LUCAS 13
13
Diosman kutirikunapaq Jesuspa anyasqan
1Chay tiempon wakin runakuna Jesusman rispa willarqanku: —Galilea provincia runakunan sacrificio haywanankupaq animalkunata wañuchishaqtinku, Pilatoqa paykunata wañuchirqan, hinan yawarninkuqa animalkunaq yawarninwan chhaqrukurqan, nispa.
2Chaymi Jesusqa paykunata nirqan: —¿Yuyankichischu chay runakuna Galilea provinciapi tiyaq runakunamanta aswan huchasapa kaspanku wañuchisqa kasqankuta? 3Manapunin, aswanqa qankunapas manachus Diosman kutirikunkichis chayqa, llapallaykichismi wañunkichispuni. 4Chunka pusaqniyoq runakunatan Siloé qochana qayllapi torre thunikuspa wañuchirqan, ¿yuyankichischu chay runakunaqa Jerusalén llaqtapi llapallan tiyaqkunamanta aswan huchasapa kaspanku wañusqankuta? 5Manapunin, aswanqa qankunapas manachus Diosman kutirikunkichis chayqa, llapaykichismi wañunkichispuni, nispa.
Mana ruruq higos sach'amanta
6Kay rikch'anachiy simitan Jesusqa nirqan: —Huk runaq uvas chakranpin higos sach'a mallkisqa karqan. Chakrayoqqa higosta pallaq rispataq mana tarirqanchu, 7chaymi uvas chakra llank'aqta nirqan: —Qhawariy, kaywanqa kinsa watañan kay higos sach'aq rurun pallaq hamusqay, manataqmi tarinichu. Wit'upuy, ¿imapaqñataq hallp'atapas usuchinqa? nispa.
8Chaymi payqa nirqan: —Wiraqocháy, saqeykuyraq kay watatawan, muyuriqninta hasp'ispay wanuwan churasaq. 9Rurunqataqchus chayqa allinmi kanqa, mana ruruqtintaq wit'upunki, nispa.
Samana p'unchaypi warmita Jesuspa qhaliyachisqan
10Diosmanta yachachina wasipin Jesusqa samana p'unchaypi yachachisharqan. 11Chaypin kasharqan chunka pusaqniyoq wataña supaypa onqochisqan warmi, paymi k'umuykuspallaña puriq, manataq imaynamantapas cheqanyayta atiqchu. 12Hinan Jesusqa payta waqyaspa nirqan: —Warmi, onqoyniykin kacharipusunki, nispa. 13Hinaspan payta llamiykuqtin hina cheqanta sayarispa Diosta hatuncharqan.
14Diosmanta yachachina wasipi kamachikuqtaq samana p'unchaypi Jesuspa qhaliyachisqanmanta phiñakuspa runakunata nirqan: —Llank'anapaqqa soqta p'unchaymi, chay p'unchaykunapi qhaliyachisqa kanaykichispaqqa hamuychis, amataq samana p'unchaypichu, nispa.
15Chaymi Señor Jesusqa payta nirqan: —Iskay uyakuna, ¿manachu samana p'unchaypi sapankaykichis wakaykichistapas asnoykichistapas uywa kanchamanta kacharispa unu ukyaqta qatinkichis? 16¿Chaychu kay warmita, Abrahampa ususin kashaqtin, chunka pusaqniyoq wataña Satanaspa watasqanta samana p'unchaypi mana paskayman karqan? nispa.
17Chaykunata niqtinmi lliw awqankunaqa p'enqarikurqanku. Llapan runataq ichaqa paypa musphana ruwasqankunamanta kusikurqanku.
Mostaza muhumanta
(Mt 13.31-33; Mr 4.30-32)
18Jesusmi nillarqantaq: —¿Imamanmi Diospa kamachikushasqanqa rikch'akun? ¿Imamantaq rikch'achisaq? 19Mostaza muhumanmi rikch'akun, chaytan huk runaqa huertanpi tarpurqan, wiñaspanmi hatun sach'a kapurqan, phalaq animalkunataq k'allmankunapi q'esachakurqan, nispa.
Qonchumanta
(Mt 13.33)
20Jesusmi nillarqantaq: —¿Imamantaq Diospa kamachikushasqantaqa rikch'achisaq? 21Qonchumanmi rikch'akun, chaytan huk warmi kinsa tupu hak'upi piturqospa lliw poqonankama saqeykun, nispa.
K'illku punkumanta
(Mt 7.13-14,21-23)
22Jesusmi Jerusalén llaqtaman rishaspa, llapa llaqtakunapi huch'uy llaqtakunapiwan yachachirqan. 23Chay purisqanpin huk runa payta tapurqan: —Señor, ¿pisillachu qespikunqaku? nispa.
Jesustaq paykunata nirqan: 24—K'illku punkun haykuymanta wañukuychisraq. Niykichismi, askhan haykuyta munanqaku, manataq atinqakuchu. 25Punkuta wasiyoq wisq'amuqtinmi hawamanta punku takayta qallarinkichis: ¡Wiraqocháy, kicharimuwayku! nispa.
Paytaq nimusunkichis: Manan reqsiykichischu, manataqmi yachanichu maymantachus kasqaykichistapas, nispa.
26Hinaqtinmi qankunaqa ninkichis: Kuskan mikhurqanchis ukyarqanchis, plazaykupitaqmi yachachirqankipas, nispa.
27Hinan nimusunkichis: Manapunin reqsiykichischu, manataqmi yachanichu maymantachus kasqaykichistapas. Ñoqamanta anchhuriychis, llapa mana chanin ruwaqkuna, nispa.
28Chaypachan Abrahamta, Isaacta, Jacobta, llapa profetakunatawan*f** Diospa kamachikushasqanpi rikunkichis, qankunataq ichaqa wikch'usqa kankichis, hinan waqaykunkichis k'achachachankichis. 29Runakunan inti lloqsimuymanta, inti haykuymanta, wichaymanta, uraymanta hamuspanku Diospa kamachikushasqanpi hatun mikhuy mikhuq tiyaykunqaku. 30Qhepa kaqkunan ñawpaq kanqaku, ñawpaq kaqkunataq qhepa kanqaku, nispa.
Jerusalén llaqtamanta Jesuspa waqasqan
(Mt 23.37-39)
31Chay raton wakin fariseokuna*f** payman hamuspa nirqanku: —Herodesmi wañuchiyta munashasunki, kaymanta ripuy, nispanku.
32Jesustaq paykunata nirqan: —Rispaykichis chay atoqta nimuychis: Pisi p'unchaykunallañan supaykunata qarqosaq, onqosqakunatapas qhaliyachisaq, chaymantataqmi ruwanayta tukusaq, nispa. 33Chaywanpas kay p'unchaykunaqa Jerusalenman chayanaypuniraqmi. Manan profetaqa*f** wak llaqtapiqa wañunmanchu aswanpas Jerusalén llaqtallapipunin.
34¡Jerusalén, Jerusalén! Qanmi kanki profetakunata*f** wañuchiq, qanman Diospa kachamusqankunatapas ch'aqeq. ¡Askha kutitan munarqani wawaykikuna huñuykuyta imaynan wallpapas raphran ukhupi chiwchinkunata oqllaykun hinata, manataq munarqankichu! 35Chay hinaqa, wasiykichismi purunyapunqa. Niykichismi, manan rikuwankichisñachu: ¡Saminchasqa kachun Señor Diospa sutinpi hamuqqa! nispa, ninaykichis tiempo chayamunankama, nispa.
Currently Selected:
LUCAS 13: QC88
Highlight
Share
Copy
Want to have your highlights saved across all your devices? Sign up or sign in
Biblia en Quechua de Cuzco © Sociedades Bíblicas Unidas, 1988.
