JUAN 8
8
1Jesustaq Olivos orqoman rirqan. 2Hinaspan pacha illarimuyta Dios yupaychana wasiman kutimurqan, hinan llapa runakuna Jesusman qayllaykurqanku, tiyaykuspataq paykunata yachachirqan.
3Kamachikuy simita yachachiqkunan fariseokunapiwan*f** wasanchay huchapi hap'isqa warmita Jesusman apamurqanku, hinaspan chawpipi sayaykachispa 4payta nirqanku: —Yachachikuq, kay warmitan wasancha hucha ruwashaqta hap'irqamuyku. 5Moisesmi kamachikuy simipi kamachiwarqanku chay hina warmikunataqa ch'aqenaykupaq, qanri, ¿ima ninkitaq? nispa.
6Chaytaqa nirqanku wateqaspa Jesusta huchachanankupaqmi. Jesustaq ichaqa pampaman k'umuykuspa hallp'a pampapi dedonwan qelqasharqan. 7Anchatapuni tapupayaqtinkutaq sayarispa paykunata nirqan: —Mayqenniykichispas mana huchayoq kaqqa ñawpaqta rumiwan warmita ch'aqeychis, nispa.
8Hinaspan yapamanta pampaman k'umuykuspa, hallp'api qelqasharqan. 9Paykunataq chayta uyarispa, concienciankuq huchachasqan ch'ulla-ch'ullamanta lloqsirqanku, kurak runakunamantapacha qallarispa, Jesustaq sapallan qheparqan, warmipas kaq sayashasqanpi. 10Hinan Jesusqa sayarispa mana pitapas rikurqanchu, aswanpas warmillata, hinaspan nirqan: —Warmi, ¿maytaq chay huchachaqniykikunari? ¿Manachu pipas huchachasunki? nispa.
11Chaymi warmiqa nirqan: —Wiraqocháy, manan pipas huchachawanchu, nispa.
Hinan Jesusqa payta nirqan: —Manan ñoqapas huchachaykichu, ripuy, amaña astawanqa huchallikuychu, nispa.#7.53-8.11: Griego rimaypi wakin qelqakunapiqa kay versiculokunaqa manan rikhurinchu, wakin qelqakunapitaq huk cheqaspi rikhurin.
Jesusmi runakunapaq k'anchay
12Jesusmi paykunata nillarqantaq: —Ñoqan lliw runakunapaq k'anchay kani, pipas qhepayta hamuqqa manan laqhayaqpichu purinqa, aswanmi kawsachiq k'anchayniyoq kanqa, nispa. 13Hinaqtinmi fariseokunaqa*f** payta nirqanku: —Qanqa kikiykimantan willakunki, willakusqaykiqa manan cheqaqchu, nispa.
14Chaymi Jesusqa paykunata nirqan: —Ñoqa kikiymantaña willakuni chaypas, willakusqayqa cheqaqmi, yachanin maymantachus hamusqayta, maymanchus risqaytapas, qankunan ichaqa mana yachankichischu maymantachus hamusqayta, maymanchus risqaytapas. 15Qankunaqa runakuna hinallan juzgankichis, ñoqaqa manan pitapas juzganichu. 16Juzgani chayqa, juzgayniyqa cheqaqmi, manan sapallaychu kashani, aswanpas kachamuwaqniy Yayaypiwanmi. 17Kamachikuy simi qelqaykichisman hinaqa iskay testigoq willakusqan tupaqtinqa cheqaqmi. 18Ñoqan kani kikiymanta willakuqqa, kachamuwaqniy Yayapas ñoqamantataqmi willakun, nispa.
19Chaymi payta nirqanku: —¿Maypitaq Yayaykiqa kashan? nispa.
Jesustaq nirqan: —Manataq ñoqatapas reqsiwankichischu chayqa, manallataqmi Yayaytapas reqsinkichischu, ñoqata reqsiwankichisman chayqa, Yayaytapas reqsiwaqchismi, nispa.
20Chay simikunatan Jesusqa Dios yupaychana wasipi yachachishaspa alcanciaq kasqanpi rimarqan, manataq pipas payta hap'irqanchu, tiempon manaraq chayamusqanrayku.
“Ñoqaq risqaymanqa manan hamuyta atiwaqchischu” nispa Jesuspa nisqan
21Jesusmi paykunata nillarqantaq: —Ñoqa ripuqtiymi maskhawankichis, hinaspan huchaykichispi wañunkichis, ñoqaq risqaymanqa manan chayayta atiwaqchischu, nispa.
22Hinan Judío umallikunaqa nirqanku: —Ñoqaq risqaymanqa manan chayayta atiwaqchischu, nispa nishaspaqa, ¿icha kikillanchu wañuchikunqa? nispa.
23Chaymi Jesusqa paykunata nirqan: —Qankunaqa kay pachamantan kankichis, ñoqataq hanaq pachamanta kani. Qankunaqa kay pachamantan kankichis, ñoqaqa manan kay pachamantachu kani. 24Chaymi nirqaykichis: Huchaykichispin wañunkichis, nispa. Pichus ñoqa kasqayta mana iñinkichis chayqa, huchaykichispin wañunkichis, nispa.
25Hinan paykunaqa tapurqanku: —¿Pitaq qanri kanki? nispanku.
Chaymi Jesusqa nirqan: —Qallariymantapachañan pichus kasqaytaqa nishaykichis. 26Askhan qankunamanta ninay kashan huchachanaypaq. Ichaqa kachamuwaqniymi cheqaqta nin, ñoqataq paypa niwasqallanta runakunaman willani, nispa.
27Paykunaqa manan entienderqankuchu Yayamanta nisqantaqa. 28Hinaqtinmi Jesusqa paykunata nirqan: —Diospa Kachamusqan Runata chakatawaspaykichisñan entiendenkichis pichus ñoqa kasqaytaqa. Tukuy imatapas manan ñoqa kikillaymantachu ruwani, aswanpas Yayaq yachachiwasqallantan willaykichis. 29Kachamuwaqniy Yayaqa ñoqawanmi kashan, manan sapallaytachu saqewan, ñoqaqa paypa sonqonman chayaqtapunin ruwani, nispa.
30Chaykunata Jesús rimaqtinmi askha paypi iñirqanku.
“Cheqaq-kaytaq kacharichisunkichis” nisqan
31Jesusqa nillarqantaqmi paypi iñiq Judío runakunata: —Qankunachus rimasqayta hunt'ankichis chayqa, cheqaqtapunin yachachisqaykuna kankichis. 32Cheqaqkaqtan reqsinkichis, chay cheqaqkaqtaq kacharichisunkichis, nispa.
33Chaymi paykunaqa nirqanku: —Abrahampa mirayninmi kayku, manan hayk'aqpas piqpa kamachinpas karqaykuchu. ¿Imaynataq qanri ninki: Kacharichisqan kankichis, nispayki? nispa.
34Jesustaq paykunata nirqan: —Cheqaqtapunin niykichis, pipas huchallikuqqa huchaq kamachinmi. 35Kamachiqa manan familiawanqa wiñaypaqchu tiyan, churin ichaqa familiawan wiñaypaq tiyan. 36Ahinaqa ñoqa Churichus kacharichisqaykichis chayqa, cheqaqtapunin kacharichisqa kankichis. 37Ñoqaqa yachanin Abrahampa miraynin kasqaykichista, ichaqa wañuchiytapunin munashawankichis, simiyta sonqoykichispi mana hap'isqaykichisrayku. 38Ñoqaqa rimani Yayaq qayllanpi rikusqaytan, qankunataq ruwankichis taytaykichismanta uyarisqallaykichista, nispa.
39Hinan Jesusta nirqanku: —Abrahammi machulaykuqa, nispa.
Jesustaq paykunata nirqan: —Abrahampa wawankuna kaspaykichisqa, Abrahampa ruwasqantachá ruwawaqchis. 40Manachá Diosmanta uyarisqay cheqaqkaqta qankunaman willasqayraykuchu wañuchiytapuni munawankichisman. Abrahamqa manan chay hinataqa ruwarqanchu. 41Qankunaqa taytaykichispa ruwasqankunatan ruwankichis, nispa.
Chaymi payta nirqanku: —Ñoqaykuqa manan qhellipi puriymanta paqariqchu kayku, taytaykuqa sapan Diosllan, nispa.
“Qankunaqa supaypa wawankunan kankichis” nisqan
42Jesustaq paykunata nirqan: —Dioschus taytaykichis kanman chayqa, munakuwankichismanpunin, ñoqaqa Diosmanta hamuspan kaypi kashani, manataqmi ñoqallamantachu hamuni, aswanpas paymi kachamuwarqan. 43¿Imaraykun rimasqayta mana reparankichischu? Simiytan mana uyariyta munankichischu, chaymi mana reparankichischu. 44Qankunaqa supaypa wawankunan kankichis, chaymi taytaykichispa munayninta ruwayta munankichis. Payqa qallariymantapachan runa wañuchiq karqan, manataqmi cheqaq-kayqa sonqonpi kanchu, cheqaq-kay paypi mana kasqanrayku. Llullakuspaqa, pay kikinmantan riman llulla kasqanrayku, llullakunaq taytantaq kanpas. 45Ñoqatataq cheqaqkaqta rimaqtiy mana creewankichischu. 46¿Mayqenniykichistaq huchayoq kasqayta sut'inchawankichisman? Cheqaqkaqta nishaqtiyqa, ¿imaraykun mana creewankichischu? 47Diospa wawanqa Diospa siminkunatan uyarin. Chaymi qankunaqa mana chaykunata uyarinkichischu mana Diospa wawanchu kasqaykichisrayku, nispa.
48Hinaqtinmi Judío runakunaqa payta nirqanku: —Allintan ñoqaykuqa niyku Samaria runa kasqaykita, supaypa hunt'aykusqan kasqaykitawan, nispa.
49Jesustaq kutichirqan: —Manan supaypa hunt'aykusqanchu kani, aswanpas Yayatan hatunchani, qankunataq ichaqa pisichawankichis. 50Manan yupaychawanaykichistachu munashani, Diosmi yupaychasqa kanaytaqa munan, paytaqmi juzgaqqa. 51Cheqaqtapunin niykichis: Pipas simiyta hunt'an chayqa, manapunin hayk'aqpas wañunqachu, nispa.
52Chaymi Judío runakunaqa Jesusta nirqanku: —Kunanqa yachaykun supaypa hunt'aykusqanpuni kasqaykita. Abrahampas profetakunapas*f** wañurqankun, qantaq ninki: Pipas simiyta hunt'aqqa manapunin hayk'aqpas wañunqachu, nispa. 53¿Qanqa, Abraham machulaykumanta aswan kurakchu kanki? Payqa wañupunñan, profetakunapas*f** wañupullantaqmi. ¿Pimantaq qanri tukunki? nispa.
54Jesustaq kutichirqan: —Ñoqa kikiyta hatunchakuyman chayqa, yanqan kanman. Yayaymi hatunchawaqniyqa, paytan qankunaqa “Diosniyku” ninkichis. 55Ichaqa manan payta reqsinkichischu. Ñoqan ichaqa payta reqsini. “Manan payta reqsinichu” niyman chayqa, qankuna hina llullachá kayman. Aswanpas paytaqa reqsinin, simintapas hunt'anin. 56Machulaykichis Abrahamqa kusikurqanmi kay pachaman hamunay p'unchayta rikuyta yuyaspa. Rikuspataq anchatapuni q'ochukurqan, nispa.
57Hinan Judío runakunaqa Jesusta nirqanku: —Manaraqmi phisqa chunka watayoqpaschu kashanki, chaychu, ¿Abrahamta rikuwaq karqan? nispa.
58Jesustaq nirqan: —Cheqaqtapunin niykichis: Manaraq Abraham kashaqtinmi ñoqaqa kaniña, nispa.
59Hinaqtinmi rumita hoqarirqanku Jesusta ch'aqenankupaq, paytaq pakaykukuspa, Dios yupaychana wasimanta lloqsipurqan.
Currently Selected:
JUAN 8: QC88
Highlight
Share
Copy
Want to have your highlights saved across all your devices? Sign up or sign in
Biblia en Quechua de Cuzco © Sociedades Bíblicas Unidas, 1988.
