Marc 5

Yésʉs lɨ́ eso méleme

1Nó ó bé á to kumo ɨ́ lʉ́ʉ́ ébʉ́m é máŋ mé Galilê, lɨ́ ebʉ́m é kɔ́m nkɛ́ɛ́ ɨ́ sí Gerázen. 2Lě Yésʉs á sulo ɨ́ byɛ̂l, le ntɔ̂ʼ nyʉ́ʉ́ mʉ̂r á duhǒ pemé mésoo, nzě bɔma e né. Mʉr waá á be ó e mbɨ́ǎ sísǐm. 3Nye á didi ó, ɨ́ mesoo maá. Mʉr á bé abe e nkul ekâʼ nyê, damá jóʼo ó e mikʉ̂kɔ̌b mí nkóho. 4Jɔʼ yɨ́yɛ̂h bé á pɨpɨr nye mboʼó nkóho, le ekáʼɔɔ mébô le mikʉ̂kɔ̌b yɨ́, nye á bɨbe ó, lɨ́ ebúʼǒ mboʼó waá le etɨ̂ míkʉ̂kɔ̌b myaá. Abe e mʉr á be e nkul ekoʼo nyê. 5Jɔʼ yɨ́yɛ̂h, le móhó le pum, nye á bɨbe ó, njɨ páʼ mesoo le kʉ́ mecwɨ̂ʼ, lɨ́ etô le ebʉ̂ bítím le ebáble nyʉ̂l nyé e mekóʼ.

6Nó mpʉ nyé á dweʼe Yésʉs lɨ́ ejaa yɨ́, nye ntɔ̂ʼ swǐm kám, tó bɨʼ mébóó sí ɨ́ míh mé, 7ntɔ̂ʼ bʉ̂ bítím kʉ́ kʉ́. Nye e né ó: «Gǒ sáá yé e me, Yésʉs, Mwân mé Nzyɛ̌m dí Lʉ́ bísá bíbyɛ̂h nyá? Me lɨ́ ejɨʼla e go ɨ́ díé mé Nzyɛ̌m: ayɨ́ dwe mé ntɨ́ʼá!» 8(Nye á lwib nó ó, ebě, Yésʉs á si lɛ́ɛ e né ó: «Mbɨ́ǎ sísǐm, duhaa mʉ̂r nyâʼ ɨ́ nyʉ̂l!») 9Yésʉs ntɔ̂ʼ dî e né ó: «Díé lô, lê nzé?» Nye ntɔ̂ʼ yala e né ó: «Díé lâm, lé ó “Daa-e-méleme”, ebě, bɨ̌h bé ɨ́ buú buo.» 10Nye ntɔ̂ʼ sâ sɨ́n lɨ́ esâ mínjɨʼla, lɨ́ elɛ́ɛ e Yésʉs ó, nye ayɨ́ tyen mímbɨ́a mísísǐm myaá ɨ́ sí swîh.

11Náǎ yé á be ó e daa lé ónkʉ̌ ɨ́ buo buo lɨ́ ede lɨ́ ecwɨ̂ʼ kʉ́. 12Meleme ménɨ̌, mé ntɔ̂ʼ jɨʼla e Yésʉs ó: «Tyenɨɨ bɨ́h yɨ́ɛ ɨ́ daa lé ónkʉ̌ lɨ̂ʼ ó, bɨ̌h tô nî bé ɨ́ menyʉ̂l.» 13Nye ntɔ̂ʼ kam ó, yé syɛ́yɨɨ nó. Mimbɨ́a mísísǐm myaá, myé ntɔ̂ʼ duho mʉ̂r waá ɨ́ nyʉ̂l, myé ntɔ̂ʼ tó nî ɨ́ menyʉ̂l mé ónkʉ̌. Daa lé ónkʉ̌ nzě tulwa ɨ́ mbéʼé écwɨ̂ʼ kʉ́, ntɔ̂ʼ lʉ́ŋa ɨ́ mâŋ, ntɔ̂ʼ jɨ́bla, dwe. Bé á be ó onkʉ̌ otɔ́ɔ́sin obá.

14Opála bé ónkʉ̌ ntɔ̂ʼ kpɛ́ɛ, tóŋɔɔ e lɔ́ɔ waá ɨ́ nkana, le bípemé e bípemé byɛ̂h. Bʉr nzě dua ɨ́ mekwár mɔ́ɔ́, lɨ́ enzě bee bísá byé á syɛ́ɛ bí. 15Jɔʼ bé á pyâl gúmó Yésʉs á be yɨ́, bê nzě bee mʉ̂r méleme mé á nzɨnzamra nyá, nyɨɛ ndîndǐl ɨ́ kpa, le mikán mímpâ ɨ́ nyʉ̂l, le pɨʼ nyé nyɨnyɛ̂h. Bʉr o b'á nze bá, kʉ́ nzě kámɔɔ nyê. 16Obea o bísyɛ́ɛla byaá, bê nzě lɛ́ɛ̌ sâ yé á pyâl ɨ́ mʉr méleme mé á nzɨnzamra nyá, le yaá yé á pyâl lɨ́ onkʉ̌ yɨ́. 17Nó ó bé á nze jɨʼla e Yésʉs ó, nye pʉ́ʼaa ɨ́ sí yɔ́ɔ́.

18Jɔ̌ʼ Yésʉs á kalwo ɨ́ byɛ̂l yɨ́, mʉr méleme mé á nzɨnzamra nyá, nzě jɨʼla e né ó, bé e boo nɔ́ɔ́, bé káa di. 19Nó Yésʉs á bé akam tíá nyaá. Nye á jaa lɛ́ɛ nye ó: «Tóʼ kwár nyǒ, tʉ́ŋlʉ̌ mbɛ̌r bʉ̂r gô. Tó lɛ́ɛ̌ sá yɨ́yɛ̂h Dâ Nzyɛ̌m sá gó yɨ́, le mpʉ nyê jɨ́ʼ gó nkoó yɨ́!» 20Nó nyé á tô ɨ́ sí Dekapôl, tô le elɛ́ɛ bʉ̂r o bínkana bi tɨ̂ʼ sá yɨ́yɛ̂h Yésʉs á sâ nye yɨ́. Bʉr bɨ́bɛ̂h, bê nzě kâm lɔ́ɔ́ wé waá.

Yésʉs lɨ́ etiʼ mâ mʉmá mé Yárwis

(Matthieu 9.18-26; Luc 8.40-56)

21Jɔ̌ʼ Yésʉs á baʼa búla ɨ́ lʉ́ʉ́ ébʉ́m é mâŋ yɨ́, entumo e bʉ̂r nzě bɔma nyé ɨ́ nká lɨ́ ebʉ́m é mâŋ laá. 22Nyʉ́ʉ́ njwɨ́ɨ mpáh minjɨʼla, díé lé Yárwis, ntɔ̂ʼ pyâl. Jɔʼ nyé á bee Yésʉs yɨ́, nye nzě kúrwo sí, píʼe mpóm ɨ́ bibwǎh ɨ́ mpǒm nyé, 23nzě jɨʼla e né e nkoó nyɨnyɛ̂h ó: «Mwân wǎm, nye múo dwe. Nó me lɨ́ ejɨʼla e go ó, go ntâʼ. Mɨná tôʼ. Go tô kɛl nyé mebô ɨ́ nyʉ̂l, nye nkʉ̂ sâ mbɨ̂mbɨá, tiʼe.» 24Yésʉs ntɔ̂ʼ tô, bé e né.

Bé le entumo e bʉ̂r, bé á be ó entúúnó-é-nkáá, bâʼ lɨ́ emána nyê. 25Ɨ́ bʉr baá, nyʉ́ʉ́ mʉ́má á be ó tɨ̂, metié lɨ́ esʉsolo ɨ́ nyʉ̂l. Nyé osí jâ le ekpaa laá mimbû kám e mimbá. 26Nye á be ɨ́ buú dûhwo mítúú lɨ́ esáǎ twiʼ kwá odɔ́bra ɨ́ buo buo, dímlě mɔnɨ́ yé yɨ́yɛ̂h lɨ́ esáa dʉ̂m. Sâ gwár, nye á bé atiʼe, ekpaa asíesie, bubwǎʼ bwaʼáa.

27Mpʉ nyé á si jóʼo bʉr lɨ́ elwilwib, dumo e Yésʉs yɨ́, nye ntɔ̂ʼ nî ɨ́ sɔ́má bʉ̂r, nzě pyâl Yésʉs kúnókúno píe koo wé, tyěn mbô, kúna e kán wé, 28ebě, mʉmá á be lɨ́ ejwɨʼ ó: «Mé kúná yɨ́ɛ e kán mʉ̂r nyâʼ nó, me tiʼe!» 29Tyé e tyé yaá, ekpaa e métié laá ntɔ̂ʼ gœ̂ʼ, nye ntɔ̂ʼ jʉ̂ʼra ɨ́ nyʉ̂l nyé ó, nyɨ́ tiʼe, le egʉ́a ó, nyé akǎ be le ekpaa! 30Ɨ́ tyé gwár yaá, Yésʉs ntɔ̂ʼ jʉ̂ʼra ɨ́ nye mʉr tɨ̂ʼ ó, nyʉ́ʉ́ nkûl bé ɨ́ duho nyé ɨ́ nyʉ̂l. Nye nzě dwira témé bʉr, ntɔ̂ʼ dî ó: «Nzê kúná e mikán myâm ɛ̌?» 31Ompʉ́n bé, bé e né ó: «Gua yɨ́ɛ lɨ́ ebee ó, entumo e bʉ̂r, lé lɨ́ enyêhle gô. Gǒ kǎ báʼǎ dî ó: “Nzê kúná e me?” ɨ́ yé ɛ́?» 32Nó ó Yésʉs á nze dwira, ntɔ̂ʼ tô le esáa mʉ́má á sâ syɛ́ɛla yaá nyá. 33Mʉmá waá nzě sâʼ ɨ́ ngba ngba ngba le ejóʼo bʉ́á, ebě, nye á be lɨ́ egʉ́ǎ sá yé á syɛ́ɛ nye ɨ́ nyʉ̂l yɨ́. Nye nzě bɨʼ mébóó sí ɨ́ mpǒm mé Yésʉs, nzě lɛ́ɛ nyé otyeetye wɨ́wɛ̂h. 34Nó ó Yésʉs á lɛ́ɛ e né ó: «Mwân wǎm, búʼó yô, yɨ́ tiʼ gô. Mepyɛbla, mé díʼee go ɨ́ léme. Ekpaa lô, lé síaa.»

35Yésʉs dína lɨ́ elwib nɛ́ɛ: bʉr o mílʉ́mlʉ́ ntɔ̂ʼ duhǒ mbɛ̌r mé Yárwis. Bé e njwɨ́ɨ waá ó: «Mónǒ, nyɨ́ dwe. Gǒ kǎ báʼǎ ntɨ̂ʼ lɛ̂ʼla ɨ́ yé?» 36Yésʉs nyɨɛ lɨ́ ekʉ́ jóʼo mékǎn bé á lɛ́ɛ má, nye á be yɨ́ɛ ó, anʉa mé, gbâ ɨ́ nkɔb. Nye nzě lɛ́ɛ e njwɨ́ɨ mpáh minjɨʼla ó: «Ayɨ́ jóʼo bʉ́á. Dyɛ́ʼwáá njɨ e me.» 37Nye nzě kamle bʉ̂r lɨ́ edû nyê. Nye á jaa kam ó, njɨ Pétrus, Jacques ndu e mɨ́ɔɔ́ wé, Yʉánɛs, ó bé e boo nɔ́ɔ́ tôʼ. 38Bé ntɔ̂ʼ nî mbɛ̌r me njwɨ́ɨ mpáh minjɨʼla. Yésʉs ntɔ̂ʼ bee ó, tɨ̂ʼ, yé á be ó, yé mû áleŋéleŋé, bʉr lɨ́ ejɨ médwê le ebʉ̂ bítím ɨ́ buo buo. 39Yésʉs nî mbɛ̌r, nzě lɛ́ɛ e bé ó: «Bɨ̌n kǎ sâ óleŋéleŋé mpʉ́nʉ̌ le ejɨ médwê ɨ́ yé? Mwân, nyé adwe. Nye ɨ́ jô.»

40Bê nzě pya nyê. Nye nzě pyêl bɨ́bɛ̂h kʉ̌l. Yé á jaa lîʼ tɨ̂ʼ ó, njɨ sɔ́ŋ e nyɔ̌ŋ mwân, le bʉr ó sɔ́má yé. Bê nzě nî ɨ́ ntɔ́ɔ, súm mwân á be yɨ́. 41Nye ntɔ̂ʼ mɛ̂r mwân waá ɨ́ mbô. Nye e né ó: «Talita, kum!» (Nó ó yé lɛ́ɛ́ ó: «Mâ mʉmá, mě lɛ́ɛ́ gó ó: mɔáa.»)

42Tyé e tyé yaá, mwân waá nzě gbɔlwa, ntɔ̂ʼ táarě tyen, ebě, nye á be ó, nye mû mimbû kám e mimbá. Bʉr baá nzě twɨrǎ syɛ́ɛla yaá ɨ́ buo buo. 43Yésʉs ntɔ̂ʼ gbâ bé mpéné ó, bé l'alɛ́ɛ mʉ̂r sâ syɛ́ɛ́ yɨ́. Nye nzě lɛ́ɛ bé ó, bé dwêʼ eséhe laá sá éde.

Currently Selected:

Marc 5: ozm

Highlight

Copy