EXODO 6
6
1Tayta Diosmi Moisesta nirqa:
—Kunanmi qawanki Faraonta imam rurasqayta, hatun atiyniywanmi kachaykusunkichik, atiyniywantaqmi wischurusunkichik nacionninmantapas.
Moiseta huktawan Dios kamachisqanmanta
2Moisesta rimapayaspam Dios nirqa:
—Ñoqam kani Tayta #Hebreo simipi sapa kuti Diospa sutin YHWH rikuriptinmi runa simipi ninchik “Tayta Dios” nispa.Dios. 3Rikurirqanim Abrahanman, Isaacman hinaspa Jacobman “Tukuy Atiyniyoq Dios” sutiywan reqsichikuspay, aswanqa Tayta Dios sutiypiqa paykunamanqa manam reqsichikurqanichu. 4Chaynataqmi contratoyta rurarqani paykunawan Canaan allpata qonaypaq. Chaypim paykunaqa *f**yachapakuspanku forastero karqaku. 5Yachanitaqmi Israelpa mirayninkunaqa sonqonkumanta llakikusqankuta. Paykunatam Egipto runakuna servichikuchkanku ichaqa contratoytaqa manam qonqanichu. 6Chayraykum Israelpa mirayninkunata ninki: “Ñoqam kani Tayta Dios chaymi ñoqa horqosqaykichik Egipto nacionpi sasa llamkaykunamanta, librasqaykichiktaqmi servipakuq kasqaykichikmantapas. Atiyniywanmi salvasqaykichik hatun castigokunawan. 7Runaykunaña kaptikichikmi ñoqañataq Diosnikichik kasaq. Qamkunam yachankichik Egipto nacionpi sasa llamkaykunamanta horqoq yupaychasqaykichik Tayta Dios kasqayta. 8Abrahanman, Isaacman hinaspa Jacobman qonaypaq jurasqay allpamanmi yaykuchisqaykichik. Chay allpatam qosqaykichik dueñoña kanaykichikpaq. Ñoqa Tayta Diosmi chaynata nini.”
9Chaymantam Moises rimapayarqa Israelpa mirayninkunata. Aswanqa paykunam Moisesta mana kasurqakuchu sasallaña servipakuypi kaspa mana pacienciayoq kasqankurayku. 10Chaymi Moisesta Tayta Dios nirqa:
11—Yaykuspayá Egipto nacionpi Rey Faraonta rimapayay Israelpa mirayninkunata kay allpamanta kachaykunanpaq —nispa.
12Chaymi Moisesñataq Tayta Diosta nirqa:
—Israelpa mirayninkunaqa manam kasuwanchu. Chaynaqa Faraonqa ¿imaynamá kasuwanqa kay mana rimakuy atiqtaqa —nispa.
13Hinaptinmi Tayta Dios rimapayarqa Aarontawan Moisesta. Kamachirqataqmi Israelpa mirayninkunatapas hinaspa Rey Faraontapas Egipto nacionmanta Israelpa mirayninkunata horqonanpaq.
Aaronpa hinaspa Moisespa ñawpa abuelonkunamanta
14Ñawpa abuelonkupa familianman hina jefekunam kaykuna:
Israelpa piwi churin Rubenpa churinkunam karqa Hanoc, Falu, Hezron hinaspa Carmi. Paykunamá karqa Rubenpa ayllunkuna.
15Simeonpa churinkunam karqa Jemuel, Jamin, Ohad, Jaquin, Zohar hinaspa Canaan warmipa wawan Saul. Paykunamá karqa Simeonpa ayllunkuna.
16Leviypa churinkunañataqmi mirayninkuman hina karqa Gerson, Coat hinaspa Merari. Leviymi kawsakurqa pachak kimsa chunkan qanchisniyoq watata. 17Gersonpa churinkunam ayllunkunaman hina karqa Libni hinaspa Simei. 18Coatpa churinkunam karqa Amram, Izhar, Hebron hinaspa Uziel. Chay Coatmi kawsakurqa pachak kimsa chunkan kimsayoq watata. 19Meraripa churinkunam karqa Mahliwan Musi. Paykunamá Leviypa ayllunkuna karqa mirayninkuman hina.
20Amranmi casarakurqa tian Jocabedwan chaymi pay wachakururqa Aarontawan Moisesta. Amranmi kawsakurqa pachak kimsa chunkan qanchisniyoq watata.
21Izharpa churinkunam karqa Corey, Nefeg hinaspa Zicri.
22Uzielpa churinkunam karqa Misael, Elzafan hinaspa Sitri.
23Aaronmi casarakurqa Aminadabpa churin otaq Naasonpa panin Elizabetwan. Elizabetmi wachakurqa Nadabta, Abiuta, Eleazarta hinaspa Itamarta.
24Coreypa churinkunam karqa Asir, Elcana hinaspa Abiasaf. Paykunam Corey castapa ayllunkuna karqa.
25Aaronpa churin Eleazarpas, Futielpa huknin warmi churinwanmi casarakurqa chaymi wachakurqa Fineesta. Paykunam jefekuna karqaku taytanku Leviy casta ayllukunaman hina.
26Kay Aarontawan Moisestam Tayta Dios kamachirqa Egipto nacionmanta Israelpa mirayninkunata tropa-tropata horqomunankupaq. 27Moiseswan Aaronmi kikinkupuni Rey Faraonta rimapayarqaku Egipto nacionmanta Israelpa mirayninkunata kacharinanpaq.
Moisestawan Aaronta Dios qayasqanmanta
28Egipto nacionpi chay punchaw Moisesta Tayta Dios rimapayaspanmi 29nirqa:
—Ñoqam kani Tayta Dios. Ñoqapa tukuy nisqaykunatayá willay Egipto nacionpi Rey Faraonman.
30Aswanqa Moisesmi nirqa Tayta Diosta:
—Ñoqaqa mana rimakuy atiq runam kani ¿imaynamá uyariwanqa Faraonqa? —nispa.
Currently Selected:
EXODO 6: QUEAYA87
Highlight
Copy
Compare
Share
Want to have your highlights saved across all your devices? Sign up or sign in
