GÉNESIS 34
34
Dinaq violasqa kasqan
1Leaq ususin Dinan lloqsirqan chay llaqta sipaskunawan tupaq, paytan Leaqa wachakurqan Jacobpaq. 2Hinan chay suyupi kamachikuq Hiv runa Hamorpa churin Shehemqa Dinata rikurqan, hinaspan payta hap'ispa violarqan. 3Dinawanmi sonqollirukurqan, hinaspan sipasta munakurqan, sumaqtataq rimapayarqanpas. 4Hinamanta Shehemqa taytan Hamorta nirqan:
—Chay sipasta casarakunaypaq horqompuway, nispa.
5Jacobtaq yacharqan ususin Dinata Shehempa violasqanta, churinkuna uywawan campopi kaqtintaq Jacobqa ch'inlla karqan paykunaq hamunankama. 6Shehempa taytan Hamortaq Jacobpata rirqan payta rimaykuq.
7Jacobpa churinkunataq chayta yachaspa campomanta hamurqanku, hinaspan paykunaqa llakikuspa mayta phiñakurqanku, Jacobpa ususinwan puñuykuspa Shehem p'enqata Israelpaq ruwasqanrayku. Manan chaytaqa ruwanachu karqan. 8Hinan Hamorqa paykunata nirqan:
—Shehem churiymi ususiykichiswan sonqollikun, valekuykichis, paywan casarachipusunchis. 9Hinaspa ñoqaykuwan aylluchakuychis, ususiykichiswan casarachiwayku, ñoqaykuqwanpas casarakullaychistaq. 10Ñoqaykuwan tiyaychis, may munasqaykichista purikuychis, chaypi tiyaychis qhatuychis, hallp'atapas hap'ikuychis, nispa.
11Shehempas nillarqantaq Dinaq taytanta turankunatawan:
—Ñoqata allinta rikuwaychis, qosqaykichismi imatachus niwasqaykichista. 12Ima qonatapas askha sumaq sonqotawan mañawaychis, ñoqataq qosqaykichis hayk'an niwasqaykichista, sipasllata qowaychis casarakunaypaq, nispa.
13Jacobpa churinkunataq ichaqa llullallawan kutichirqanku Shehemman taytan Hamormanwan, pananku Dinata violasqanrayku. 14Hinaspan paykunata nirqanku:
—Manan kaytaqa ruwaykumanchu, manan panaykutaqa qoykikumanchu qhari-kaynin mana señalasqa runamanqa, ñoqayku ukhupiqa p'enqaymi chayqa. 15Chaypas kayllawan sonqochasqaykiku:
—Ñoqayku hina kankichis, llapa qhari señalakunkichis chayqa. 16Hinaqa ususiykuta qosqaykiku, ñoqaykupas ususiykichiswan casarakusaqku, hinaspa qankunawan tiyasaqku, huk llaqtallataq kasunchis. 17Manataq uyakuwankikuchu señalachikunaykichispaq chayqa, ususiykuta pusakapusaqku hinaspa ripusaqku, nispa.
18Nisqankutataq allinpaq hap'irqan Hamorpas churin Shehempas. 19Hinaspanmi waynaqa usqhaylla señalakurqan, Jacobpa ususinta munakusqanrayku. Payqa aswan reqsisqan karqan taytanpa lliw wasi ayllunpi. 20Hinaspan Hamorpas churin Shehempas llaqtanku punkuman rispa llaqtamasinku qharikunata rimapayarqanku:
21—Ñoqanchispaq chay qharikunaqa sumaqmi, kay suyupi tiyakuchunku qhatukuchunku, kayqa hallp'aqa paykunapaqpas hatunraqmi. Ñoqanchis casarakusunchis ususinkuwan, paykunapas ususinchiswan. 22Ichaqa, paykunaqa ñoqanchiswan ch'ulla llaqtalla tiyanankupaq uyakunqaku kayraykulla:
llapa qhari señalakuqtinchis imaynan paykunapas señalasqa kanku hina. 23Llapa kaqninkupas llapa uywankupas, ¿manachu kaqnillanchistaq kanqa? Ñoqanchisqa uyakullasunchis paykunaman, hinan ñoqanchiswan tiyanqaku, nispa.
24Hinaqtinmi Hamorta churin Shehemtawan kasurqanku llaqta punkuman llapa lloqsiqkuna, hinaspan señalarqanku llapa qharita. 25Kinsakaq p'unchaypitaq ichaqa paykuna sinchi nanaywan kashaqtinku, Jacobpa iskay churinkuna Dinaq turan Simeonwan Leviwan sapanka espadata hap'irqanku, mana reparashaqtinku llaqta contra rirqanku, hinaspataq llapa qharita wañuchirqanku. 26Hamortapas churin Shehemtapas espadawan wañuchirqanku, hinaspan Shehempa wasinmanta Dinata pusarikuspa ripurqanku. 27Hinaspataq Jacobpa hukkaq churinkunaqa wañusqakunaqta rispanku llaqtata llat'anarqanku panankuta violasqankumanta. 28Qatirikurqanku ovejankuta, wakankuta, asnonkuta, llaqtapi kaqtapas campopi kaqtapas, 29lliw kaqninkutawan. Presota aparqanku llapa wawankuta hinallataq warmikunatapas, wasipi ima hayk'akaqtapas suwakurqanku. 30Chaymi Jacobqa Simeontawan Levitawan nirqan:
—Hawan ukhun sonqoyoqtan ruwawankichis, kay suyu Canaán runawan Fares runawan cheqnichiwaspaykichis. Pisi runallayoq kashaqtiyqa, contraypichá huñukunqaku hinaspa maqawanqaku, hinan ñoqaqa aylluypiwan wañuchisqa kasaq, nispa.
31Paykunataq ichaqa kutichirqanku:
—¿Payri panaykuta huk qhellipi puriq warmita hinachu rikunman karqan? nispa.
Currently Selected:
GÉNESIS 34: QC88
Highlight
Share
Copy
Want to have your highlights saved across all your devices? Sign up or sign in
Biblia en Quechua de Cuzco © Sociedades Bíblicas Unidas, 1988.
