JUAN 1

Diospa Siminpa runaman tukusqan

1Manaraq imapas kamasqa kashaqtinmi Simiqa karqanña, Simitaq Dioswan karqan, Simitaq Dios karqan. 2Payqa maypachamantapas Dioswanmi karqan. 3Tukuy imatapas paywanmi Diosqa ruwachirqan. Mana paywanqa manan ima kaqpas ruwasqachu karqan. 4Paymantan kawsayqa paqarirqan, chay kawsaytaq runakunaq k'anchaynin karqan. 5K'anchaymi laqhayaqta k'anchan, laqhayaqtaq k'anchayta mana tutayachirqanchu.

6Juan sutiyoq runatan Diosqa kachamurqan. 7Paymi willakuq hamurqan k'anchaymanta willakunanpaq, paypa willasqanwan llapa iñinankupaq. 8Manan Juanchu k'anchayqa karqan, aswanpas k'anchaymanta willananpaqmi hamurqan. 9Llapa runata k'anchaq cheqaq K'anchayqa kay pachamanmi chayamusharqanña.

10Chay Simin kay pachapi kasharqan, kay pachataq paypa ruwasqan karqan, runakunataq payqa pichus kasqanta mana repararqankuchu. 11Payqa llaqtanmanmi hamurqan, llaqta-masinkunataq payta mana chaskirqankuchu. 12Payta chaskispa paypi iñiqkunatan ichaqa Diospa wawankunaman tukuchipurqan. 13Diospa wawan kanankupaqqa manan runamantachu nacerqanku, manallataq runaq munayninman hinapaschu nacerqanku, aswanmi Diosmanta nacerqanku.

14Chay Simin runa kapurqan, hinaspan ñoqanchiswan tiyarqan. Paymi Yayaq sapallan Churin kaspa ancha musphanapuni karqan, ñoqanchistaq chayta rikurqanchis. Payqa ancha khuyakuqmi karqan, Diospa cheqaq-kaynintataq hunt'asqata rikuchirqan. 15Juanmi paymanta willakuspa kunkayoqta waqyakurqan: —Payqa qhepaytaña hamushan chaypas ñoqamantaqa aswan atiyniyoqmi, manaraq naceshaqtiy karqanpuniña chayrayku, nispa.

16Yayaq Churinmi ancha khuyakuq kaspa llapanchisman ancha askha saminchata qowarqanchis. 17Diosmi Moiseswan kamachikuy simita churachirqan, khuyapayakuyninta cheqaq-kaynintawanmi ichaqa Jesucristowan sut'inchachirqan. 18Manan pipas Diostaqa hayk'aqpas rikurqanchu, Yayaq sapallan Churinmi reqsichiwarqanchis, payqa Diosmi, Yayawan kuskataqmi tiyanpas.

Bautizaq Juanpa willasqan

(Mt 3.1-12; Mr 1.2-8; Lc 3.15-17)

19Jerusalén llaqtapi kaq Judío umallikunan sacerdotekunata, sacerdote yanapaq Leví runakunatawan kacharqanku Juanta pichus kasqanta tapunankupaq. 20Hinan Juanqa iman kaqta sut'inta willarqan: —Manan ñoqachu Diospa Akllasqan Cristoqa kani, nispa.

21Chaymi tapurqanku: —Chhaynaqa, ¿profeta*f** Eliaschu kanki? nispa.

Paytaq nirqan: —Manan paychu kani, nispa.

Nillarqankutaq: —Diosmi huk profetata*f** kachamunan karqan, ¿chaychu qanqa kanki? nispa.

Chaymi nillarqantaq: —Manan chaypaschu kani, nispa.

22Chaymi nirqanku: —Chay hinaqa, kachamuwaqniykuman willanaykupaq pipunichus kasqaykita willawayku. Qan kikiykiqa, ¿pi kasqaykitan ninki? nispa.

23Juantaq nirqan: —Profeta*f** Isaiasmi nirqan: Ch'inneqpin huk kunka waqyakun: Cheqanyachiychis Señor Diospa ñanninta, nispa. Chaymi ñoqaqa kani, nispa.

24Chay kachasqakunamanta wakinninkuqa fariseokunan*f** karqanku. 25Paykunan Juanta tapurqanku: —Manataq Diospa Akllasqan Cristopaschu, manataq Eliaspaschu, manallataq Diospa kachamunan karqan chay profetapaschu*f** kashaspaykiqa, ¿imanaqtintaq bautizanki? nispa.

26Chaymi Juanqa paykunata nirqan: —Ñoqaqa unullawanmi bautizani, ichaqa qankuna ukhupin huk runa kashan, paytan manaraq reqsinkichischu. 27Paymi chay “qhepaytan hamushan” nisqayqa. Ñoqaqa usut'a watullantapas manan paskanaypaq hinachu kani, nispa.

28Juanqa Jordán mayu inti lloqsimuy lado Betaniapin bautizasharqan, chaypin chaykuna sucederqan.

Runakunaq huchan pampachaq

29Qhepantin p'unchaymi Juanqa Jesusta payman hamushaqta rikuspa nirqan: —Qhawariychis, paymi Diosmanta hamuq runa, borrego hina wañuspa runakunaq huchankuta pampachaq. 30Paymi chay nisqay runaqa. Paymantan nirqani: Payqa qhepaytaña hamushan chaypas ñoqamantaqa aswan atiyniyoqmi, manaraq naceshaqtiy karqanpuniña chayrayku, nispa. 31Ñoqapas manan pichus pay kasqantaqa yacharqanichu, ichaqa Israel runakunaq payta reqsinanpaqmi unuwan bautizashani, nispa.

32Juanqa nillarqantaqmi: —Santo Espiritutan hanaq pachamanta urpita hina uraykamushaqta rikurqani Jesuspa uman altopi sayaykuqtawan. 33Ñoqaqa manaraqmi pichus pay kasqanta yacharqanichu, ichaqa unuwan bautizanaypaq kachamuwaqniy Diosmi niwarqan: Piqpa altonmanchus Santo Espíritu uraykamuspa sayaykuqta rikunki, chaymi Santo Espirituwan bautizaqqa, nispa. 34Ñoqan chayta rikurqani, hinaspan payqa Diospa Churin kasqanta willarqani, nispa.

Jesuspa ñawpaqkaq yachachisqankuna

35Qhepantin p'unchaymi Juanqa iskay yachachisqankunawan kashallarqantaq. 36Hinaspan Jesusta purishaqta rikuspa nirqan: —Qhawariychis, paymi Diosmanta hamuq runa, borrego hina wañuspa huchata qechuq, nispa.

37Chayta uyarispan Juanpa iskaynin yachachisqankunaqa Jesuspa qhepanta ripurqanku. 38Hinan Jesusqa kutirimuspa, paypa qhepanta rishasqankuta rikuspa nirqan: —¿Imatan munashankichis? nispa.

Paykunataq nirqanku: —Yachachikuq, ¿maypin tiyanki? nispa.

39Chaymi paykunata nirqan: —Hakuyá, rikumuychis, nispa.

Rispataq rikurqanku maypichus tiyasqanta, chay horaqa las cuatro hinañan karqan. Hinaspan paqarisninkama paywan qhepakurqanku.

40Juanpa rimasqanta uyarispa Jesuspa qhepanta iskay riqkunamanta hukninqa Simón Pedroq wawqen Andresmi karqan. 41Andresmi ñawpaqta tarirqan wawqen Simonta, hinaspa nirqan: —Mesiastan tarimuyku, nispa. (Mesías sutiqa Diospa Akllasqan Cristo ninantan nin).

42Andresmi Jesusman Simonta pusamurqan. Chaymi Simonta qhawaykuspa Jesusqa nirqan: —Qanqa Juanpa churin Simonmi kanki, kunanmantaqa Cefasmi sutiyki kanqa, nispa. (Cefas sutiqa Pedro ninantan nin).

Felipeta Natanaeltawan waqyasqan

43Qhepantin p'unchaymi Jesusqa Galileaman puriyta yuyaykurqan. Felipeta tarispataq nirqan: —Qhepayta hamuy, nispa.

44Felipeqa Betsaida llaqtamantan karqan. Chayllamantataqmi Andrespas Pedropas karqan. 45Felipen Natanaelta tarispa nirqan: —Pimantachus Moisesqa kamachikuy simipi qelqarqan, hinallataq profetakunapas*f** qelqarqan chaytan tarimuyku.

Paymi Nazaret llaqtamanta Josepa churin Jesusqa, nispa.

46Natanaeltaq payta nirqan: —Nazaret llaqtamantaqa, ¿ima allinpas kanmanchu? nispa.

Chaymi Felipeqa payta nirqan: —Haku, rikumunki, nispa.

47Jesustaq Natanaelpa hamusqanta rikuspa nirqan: —Kay hamuqqa cheqaq Israel runan, payqa manapunin pitapas q'otunchu, nispa.

48Natanaeltaq payta nirqan: —¿Imaynapin reqsiwanki? nispa.

Hinan Jesusqa nirqan: —Manaraq Felipe waqyamushasuqtiykin, higos sach'a k'uchupi kashaqta rikurqayki, nispa.

49Natanaeltaq nirqan: —Yachachikuq, qanqa Diospa Churinmi kanki, Israelpa Reyninmi kanki, nispa.

50Chaymi Jesusqa payta nirqan: —¿Higos sach'a k'uchupi kashaqtan rikurqayki niqtiychu iñinki? Kaykunamanta aswan musphana ruwasqakunataraqmi rikunki, nispa.

51Jesusqa nillarqantaqmi: —Cheqaqtapunin niykichis: Kunanmantan hanaq pachata kicharayashaqta rikunkichis, Diospa angelninkunatapas Diospa Kachamusqan Runaq patayta wichashaqta uraykamushaqtawan rikunkichis, nispa.

Currently Selected:

JUAN 1: QC88

Highlight

Copy