LUCAS 17
17
Huchaman urmachiqkunaq muchuchisqa kanan
(Mt 18.6-7,21-22; Mr 9.42)
1Jesusmi yachachisqankunata nirqan: —Runakunata misk'achiqkunaqa kanqapunin, ichaqa, ¡ay chay misk'achiq runamanta! 2Paypaqqa aswan allinmi kanman karqan molino rumita kunkanman warkuykuspa mama qochaman wikch'uykunanku kay huch'uykunamanta hukninta huchaman urmachinanmantaqa. 3Chhaynaqa, kikiykichista qhawakuychis.
Wawqeyki qan contra huchallikuqtinqa payta anyaykuy, huchanta reqsikuqtintaq pampachaykuy. 4Huk p'unchaypi qanchis kuti qan contra huchallikuspa. qanchis kutillatataq chay p'unchaypi asuykamusunkiman: —Huchallikunin, nispa, chayqa, pampachankin payta, nispa.
Astawan iñinankupaq mañakusqanku
5Apostolkunataq*f** Señor Jesusta nirqanku— Astawan iñinaykupaq yanapaykuwayku, nispa.
6Hinan Señor Jesusqa nirqan:— Huk mostaza ruru sayayllapas iñiyniykichis kanman chayqa, kay sicómoro sach'ata niwaqchismi: T'irakuspa mama qochapi mallkikamuy, nispa, hinan kasusunkichis.
Kamachiq imachus ruwanan
7Kamachiykichista yapumusqanmantapas uywa michimusqanmantapas kutimuqtinqa, ¿mayqenniykichistaq niwaqchis: Asuykamuy, mikhunaykipaq tiyaykuy, nispa? 8Manan mayqenniykichispas niwaqchischu, aswanqa niwaqchismi: Cenayta wayk'umuy, p'achaykita allichakuspataq haywamuway mikhunay ukyanaykama, chaymantaña qanqa mikhunkipas ukyankipas, nispa. 9Chay kamachitaqa manan “gracias” nillanpaschu kamachisqanta ruwasqanmantaqa. 10Chay hinallataq qankunapas tukuy kamachisqakunata ruwaspaykichisqa, ninkichis: —Kay hina kamachiykikunallan kayku, ima ruwanallaykutan ruwapuykiku, nispa.
Aycha qarapi millay onqoyniyoqkunaq qhaliyasqan
11Jerusalén llaqtata Jesús rishaspataqmi, Galilea provinciawan Samaria provinciawan tupay qorpanta pasarqan. 12Hinan huk huch'uy llaqtaman haykushaqtin, chunka runa aycha qarapi millay onqoyniyoq payman hamurqanku. Karullapi sayaykuspataq 13kunkayoqta waqyakurqanku: —Wiraqochayku Jesús, khuyapayaykuwayku, nispa.
14Jesustaq paykunata qhawarispa nirqan: —Riychis, sacerdotekunawan qhawachikamuychis, nispa. Rishaqtinkutaqmi alliyasqa karqanku. 15Chaymi hukninku alliyasqa kasqanta rikukuspa kutirqamurqan alto kunkawan Diosta yupaychaspa. 16Hinaspa Jesuspa ñawpaqenpi pampakama k'umuykuspa graciasta qorqan. Payqa Samaria runan karqan.
17Jesustaq nirqan: —¿Manachu alliyasqakunaqa chunka karqanku? ¿Maypitaq isqonri? 18¿Kay wak llaqtayoq runallachu Diosta hatunchaqqa kutimun? nispa. 19Chay runatataq nirqan: —Sayarispa ripuy, Diospi iñiyniykin qhaliyachisunki, nispa.
Imaynatachus Diospa kamachikunan qallarinanmanta
(Mt 24.23-28,37-41)
20Hayk'aqchus Diospa kamachikunan qallarinanmanta fariseokuna*f** tapuqtinkutaq Jesusqa nirqan: —Diospa kamachikunan qallarisqantaqa manan señalkunawanraqchu yachawaqchis, 21manataqmi ninkumanchu: —¡Kaypin kashan! ¡Haqaypin kashan! nispapas. Diosqa qankuna ukhupin kamachikushanña, nispa.
22Yachachisqankunatataq nirqan: —Tiempon chayamunqa, Diospa Kachamusqan Runaq*f** kay pachaman kutimunay punch'ayta rikuyta munanaykichis, manataqmi rikuyta atinkichischu. 23Hinan runakunaqa nisunkichis: ¡Kaypin kashan! ¡Haqaypin kashan! nispa. Ichaqa aman kasunkichischu, amataqmi qhepankutapas rinkichischu. 24Imaynan rayoqa tukuy hinantinman lliphllikispa k'ancharin, chay hinallataqmi Diospa Kachamusqan Runaq*f** kutimuyniypas kanqa. 25Ichaqa ñawpaqtaraqmi sinchita ñak'arinay, hinaspataq kay tiempo runakunaq qhawarparisqan kanay.
26Imaynan Noepa p'unchayninkunapi karqan, chay hinallataqmi Diospa Kachamusqan Runaq*f** kutimunaypaqpas kanqa. 27Tuyuq wasiman Noepa haykusqan p'unchaykaman mikhusharqanku, ukyasharqanku, casarakusharqanku, casarakunapaq rimanakusharqanku, millp'uq unu chayamuspataq llapallanta millp'urqan.
28Kaqllataqmi Lotpa p'unchayninkunapipas karqan, mikhusharqanku, ukyasharqanku, rantisharqanku, vendesharqanku, tarpusharqanku, wasita sayarichisharqanku. 29Lotpa Sodoma llaqtamanta lloqsimusqan p'unchaymi ichaqa, cielomanta azufreyoq nina para chayamurqan, hinaspan llapallanta p'uchukarqan. 30Chay hinallataqmi kanqa Diospa Kachamusqan Runaq*f** rikhurimusqay p'unchaypipas.
31Chay p'unchaypiqa wasi patapi kaqqa amaña uraykuchunchu wasipi kaqninkunata horqonanpaq, chhaynallataq chakrapi kaqpas wasinman ama kutimuchunñachu. 32Lotpa warminta imachus sucedesqanta yuyariychis. 33Pipas pay kikillanta waqaychakuyta munaqqa chinkapunqan, pipas wañuqmi ichaqa wiñaypaq kawsanqa. 34Niykichismi, chay tutapin huk puñunapi iskay puñushanqaku. Hukninmi apasqa kanqa, huknintaq saqesqa. 35Iskay warmin kuska kutashanqaku. Hukninmi apasqa kanqa, huknintaq saqesqa. [ 36Iskay runan chakrapi kashanqaku. Hukninmi apasqa kanqa, huknintaq saqesqa,] nispa.
37Chaymi uyariqkunaqa payta tapurqanku: —Señor, ¿maypitaq chaykunaqa sucedenqa? nispa.
Hinan paykunata nirqan: —Maypichus wañusqa kashanqa chaymanmi kunturkunapas huñukunqa, nispa.
Currently Selected:
LUCAS 17: QC88
Highlight
Share
Copy
Want to have your highlights saved across all your devices? Sign up or sign in
Biblia en Quechua de Cuzco © Sociedades Bíblicas Unidas, 1988.
