JUAN 3

Jesuspa Nicodemowan rimasqan

1Huk runan karqan fariseokunamanta*f** Nicodemo sutiyoq, Judío runakunaq umallin. 2Paymi Jesusman tutalla rispa nirqan: —Yachachikuq, yachaykun yachachinaykipaq Diospa kachamusqasuykita. Manan pipas ruwasqayki milagrokunataqa ruwayta atinmanchu manachus Dios paywan kanman chayqa, nispa.

3Jesustaq payta nirqan: —Cheqaqtapunin niyki, pipas Diospa kamachikushasqanpi kananpaqqa wakmantan nacenan, nispa.

4Nicodemotaq payta nirqan: —¿Imaynataq runari yuyaqña kashaspa naceyta atinman? Icha, ¿mamanpa wiksanman kutiykuspachu wakmanta nacemunman? nispa.

5Jesustaq nirqan: —Cheqaqtapunin niyki, pipas Diospa kamachikushasqanpi kananpaqqa unumantawan Diospa Espiritunmantawanmi nacenan. 6Runamanta naceqqa runallan, Espiritumanta naceqpas espiritun. 7Ama musphaychu: “Wakmantan nacenaykichispuni” nisqaywanqa. 8Wayraqa may munasqanmantan wayramun, suenasqallantan uyarinki, manataqmi yachankichu maymanta hamusqantapas, maymanchus risqantapas, chay hinallataqmi Espiritumanta pipas naceqqa, nispa.

9Nicodemotaq payta tapurqan: —¿Imaynataq kayri kanman? nispa.

10Chaymi Jesusqa nillarqantaq: —¿Israel runakunata yachachiq kashaspachu qanqa chayta mana yachanki? 11Cheqaqtapunin niyki, ima yachasqaykutan rimayku, ima rikusqaykutataqmi willaykupas, willasqaykutataqmi mana chaskinkichischu. 12Kay pacha kaqkunamanta qankunaman nishaqtiy mana iñinkichischu chayqa, ¿imaynatataq iñiwaqchis hanaq pacha kaqkunamanta niykichisman chayqa?

13Manan pipas hanaq pachamanqa wicharqanchu, aswanpas hanaq pachamanta uraykamuqllan, paymi Diospa Kachamusqan Runa. 14Imaynan Moisesqa ch'inneqpi broncemanta mach'aqwayta warkurqan, chay hinallataqmi Diospa Kachamusqan Runapas warkusqa kanqa, 15pipas paypi iñiqqa wiñay kawsayniyoq kananpaq.

Diospa runakunata munakusqan

16Diosqa anchatapunin runakunata munakurqan, chaymi sapan Churinta qomurqan, pipas paypi iñiqqa ama wiñaypaq wañunanpaq, aswanpas wiñaypaq kawsananpaq. 17Diosqa kay pachaman Churinta kachamurqan manan runakunata huchachananpaqchu, aswanmi runakunata qespichinanpaq.

18Diospa Churinpi iñiqqa manan huchachasqachu, paypi mana iñiqmi ichaqa huchachasqaña, Diospa sapan Churinpi mana iñisqanrayku. 19Kaymi huchachayqa: K'anchaymi kay pachaman hamurqan, runakunataq laqhayaqta aswanta munakurqanku, ruwasqanku mana allin kasqanrayku. Chaymi Diosqa paykunata huchachan. 20Pipas mana allinkaqta ruwaqqa k'anchaytan cheqnikun, manataq k'anchayman hamunchu, ruwasqankuna mana sut'inchasqa kananpaq. 21Cheqaqkaqta ruwaqmi ichaqa k'anchayman hamun, chhaynaqa k'anchaymi rikuchin ruwasqankunaqa Diospa yanapasqan kasqanta, nispa.

Juanpa Cristota hatunchasqan

22Chay qhepatan Jesusqa yachachisqankunapiwan Judea ladoman rirqan, chaypi paykunawan qhepakuspataq runakunata bautizarqan. 23Juanpas bautizallarqantaqmi Salim qaylla Enonpi, askha unu chaypi kasqanrayku. Runakunan rispa bautizachikurqanku. 24Juanqa manaraqmi carcelman wisq'asqachu karqan.

25Juanpa wakin yachachisqankunataq ch'uyanchakuymanta Judío-masin runawan tapunakurqan. 26Juanman rispataq nirqanku: —Yachachikuq, Jordán mayu inti lloqsimuy ladopin huk runa qanwan karqan, paymantan qanqa willawarqankiku, kunanqa paymi bautizashan, llapallataqmi payman rishanku, nispa.

27Hinan Juanqa nirqan: —Manan runaqa imatapas chaskiyta atinmanchu Dios payman mana qoqtinqa. 28Qankuna kikiykichismi uyariwarqankichis: Manan ñoqachu Diospa Akllasqan Cristoqa kani, aswanpas paypa ñawpaqenta Diospa kachamusqallanmi kani, nispa nisqayta. 29Casarakuypiqa noviollan noviayoqqa, novioq amigontaq paypa rimasqanta uyarispa sinchitapuni q'ochukun, chay hinan ñoqapas sinchitapuni q'ochukushani. 30Payqa aswan-aswan reqsisqan kanan, ñoqataqmi manaña ancha resisqachu kanay, nispa.

Hanaq pachamanta hamuq

31Hanaq pachamanta hamuqqa lliwpa qollananmi, kay pachamanta kaqqa kay pachallamantan, kay pacha kaqkunallamantataq rimanpas. Hanaq pachamanta hamuqmi ichaqa lliwpa qollanan. 32Payqa imachus rikusqantan uyarisqantan willakun, manataq pipas willakusqantaqa chaskinchu. 33Willakusqanta chaskiqmi ichaqa, Diospa nisqanta cheqaqpaq hap'in. 34Diospa kachamusqanqa Diospa siminkunatan riman, Diosqa Espiritunta mana mich'akuspan payman qon. 35Yayaqa Churintan munakun, chaymi lliwta qorqan pay kamachikunanpaq. 36Churipi iñiqqa wiñay kawsayniyoqmi, Churipi mana iñiyta munaqmi ichaqa chay kawsayman mana haykunqachu, aswanmi Diospa phiñakuynin paypaqqa kaqlla kashan, nispa.

Currently Selected:

JUAN 3: QC88

Highlight

Copy