LUCAS 8

Jesusta serviq warmikuna

1Chay qhepatataq Jesusqa purirqan llapa llaqtakunata huch'uy llaqtakunatawan, Diospa kamachikuq kananmanta allin willakuykunata willaspa, paywantaq chunka iskayniyoq yachachisqankunapas rirqanku. 2Rillarqankutaqmi supaykunamanta onqoykunamantawan qhaliyachisqa wakin warmikunapas, paykunan karqan Magdalá llaqtayoq María (paymantan Jesusqa qanchis supaykunata qarqosqa), 3Susana, Herodespa mayordomon Chuzaq warmin Juanapiwan. Hinallataq rirqanku askha warmikunapas, paykunan kaqninkuwan Jesusta yachachisqankunatawan yanaparqanku.

Muhu t'akaqmanta

(Mt 13.1-9; Mr 4.1-9)

4Llaqta-llaqtamanta hamuspa askhallaña runa Jesusman huñukamuqtinkun rikch'anachiy simipi paykunata Jesusqa yachachirqan: 5—Huk runan chakranta rirqan muhu t'akaq. T'akashaqtinmi wakin muhuqa ñan pataman chayarqan, hinan puriqkuna sarurqanku, phalaq animalkunataq pallarqapurqan. 6Wakin muhutaq rumi-rumiman chayarqan, wiñarimuspataq ch'akipurqan ch'akipi kasqanrayku. 7Wakin muhutaq khiska-khiskaman chayarqan, hinan khiskakunaqa chaywan kuska wiñamuspa p'amparqapurqan. 8Wakin muhutaq allin hallp'aman chayaspa wiñamurqan, hinaspa huklla pachakta rururqan, nispa.

Chaykunata yachachispataq kunkayoqta nirqan: —Uyarinanpaq ninriyoqqa uyarichun, nispa.

Imapaqchus rikch'anachiy simikunaq kasqan

(Mt 13.10-17; Mr 4.1-9)

9Chaymi yachachisqankunaqa Jesusta tapurqanku: —¿Ima ninantan nin kay rikch'anachiy simi? nispa.

10Hinan payqa nirqan: —Imaynatachus runakunata Diospa kamachinanmi pakasqa karqan, chaytan kunan sut'ita yachachisqaykichis, wak runakunamantaq ichaqa rikch'anachiy simikunapi yachachini, qhawashaspa mana rikunankupaq, uyarishaspapas mana entiendenankupaq.

Muhu t'akaqmanta Jesuspa sut'inchasqan

(Mt 13.18-23; Mr 4.13-20)

11Kaymi chay rikch'anachiy simiq sut'inchayninqa: Muhuqa Diospa siminmi. 12Ñan pataman chayaqkunaqa Diospa siminta uyariqkunan kanku, saqrataq hamuspa sonqonkumanta simita aparqon, mana iñinankupaq, hinaspa mana qespichisqa kanankupaq. 13Rumi-rumiman chayaqkunaqa Diospa siminta uyarispa kusikuywan chaskiqkunan kanku, ichaqa kaykunaqa manan saphichasqachu pisi p'unchaykunallapaqmi iñinku, wateqay p'unchaykunapitaq t'aqarikapunku. 14Khiska-khiskaman chayaqkunaqa Diospa siminta uyariqkunan kanku, ichaqa, kay kawsaypi afanakuywan, qhapaq-kaykunawan, mana allin kusikuykunawan atipachikuspa rurusqanku mana poqopunchu. 15Allin hallp'aman chayaqkunataqmi uyarispa cheqaq allin sonqowan simi waqaychaqkuna kanku, hinaspa pacienciawan rurunku, nispa.

Mana pakasqa k'anchaymanta

(Mr 4.21-25)

16Pipas lamparata hap'ichispaqa manan imawanpas pakarqonchu, manataqmi puñuna pata ukhumanpaschu churaykun, aswanmi k'anchana pataman churan, haykuqkunata k'anchananpaq. 17Lliw pakasqa kaqtapas pakapi kaqtapas Diosmi rikhurichispa sut'inchanqa. 18Chay hinaqa, allinta uyariychis. Pipas reparay yachaqtaqa Diosmi astawanraq reparachinqa, pipas mana reparaqmantataqmi reparay yuyasqantapas Diosqa qechupunqa, nispa.

Jesuspa maman wawqenkunapiwan

(Mt 12.46-50; Mr 3.31-35)

19Mamanmi wawqenkunapiwan Jesusman hamurqanku, ichaqa askha runakuna kaqtinmi payman mana asuykuyta atirqankuchu. 20Hinan Jesusman willarqanku: —Mamaykin wawqeykikunapiwan hawapi kashanku, qanwan tupayta munaspa, nispa.

21Hinaqtinmi paykunata nirqan: —Mamaypas wawqeykunapas Diospa siminta uyarispa hunt'aqkunan, nispa.

Manchay wayrata Jesuspa thanichisqan

(Mt 8.23-27; Mr 4.35-41)

22Huk p'unchaymi Jesusqa yachachisqankunapiwan boteman haykuspa paykunata nirqan: —Qocha chimpaman risun, nispa. Hinan puririrqanku. 23Ichaqa botepi rishaspankun payqa puñurqapurqan. Chayllamanmi sinchi wayra qochaman wayramurqan, boteman unu hunt'aykushaqtintaq yaqaña chinkaykusharqanku.

24Hinan Jesusman asuykuspa rikch'achirqanku: —¡Yachachikuq, yachachikuq chinkaykushanchisñan! nispa.

Pay rikch'arispataq wayrata unu hatariytawan phiñarikurqan, hinan wayraqa thanipurqan, qochapas t'ak-nisqa kapurqan. 25Paykunatataq nirqan: —¿Maytaq iñiyniykichisri? nispa.

Hinan mancharisqa musphaspa ninakurqanku: —¿Pitaq kayri? Wayratapas unutapas kamachin, paytaqa kasunkutaq, nispanku.

Gerasamanta supaypa ñak'arichisqan runa

(Mt 8.28-34; Mr 5.1-10)

26Galilea qocha chimpapi Gerasa runakunaq hallp'anmanmi botepi rirqanku. 27Botemanta Jesús lloqsiqtinmi supaypa ñak'arichisqan runa paywan tuparqan. Payqa llaqta runa kashaspapas unayñan mana p'achayoq q'alallaña puriq, manañataq wasinpipas tiyaqchu, aswanpas panteonllapiña. 28Paymi Jesusta rikuspa ñawpaqenpi qonqoriykukurqan, hinaspan kunkayoqta qaparispa nirqan: —¿Iman ñoqawan ruwanayki, Qollana Diospa Churin Jesús? Rogakuykin ama ñak'arichinawaykipaq, nispa. 29Chay runamanta supay lloqsinanpaq Jesús kamachiqtinmi chay hinata qaparirqan. Paytaqa askha kutitan supayqa chhaphchirqan. Cadenakunawan thunkunakunawan wataqtinkupas p'itirqospan supaypa apasqan ch'inneqkunaman riq. 30Jesustaq payta tapurqan: —¿Iman sutiyki? nispa.

Chaymi kutichirqan: —“Waranqa-waranqan” sutiyqa, nispa. Chaytaqa nirqan askha supaykuna payman haykusqanraykun. 31Hinan supaykuna Jesusta rogakurqanku chinkay-chinkay ukhuman ama wikch'uykunanpaq. 32Chay orqopitaq t'aqantin khuchikuna mikhusharqan, hinan Jesusta rogakurqan khuchikunaman haykunankupaq, chaymi kacharparirqan. 33Runamanta lloqsirqospankutaq supaykunaqa khuchikunaman haykurqanku. Chaymi t'aqantin khuchikunaqa qochaman phawarispanku qaqapaykuspa heq'eparqanku.

34Khuchi michiqkunataq chayta rikuspa ayqerirqanku, rispankutaq llaqtapipas campopipas willakamurqanku. 35Chaymi runakunaqa imachus kasqanta qhawamunankupaq rispanku Jesusman chayarqanku, hinaspan supaykunamanta kacharichisqa runata rikurqanku. Paymi Jesuspa qayllanpi p'acharqosqa yuyayninpiña tiyasharqan, chaymi mancharikurqanku. 36Jesuspa qhaliyachisqanta rikuqkunataq paykunaman willarqanku imaynatachus supaypa ñak'arichisqan runaq qhaliyachisqa kasqanta. 37Hinaqtinmi Gerasa hap'iypi tiyaq lliw runakunaqa Jesusta rogakurqanku llaqtankumanta ripunanpaq, sinchita manchakusqankurayku. Chaymi Jesusqa boteman haykuspa kutipurqan. 38Supaykunamanta kacharichisqa qharitaq kuskalla kananpaq rogakurqan, Jesustaq ichaqa kachapurqan: 39—Wasiykita kutipuy, hinaspa willakamuy Diospa imaymana ruwapusqasuykita, nispa.

Runataq ripurqan Jesuspa paypaq imaymana ruwasqanta tukuy llaqtantinpi willakuspan.

Jairoq ususinta Jesuspa kawsarichisqan onqosqa warmita qhaliyachisqanpiwan

(Mt 9.18-26; Mr 5.21-43)

40Qocha chimpaman Jesús kutimpuqtintaq askha runakunaqa kusisqa payta chaskirqanku, llapankun paytaqa suyasharqanku. 41Diosmanta yachachina wasipi uma runa Jairo sutiyoq qharitaq hamuspa, Jesuspa ñawpaqenpi qonqoriykukuspa rogakurqan wasinta rinanpaq. 42Paypa ch'ulla ususinmi wañunayasharqanña, chay ususinmi chunka iskayniyoq watayoq hinaña karqan.

Rishaqtintaq askha runakunaqa Jesusta k'iskiykurqanku. 43Chaypin huk warmi kasharqan. Paymi chunka iskayniyoq wataña yawar apaywan onqosharqan, paymi tukuy kaqninkunatapas hampiqkunapi tukusqa, manataq pipas qhaliyachiyta atisqañachu. 44Jesuspa qhepanman asuykuspanmi p'achanpa ch'ullpanta llamiykurqan, hinan yawar apayninqa kaq rato thanirqapurqan.

45Chaymi Jesusqa nirqan: —¿Pin llamiykamuwan? nispa.

Llapanku mananchakuqtinkutaq, Pedroqa paywan kaqkunapiwan nirqan: —Yachachikuq, runakunan tanqapakuspa k'iskipakamushasunkiku, nispa.

46Jesustaq nirqan: —Pipunichá llamiykamuwan, reparanin atiyniywan qhaliyachisqayta, nispa.

47Chaymi warmiqa mana pakakuyta atispa, khatatataspan hamurqan, Jesuspa ñawpaqenpi qonqoriykukuspataq llapa runaq qayllanpi payman willakurqan imaraykuchus llamiykusqanta, imaynatachus qhaliyarqapusqantawan. 48Hinan Jesusqa warmita nirqan: —Ususíy, iñiyniykin qhaliyachisunki, sumaqllaña ripuy, nispa.

49Jesús rimashallaqtinraqmi huñukuna wasipi uma runaq kamachin hamurqan: —Ususiykiqa wañukapunñan, amaña yachachikuqta pusaychu, nispa.

50Jesustaq chayta uyarispa nirqan: —Ama mancharikuychu, iñillay, kawsallanqan, nispa.

51Hinaspan wasita haykuspa, mana pitapas paywan haykunankuta munarqanchu, aswanpas Pedrota, Jacobota, Juanta sipaspa tayta-mamallantawan. 52Lliwmi sipasmanta sinchita llakikuspa waqarasharqanku. Chaymi Jesusqa nirqan: —Ama waqaychischu, manan wañusqachu kashan, puñushallanmi, nispa.

53Hinan wañusqa kasqanta yachaspanku Jesusta asipayarqanku. 54Paytaq ichaqa makinmanta hap'iykuspa kunkayoqta nirqan: —¡Sipas, hatarikuy! nispa.

55Hinan kawsarimpuspa sayarirqanpacha, Jesustaq kamachirqan sipasman mikhunata qonankupaq. 56Tayta-mamantaq muspharqan. Jesustaq paykunata kamachirqan chay ruwasqanta ama pimanpas willanankupaq.

Currently Selected:

LUCAS 8: QC88

Highlight

Copy