LUCAS 12

Fariseokunaq iskay uya-kaynin

1Waranqa-waranqa runakuna sarunakunankukama huñukamushanankamataq Jesusqa yachachisqankunamanraq nirqan: —Cuidakuychis fariseokunaq*f** qonchunmanta*f**, chayqa iskay uya-kayninkun. 2Manan imapas pakasqaqa kanchu mana rikhuriqqa, manataq ima pakasqapas kanchu mana yachakuqqa. 3Chaymi pakapi imapas nisqaykichisqa sut'ipi uyarisqa kanqa, wasi ukhupi ninrillaman imapas nisqaykichisqa wasi patakunamantan sut'i willasqa kanqa.

Pitachus manchakunamanta

(Mt 10.28-31)

4Amigoykuna, qankunatan niykichis, ama manchakuychischu cuerpoykichista wañuchiqkunataqa, chaymantaqa manan ima ruwaytapas atinkumanñachu.

5Aswanpas niykichismi pitachus manchakunaykichista. Manchakuychisqa Diosta, paymi wañuchispa infiernoman wikch'uykunanpaq atiyniyoqqa. Arí, niykichismi, paytapuni manchakuychis.

6¿Manachu phisqa pichitankaqa iskay huch'uy qolqeman vendekun? Chaywanpas manan huknillantapas Diosqa qayllanpiqa qonqapunchu. 7Chay hinallataqmi chukchaykichispas llapallan yupasqa kashan. Chay hinaqa ama manchakuychischu, askha pichitankamantapas aswan chaniyoqmi kankichis, nispa.

Jesusmanta mana p'enqakuspa rimanamanta

(Mt 10.32-33; 12.32; 10.19-20)

8Pipas runakunaman “reqsinin” niwaqniymantaqa Diospa Kachamusqan Runapas*f** Diospa angelninkunaq qayllanpi “reqsinin” nillasaqtaqmi. 9Pipas runakunaman “manan reqsinichu” niwaqniytaqa Diospa angelninkunaq qayllanpipas “manan reqsinichu” nillasaqtaqmi. 10Pipas Diospa Kachamusqan Runa*f** contra imallatapas ninman chayqa, pampachasqan kanqa, Santo Espíritu contra mana allinta rimaspa pisichaqmi ichaqa, mana pampachasqachu kanqa, nispa.

11Diosmanta yachachina wasikunaman, juezkunaman, kamachikuqkunamanpas pusasunkichis chayqa, aman llakikunkichischu imaynatachus kutichinaykichismanta imatachus ninaykichismantapas. 12Santo Espiritun chay kikin rato imatachus ninaykichistaqa yachachisunkichis, nispa.

Mana yuyayniyoq qhapaq runa

13Runakuna ukhumantataq huk runa Jesusta nimurqan: —Yachachikuq, wawqeyta niykapuway herenciaykuta rakinakapunaykupaq, nispa.

14Jesustaq payta nirqan: —Yaw, runa, ¿pitaq qankuna ukhupi juezpaqpas rakiqpaqpas churawarqan? nispa.

15Chaymantataq runakunata nirqan: —Qhawariychis, tukuy imatapas munapayaymanta cuidakuychis. Runaqa askha kaqniyoq kashaspapas, manan ninmanchu: Kawsashallasaqmi, nispaqa, nispa.

16Chaymi huk rikch'anachiy simita paykunaman nirqan: —Huk qhapaq runan chakranmanta askhallataña cosecharqan. 17Hinaspan payqa sonqonpi nirqan: ¿Imanasaqmi? ¿Maymanñataq waqaychasaq kay cosechaytaqa? nispa.

18Kayta ruwasaq: Taqena wasiykunata thunispa aswan hatuchaqkunata sayarichisaq, chaymantaq lliw cosechayta kaqniykunatawan waqaychasaq, 19hinaspa sonqoyta nisaq: Sonqolláy, ñan askhaña kaqniykuna askha watapaq taqesqa kapuwan. Kunanqa, samakusaq, mikhukusaq, ukyakusaq, q'ochukusaq, nispay.

20Diostaq ichaqa payta nirqan: —Mana yuyayniyoq runa, kunan tutan wañunki. Waqaychasqaykikunari, ¿pipaqtaq kanqa? nispa.

21Chhaynan payllapaq qhapaq-kayta waqaychaqqa, Diospa qhawarinanpaqmi ichaqa wakcha, nispa.

Imaynatachus runata Diospa uywasqan

(Mt 6.25-34)

22Chaymantataq Jesusqa yachachisqankunata nirqan: —Chayraykun niykichis, ama llakipakuychischu imatachus mikhunaykichismantapas imawanchus p'achakunaykichismantapas. 23Kawsayqa mikhuymantapas aswan chaniyoqmi, cuerpopas p'achamantaqa aswan chaniyoqmi. 24Qhawariychis alqamarikunata, manan tarpunkupaschu cosechankupaschu, manan despensankupas taqenkupas kanchu, chaywanpas Diosmi mikhuchin. Qankunaqa phalaq animalkunamantapas aswan chaniyoqmi kankichis. 25¿Mayqenniykichistaq atinman llakikushaspan sayayninman huk chhikallantawanpas yapaykukuyta? 26Chayllatapas ruwayta mana atishaspaykichisqa, ¿imapaqtaq imamantapas llakikunkichis?

27Qhawariychis hamanq'ay t'ikakuna imaynatachus wiñasqanta, manan llank'ankupaschu phuskankupaschu. Niykichismi, rey Salomonpas qhapaqña kashaspapas, manan chay huknin t'ika hinallapas p'achakurqanchu. 28Chay hinatan Diosqa campopi plantakunata p'achachin, chaykunan huk p'unchay wiñan qhepantin p'unchaytaq hornoman wikch'uykunku. ¿Chaychu Diosqa qankunatapas mana uywasunkichisman? ¡Qankunaqa pisi iñiyniyoqmi kankichis! 29Chayrayku ama puriychischu: ¿Imatataq mikhuykusaqpas? ¿Imatataq ukyaykusaqpas? nispaqa. Amayá llakipakuychischu. 30Tukuy chaykunamantaqa Diospi mana iñiq llapa runakunan llakipakunku. Yayaykichisqa yachanmi chaykuna pisisqasuykichista. 31Aswanpas munaychis tukuy imapi Dios kamachiqniykichis kananta, hinan chaykunata payqa qosunkichis, nispa.

Hana pachapi qhapaq-kayniyoq kaymanta

(Mt 6.19-21)

32Qankunaqa pisi ovejakuna hinallaña kaspapas, ama manchakuychischu, Yayaykichismi kamachikuyninpi kamachiysikunaykichista munan. 33Kaqniykichista vendespa wakchakunaman qoychis, hinaspa mana thantakuq qolqe waqaychanata ruwakuychis, hanaq pachapi mana hayk'aq tukukuq qhapaq-kayta huñuychis, chaymanqa manan suwapas chayanchu, manallataq chaypiqa thutapas thutanchu. 34Maypichus qhapaq-kayniykichis kashan, chayllapitaqmi sonqoykichispas kashan, nispa.

Wakichisqa kanamanta

35Listollaña kaychis, lamparaykichispas hap'ichisqallaña kachun. 36Casarakuymanta patronninkuq kutimpunanta suyaq runakuna hina qankunapas kaychis, paykunan chayamuspa waqyakamuqtin punkuta usqhaylla kichanku. 37Kusisamiyoqmi patronninkuq kutimuspa rikch'ashaqta tarisqan chay kamachikunaqa. cheqaqtan niykichis, kikin patronmi p'achanta allichakuspa mikhunankupaq tiyaykachispa servinqa. 38Chawpi tutatapas, wallpa waqaytapas hamuspa chay hina suyashaqta paykunata tarinqa chayqa, kusisamiyoqmi chay kamachikunaqa. 39Kayta ichaqa yachaychis, ima horatachus suwaq hamunanta wasiyoq yachanman chayqa, rikch'ashanmanpunin, hinaspan wasinta mana t'oqochinmanchu. 40Diospa Kachamusqan Runaqa*f** mana suyasqaykichis horatan hamusaq, chayrayku listollaña kaychis, nispa.

Mana hunt'aq kamachi

(Mt 24.45-51)

41Chaymi Pedroqa Jesusta nirqan: —Señorníy, kay rikch'anachiy simitaqa, ¿ñoqallaykupaqchu, icha, llapapaqchu ninki? nispa.

42Hinan Señor Jesusqa nirqan: —¿Pitaq allin yuyayniyoq hunt'aq mayordomoqa? Paytan patronqa wasinpi kaqkunata kamachinanpaq churan, tiempollanpi kamachinkunaman mikhunatapas qonanpaq. 43Kusisamiyoqmi chay mayordomoqa kanqa patronnin hamuspa chay hina ruwashaqta tarinman chayqa. 44Cheqaqtan niykichis, paytan patronqa churanqa tukuy kaqninkunata qhawananpaq. 45Ichaqa chay mayordomochus sonqonpi ninman: Patronniyqa manaraqmi chayamunqachu, nispa. Hinaspa qhari kamachikunata warmi kamachikunata maqayta qallarinman, hinallataq mikhunman, ukyanman, machanmanpas chayqa, 46patronninmi chayamunqa mana suyasqan p'unchaypi, mana yachasqan horapi, hinaspan sinchita suq'aykunqa, mana iñiyniyoqkunawan kuskatataq payta muchuchinqa.

47Patronninpa munayninta yachashaspan mana wakichikuq, mana kasukuq kamachiqa aswan suq'aykusqan kanqa. 48Patronninpa munayninta mana yachaspa suq'anapaq hina ruwaqmi ichaqa pisi suq'asqalla kanqa. Pimanchus Diosqa askhata qon, chaymantaqa askhallatataqmi mañanqa, pimanchus Diosqa aswan askhata hap'ichin, chaymantaqa aswan askhallatataqmi mañanqa.

Kay pachapi t'aqanakuymanta Jesuspa rimasqan

49Ñoqaqa ninatan kay pachaman apamurqani. Chhaynaqa, maytan munayman rawrashanantaña. 50Sinchi ñak'arinaymi kashan, maytapunin llakikushani hunt'akunankama. 51¿Yuyankichischu hamusqaywan kay pachaqa thak kananta? Manan, aswanpas t'aqanachiqmi hamuni. 52Kunanmantan huk familiapi phisqa t'aqanasqa kanqaku, kinsan iskaypa contranpi, iskaytaq kinsaq contranpi. 53T'aqanasqan kanqaku, taytan churin contra, churitaq taytan contra, mamataq ususin contra, ususitaq maman contra, suegrataq qhachunin contra, qhachuntaq suegran contra, nispa.

Tiempokuna reqsiymanta

(Mt 16.2-3)

54Runakunatapas nillarqantaq: —Inti haykuy ladomanta phuyu lloqsimuqta rikuspaykichismi ninkichis: Paramunqan, nispa, paranpunitaq kanpas. 55Uray wayra wayramuqtinmi ninkichis: Ruphaykunqan, nispa, ruphaykunpunitaq kanpas. 56¡Iskay uyakunan kankichis! Cieloqpas kay pachaqpas imayna kasqanta qhawaytan yachankichis, ¿imaynataq kay p'unchaykunapi imayna kasqanta manari reparankichischu?

Awqawan allipunaymanta

(Mt 5.25-26)

57¿Imaraykutaq kikiykichispas manari chaninkaqta reqsinkichischu? 58Awqaykiwan gobernadorman rispaykiqa ñanllapiraq paywan allipunay, paqtan juezman aysaykusunkiman, jueztaq alcaideman hap'ichisunkiman, alcaidetaq watay wasiman apaykusunkiman. 59Chaymantaqa manapunin lloqsimunkichu llapallan manukusqaykita kutichipunaykikama, nispa.

Currently Selected:

LUCAS 12: QC88

Highlight

Copy