LUCAS 14
14
Samana p'unchaypi Jesuspa runata qhaliyachisqan
1Huk samana p'unchaypi fariseokunaq*f** huknin umallinpa wasinman mikhuq haykuqtinmi wakin runakunaqa Jesusta makilla qhawasharqanku. 2Huk punkillisqa runan Jesuspa ñawpaqenpi kasharqan. 3Hinan Jesusqa Diospa kamachikuyninta yachachiqkunata fariseokunatawan*f** nirqan: —¿Diospa kamachikuyninqa samana p'unchaypi qhaliyachinatachu kamachikun? Icha, ¿manachu? nispa.
4Paykuna ch'inlla kaqtinkutaq onqosqa runata hap'iykuspa qhaliyachirqan, hinaspanmi kachapurqan.
5Paykunatataq nirqan: —Mayqenniykichispa wawaykichispas wakaykichispas t'oqoman urmaykuqtinqa, ¿manachu horqowaqchispacha samana p'unchayña kashaqtinpas? nispa.
6Manataq pipas chay nisqanman kutichiyta atirqanchu.
K'umuykukuymanta
7Waqyasqakunaq imaynatachus allinkaq tiyanakunata akllasqankuta rikuspataq Jesusqa paykunata nirqan: 8—Pipas casarakuyman waqyasunkichis chayqa, aman allinkaq tiyanapiqa tiyankichischu, paqtan qanmanta aswan allinpaq hap'isqa paypa waqyamusqan kanman, 9hinaspanmi paytapas qantapas waqyamuq hamuspa nisunkiman: —Tiyanata payman qoykuy, nispa, hinaspataq qhepapi p'enqasqa tiyamuwaq. 10Aswanpas waqyasqa kaspaykiqa haykuspa qhepallapi tiyaykuy, waqyaqniyki hamuspa: —Amigóy, ñawpaqman asuykamuy, ninasuykipaq, chaymi mikhuq-masiykikunaq qayllanpi hatunchasqa kanki. 11Pipas hatunchakuqqa huch'uyyaykachisqan kanqa, huch'uyyaykukuqtaqmi hatunchasqa kanqa, nispa.
12Waqyaqnin runatapas nillarqantaq: —P'unchayña ch'isintaña hatun mikhuyta ruwaspaqa aman waqyankichu amigoykikunatapas, wawqeykikunatapas, aylluykikunatapas, qhapaq wasi-masiykikunatapas, paqtan paykunapas kaqllatataq waqyaspa kutichipusunkiman. 13Aswanpas hatun mikhuyta ruwaspaykiqa, wakchakunata, ñuk'ukunata, wist'ukunata, ñawsakunatawan waqyanki, 14chaymi kusisamiyoq kanki. Paykunaqa manan kutichipuyta atisunkimanchu, ichaqa chanin runakunaq kawsarimpuyninpin Dios kutichipusunki, nispa.
Hatun mikhuymanta
(Mt 22.1-10)
15Chayta uyarispan huknin mikhuqmasin Jesusta nirqan: —Kusisamiyoqmi Diospa kamachikushasqanpi hatun mikhuyta mikhuysikuqqa, nispa.
16Hinaqtinmi Jesusqa payta nirqan: —Huk runan hatun mikhuyta ruwaspa askha runata waqyachimurqan. 17Mikhuy horastataq waqyachimusqakunaman kamachinta kacharqan: —Hamuychis, llapanmi wakichisqaña kashan, nispa nimunanpaq.
18Ichaqa llapallankun: —Manan hamuyta atiymanchu, niyta qallarirqanku. Ñawpaqkaqmi nirqan: —Chakra rantisqayta qhawaqmi rinay kashan, valekuykin pampachaykuwachun, nispa.
19Hukninpas nirqan: —Phisqa masa toro rantisqayta yapusqanta qhawaqmi rinay kashan, valekuykin pampachaykuwachun, nispa.
20Hukninpas nillarqantaq: —Chayllaraqmi casarakuni, manan riyta atiymanchu, nispa. 21Hinan kamachiqa chaykunata patronninman willarqan.
Chaymi patronninqa phiñakuspa kamachinta nirqan: —Usqhaylla riy plazakunata, callekunatapas, hinaspa kayman pusamuy wakchakunata, ñuk'ukunata, wist'ukunata, ñawsakunatawan, nispa.
22Chaykuna qhepatan kamachiqa nirqan: —Wiraqocháy, kamachiwasqaykiman hinan waqyamuni, chaypas kashanraqmi tiyanaqa, nispa.
23Chaymi patronqa kamachinta nirqan: —Riy ñankunata, hatun ñankunatapas, hinaspa pusaykamuy wasiy hunt'a kananpaq. 24Yachaychis, chay ñawpaq waqyasqa runakunaqa manapunin mayqenpas mikhunayta mallinqachu, nispa.
Cristoq qhepan riymanta
(Mt 10.37-38)
25Askha runakunan Jesuswan risharqanku, kutirispataq paykunata nirqan: 26—Pipas ñoqaman hamun hinaspa taytanta, mamanta, warminta, wawankunata, wawqenkunata, panankunata, pay kikintawanpas ñoqamanta astawan munakun chayqa, manan puriqmasiy kanmanchu. 27Pipas ñoqarayku ñak'arispa wañunanña kaqtinpas qhepayta mana hamuqqa, manan puriqmasiy kanmanchu.
28Pipas torreta sayarichiyta munaspaqa tukunankama gastananpaqmi ñawpaqtaraq qolqenta yupan hayk'achus kasqanta. 29Paqtan teqsita churaspalla mana tukuyta atiqtin, llapan chayta rikuqkuna payta asipayankuman: 30—Kay runaqa torre sayarichiyta qallarishaspan mana tukuyta atinchu, nispanku.
31Hinallataqmi chunka waranqa soldadoyoq reypas ñawpaqtaraq tiyaykuspa tanteakunqa iskay chunka waranqa soldadoyoq contranpi hamuq reywan maqanakuq rinanpaq. 32Mana atiq hina kaspataqmi karullapiraq awqan kashaqtin runakunata kachanqa mana maqanakuspalla allipunakapunankupaq. 33Chhaynan, mayqenniykichispas tukuy kaqninta mana saqeqqa manan puriqmasiy kanmanchu, nispa.
Q'ayma kachimanta
(Mt 5.13; Mr 9.50)
34Kachiqa sumaqmi, kachitaqchus q'aymayanman chayqa, ¿imawanmi kachiman tukuchiwaqchis? 35Manañan allinchu hallp'apaqpas wanupaqpas, aswanpas wikch'upunallapaqñan. Pipas uyarinanpaq ninriyoqqa uyarichun, nispa.
Currently Selected:
LUCAS 14: QC88
Highlight
Share
Copy
Want to have your highlights saved across all your devices? Sign up or sign in
Biblia en Quechua de Cuzco © Sociedades Bíblicas Unidas, 1988.
