GÉNESIS 33
33
Jacobwan Esauwan allipunakapusqanku
1Qhawarispanmi Jacobqa rikurqan Esauta tawa pachak runakunapiwan hamushaqta, hinan payqa wawakunata rakirqan Leaman Raquelmanwan iskaynin kamachi warmimanwan. 2Hinaspanmi ñawpaqenpi sayaykachirqan kamachi warmikunata wawakunantinta, hinamantataq Leata wawakunantinta, qhepapitaq Raquelta Jasetawan. 3Paytaq ichaqa ñawpaqenkuman pasaspa qanchis kutita pampaman k'umuykukurqan wawqenman taripanankama. 4Esautaq ichaqa aypaqnin phawarimurqan, hinaspan waqapunakurqanku. 5Qhawarispataq rikurqan warmikunata wawakunatawan, chaymi nirqan:
—¿Pikunataq kaykunari? nispa.
Jacobtaq kutichirqan:
—Kamachiykiman Diospa qosqan wawakunan, nispa.
6Hinamantataq kamachi warmikuna wawantinkama hamurqanku, hinaspa k'umuykukurqanku. 7Hamullarqantaq Leapas wawakunantin, hinaspan k'umuykukurqanku. Chay qhepatataq Josewan Raquelwan qayllaykurqanku, hinaspataq k'umuykukurqanku. 8Chaymi Esauqa nirqan:
—¿Imatataq yuyaykunki kay llapan tarisqay t'aqa-t'aqawan? nispa.
Jacobtaq kutichirqan:
—Wiraqochay sumaqta qhawariwanaykipaqmi, nispa.
9Esautaq nirqan:
—Ñoqaqqa hunt'asqan kapuwan, wawqéy, qanpa kachun kaqniykiqa, nispa.
10Jacobtaq nirqan:
—Ama, ñoqa valekuyki, kunan sumaqta qhawariwanki chayqa chaskiykuy kay sumaq sonqoyta, uyaykitan rikuni Diospa uyantapas rikushayman hinataraq, may sumaqta ari chaskiykuwanki. 11Valekuyki, chaskiykuway qanpaq apamusqay sumaq sonqoyta, Diosmi kaykunawan qhawariwarqan, kaypi hayk'an kaqpas ñoqaqmi, nispa.
Hinaspanmi payman k'askachirqan, Esautaq chayta chaskirqan. 12Hinaspan Esauqa nirqan:
—Haku purisunchis, ñoqataq ñawpaqeykita risaq, nispa.
13Jacobtaq payta nirqan:
—Yachankin, wiraqocháy, wawakunaqa pisi kallpallaraq kasqanta, hinallataq ovejaykunapas wakaykunapas qholla uñayoqkama kasqanta, huk p'unchaylla sayk'uchinqaku chayqa, llapallan ovejan wañuranqa. 14Ahinaqa kamachiykimanta ñawpariy, ñoqataq allillamanta purisaq qatisqay uywaq purisqanman hina, wawakunaqpas purisqanman hina, Seirpi tiyasqaykiman chayamunaykama, nispa.
15Esautaq nirqan:
—Pusamusqay wakin runakunata saqesqayki, nispa.
Jacobtaq nirqan:
—¿Imapaq? Ama nishaychu, nispa.
16Ahinapin Esauqa chay p'unchay ñanninta kutipurqan Seirman. 17Jacobtaq ichaqa Sukotman ripurqan, chaypin wasita paypaq sayarichikurqan, uywanpaqtaq ch'ukllakunata sayarichirqan. Chaymi chayneqta suticharqan Sukot-ta#Sukot sutin Hebreo rimaypi “ch'ukllakuna” ninanta nin..
18Chaymantataq Jacobqa allillan chayarqan Canaán suyupi kaq Shehem llaqtaman, Padan-arammanta hampuspa, hinaspan llaqta chimpapi tiyarqan. 19Karpakunata sayarichisqan wakin hallp'atataq pachak qolqewan rantikurqan Shehempa taytan Hamorpa wawankunamanta. 20Hinaspan chaypi altarta perqarqan, suticharqantaq “EL, Israelpa Diosnin” nispa.
Currently Selected:
GÉNESIS 33: QC88
Highlight
Share
Copy
Want to have your highlights saved across all your devices? Sign up or sign in
Biblia en Quechua de Cuzco © Sociedades Bíblicas Unidas, 1988.
