LUCAS 9
9
Chunka iskayniyoqta kachasqan
(Mt 10.5-15; Mr 6.7-13)
1Jesusqa chunka iskayniyoq yachachisqankunata waqyaspanmi, paykunaman atiyta qorqan llapa supaykunata qarqonankupaq onqosqakunatapas qhaliyachinankupaq. 2Hinaspan paykunata kacharqan Diospa kamachikuq kananmanta willamunankupaq, onqosqakunata qhaliyachimunankupaqwan. 3Nirqantaq: —Aman imatapas ñanpaqqa apakunkichischu, tawnatapas, qoqawatapas, t'antatapas, qolqetapas, iskay p'achatapas. 4May wasimanpas haykuspaykichisqa chayllapin samakunkichis chay llaqtamanta ripunaykichiskama. 5May llaqtapipas mana chaskiyta munasunkichischu chayqa, chaymanta lloqsispa, chakiykichispi kaq hallp'atapas chhaphchinkichis mana allin ruwasqankuta yachanankupaq, nispa. 6Hinan puririspa lliw huch'uy llaqtakunata purirqanku, Diosmanta allin willakuykunata willaspa, tukuy hinantinpi qhaliyachispankupiwan.
Bautizaq Juanpa wañusqan
(Mt 14.1-12; Mr 6.14-29)
7-8Kamachikuq Herodesmi Jesuspa lliw ruwasqankunata uyarirqan.
Wakinmi nirqanku: —Juanmi wañusqanmanta kawsarimpun, nispa. Wakintaq: —Eliasmi rikhurimpun, nirqanku. Hukkunataq: —Mayqen ñawpa profetacha*f** kawsarimpun, nirqanku. Chaymi Herodesqa iskayrayaspa nirqan: 9—Juanpa umantaqa qhoruchipurqanin riki. ¿Pitaq chayri kanman chaykunata uyarinaypaqqa? nispa. Paytataq rikuytapuni munarqan.
Phisqa waranqa runaman Jesuspa mikhuchisqan
(Mt 14.13-21; Mr 6.30-44; Jn 6.1-14)
10Apostolkunataq*f** kutimuspa imaymana ruwamusqankuta Jesusman willarqanku. Paykunallata pusarikuspataq Jesusqa Betsaida nisqa llaqta qayllaman rirqan. 11Runakunataq chayta yachaspa qhepanta rirqanku. Hinan Jesusqa paykunata chaskispa Diospa kamachikuq kananmanta paykunaman yachachirqan, onqosqakunatapas qhaliyachirqan.
12Ch'isiyaykushaqtintaq chunka iskayniyoq yachachisqankunaqa Jesusman asuykuspa nirqanku: —Kachapullayña runakunata muyuriqpi huch'uy llaqtakunaman estanciakunaman chaypi qorpachakamunankupaq, mikhunatapas maskhakamunankupaq, kaypiqa ch'inneqpin kashanchis, nispa.
13Jesustaq ichaqa paykunata nirqan: —Qankuna mikhuchiychis, nispa.
Paykunataq nirqanku: —Phisqa t'anta iskay challwallaykun kashan, icha, ¿riykumanchu kay llapan runakunapaq mikhuna rantimuq? nispa.
14Yaqa phisqa waranqa qharikunan karqanku. Chaymi yachachisqankunata Jesusqa nirqan: —Phisqa chunkatakama t'aqaspa tiyachiychis, nispa.
15Chay hinata ruwaspankun llapankuta tiyachirqanku. 16Hinan Jesusqa phisqa t'antata iskay challwatawan hap'iykuspa hanaq pachata qhawarispa graciasta qorqan, phasmispataq yachachisqankunaman haywarqan runakunaman rakimunankupaq. 17Hinan llapanku mikhurqanku saksanankukama, puchuq p'akisqakunatataq chunka iskayniyoq canastata hoqarirqanku.
Jesuspa Cristo kasqanta Pedroq sut'inchasqan
(Mt 16.13-19; Mr 8.27-29)
18Huk kuti Jesusqa sapallan mañakushaqtinmi yachachisqankunaqa paywan kasharqanku, hinan paykunata tapurqan: —Runakunari, ¿pi kasqaytataq ninku? nispa.
19Paykunataq kutichirqanku: —Wakinmi Bautizaq Juan kasqaykita ninku, wakintaq Elías kasqaykita ninku, wakinñataq profetakunamanta*f** huknin kasqaykita ninku, nispanku.
20Chaymi Jesusqa paykunata tapurqan: —Qankunari, ¿pi kasqaytataq ninkichis? nispa.
Chaymi Simón Pedroqa payta nirqan: —Diospa Akllasqan Criston kanki, nispa. 21Paytaq ichaqa allin-allinta kamachirqan chayta ama pimanpas rimarinankupaq.
Wañunanmanta Jesuspa willakusqan
(Mt 16.20-28; Mr 8.30—9.1)
22Nirqantaq: —Ñoqaqa Diospa Kachamusqan Runan kani, anchatapunin ñak'arisaq. Ñoqataqa kurak runakunan, sacerdote umallikunan, kamachikuy simita yachachiqkunan qhawarpariwaspa wañuchiwanqaku, kinsakaq p'unchaypitaq kawsarimpusaq, nispa.
23Llapa runakunamantaq nirqan: —Pipas qhepayta hamuyta munaqqa pay kikinta sapa p'unchay nikuchun: Manañan ñoqapaqchu kawsani, nispa, hinaspa ñoqarayku ñak'arispa wañunanpaq kaqtinpas qhepayta hamuchun. 24Pipas pay kikillanta waqaychakuyta munaqqa wiñaypaqmi chinkapunqa, pipas ñoqarayku wañuqmi ichaqa wiñaypaq kawsanqa.
25Huk runachus kay pachantinpi lliw kaqkunata hap'ikapuspa, wiñaypaq chinkapunqa chayqa, ¿ima allintaq paypaq kanqa? 26Pipas ñoqamanta simiykunamantawan p'enqakunqa chayqa, Diospa Kachamusqan Runapas paymantaqa p'enqakullasaqtaqmi, Yayaqpas ch'uya angelkunaqpas hatunchasqan lliphlli-kayniypi hamuspay. 27Cheqaqtan niykichis, Diosqa kamachikunanpaq hamuqtinmi, kaypi kaqkunamanta wakinniykichisqa kawsashankichisraq, nispa.
Jesuspa rikch'aynin hukniraqman tukusqan
(Mt 17.1-8; Mr 9.2-8)
28Pusaq p'unchay hinaña chay simikuna nisqanmantataqmi Pedrota, Juanta, Jacobotawan Jesusqa pusarikurqan, hinaspan orqota wicharqan Diosmanta mañakuq. 29Mañakushaqtintaq uyan hukniraqman tukurqan, p'achanpas yuraq lliphipishaqman. 30-31Chayllamanmi iskay qharikuna lliphlli-kaypi rikhurimurqanku, paykunan Moiseswan Eliaswan karqanku. Jesuswan parlashaspataq wañunanmanta rimarqanku. Jesusqa Jerusalén llaqtapin wañunanpuni karqan. 32Pedrotaq paywan kaqkunapiwan puñuywan aysachikusharqanku, rikch'arispankutaq Jesuspa lliphlli-kayninta rikurqanku, chay iskaynin qharikunatapas paywan kashaqta. 33Jesusmanta paykuna t'aqarikushaqtinkutaqmi Pedroqa payta nirqan: —Yachachikuq ¡may allinmi kaypi kayninchisqa! Kinsa ch'ukllata ruwasaqku, hukta qanpaq, hukta Moisespaq, huktataq Eliaspaq, nispa. Pedroqa mana reparaspan chay hinata rimarqan.
34Chayta pay rimashaqtintaq huk phuyu hamuspa paykunata pakaykurqan. Chaymi phuyuq pakaykusqan kaspa mancharikurqanku. 35Chay phuyumantan huk kunka nimurqan: —Kaymi Munasqay Churiy, payta uyariychis, nispa.
36Chay kunka upallaqtintaq Jesús sapallanña kapusharqan, paykunataq chay p'unchaykunapi mana pimanpas imatapas rimarirqankuchu rikusqankuta.
Supayniyoq waynata Jesuspa qhaliyachisqan
(Mt 17.14-18; Mr 9.14-17)
37Qhepantin p'unchaymi orqomanta uraykamushaqtinku, askha runakuna Jesusman tariparqanku. 38Runakuna ukhumantataq huk qhari waqyakurqan: —Yachachikuq, ama hinachu kay, sapallan churiyta qhawaykampuway. 39Paytan supay hap'in, hinan qonqaylla qaparkachan, wat'akichispan phosoqota aqtuchin, k'irispataq ñak'ayta paymanta t'aqarikun.
40Yachachisqaykikunatan valekurqani chay supayta qarqonankupaq, manataqmi atirqankuchu, nispa.
41Chaymi Jesusqa yachachisqankunata nirqan: —¡Ay! ¡Mana iñiyniyoq waqllisqa runakuna! ¿Hayk'aqkamataq qankunawan kasaq? ¿Hayk'aqkamataq muchusqaykichis? nispa. Taytatataq nirqan: —Churiykita pusamuy, nispa.
42Chaymi wayna asuykushallaqtinraq, supayqa urmachispa wat'akichirqan. Jesustaq supayta phiñarikuspa waynata qhaliyachirqan, hinaspan taytanman kutichipurqan. 43Llapankutaq Diospa hatun atiyninmanta muspharqanku.
Wañunanmanta iskay kutipi Jesuspa willakusqan
(Mt 17.22-23; Mr 9.30-32)
Imaymana ruwasqanmanta llapa musphashaqtinkutaq Jesusqa yachachisqankunata nirqan: 44—Kay simikunata allinta uyariychis, Diospa Kachamusqan Runaqa*f** runakunamanmi hap'ichisqa kasaq, nispa.
45Paykunataq chay rimasqanta mana entienderqankuchu, mana entiendenankupaq pakasqaraq kaqtin, imachus chay simi kasqanta tapuykuytapas manchakurqankutaq.
Pichus qollana kananmanta rimasqanku
(Mt 18.1-5; Mr 9.33-37)
46Yachachisqakunaqa mayqenninkuchus qollana kanankumantan churanakurqanku. 47Hinan Jesusqa sonqokuq yuyaykusqanta yachaspa, huk wawata hap'iykurqan, hinaspan ladonpi sayaykachispa 48paykunata nirqan: —Pipas ñoqaq sutiypi kay wawata chaskiqqa, ñoqatan chaskiwan, pipas ñoqata chaskiwaqtaqmi kachamuwaqniy Diosta chaskin, qankuna ukhupi aswan huch'uykaqmi qollanaqa, nispa.
Mana contranchispi kaqqa ñoqanchiswanmi kashan nisqan
(Mr 9.38-40)
49Juantaq Jesusta nirqan: —Yachachikuq, huk runatan sutiykipi supaykunata qarqoshaqta rikumuyku, payqa manan ñoqanchiswan puriqchu, chaymi hark'amurqayku, nispa.
50Jesustaq Juanta nirqan: —Ama payta hark'aychischu, mana contranchispi kaqqa ñoqanchiswanmi kashan, nispa.
Jacobota Juantawan Jesuspa anyasqan
51Hanaq pachaman ripunan tiempo qayllaykamuqtinmi Jesusqa Jerusalén llaqtaman riytapuni yuyaykukurqan. 52Hinaspan willaqkunata ñawpachirqan, paykunan rispanku Samaria runakunaq huk llaqtanman haykurqanku qorpachanata maskhamunankupaq. 53Samaria runakunataq mana payta chaskiyta munarqankuchu Jerusalén llaqtamanpuni riqta reparaspa. 54Hinan yachachisqankunaqa Jacobowan Juanwan chayta yachaspa nirqanku: —Señorniyku, munanki chayqa hanaq pacha ninata uraykachimusun paykunata rupharqonanpaq profeta*f** Eliaspa ruwasqanta hina, nispa. 55Chaymi Jesusqa kutirispa paykunata anyarqan. 56Chaymantataq huk llaqtachaman ripurqanku.
Jesuspa qhepan riy munaqkuna
(Mt 8.19-22)
57Ñanta rishaqtinkun huk runa Jesusta nirqan: —Qanwanmi risaq mayta riqtiykipas, nispa.
58Jesustaq payta nirqan: —Atoqkunapas t'oqoyoqmi, phalaq animalkunapas q'esayoqmi, Diospa kachamusqan Runaqmi*f** ichaqa mana kanchu maypi puñuykunallaypaqpas, nispa.
59Chaymantataq huk runata nirqan: —Qhepayta hamuy, nispa.
Paytaq nirqan: —Señorníy, simiykimanta risaq taytayta p'ampaykamuq, chaymantaqa risaqmi, nispa.
60Jesustaq payta nirqan: —Hina wañusqakunaqa ayankuta p'ampamuchunku. Qanqa riy, Diospa kamachikuq kananmanta willamuy, nispa.
61Huk runapas Jesustaqa nillarqantaqmi: —Señorníy, ñoqapas qanwanqa risaqmi, ichaqa simiykimanta wasiypi kaqkunawanraq kacharparinakamusaq, nispa.
62Hinan Jesusqa payta nirqan: —Pipas yapunata hap'iykuspaña qhepaman qhawariqqa, manan Diospa kamachikushasqanpi llank'ananpaq hinachu, nispa.
Currently Selected:
LUCAS 9: QC88
Highlight
Share
Copy
Want to have your highlights saved across all your devices? Sign up or sign in
Biblia en Quechua de Cuzco © Sociedades Bíblicas Unidas, 1988.
