JUAN 4
4
Samaria warmiwan Jesuspa rimasqan
1Fariseokunan*f** uyarisqaku: Juanpa yachachisqankunaqa pisillan, Jesusmi yachachisqakunata askhayachishan bautizashanpas, nispa, nisqata. 2Kikin Jesusqa manan bautizarqanchu, aswanpas yachachisqankunallan. 3Fariseokunaq*f** rimasqanta yachaspan Jesusqa Judeamanta lloqsispa Galileaman kutipurqan. 4Samaria provinciantapunin pasanan karqan. 5Hinaspan Samariapi Sikar nisqa llaqtaman chayarqan, Jacobpa José churinman chakrata qosqan qayllaman. 6Chaypin Jacobpa p'uytun nisqa karqan. Jesusmi purimusqanpi sayk'usqa kaspa p'uytu patapi tiyaykurqan. Chawpi p'unchay hinan karqan.
7-8Yachachisqankunaqa llaqtatan rirqanku mikhunata rantimuq. Chayllamanmi Samaria llaqtayoq warmi unu aysakuq hamurqan, paytan Jesusqa nirqan: —Unuta ukyaykachiway, nispa.
9Chaymi Samaria warmiqa payta nirqan: —¿Imaynan qanqa Judío runa kashaspa ñoqamanta unuta mañakuwanki, Samaria warmi kashaqtiy? nispa. (Judío runakunaqa Samaria runakunaq ukyasqanpiqa manan ukyaqkuchu).
10Hinan Jesusqa payta nirqan: —Diospa qonasuykitachus yachawaq, “ukyaykachiway” niqniykitapas reqsiwaq chayqa, qanchari ñoqamanta mañakuwankiman, ñoqataq kawsachiq unuta qoykiman, nispa.
11Warmitaq nirqan: —Wiraqocháy, manamá imawan aysanaykipas kanchu, p'uytupas ukhutaq. ¿Maymantataq chay kawsachiq unuta qowankiman? 12¿Kurakchu kanki Jacob machulaykumanta? Paymi kay p'uytuta saqewarqanku, kaymantan paypas wawankunapas uywankunapas ukyarqan, nispa.
13Jesustaq payta nirqan: —Pipas kay unuta ukyaqqa wakmantan ch'akichikunqa. 14Ñoqa qosaq chay unuta ukyaqmi ichaqa manaña hayk'aqpas ch'akichikunqachu, aswanmi ñoqa qosaq chay unuqa phullpumuq unu pukyu hina paypi kanqa, hinaspa wiñay kawsayta qonqa, nispa.
15Chaymi warmiqa nirqan: —Wiraqocháy, chay unuta qoykuway, amaña ch'akichikunaypaq, amañataq kaykama aysakuq hamunaypaqpas, nispa.
16Hinan Jesusqa payta nirqan: —Phaway, qosaykita waqyarqamuy, nispa.
17Warmitaq nirqan: —Manan qosayqa kanchu, nispa.
Hinan Jesusqa nirqan: —Allintan ninki: Manan qosayqa kanchu, nispayki. 18Phisqa qosayoqmi karqanki riki, kunan qanwan tiyaqqa manan qosaykichu, chaytaqa cheqaqtan ninki, nispa.
19Chaymi warmiqa nirqan: —Wiraqocháy, profetamá*f** qanqa kasqanki. 20Kay orqopin machulaykuqa Diosta yupaycharqanku, qankunataq “Jerusalén llaqtapin yupaychananchisqa” ninkichis, nispa.
21Jesustaq payta nirqan: —Warmi, creeway, tiempon chayamushan, manan kay orqopichu, manallataq Jerusalén llaqtapipaschu Yayata adoranaykichis. 22Qankunaqa mana entiendesqaykichistan yupaychankichis, ñoqaykun ichaqa pitachus reqsisqaykuta yupaychayku. Judío runakunamantan Diospa kachamusqan qespichiqqa hamun. 23Ichaqa tiempon chayamushan, chayarqamunñan, chay pachan cheqaq yupaychaqkunaqa Yayata yupaychanqaku Diospa Espiritunpa yanapasqan Diospa kayninman hinapuni, Yayaqa chay hina yupaychaqkunatan munan payta yupaychanankupaq. 24Diosqa Espiritun, payta yupaychaqkunaqa Diospa Espiritunpa yanapasqan Diospa kayninman hinapunin yupaychananku, nispa.
25Warmitaq nirqan: —Yachanin Diospa Akllasqan Cristo nisqa Mesiaspa hamunanta, paymi hamuspan lliw imaymanata sut'inchawanqaku, nispa.
26Hinan Jesusqa nirqan: —Ñoqa rimapayaqniykin chay Mesiasqa kani, nispa.
27Chay raton yachachisqankunaqa hamurqanku, hinaspan warmiwan rimasqanmanta muspharqanku, ichaqa manan mayqenpas warmita nirqanchu: ¿Imatan munanki? nispa. Manallataq Jesustapas nirqanchu: —¿Imatan paywan rimashanki? nispapas.
28Hinaqtinmi warmiqa p'uyñunta saqerparispa llaqtata rirqan, hinaspan runakunaman willamurqan: 29—Hamuychis, lliw ruwasqaykunata niwaqniy runata rikumuychis. ¿Paychu icha Diospa Akllasqan Cristoqa kanman? nispa.
30Chaymi llaqtamanta lloqsispa Jesuspa kasqanman hamurqanku. 31Chaykamataq yachachisqankunaqa Jesusta rogarqanku: —Yachachikuq, mikhuykuy, nispanku.
32Jesustaq ichaqa yachachisqankunata nirqan: —Ñoqaq mikhunayqa qankunaq mana reqsisqaykichis mikhunan kashan, nispa.
33Chaymi yachachisqankunaqa ninakurqanku: —¿Pipaschá mikhunata payman apamurqan? nispa.
34Jesustaq paykunata nirqan: —Mikhunayqa kachamuwaqniy Yayaq munayninta ruwaspa paypa ruwananta hunt'anaymi. 35Qankunan ninkichis: Tawa killaraqmi ichhunapaqqa kashan, nispa. Ñoqataq niykichis: Chakrakunata allinta qhawariychis, ichhunapaqmi poqosqaña kashan. 36Ichhuqqa Diosmantan pagota chaskin, hinaspan ruruta hina wiñay kawsaypaq huñun, ahinatan t'akaqpas ichhuqpas kuska kusikunqaku. 37Chay hinapin: Hukmi t'akan, huktaq ichhun, nispa nisqaqa cheqaqpuni. 38Mana llank'asqaykichismanmi ichhumunaykichispaq kacharqaykichis, hukkunan llank'arqanku, qankunataq llank'asqankuman haykurqankichis, nispa.
39Chay llaqtapi Samaria runakunataq Jesuspi askha iñirqanku: Lliw ruwasqaykunatan niwan, nispa warmiq nisqanrayku. 40Chaymi Samaria runakunaqa Jesusman hamuspa paykunawan qhepakunanpaq rogakurqanku. Hinan chaypi payqa iskay p'unchayta qhepakurqan. 41Jesuspa siminta uyarispataq aswan askha iñirqanku. 42Chaymi warmita nirqanku: —Manañan qanpa nisqallaykiwanchu Jesuspi iñiyku, kikiykun uyarimuyku, hinaspan yachayku payqa cheqaqtapuni lliw runakunata Qespichiq Cristo kasqanta, nispa.
Oficialpa churinta qhaliyachisqan
43Iskay p'unchay qhepatataq chaymanta lloqsispa Jesusqa Galilea provinciaman rirqan. 44Kikin Jesusmi rimarisqa: Profetaqa*f** llaqtanpin pisichasqa kashan, nispa. 45Galileaman chayaqtintaq chaypi kaqkunaqa payta chaskirqanku, Jerusalén llaqtaman rispa fiestapi paypa imaymana ruwasqanta rikusqankurayku.
46Jesusqa wakmantan Galileapi kaq Caná llaqtaman rirqan, unuta vinoman tukuchisqan llaqtaman. Chaykamataq Capernaum llaqtapi reypa huknin oficialninpa churin onqosharqan. 47Chay oficialmi Judeamanta Galileaman Jesuspa chayasqanta yachaspa Jesusman rirqan, hinaspan rogakurqan Canamanta Capernaumman uraykuspa wañunayashaq churinta qhaliyachimunanpaq. 48Chaymi Jesusqa payta nirqan: —Manachus musphana milagrokunatapas rikunkichis chayqa, manan ñoqapi iñiwaqchischu, nispa.
49Reypa oficialnintaq payta nirqan: —Ama hinachu kay, uraykuypuni, manaraq churiy wañurqoshaqtin, nispa.
50Hinan Jesusqa nirqan: —Ripuy, churiykiqa kawsashanmi, nispa.
Chaymi runaqa Jesuspa nisqanta creerqan, hinaspan ripurqan. 51Oficial Capernaum llaqtaman uraykushaspataq kamachinkunawan tuparqan, chaymi willarqanku: —Churiykiqa kawsashanmi, nispa.
52Hinan paykunata tapurqan ima horastachus qhaliyasqanta. Paykunataq nirqanku: —Qayna p'unchay doce wasapayta hinan fiebre onqoyqa thanirqapurqan, nispa.
53Chaymi taytaqa repararqan chay horasta: Churiykiqa kawsashanmi, nispa, Jesuspa nisqanta, hinaspan payqa llapa familiantin Jesuspi iñirqan.
54Chay iskaykaq milagrotan Jesusqa ruwarqan Judeamanta Galileaman kutispa.
Currently Selected:
JUAN 4: QC88
Highlight
Share
Copy
Want to have your highlights saved across all your devices? Sign up or sign in
Biblia en Quechua de Cuzco © Sociedades Bíblicas Unidas, 1988.
