EXODO 4

1Chaymi Moisesñataq Diosta nirqa:

—Paykunaqa manachá creewanqachu nitaqchá kasuwanqachu. Paykunaqa niwanqachá: “Tayta Diosqa manam rikurisurqankichu” nispa. 2Chaymi Tayta Dios nirqa:

—¿Imataq chay makikipi kachkan? —nispa.

Hinaptinmi payñataq nirqa:

—Tawnam —nispa.

3Hinaptinmi Dios kamachirqa:

—Pampaman wischuy —nispa.

Moises pampaman wischuykuptinmi culebraman tikrakururqa chaymi Moises ayqekurqa. 4Ichaqa Moisestam Tayta Dios nirqa:

—Chupanmanta hapiruy —nispa.

Moises hapiruptinmi makinpi kaqlla tawnayarurqa. Chaymi Tayta Dios nirqa:

5—Kay señalraykum creenqaku abueloykichik Abrahampa, Isaacpa hinaspa Jacobpa yupaychasqan Tayta Dios qanman rikurisusqaykita. 6Makikita hinay oqllaynikiman —nispa.

Moises oqllayninman makinta hinaykuspa horqoykuptinmi makinqa riti hina yuraqllaña lepra onqoywan kachkasqa. 7Hinaptinmi Tayta Dios nirqa:

—Yapatawan makikita oqllaynikiman hinay —nispa.

Chaymi makinta oqllayninman hinaykuspa horqoykuptin makinqa cuerpon hina sanoy-sanoyña kachkasqa. 8Tayta Diosqa nirqataqmi:

—Sichu punta kaq señalwan mana creespa mana kasukuspankuqa ichapas qepa kaq señalwanqa creenmanku. 9Chay iskay señalkunata mana creeptinkuqa nitaq nisqaykitapas mana kasukuptinkuqa yakutam wisiykunki mayumanta hinaspam hichaykunki chaki allpaman hinaptinmi mayumanta wisisqayki yakuqa allpapi yawaryarunqa —nispa.

10Chaymi Tayta Diosta Moises nirqa:

—¡Ay Señorlláy! Ñawpaqpas-kunanpas ñoqaqa manam rimaysapa runachu kani, kay serviqnikiqa mana rimakuy atiqmi kani —nispan.

11Hinaptinmi Tayta Dios payta nirqa:

—¿Pitaq runaman simita qorqa? ¿Pitaq unancharqa mana rimaqta, mana uyariqta? ¿Pitaq unancharqa qawakuqta hinaspa ñawsata? ¿Manachu ñoqa Tayta Dios? 12Chaynaqa kunanyá riy, ñoqam rimachiqniki kasaq, ñoqataqmi yachachisqayki imam rimanaykitapas —nispa.

13Chaymi Moises nirqa:

—¡Ay Señorllay! Pim kachanaykitayá kachayqa —nispa.

14Tayta Diosñataqmi Moisespaq llumpayta piñakuspan nirqa:

—Ñoqaqa reqsinim Leviy casta wawqeki Aaronta. Paymi rimanqa. Paymi taripamusuchkanki, qawaykususpaykim sonqonpi kusikunqa. 15Qanmi rimapayanki payta, yachachinkitaqmi imam ninantapas, ñoqam yachachisqaykichik imam rimanaykichiktawan imam ruranaykichiktaqa. 16Paymi rimapayanqa runakunaman qampa rantikipi, qampa rimanaykita hinam rimanqa, qamñataqmi kanki ñoqapa rantiypi. 17Chay tawnata apaspam señalkunata ruranki.

Egipto nacionman Moisespa kutisqanmanta

18Moisesmi suegron Jetropa wasinman kutiruspan nirqa:

—Kunanmi kutisaq Egipto nacionpi kaq castaykunaman kawsasqankupas wañusqankupas yachamunaypaq —nispa.

Hinaptinmi suegronñataq nirqa:

—Riyá allinlla —nispa.

19Madian lawpi Moises kachkaptinraqmi payta Tayta Dios nirqa:

—Kutiy Egipto nacionman, llapallan wañuchiy munasuqnikikunaqa wañurunñam —nispa.

20Chaymi Moisesqa warmintawan churinkunata huk asnoman sillaykachispa kutikurqa Egipto nacionman. Moisesqa aparqataqmi Diospa tawnantapas. 21Chaymantam Moisesta Tayta Dios nirqa:

—Egipto nacionman kutispaykiqa amam qonqankichu chay rurachisqay llapallan milagrokuna Faraonpa qayllanpi rurayta. Ñoqañataqmi sonqonta rumiyarachisaq runaykunata mana kacharinanpaq. 22Faraontam ninki: “Tayta Diosmi kaynata nin: ‘Israel casta runakunaqa piwi churiy hinam, 23ñam nirqaykiña serviwananpaq churiyta kacharinaykipaq aswanqa manam munarqankichu kachariyta. Chaynaqa ñoqam piwi churikita wañurachisaq’ nispa.”

24Ñanpi familiantin samana wasipi kachkaptinmi Tayta Dios tuta rikuriykurqa Moisesta wañurachinanpaq. 25Chaymi warmin Sefora ñawchi rumita hapiykuspan wawanpa qari kayninpa qarachanta kuchururqa hinaspam Moisespa chakinman tupaykachirqa:

—Cheqaptapas qamqa kanki yawarwan chapukusqa qosaymi —nispa.

26Chaymi Dios mana wañurachirqachu. Chay señalraykum Sefora nirqa: “yawarwan chapukusqa qosaymi” nispa.

27Aarontapas Tayta Diosmi nirqa:

—Chunniqta riy Moises taripaq —nispa.

Chaymi pay rispan tupaykurqa Diospa orqonpi, payta rimakuykuspanmi muchaykurqa.

28Chaymi Aaronman Moises willarqa:

—Tayta Diosmi kachamuwan kaykunata rimanaypaq, kamachiwantaqmi tukuy kay señalkuna ruranaypaqpas —nispa.

29Moiseswan Aaron rispankum Israelpa mirayninkunamanta llapallan ancianokunata huñururqaku. 30Chaymi Aaron paykunaman willarqa Tayta Diospa tukuy ima Moisesman nimusqanta, runakunapa rikusqantataqmi señalkunatapas rurarqa.

31Chaymi paykunata runakuna creerqaku. Israelpa mirayninkunam Tayta Dios paykunata watukusqanta yachaykuspanku hinaspa ñakarisqankuta Dios qawaykusqanta uyariykuspanku kumuykuspa adorarqaku Diosta.

Currently Selected:

EXODO 4: QUEAYA87

Highlight

Copy

Compare