JUAN 19

1Hinaqtinmi Pilatoqa Jesusta hap'iykachispa suq'achirqan. 2Soldadokunataq khiska pilluta simp'aspa umanman churarqanku, hinaspan sani-puka p'achawan p'achaykachirqanku. 3Chaymantataq nirqanku: —¡Kawsachun Judío runakunaq Reynin! nispa. Hinaspan ch'aqlarqanku.

4Pilatotaq wakmanta hawaman lloqsispa runakunata nirqan: —Qhawariychis, qankunamanmi Jesusta horqomuni, mana ima huchachaytapas paypi tarisqayta yachanaykichispaq, nispa. 5Jesustaq khiska pilluyoq, sani-puka p'achayoq lloqsimurqan. Hinan Pilatoqa nirqan: —¡Kayqa chay runa! nispa.

6Sacerdote umallikunataq Dios yupaychana wasi qhawaqkunapiwan Jesusta rikuspa qaparkacharqanku: —¡Chakatay, chakatay! nispa.

Chaymi Pilatoqa paykunata nirqan: —Qankuna apaychis, hinaspa chakatamuychis, ñoqaqa manan ima huchatapas paypiqa tarinichu, nispa.

7Runakunataq payta nirqanku: —Ñoqaykuqqa kanmi kamachikuy simiyku, chayman hinan wañunan, “Diospa Churinmi kani” nisqanmanta, nispa.

8Pilatotaq chay nisqankuta uyarispa, astawan mancharikurqan. 9Hinaspan wasinman kutiykuspan Jesusta tapurqan: —Qanqa, ¿maymantan kanki? nispa.

Jesustaq ichaqa mana ima nirqanpaschu. 10Hinan Pilatoqa payta nirqan: —¿Manachu ñoqapaq rimarinki? ¿Manachu yachanki qanta kacharinaypaqpas chakatanaypaqpas atiyniyoq kasqayta? nispa.

11Chaymi Jesusqa nirqan: —Manan ima atiyniykipas ñoqa contraqa kanmanchu, manachus Dios qosunkiman chayqa. Chaymi qanman entregawaqniyqa aswan huchayoq qanmantaqa, nispa.

12Chaymantapachan Pilatoqa kacharipuytapuni munarqan, runakunan ichaqa qaparkacharqanku: —Chay runata kacharinki chayqa, manan hatun rey Cesarpa amigonchu kanki. Pipas “reymi kani” niqqa rey César contran, nispa.

13Hinaqtinmi Pilatoqa chayta uyarispa hawaman Jesusta pusachirqan, hinaspan juzganapi tiyaykurqan, Rumiwan Mast'asqa nisqa cheqaspi, Hebreo rimaypitaq Gabata nisqa. 14Chayqa Diospa Alqaspa Pasarparisqan Yuyarina Fiesta ñawpaqnin p'unchaymi karqan, chawpi p'unchay hinaña. Pilaton runakunata nirqan: —¡Kayqa Reyniykichis! nispa.

15Paykunataq ichaqa qaparkacharqanku: —¡Wañuchun! ¡Wañuchun! ¡Chakatay! nispa.

Chaymi Pilatoqa paykunata nirqan: —¿Reyniykichistachu chakatasaq? nispa. Sacerdote umallikunataq nirqanku: —Manan wak reyniykuqa kanchu, aswanpas rey Cesarllan, nispa.

16Hinaqtinmi soldadokunaman hap'iykachirqan chakatasqa kananpaq.

Jesusta chakatasqanku

(Mt 27.32-44; Mr 15.21-32; Lc 23.26-43)

Chaymi soldadokunaqa Jesusta aparqanku. 17Jesustaq cruzninta apaspa, Calaverayoq Pata nisqaman lloqsirqan, chaytan Hebreo rimaypiqa “Gólgota” ninku. 18Chaypin Jesusta chakatarqanku iskay runa chawpipi hukta pañanpi huktataq lloq'enpi. 19Pilaton huk qelqata qelqaspa cruz pataman churachirqan. Chay qelqasqan nirqan: Nazaret llaqtayoq Jesús, Judío runakunaq Reynin, nispa. 20Jesusta chakatasqanku cheqasqa llaqta qayllan karqan, chaymi askha runakuna chay qelqasqata leerqanku. Chay qelqasqaqa karqan Hebreo rimaypi, Griego rimaypi, Latín rimaypi ima. 21Hinan sacerdote umallikunaqa Pilatota nirqanku: —Ama Judío runakunaq Reynin, nispaqa qelqaychu, aswanpas paypa: Judío runakunaq Reyninmi kani, nisqanta qelqayqa, nispa.

22Chaymi Pilatoqa nirqan: —Qelqasqayqa qelqasqan, nispa.

23Soldadokunataq Jesusta chakataspaña, p'achankunata hap'ispa tawaman rakirqanku, sapanka soldadopaq huktakama. Hinallataq ukhunantapas hap'irqanku, chay ukhunaqa mana sirayniyoqmi karqan, wichaymantapacha huk awaylla. 24Chaymi paykunaqa ninakurqanku: —Ama llik'isunchu, aswanpas sorteallasun, mayqenpaqchá kanqa, nispa. Chay hinapin Diospa Simin hunt'akurqan, chaypin nin:

P'achaykunatan rakinakurqanku,

p'achaypaqmi sortearqanku, nispa.

Soldadokunataq chay hinatapuni ruwarqanku.

25Jesuspa cruznin qayllapin sayasharqanku Jesuspa mamanpas, mamanpa ñañanpas, Cleofaspa warmin Mariapas, Magdalá llaqtayoq Mariapas. 26Hinan Jesusqa mamanta munasqan yachachisqantawan chaypi sayashaqta rikuspan mamanta nirqan: —Mamáy, chayqa wawayki, nispa.

27Yachachisqantapas nillarqantaqmi: —Chayqa mamayki, nispa.

Hinan yachachisqanqa chay ratopacha Mariata wasinman pusakapurqan.

Jesuspa wañusqanmanta

(Mt 27.45-56; Mr 15.33-41; Lc 23.44-49)

28Chay qhepatataq Jesusqa tukuy imaymana hunt'asqaña kasqanta yachaspa Diospa Simin Qelqa hunt'akunanpaq nirqan: —Ch'akishawanmi, nispa.

29Chaypin kasharqan huk vaso hunt'a p'osqo vino, hinan paykunaqa esponjata chay p'osqo vinoman challpuykuspa huk k'aspipi Jesuspa siminman aypachirqanku. 30Chaymi Jesusqa p'osqo vinota ch'onqaykuspaña nirqan: —Lliwmi tukusqaña, nispa.

Umanta k'umuykuspataq wañukapurqan. 31Chay p'unchayqa samana p'unchaypaq wakichikunan karqan, chay samana p'unchayqa hatun p'unchaymi karqan. Chaymi Judío umallikunaqa samana p'unchaypi ama cruzpi ayakuna qhepananpaq Pilatota valekurqanku, chakinkunata p'akispa apanankupaq. 32Hinan soldadokunaqa hamuspa ñawpaqkaqpa chakinta p'akirqanku, hinallataq chay hukkaq chakatasqaq chakintapas. 33Jesusman asuykuspataq ichaqa, wañusqataña rikuspa manaña chakinta p'akirqankuchu. 34Ichaqa huknin soldadon Jesuspa waqtanninta t'urpurqan, kaq ratotaq phawamurqan yawarwan unuwan. 35Chaytaqa rikuqpunin willakun qankunapas iñinaykichispaq, willakusqanqa cheqaqpunin, paymi yachan cheqaq nisqanta. 36Chaykunaqa karqan: Manan tullunqa p'akisqachu kanqa, niq Diospa Simin Qelqa hunt'akunanpaqmi. 37Chay hinallataq huknin Qelqapas nin: Qhawanqakun t'urpusqanku runata, nispa.

Jesusta p'ampasqanku

(Mt 27.57-61; Mr 15.42-47; Lc 23.50-56)

38Chaykuna qhepatataq Arimatea llaqtayoq Joseqa Pilatota valekurqan Jesuspa cuerponta apananpaq, chaymi Pilatoqa uyakurqan. Joseqa Jesuspa huknin yachachisqanmi karqan, ichaqa pakallapi, Judío umallikunata manchakusqanrayku. Hinan Joseqa rispa Jesuspa cuerponta aparqan. 39Ñawpaqta Jesusman tutalla hamuq Nicodemopas rillarqantaqmi qanchis chunka librata hina mirrata aloetawan*f** chhaqrusqata aparikuspa. 40Josewan Nicodemowanmi Jesuspa cuerponta wantuspa q'apaqkunawan hawispa sumaq telakunapi p'istuykurqanku, Judío runakunaq p'ampanakuyta yachasqankuman hina. 41Chakatasqa kasqan cheqaspin huerta karqan, chaypin huk mosoq p'ampana t'oqo karqan, chaypiqa manaraqmi pipas p'ampasqachu karqan. 42Chaymanmi Jesuspa cuerponta churaykurqanku chay p'ampana t'oqo qayllallapi kasqanrayku, samana p'unchaypaq wakichikuna p'unchay kashasqanraykupiwan.

Currently Selected:

JUAN 19: QC88

Highlight

Copy