JUAN 2

Caná llaqtapi casarakuqmanta

1Iskay p'unchay qhepatataq Galilea provinciapi kaq Caná llaqtapi casarakuq karqan. Jesuspa mamanpas chaypin kasharqan. 2Jesuspas yachachisqankunapiwanmi casarakuqpaman waqyasqa karqan. 3Vino pisiqtinmi Jesuspa mamanqa Jesusta nirqan: —Manan vinonku kapunchu, nispa.

4Chaymi Jesusqa payta nirqan: —Mamáy, ¿imanaqtintaq chayta niwanki? Horayqa manaraqmi chayamunchu, nispa.

5Mamantaq serviqkunata nirqan: —Llapan nisqasuykichistan ruwankichis, nispa.

6Chaypin kasharqan Judío runakunaq ch'uyanchakuyninman hina unupaq soqta rumi urpukuna, sapankamanmi chunka hatun p'uyñu unu haykuq. 7Jesustaq serviqkunata nirqan: —Unuta hunt'achiychis kay urpukunaman, nispa.

Hinan hunt'atapuni hunt'achirqanku. 8Chaymantataq paykunata nirqan: —Kunanqa wisiychis, hinaspa despenseroman haywaychis, nispa.

Chaymi payman haywarqanku. 9Despenserotaq vinoman tukuchisqa unuta malliykuspa mana yacharqanchu maymantachus kasqanta, serviqkunan ichaqa yacharqanku unumanta wisimusqankuta. Chaymi despenseroqa noviota waqyaspa 10nirqan: —Llapa runan sumaq vinota ñawpaqtaqa haywan, allintaña ukyaqtinkutaq ima kaqllataña haywan, qanmi ichaqa sumaqkaq vinota kunankama waqaychasqanki, nispa.

11Chay ñawpaqkaq milagrotan Jesusqa ruwarqan Galileapi kaq Caná llaqtapi, ahinapin musphana atiyninta rikuchirqan, chaymi yachachisqankunaqa paypi iñirqanku.

12Chay qhepatataq Jesusqa mamantin, wawqenkunantin, yachachisqankunantin ima Capernaum llaqtaman rirqanku, hinaspan pisi p'unchaykunallata chaypi qhepakurqanku.

Dios yupaychana wasita Jesuspa ch'uyayachisqan

(Mt 21.12-13; Mr 11.15-17; Lc 19.45-46)

13Judío runakunaq Diospa Alqaspa Pasarparisqan Yuyarina Fiestan qayllaykamushaqtinmi Jesusqa Jerusalén llaqtaman wicharqan. 14Hinaspan Dios yupaychana wasi patiopi tarirqan torokuna, ovejakuna, urpikuna vendeqkunata, tiyaykuspa qolqe cambiaqkunatapas. 15Chaymi Jesusqa waskhamanta hasut'ita ruwarqospa qarqomurqan Dios yupaychana wasi patiomanta llapa ovejakunatapas torokunatapas, cambiaqkunaq mesankutapas tikrarparispan qolqenkuta hich'arparirqan. 16Urpi vendeqkunatapas nirqan: —¡Chaykunata kaymanta horqoychis! ¡Yayaypa wasintaqa ama qhatuna wasimanchu tukuchiychis! nispa.

17Hinaqtinmi yachachisqankunaqa Diospa Siminpi kay hina qelqasqata yuyarirqanku: Yupaychana wasiykitan wañuytapuni munakuni, niqta.

18Chaymi Judío umallikunaqa payta nirqanku: —Kaykunata ruwanaykipaq atiyniyoq kasqaykita yachanaykupaq milagrota rikuchiwayku, nispa.

19Jesustaq nirqan: —Thuniychis kay yupaychana wasita, kinsa p'unchaypitaqmi sayarirqochisaq, nispa.

20Judío umallikunataq nirqanku: —Tawa chunka soqtayoq watapin kay yupaychana wasiqa sayarichisqa karqan. ¿Qantaqchu kinsa p'unchayllapi sayarichiwaq? nispa.

21Jesusqa chayta nispaqa pay kikinpa cuerponmantan rimarqan. 22Chay rimasqantan yachachisqankunaqa wañusqanmanta Jesús kawsarimpuqtin yuyarirqanku, hinaspan Diospa Simin Qelqatapas Jesuspa nisqan simitapas creerqanku.

Llapa runata Jesuspa reqsisqan

23Diospa Alqaspa Pasarparisqan Yuyarina Fiesta Jerusalén llaqtapi kashaqtinmi Jesuspi askha iñirqanku, milagrokunata ruwasqanta rikuspa. 24Ichaqa kikin Jesusmi paykunapi mana confiakurqanchu, llapankuta reqsisqanrayku. 25Manataq necesitarqanchu pipas runamanta payman ima willanantapas, runapi ima kasqantapas pay yachasqanrayku.

Currently Selected:

JUAN 2: QC88

Highlight

Copy