EXODO 7
7
1Hinaptinmi Moisesta Tayta Dios nirqa:
—Qamtaqa diosta hinam churaruyki Faraonpaq, wawqeki Aaronñataqmi kanqa qanmanta willakuq hina. 2Qanmi ninki ñoqapa tukuy kamachisqaykunata hinaptinmi wawqeki Aaron rimanqa Faraonwan chaynapi Israelpa mirayninkunata Egipto nacionmanta kacharinanpaq. 3Aswanqa ñoqam Faraonpa sonqonta rumiyarachisaq hinaspam Egipto nacionpi achka-achka señalkunata hinaspa milagroykunata rurasaq. 4Faraonqa manam uyarisunkichikchu. Aswanqa ñoqam Egipto nacionta castigasaq mancharikuypaq castigokunawan hinaspam Israelpa miraynin tropaykunata horqosaq. 5Egipto runakunata atiyniywan castigaspa Israelpa mirayninkunata paykunapa chawpinmanta horqoptiymi Egipto runakuna yachanqaku ñoqaqa Tayta Dios kasqayta.
6Chaymi Moiseswan Aaron, Tayta Diospa kamachisqanman hina rurarqaku. 7Faraonwan rimasqan tiempopim Moises karqa pusaq chunka watanpiña, Aaronñataqmi karqa pusaq chunka kimsayoq watanpiña.
Culebraman tikrakuruq Aaronpa tawnanmanta
8Moisesmanwan Aaronmanmi Tayta Dios nirqa:
9—“Qawachiway milagrota” nispa Faraon nisuptikichikqa Aarontam ninki: “Hapiy tawnaykita hinaspa Faraonpa ñawpaqninman wischuykuy culebraman tikrakunanpaq” nispa.
10Yaykurqakum Faraonman Moiseswan Aaron hinaspam Tayta Diospa kamachisqanman hina rurarqaku. Chaymi tawnanta Faraonpa hinaspa serviqninkunapa ñawpaqninman Aaron wischuykurqa hinaptinmi culebraman tikrakururqa. 11Chaymi Faraonpas qayarqa yachaysapa runakunatawan brujokunata hinaptinmi Egipto nacionniyoq brujokunapas chaynata rurarqaku brujeriankuwan: 12sapakama tawnankuta wischuykuptinkum chaykunapas tikrakururqa culebraman, aswanqa culebraman tikrakuq Aaronpa tawnanmi paykunapa culebraman tikrakuq llapallan tawnankuta millpururqa. 13Faraonpa sonqonñataqmi rumiyarurqa Tayta Diospa nisqanman hina chaymi paykunata mana kasurqachu.
Yakukunapa yawaryasqanmanta
14Chaymantam Moisesta Tayta Dios nirqa:
—Faraonpa sonqon rumiyasqa kaptinmi Israel runakunata mana kachariyta munanchu. 15Riy tutapayta Faraonman, paymi rinqa mayuta chaymi mayupa patanpi suyanki paywan tupanaykipaq, apankitaqmi culebraman tikrakuruq tawnatapas. 16Hinaspam payta ninki: “Hebreo castakunapa yupaychasqan Tayta Diosmi kachamuwan qanman kayta ninaypaq: ‘Chunniqpi adorawananpaq runaykunata kachariy ichaqa kunankamam manaraq kasukunkichu’ nispa. 17Kaynatam Tayta Dios nin: ‘Kunanmi yachanki Tayta Dios kasqayta: Moisespa makinpi tawnaywanmi mayuta waqtarachisaq hinaptinmi yakuqa yawarman tikrakurunqa. 18Chaymi mayupi kaq challwakunapas wañurunqa, mayupas asnariruptinmi Egipto runakunaqa mayu yaku tomaytapas millakurunqakuña.’ ”
19Chaymi Tayta Dios nirqa Moisesta:
—Niy Aaronta: “Tawnaykita hapispa makikita haywariy Egipto nacionpi yakukunapa hawanman, mayukunapa hawanman, hatun mayumanta lloqsiq yarqakunapa hawanman, qochakunapa hawanman hinaspa qocharayaq yakukunapa hawanman, chaynataqa ruranki llapachallan yakukuna yawaryarunanpaqmi. Chaymi yawarqa kanqa kullumanta yaku churanankupi chaynataq rumimanta yaku churanankupipas lliw Egipto nacionpi.
20Chaymi Tayta Diospa kamachisqanta hina Moiseswan Aaron rurarqaku. Tawnanta hoqarispanmi Faraonwan serviqninkuna qawachkaptin mayu yakuta waqtarurqa hinaptinmi Nilo Mayupi lliw yakukuna yawarman tikrakururqa. 21Challwakunapas wañuruptinmi mayupas asnarirurqa yakutapas Egipto runakunaqa mana tomay atinankukama chaymi yawar karqa lliw Egipto nacionpi.
22Egipto nacionniyoq brujokunapas brujeriankuwan chaynata ruraptinkum Faraonpa sonqon rumiyarurqa chaymi Moisestawan Aaronta mana kasurqachu Tayta Diospa nisqanpi hina. 23Faraonmi wasinman kutikurqa, paytaqa manam imapas qokurqachu chaykunamantaqa. 24Lliw Egipto runakunam mayu yakuta tomayta mana atispanku mayupa patanpi uchkurqaku limpio yakuta maskaspanku.
Kayra castigomanta
25Mayu waqtachisqanmanta qanchis punchawña pasaruptinmi.
Currently Selected:
EXODO 7: QUEAYA87
Highlight
Copy
Compare
Share
Want to have your highlights saved across all your devices? Sign up or sign in
