LUCAS 18
18
Viudamanta mana chanin juezmantawan
1Mana chiriyaspa mañakunapuni kasqanta yachachispanmi Jesusqa huk rikch'anachiy simita paykunaman nirqan: 2—Huk llaqtapin karqan huk juez Diostapas mana manchakuq, runatapas mana manchakuq. 3Kallarqantaq chay llaqtapi huk viudapas. Paymi sapa kuti juezman riq awqanmanta qespichinanpaq chaninchayta mañakuspa.
4Chaymi juezqa unayña mana munashaspapas sonqonpi nirqan: —Diosta mana manchakushaspaypas, runata mana manchakushaspaypas, 5hinata kay viudapaq qatiykachawasqanrayku chaninchapusaq, amaña hamupayawaspa umayta nanachiwananpaq, nispa, nispan.
6Señor Jesusmi nillarqantaq: —Uyariychis chay mana chanin juezpa nisqanta. 7Diosqa akllakusqankunapaq chaninchapunqapunin, payta tuta p'unchay waqyakushaqtinku. Payqa manan unaytachu suyachikunqa. 8Arí, usqhayllan paykunapaq chaninchapunqa. Ichaqa Diospa Kachamusqan Runa*f** hamuspayqa, ¿Diospi iñiq runakunata kay pachapi tarisaqchu? nispa.
Fariseomanta contribución cobraqmantawan
9Chanin kasqankuta yuyaspa hukkunata pisichaqkunamanmi kay rikch'anachiy simitapas Jesusqa nillarqantaq: 10—Iskay runan Dios yupaychana wasiman wicharqan mañakuq. Hukninmi karqan fariseo*f**, huknintaq contribución cobraq. 11Fariseon*f** sayaykuspa payllapaq kay hinata mañakurqan: Diosníy, graciastan qoyki, manan wakin runakuna hinachu kani suwakuq, mana chanin, wasanchaq, manallataq kay contribución cobraq hinapaschu kani. 12Iskay kutitan semanapi ayunani, tukuy ima tarisqaymantan diezmota qoyki, nispa.
13Contribución cobraqtaq ichaqa karullapi sayaykuspa hanaq pachata qhawariyllatapas mana munarqanchu, aswanmi llakikuymanta qhasqonta takakuspa mañakurqan: Diosníy, ñoqa huchasapata khuyapayaykuway, nispa.
14Niykichismi, chay contribución cobraqmi wasinta Diospa chaninchasqan kutipurqan, manataq fariseoqa*f**. Pipas hatunchakuqqa k'umuykachisqan kanqa, k'umuykukuqtaqmi hatunchasqa kanqa, nispa.
Wawakunata Jesuspa saminchasqan
(Mt 19.13-15; Mr 10.13-16)
15Jesusmanmi wawakunata pusamurqanku llamiykunanpaq, yachachisqankunataq chayta rikuspa paykunata phiñarirqan. 16Jesustaq paykunata nirqan: —Wawakunaqa hinalla ñoqaman hamuchunku, ama paykunata hark'aychischu, Diosqa kay wawakuna hina kaq runakunallatan kamachinqa. 17Cheqaqtan niykichis, wakin runakunaqa wawa hinan Diosta kamachiqninkupaq chaskinku, pipas Diosta mana chay hinata chaskiqqa manapunin Diospa kamachisqanchu kanqa, nispa.
Qhapaq runamanta
(Mt 19.16-30; Mr 10.17-31)
18Huk uma runan Jesusta tapurqan: —Allin yachachikuq, ¿imatan ruwasaq wiñay kawsayniyoq kanaypaq? nispa.
19Hinan Jesusqa payta nirqan: —¿Imaraykun “allin” niwanki? Manan pipas kanchu “allinqa”, aswanpas sapan Diosllan. 20Diospa kamachikuy siminkunataqa yachankin riki: Aman wasanchankichu. Aman pitapas wañuchinkichu. Aman suwakunkichu. Aman llullakuspa tumpankichu. Taytaykita mamaykita yupaychanki, nisqata, nispa.
21Hinan payqa Jesusta nirqan: —Tukuy chaykunataqa waynacha kasqaymantapachan hunt'arqani, nispa.
22Jesustaq chayta uyarispa payta nirqan: —Kanraqmi ruwanayki, llapan kaqniykita vendemuspa wakchakunaman qomuy, hinan hanaq pachapi qhapaq-kayniyki kanqa, kutimuspaykitaq qhepayta hamuy, nispa.
23Hinaqtinmi chay runaqa chaykunata uyarispan anchata llakikurqan, sinchi qhapaq kasqanrayku. 24Jesustaq ancha llakisqa kasqanta rikuspa nirqan: —May sasapunin qhapaqkunapaqqa Diosta kamachiqninkupaq chaskiyqa kanqa. 25Camello nisqa animalraqmi yawriq ninrinta suchuyta atinman Diosta kamachiqninpaq qhapaqpa chaskinanmantaqa, nispa.
26Hinan chayta uyariqkunaqa nirqanku: —Chhaynaqa, ¿pillañataq qespichisqaqa kanman? nispa.
27Chaymi Jesusqa nirqan: —Runakunapaqqa mana atinan, Diospaqmi ichaqa atikun, nispa.
28Hinaqtinmi Pedroqa nirqan: —Ñoqaykuqa lliw imaymanaykuta saqespan qhepaykita hamuyku, nispa.
29Chaymi Jesusqa paykunata nirqan: —Cheqaqtan niykichis: Pipas wasinta, tayta-mamanta, wawqenkunata, warminta, wawankunata, Diospa kamachisqan kananrayku saqemuqqa, 30kay tiempopin ancha askhata chaskinqa, qhepa tiempopitaq wiñay kawsayta chaskinqa, nispa.
Wañunanmanta kinsa kutipi Jesuspa willakusqan
(Mt 20.17-19; Mr 10.32-34)
31Jesusqa chunka iskayniyoq yachachisqankunata sapaqman pusaspan nirqan: —Kunanqa Jerusalén llaqtamanmi wicharishanchis, Diospa Kachamusqan Runamanta*f** profetakunaq*f** lliw qelqasqanmi hunt'akunqa. 32Mana Judío runakunamanmi hap'ichisqa kasaq, paykunan asipayawanqaku, k'amiwanqaku, thoqaykuwanqaku ima. 33Suq'aykuwasqanku qhepatataq wañuchiwanqaku, ichaqa kinsakaq p'unchaypitaq kawsarimpusaq, nispa.
34Paykunataq mana chaykunata entienderqankuchu, manataq yacharqankuchu imamantachus rimasqantapas.
Ñawsata qhawarichisqan
(Mt 20.29-34; Mr 10.46-52)
35Jericó llaqtaman Jesusqa sispaykushaqtinmi, huk ñawsa ñan patapi limosnata mañakuspa tiyasharqan. 36Askha runaq purisqanta uyarispataq imachus kasqanta tapukurqan. 37Nazaret llaqtayoq Jesuspa purishasqanta willaqtinkutaq 38ñawsaqa waqyakurqan: —¡Jesús! ¡Rey Davidpa miraynin! ¡Khuyapayaykuway! nispa.
39Ñawpaqta riqkunataq phiñarikurqanku upallananpaq. Ñawsataq ichaqa aswantaraq waqyakurqan: —¡Rey Davidpa miraynin! ¡Khuyapayaykuway! nispa.
40Chaymi Jesusqa sayaykuspa kamachikurqan pusamunankupaq. Asuykamuqtintaq payta tapurqan: 41—¿Ima ruwapunaytan munanki? nispa.
Ñawsataq nirqan: —Señor, qhawarichiwanaykitan munani, nispa.
42Jesustaq payta nirqan: —¡Qhawariy! Diospi iñiyniykin qhaliyachisunki, nispa.
43Hinan kaq rato qhawarirqan, hinaspan Jesuspa qhepanta ripurqan Diosta hatunchaspa. Llapa runataq chayta rikuspa Diosta yupaycharqanku.
Currently Selected:
LUCAS 18: QC88
Highlight
Share
Copy
Want to have your highlights saved across all your devices? Sign up or sign in
Biblia en Quechua de Cuzco © Sociedades Bíblicas Unidas, 1988.
