EXODO 5

Moiseswan Aaron Rey Faraonta rimapayasqankumanta

1Chaymantam Moiseswan Aaron yaykurqaku Faraonman hinaspam payta nirqaku:

—Israelpa yupaychasqan Tayta Diosmi nin: “Runaykunata kachariy chunniqpi fiestata rurapuqniy rinankupaq” nispa.

2Chaymi Rey Faraonñataq nirqa:

—¿Pitaq Tayta Diosqa kasunaypaq hinaspa Israel castakunata kachaykunaypaqqa? Tayta Diostaqa manam reqsinichu manataqmi Israel castakunataqa kachariymanchu —nispa.

3Chaymi paykuna nirqaku:

—Hebreo castakunapa Diosninmi ñoqaykuta tariramuwanku. Kachaykuwaykuyá kimsa punchaw puriy chunniqta riruspa yupaychasqayku Tayta Diosman animalkunata wañuchipuspa adoramunaykupaq, mana chayqa ñoqaykumanmi hamurunman peste onqoypas otaq guerrapas —nispa.

4Ichaqa Egipto nacionpi reymi paykunata nirqa:

—Yaw Moiseswan, Aaron ¿imanasqataq llamkayninkumanta runakunata sayarachinkichik? Llamkaynikichikman riychik —nispa.

5Faraonmi nirqataq:

—Kunanqa qamkunapa castaykichikqa achkallañam. ¿Qamkunañataqchu samarachinkichik llamkanankumanta? —nispa.

6Hinaptinmi chay punchawpuni llamkachiqkunatawan capatazkunata Faraon kamachirqa:

7—Qayninpakuna hinaqa amam runakunapaq pajata huñuchipunkichikchu adobe chutanankupaq, kunanqa kikinkuñayá huñuchunku pajatapas. 8Ichaqa qayninpakuna adobe ruranankuta hinam rurachinkichik, amam imaniraqtapas menosyachinkichikchu. Ociosom kachkanku chaymi rimachkanku: “Animalkunata wañuchispayá adoramusunchik Diosninchikta” nispa. 9As allinta llamkachiychik chaypi ocupakuspa llulla rimaykunata ama uyarinankupaq.

10Chaymi llamkachiqkuna hinaspa capatazkuna lloqsispanku runakunata nirqaku:

—Kaynatam Rey Faraon nin: “Manañam pajataqa qoykichikmanchu. 11Chaynaqa rispayá huñumuychik pajata maymantapas ichaqa imam llamkanaykichikqa amam imayniraqtapas menosyanqachu” nispa.

12Chaymi Israel runakuna cheqerirqaku lliw Egipto nacionman pajapa rantinpi rastrojotaña huñumunankupaq. 13Llamkachiqkunañataqmi hikutarqaku:

—Paja qosusqaykichikpi hina tukuychik sapa punchaw llamkanaykichikta chay punchawllapi —nispa.

14Faraonpa llamkachiqninkunam Israelpa mirayninmanta capatazkuna churasqankuta azoterqaku:

—¿Imanasqataq qayninpakuna hina adobe chutanaykichiktaqa mana tukuchinkichikchu qayna punchawpas nitaq kunan punchawpas? —nispa.

15Chaymi Israelpa miraynin capatazkuna quejakuq yaykuspanku Faraonta nirqaku:

—¿Imanasqataq kayta rurawankiku sirvientekikunataqa? 16Mana paja qosqam sirvientekikunaqa llamkachkaniku chaywanpas llamkachiqkunam niwanku: “Ruramuychik adobekunata” nispa. Chaynapim kay sirvientekikunaqa azotesqa kachkaniku, runaykikunam huchayoqqa, manam ñoqaykuchu —nispa.

17Ichaqa Faraonmi nirqa:

—Ociosom kachkankichik, arí, ociosom, chayraykum nichkankichik: “Hakuchikyá Tayta Diospaq animalkunata wañuchipamusun adoramunanchikpaq” nispa. 18¡Pasawaychik hinaspa llamkamuychik! Manam pajataqa qosunkichikchu, adobetañataqmi entregankichik hina ruranaykichikta hinalla.

19Israelpa miraynin capatazkunam sasachakuypi rikurirurqaku: “Amam menosyachinkichikchu sapa punchaw adobe chutaytaqa” nisqanwan. 20Chaymi Faraonpa ñawpaqninmanta lloqsiramuspanku hawapi suyaqnin Moiseswan hinaspa Aaronwan tuparurqaku. 21Paykunatam nirqaku:

—Tayta Diosyá qawasunkichik hinaspa castigasunkichik. Qamkunaraykum Faraonqa runankunapiwan cheqnipakuruwaspanku wañuchiwaykupi richkanku.

Diosta Moises mañakusqanmanta

22Chaymi Tayta Diosta huktawan mañakuspan Moises nirqa:

—Señorlláy ¿imanasqataq mana allinta ruranki kay runakunata? ¿Imapaqtaq kachamuwarqanki? 23Faraonman qampa sutikipi rimapayaq yaykusqaymantapunim runaykikunataqa mana allinta Faraonqa rurachkan. Qamqa manamá runaykikunataqa libraykunkichu —nispa.

Currently Selected:

EXODO 5: QUEAYA87

Highlight

Copy

Compare