeyrahet da so nakenakem. O meyyama kano meyina kano meycyeycyarwa do vahay am ji sira macipaswasovoy.”
54Maniring do aro a tao si Yeso am, “No macita nyo o rako a cinalab a apo do keylawdan am makeykai nyo a katenngan o kacimoy na rana. 55No malangin do kapyan na am katenngan nyo kapamseng na. 56Inyo rana a mapakateneteneng a tao am nyo katenngan o kacita nyo so palapalanginan am ikongo nyo ji makatenngi do vazay ni Ama ta do to sicyakwaya.
57“Ikongo nyo ji naknakmi so apipya vazay nyo. 58No makasinmo ka so tao a pacioyyan mo am apyapya o to nyongbowa so marahet a vazay nyo do pangonongan nyo. Ta maraherahet o kangay na nimo do mapacici a tao a kaneb da jimo do pamemtengan. 59Ko pa ciring jinyo am no si katorwan mo na o ahapen da jimo a nizpi do kalasan mo am ori o ipakagag mo so kataotao mo.”
Currently Selected:
Locya 12: snt
Highlight
Share
Copy
Want to have your highlights saved across all your devices? Sign up or sign in
The Bible Society in Taiwan
