Marc 6

Yésʉs e dyɛɛ́ yé, bʉr ó Nazarɛ̂t

1Nó ó Yésʉs á duhǒ gúmó nyé á be yɨ́, nzě tô ɨ́ kwár nyé á bwaʼ nyɨ́. Ompʉ́n bé, nzě dû nyê. 2Jɔ̌ʼ móhó sábat, wé á pyâl yɨ́, nye ntɔ̂ʼ táare édwe bʉ̂r milɛ́ʼlá ɨ́ mpáh minjɨʼla. Bʉr ɨ́ buo buo bé á jóʼo sá nyé á lɨlɛ́ɛ yɨ́ bá, bé á be ɨ́ buú kâm, le elɛ́ɔɔ ó: «Wɨ̂ʼ mbǐ sɔ̂ʼ, wé duho nyé nkoó? Nye á nʉa wɨ̂ʼ ócwóó le mâʼ mésimá ménɨ́nɨ́ɨ́ nyé dí esâ mâʼ wó? 3Ntʉ nyé dí wâʼ kábína nyá ɛ́? Ntʉ mwân mé Maria nyâʼ ɛ̌? Mɨ́ɔɔ́ mé Jacques, Yóse, Yʉ̂d ndu e Simon ɛ̌? Ntʉ ókɛ́l bé dí wâʼ ɨ́ sɔ́má gá yɨ́ná yɨ̂ʼ bâʼ ɛ̌?» Syɛ́ɛla yaá nzě bɨm bé ebɔ̌ʼ ɨ́ miléme, ntɔ̂ʼ benɔɔ nyê. 4Nó ó Yésʉs á nze lɛ́ɛ e bé ó: «Bé jaá bene édwáawo ngwíha milɔ̌b mé Nzyɛ̌m ó, njɨ ɨ́ sí yé, le témé dyɛɛ́ yé, le ɨ́ mbɛ̌r bʉ̂r wé tʉ́ŋlʉ̌.»

5Yésʉs á bé asâ mésimá gúmo yaá. Nye á jaa kɛl myúú mímbêl ó, njɨ mebô ɨ́ nyʉ̂l, le etiʼ myê. 6Yésʉs á si kâm lɨ́ ebeě mpʉ bé á be adyɛ̂ʼwo e nye yɨ́.

Píe tɨ̂, nye nzě ja nzɨ́, ntɔ̂ʼ tô le edwe bʉ̂r milɛ́ʼlá ɨ́ mekwár mé ngʉ́rá waá wɨ́wɛ̂h.

Yésʉs lɨ́ elómo ómpʉ́n bé

(Matthieu 9.3-5; 11.1; Luc 9.16)

7Nó nyé á nze jébe ompʉ́n bé kám le obá, nzě lómo bé, obá óbá, nyé osí dwe bé nkul ó, bé sôʼ mimbɨ́a mísísǐm ɨ bʉr. 8Nye á dwe bé mpéné ó: «Bɨ̌n tó náǎ ó, abe e mimbeʼ, njɨ súmu ɨ́ mbô. Abe e blêr, abe e myah, abe e mɔnɨ́ ɨ́ mpɨ́ʼ. 9Abwâr gá mintɔra mi kʉ́ mímbá. Tóʼ gá njɨ le osípah ɨ́ mekʉ̌.»

10Nye ó: «Mbɛ̌r wɨ́wɛ̂h bɨ́n ngá nî wɨ́, diʼee gá tɨ̂, tó pyâl ɨ́ jɔʼ bɨ́n ngá mɔa, laa nyɨ́haá kwár yɨ́. 11Gúmó yɨ́yɛ̂h bʉ̂r, bé óbene bɨ́n, nkʉ̂ akpɛl éjôʼlo bɨ́n yɨ́, pɔʼá bɨ́n ngá pʉʼa tɨ̂ʼ wɨ́, bɨ̌n e kúró pím ónara bɨ́n ɨ́ mebo nyɨ́. Syɛ́ɛla yaá, yé ónwâhle bé ó, bé mû ó ɨ́ mebyaʼ.»

12Nó ó ómpʉ́n bé, bé á nze tô, tô le etúno, le elɛ́ɛ bʉ̂r ó, bé túmaa mikoo e mebébe mɔ́ɔ́ le edwira míléme. 13Nó ó bé á nze so meleme ɨ́ bʉr ɨ́ buo buo, le elœm mímbêl múlo, le etiʼ myê.

Eswie mé Yʉánɛs Ndubʉr

(Matthieu 14.1-12; Luc 9.7)

14Nó ó ngóvina Erôd á nze jóʼo lɔ́ɔ́ dí edumo e Yésʉs wɨ́, ebě, kûm nyé á be ɨ́ buú myaŋla. Bʉ́ʉ́ bʉ̂r, bé á lɨ̂lɛɛ ó: «Yʉánɛs Ndubʉr, nyɨ́ pah ɨ́ soo. Sâ yaá ó nyé dí esâ mésimá nó yɨ́.» 15Bâʼ, bé ó: «Yé ó Elie.» Bʉ́ʉ́, bé ó: «Yé ó ngwíha milɔ̌b mé Nzyɛ̌m mpʉ baá o mélú mé épíhe.» 16Jɔ̌ʼ Erôd á jóʼo lɔ́ɔ waá yɨ́, nye ó: «Yʉánɛs Ndubʉr ó nɨ̌, mʉr mé á tíʼe lʉ̂ nyá. Nyɨ́ pah ɨ́ soo.»

17Náǎ yé ó, Erôd mʉr tɨ̂ʼ ó b'á lómo bʉr ó, bé tôʼ mɛ̂r Yʉánɛs. Bé e káʼ nyé menkara, bé e gbá nyé ɨ́ mbʉʼ. Erôd á sâ nó ó ɨ́ lɔ̌b mé Erodiâd. Erodiâd á nyɛɛ bâ ó, Philippe, mɨ́ɔɔ́ mé Erôd. Erôd nzě dɛn nyé nyǎ, bâ ntémé nye. 18Nó ó Yʉánɛs á lɛ́ɛ le Erôd ó: «Yê mpéné ó, mʉr abâ myáá mɨ́ɔɔ́!» 19Erodiâd nzě sâ nyé otié. Nye nzě sáa ménzɨ̌ mé éjʉ̂ nyê. Sâ gwár, yé á bé abána. 20Ebě, Erôd á be ó lɨ́ ekpɛ́ɛ̌ Yʉánɛs. Nye á be lɨ́ egʉ́a ɨ́ páʼ mé Yʉánɛs ó, nye ó ti, nye ntémé tîtyěl mʉr ɨ́ míh mé Nzyɛ̌m. Nó ó nyé á kɨkamle e twiʼ yé yɨ́. Jɔʼ nyé á jóʼo nye lɨ́ elwib yɨ́, lwǐb yaá, yé á be ɨ́ buú séa nyé ɨ́ léme. Nye á bɨbe ó lɨ́ ekpɛl éjôʼlo nyê.

21Nó Erodiâd á nze bee mbɨambɨa jɔʼ dʉ́ó Erôd á tyêl nzɔɔ ebyɛ́l lé yɨ́. Erôd á be ó sí báŋle bʉ̂r onɨ́nɨ́ɨ́ bé, bé le ojwɨ́ɨ o bísója, ndu e minjwɨ́ʼ mí bʉ̂r ó Galilê. 22Nó ó sile mé Erodiâd, wé mʉr tɨ̂, wé á lʉ́o nyʉ̂l ɨ́ duo nzɔ́ɔ, nzě gɔ́na le ebwal. Erôd, bé e bʉr o b'á be lɨ́ ede bá, nzě kpɛlɔɔ lɨ́ ebeě mbi nyé á bubwal wɨ́. Nó ó Erôd á lɛ́ɛ e sile wé ó: «Twáráá sá yɨ́yɛ̂h gó ókpɛl yɨ́. Me ódwe gó yǎ.» 23Nye ntɔ̂ʼ ntaa mínkâl. Nye e né ó: «Me ódwe gó sá yɨ́yɛ̂h gó ógwâm yɨ́, yé damá be nkɔ̂b mpwár ɨ́ menkɔb mebá ɨ́ sí mé dí ejwɨ́ɨ yɨ̂, me ókʉ́ bánǎ dwe gó yǎ.» 24Nó ó sile waá, wé á tô kʉ̌l, ntɔ̂ʼ tó dî e nyɔ̌ŋ ó: «Me twáraa yé ɛ́?» Nó ó nyɔ́ŋ á nze yala ó: «Lʉ́ mé Yʉánɛs Ndubʉr!»

25Abe e minděʼ, nye ntɔ̂ʼ tô kwá mé Erôd, tó lɛ́ɛ e né ó: «Mě jaá kpɛl ó, go dwêʼ me sɔ̂ʼ ɨ́ báánâʼ ó, njɨ lʉ́ mé Yʉánɛs Ndubʉr kɛlá ɨ́ mpyáa.» 26Njóʼá njwɨ́ɨ á jóʼo yalá yaá yɨ́, nye kʉ́ nzě tyɛʼ nyʉ̂l, nyʉ̂l ntɔ̂ʼ di nyé ɨ́ twíaaa. Sâ gwár, nye á bé akpɛl éníme nyé wǎ ɨ́ lɔ̌b mínkâl nyé á pa ntaa mí le bʉr o nyé á báŋle bá. 27Nó ɨ́ tyé e tyé yaá, nye ntɔ̂ʼ lómo mʉ̂r á tîtiʼe bʉr milʉ̂ nyá. Nye e né ó: «Ntáʼ mé e lʉ́ mé Yʉánɛs Ndubʉr!» 28Nye nzě tô mbɛ̌r mímbʉʼ, tó tíʼě Yʉánɛs lʉ̂, nzě búla e wé ɨ́ mpyáa, dwe éséhe laá, lɨ́ɛ kǎ tô e wé, tó tímle nyɔ́ŋ. 29Jɔʼ ómpʉ́n mé Yʉánɛs bé á jóʼo lɔ́ɔ waá yɨ́, bé ntɔ̂ʼ nʉǎ múú wé, tó dɨlɔɔ wê.

Yésʉs lɨ́ edwe bʉ̂r ɨ́ buo buo mede

(Matthieu 14.13-21; Luc 6.10-17; Yʉánɛs 6.1-14)

30Bʉr ó Yésʉs á lómo bá, ɨ́ jɔʼ bé á búla yɨ́, bé ntɔ̂ʼ lɛ́ɛ nyé sá yɨ́yɛ̂h bé á sâ le elɛ̂ʼle yɨ́. 31Nye ntɔ̂ʼ lɛ́ɛ bé ó: «Ntáʼ gá lɨ́ empah. Mɨná tô gbala gá tîtííǎ ɨ́ mâ lʉ̌n, súm bʉ̂r dí abe yɨ́!» (Nye á lwib nó ó, ebě, bʉr ɨ́ buo buo, bé á be ó, bâʼ lɨ́ enze, bʉ́ʉ́ lɨ́ ebúla, abírɔɔ bé epʉ́la ó, bé dêʼ.)

32Nó ó bé á nze kalwo ɨ́ byɛ̂l, tóŋɔɔ̌ gúmó bʉ̂r, bé á be abe yɨ́, ó bé díʼee gʉ̂ʼ bé omér. 33Nó bʉr ɨ́ buo buo, bé á si bee bé lɨ́ etô, bê nzě dweʼe bê, nzě duho ɨ́ binkana bíbyɛ̂h e mikám, ntɔ̂ʼ nyɛɛ́ tó pyâl ɨ́ gúmó Yésʉs, bé le ompʉ́n bé, bé á be ó, bé tô yɨ́.

34Jɔ̌ʼ Yésʉs á sulo ɨ́ byɛ̂l, nzě bee éntumo e bʉ̂r laá yɨ́, nye ntɔ̂ʼ jɨ̂ʼ bé nkoó, ebě, nye á si bee ó, bé á kʉ be ó mpʉ bínteme bi dí, abe e mbɔʼlʉ bí. Nó nyé á nyɛl edwe bé milɛ́ʼlá ɨ́ milɔ̌b ɨ́ buo buo. 35Jɔʼ dʉ́ó lé á léŋa yɨ́, ompʉ́n bé ntɔ̂ʼ sîhlě súm nyé á be yɨ́, nzě lɛ́ɛ e né ó: «Mɨná gá bé wâʼ ó, gúmó bʉ̂r dí abe yɨ́. Pum múo nzě dwíne. 36Bírɨ́ɨ́ bʉ̂r bâ, bé tôʼ ɨ́ bipemé le mekwár me dí kúnókúno má. Bé tôʼ bwâm bé bʉr o tɨ̂ʼ sá éde.» 37Nó ó Yésʉs á lɛ́ɛ bé ó: «Bɨ̌n bʉr o tɨ̂, dwéʼ gá bé mede.» Bé ntɔ̂ʼ dî e né ó: «Bɨ̌h sâʼ nyá? Nzê bɨ̌h tô bwâm bé blêr e minzaŋ mí mɔnɨ́ minter mimbá, lɨ́ esú lé édwe bé sá éde ɛ̌?» 38Nye ó: «Bɨ̌n bé e biblêr bintíá? Tó dwɛ̂ʼ gâ.» Jɔʼ bé á sil eláa byé yɨ́, bê nzě lɛ́ɛ e né ó: «Bɨ̌h bé e biblêr bitɛ̂n, le osú óbá.»

39Nó ó Yésʉs á nze lɛ́ɛ e bé ó, bé dílɨɨ bʉr bɨ́bɛ̂h sí ɨ́ dáá laá, mentumo, mentumo. 40Bê nzě sâ nó. Bʉr nzě di sí, mimbɔŋ, mimbɔŋ. Mîʼ, bʉr nter; myúú, bʉr mekám métɛ̂n. 41Nó ó Yésʉs á nʉa biblêr bitɛ̂n le osú óbá baá, ntɔ̂ʼ dwɛ̂ʼ kʉ́, nzě dwě Nzyɛ̌m nzyǒo, ntɔ̂ʼ pɛ̂ʼ blêr bipêh, tímle ómpʉ́n byǎ, ó bé dwêʼ bʉr byǎ. Nye nzě kab bʉ̂r bɨ́bɛ̂h osú óbá baá. 42Bʉr bɨ́bɛ̂h nzě de, díle. 43Bipéh bíblêr le bipéh bí ósû byé á buʼo bí, byé á si lóŋlo mekwám kám e mebá ɨ́ jɔʼ bé á tœ̂ʼ byé yɨ́. 44Ɨ́ bím bʉ̂r o b'á de mede maá bá, bʉrʉ̂m, bé á be tɨ̂ʼ ó, otɔ́ɔ́sin otɛ̂n.

Yésʉs lɨ́ etye ɨ́ medíbé kʉ́

(Matthieu 14.22-23; Yʉánɛs 6.16-21)

45Abea nɛ́ɛ: Yésʉs nzě tíne ómpʉ́n bé ó, bé kpâhwa kalwo ɨ́ byɛ̂l, bé e sámle, tô lɨ́ ebʉ́m é kɔ́m nkɛ́ɛ́, nkǒ Bétsɛ́da. Jɔʼ yaá, nyɨɛ ólîʼ lɨ́ ebwóolo éntumo e bʉ̂r. 46Jɔʼ nyé á sil ebwóolo entumo e bʉ̂r laá yɨ́, nye nzě bére lɨ́ ecwɨ̂ʼ kʉ́, tó jɨʼla e Nzyɛ̌m. 47Jɔ̌ʼ pum wé á dwíne yɨ́, Yésʉs, nye dína lɨ́ ebʉ̂m nye omér, byɛ̂l á be ó, nye mû témé mâŋ. 48Nyé bée nɛ́ɛ: ompʉ́n bé lɨ́ esia e túú lɨ́ edúʼo byɛ̂l, ebě, pubó, yé á duho ó, nko byɛ̂l á be lɨ́ etô yɨ́. Á dwií ɨ́ melɔ́ma mé mɛ́n nɛ́ɛ: nye nzě dû bê, lɨ́ etye ɨ́ medíbé kʉ́. Nye nzě sâ mpʉ̌ sá lɛ́ɛ́, nye ólaa bê. 49Mpʉ bé á bee nye lɨ́ etye ɨ́ medíbé kʉ́ yɨ́, bé á jwɨʼ ó, yé ó ndîm. Bé ntɔ̂ʼ bʉ̂ bítím. 50Ebě, bɨ́bɛ̂h, bé á si kʉ bee nye. Mepɨʼ nzě dîm bé ɨ́ milʉ̂. Tyé e tyé yaá, Yésʉs, nye e bé ó: «Talaa gá miléme. Yé ó me! Ayɨ́ kpɛ́ɛ gâ.»

51Nó mpʉ nyé á to kalwo ɨ́ byɛ̂l yɨ́, pubó ntɔ̂ʼ síe, ompʉ́n bé, nzě buú kâm sâ yaá ɨ́ buo buo. 52Ebě, bé á bé agwá jóʼǒ sá ésimá lé ébul bíblêr lé á pʉgʉ kpɛl elɛ́ɛ yɨ́, ebě, milémé myɔ́ɔ́, myé á be ɨ́ lele lɨ́ ebúʼla.

Yésʉs lɨ́ etiʼ mímbêl ɨ́ sí Genezarɛ̂t

53Nó ɨ́ jɔʼ bé á sil entaa mâŋ, pyâl ɨ́ sí Genezarɛ̂t yɨ́, bê nzě syel byɛ̂l wɔ́ɔ́ lɨ́ ebʉ̂m. 54Jɔʼ bé á sulo ɨ́ byɛ̂l yɨ́, bʉr nzě kpâhwǎ dweʼɔɔ̌ Yésʉs, 55bé ntɔ̂ʼ tô míkám ɨ́ sí yaá yɨ́yɛ̂h, tô le enkɛ́ɛ mímbêl myɔ́ɔ́ mímyɛ̂h ɨ́ mimyɛɛla, tóŋɔɔ e myé gúmó yɨ́yɛ̂h bé á jʉ̂ʼra nye yɨ́. 56Ɨ́ gúmó yɨ́yɛ̂h Yésʉs á tʉtô yɨ́, ɨ́ mekwár, le binkana ndu e mempɔ́ɔ́, bʉr, bé á be ó, lɨ́ enze e mimbél myɔ́ɔ́, dyéʼɔɔ myé ɨ́ mebɛhɛɛ, bɨ́ɛ lɨ́ ejɨʼla e né ó, nye kámaa ó, bé jáa kúna njɨ le empah é kán wé. Mʉr nyɨnyɛ̂h á kúna e né nyá, á si kʉ tiʼe.

Currently Selected:

Marc 6: ozm

Highlight

Copy