JUAN 10
10
Oveja michiqmanta rikch'anachiy simi
1Jesusmi nirqan: —Cheqaqtapunin niykichis: Pipas oveja kanchaman mana punkunta haykuspa wakninta haykuqqa suwataq llat'anaqtaq. 2Pipas punkunta haykuqmi ichaqa oveja michiq. 3Pay haykunanpaqmi punku qhawaqqa kicharin, ovejakunapas kunkantaqa uyarinmi. Michiqtaq ovejankunata sutinmantakama waqyaspa hawaman pusamun. 4Llapan ovejankunata hawaman pusamuspataq ñawpaqenkuta rin, ovejakunataq qhepanta rinku kunkanta reqsisqankurayku. 5Mana reqsisqaq qhepantan ichaqa mana rinqakuchu, aswanmi paymanta ayqenqaku, wak runakunaq kunkanta mana reqsisqankurayku, nispa.
6Chay rikch'anachiy simitan Jesusqa paykunaman nirqan, paykunataq ichaqa imatachus nisqanta mana entienderqankuchu.
Jesusmi allin michiq
7Jesusqa nillarqantaqmi: —Cheqaqtapunin niykichis: Ñoqan ovejakunapaq punku kani. 8Manaraq ñoqa hamushaqtiy lliw hamuqkunaqa suwakunan llat'anaqkunan karqan, ovejakunan ichaqa mana paykunata uyarirqankuchu. 9Ñoqan punku kani, pipas ñoqanta haykuqqa qespichisqan kanqa, hinaspan haykunqa lloqsinqa, q'achutapas tarinqa.
10Suwaqa hamun suwakunallanpaq, wañuchinallanpaq, tukunallanpaqwan, ñoqan ichaqa hamuni kawsanankupaq, t'ikarishaq kawsayniyoq kanankupaqwan. 11Ñoqan allin michiqqa kani. Allin michiqqa ovejankunaraykun wañuytapas mana manchanchu. 12Mink'asqa michipakuqmi ichaqa ovejakunaq mana dueñon kaspa, loboq hamushasqanta rikuspa ovejakunata saqerparispa ayqerikun, lobotaq ovejakunata hap'ispa ch'eqechin. 13Ahinaqa michipakuqqa ayqenmi, mink'asqa kasqanrayku, manataq ovejakunamantaqa imapas qokunchu.
14-15Ñoqan allin michiqqa kani. Imaynan Yaya reqsiwan, ñoqapas Yayata reqsillanitaq, ahinatan ovejaykunata reqsini, ovejaykunapas reqsiwankutaq. Paykunaraykutaq wañuytapas mana manchanichu. 16Wak ovejaykunapas kallantaqmi, mana kay t'aqamanta kaqkuna, paykunatapas pusamunaymi, hinan kunkayta uyarinqaku, ch'ulla t'aqallataq kanqa, huk michiqnillayoq.
17Ñoqaqa wañuspa kawsarimpunaypaq liston kashani, chaymi Yayaqa munakuwan.
18Manan pipas wañuchiwanqachu, aswanpas ñoqa kikiymi wañusaq. Atiyniyoqmi kani wañunaypaqpas kawsarimpunaypaqpas. Yayaymi chaytaqa kamachimuwarqan, nispa.
19Hinan runakunaqa chay simikunata uyarispanku wakmanta yuyayninkuta mana tupachirqankuchu. 20Askha runakunan nirqanku: —Supaypa hunt'aykusqanmi, waq'an, ¿imapaqmi uyarinkichis? nispanku.
21Wakintaq nirqanku: —Kay simikunaqa manan supaypa hunt'aykusqan runaqchu, ¿atinmanchu supayqa ñawsakunaq ñawin kichariyta? nispa.
Runakunaq Jesusta mana chaskisqanku
22Para tiempopin Jerusalén llaqtapi Dios yupaychana wasi Ch'uyanchay Fiesta nisqa karqan. 23Jesustaq Dios yupaychana wasipi purisharqan, Salomón nisqa portalninta. 24Chaymi runakunaqa Jesusta muyuykuspa nirqanku: —¿Hayk'aqkaman iskayrayachiwankiku? Diospa Akllasqan Cristopuni kaspaykiqa sut'inta willawayku, nispa.
25Hinan Jesusqa paykunata nirqan: —Nirqaykichisñan, manataq creewarqankichischu. Yayaypa atiy qowasqanwanmi imaymanata ruwani, chaykunan ñoqamanta willakun. 26Qankunan ichaqa mana iñinkichischu mana ovejaykuna kasqaykichisrayku. 27Ovejaykunaqa kunkaytan uyarinku, ñoqapas paykunataqa reqsinin, qhepaytataq purinkupas. 28Ñoqan wiñay kawsayta paykunaman qoni, manan wiñaypaqchu wañunqaku, manataq pipas paykunataqa makiymanta qechuwanqachu. 29Paykunata qowaqniy Yayayqa llapamanta atiyniyoqmi, Yayaypa makinmantaqa manataqmi pipas paykunata qechuyta atinchu. 30Ñoqawan Yayawanqa hukllan kayku, nispa.
31Chaymi runakunaqa wakmanta rumita hoqarirqanku payta ch'aqenankupaq. 32Hinan Jesusqa paykunata nirqan: —Yayaypa atiy qowasqanwanmi askha musphana milagrokunata rikushasqaykichis ruwarqani, ¿mayqenkaqmantataq ch'aqewankichis? nispa.
33Runakunataq payta nirqanku: —Manan allin ruwasqaykimantachu ch'aqesqaykiku, aswanpas Dios contra rimaspa pisichasqaykimantan, runalla kashaspayki Dioswan kuskachakusqaykimantawanmi, nispa.
34Jesustaq paykunata nirqan: —Kamachikuy simi qelqaykichispin nin: Diosqa nirqan: Qankunaqa dioskunan kankichis, nispa. 35Diospa Simin Qelqaqa manan yanqayachisqa kanmanchu. Diospa Siminta uyariq runakunatan Diosqa “dioskuna” nispa suticharqan. 36Ñoqatan Yayaqa akllaspa kay pachaman kachamuwarqan, chaymi ñoqaqa: Diospa Churinmi kani, nini. Chay hinaqa, ¿imanaqtintaq niwankichis: Dios contra rimaspan pisichanki, nispa?
37Yayaypa ruwasqankunata mana ruwaqtiyqa, ama iñiwaychischu. 38Chaykunatachus ruwani chayqa, ñoqapi mana iñispapas, ruwasqaykupiyá iñiychis, Yayawan ñoqawanqa huklla kasqaykuta yachaspa entiendenaykichispaq, nispa.
39Hinaqtinmi runakunaqa huktawan hap'irqoytapuni munarqanku, Jesustaq ichaqa qayllankumanta chinkarqapurqan.
40Jesusqa Jordán mayuta chimpaspa kutillarqantaqmi ñawpaqta Juanpa bautizashasqan cheqasman, hinaspan chaypi qhepakurqan. 41Askha runakunan Jesusman rirqanku, hinaspan nirqanku: —Juanqa manan ima milagrotapas ruwarqanchu, ichaqa Jesusmanta Juanpa tukuy ima nisqanmi cheqaqpuni karqan, nispa.
42Chaypin askha runakuna Jesuspi iñirqanku.
Currently Selected:
JUAN 10: QC88
Highlight
Share
Copy
Want to have your highlights saved across all your devices? Sign up or sign in
Biblia en Quechua de Cuzco © Sociedades Bíblicas Unidas, 1988.
