LUKAS 7
7
Jesús kachakátsin senturyonpa sirweqninta
1Pweblu wiyaqman llapan palabrankunata usharirna, yeykurerqan Kapernaunman. 2I juk senturyonpa sirweqnin, pey allápa kuyanqan, qeshyar waníkarqan. 3Senturyonnam Jesuspaq parlaqta wiyarir, kacharqan judyukunapa wakin awkinkunata rowarnin shamunanpaq i sirweqninta kachakátsinanpaq. 4I peykunanam shayámorqan Jesusman i rowayarqan waneypa, nishpa: —Allim keyta qoneykiy; 5markantsiktam kuyan i eyllukána wayíkunam ruramorqan.
6Jesusnam peykunawan eywarqan. Peru wayipita manaraq karupáyaptin, senturyon kacharqan peyman amígunkunata, nirnin: —Señor, amana afanakítsu, manam dignutsu ká wayí ruriman yeykuneykipaq; 7tseyreykur manam dignutsu karqó qanman shamunápaq; peru níkiy palabrallata, i sirwimaqní kachakashqam kanqa. 8Tseynowmi jina noqapis ká awtoridáman churashqa nuna, i kapamanmi soldadukuna mandakiniykunachow; keytam ní: “Eywey”, i eywan i juknintanam “shamíy” i shamun; i sirwikoqníta keyta “rurey” i ruran.
9Keyta wiyarirnam Jesús almirakorqan peypita i tumarirnam nerqan qateqnin nunakunata: —Niyaqmi, ni Israyelchowpis tarerqótsu keynow kreyikiytaqa.
10I wayita kutirirnam kachakuna, tariyarqan kachakashqatana sirweqninta qeshyanqanpita.
Jesús kawaritsin juk biwdapa wawanta
11Tseypitanam, pey eyweykaptin Nayin jutiyoq markata, peywan eywayarqan atskaq disípulunkuna, i shuyni nunakuna. 12Markapa punkunman cheykaptinna, keymi key apeykáyarqan panpayánanpaq juk wanushqata, mamanpa japallan wawan, keymi karqan biwda, i peywan kayarqan atska nunakuna tsey markapita. 13I Señor rikeykurnam, ankuparqan peyta, i nerqan: —Ama waqeytsu.
14I witíkurnam yateykorqan kájata, i apeykaqkuna shákuriyarqan. I nerqan: —Jobin, qamtam neq: ¡Sharkiy!
15Tseynam tarkamorqan wanushqa kaq, i qalleykorqan parlarnin i qoykorqan mamanta. 16I llapankunam mantsakáyarqan, i glorifikáyarqan Dyosta nirnin: —¡Juk jatun profetam sharkamushqa noqantsikchow; i Dyosmi watukamushqa pweblunta!
17I reqishqa keynin witsikarqan Judeapa, i jiruroq markakunapapis.
Juan Bawtistapa willakoqninkuna
18Juanpa disípulunkunam qoyarqan willakiykunata llapan kosaskunapita. I qayarqan Juan ishkaq disípulunkunata, 19i kacharqan Jesusman tapuyánanpaq: “¿Qamku kanki shamunan kaq, ó shuyayáshaq juktaku?” 20Tseynam, nunakuna shayámorqan peyman, niyarqan: —Juan Bawtistam kachayámarqon qanman, tapuyánaqpaq: “¿Qamku kanki shamunan kaq, ó shuyayáshaq juktaku?”
21Tsey órachowmi kachakátserqan atskaqta qeshyakunapita i plágakunapita, i mana alli espiritukunapita, i atskaq wiskukunata rikeynin qorqan. 22I yaskirnin Jesús, nerqan: —Eywayey, Juanta musyatsiyey rikáyashqeykita i wiyayashqeykita: Wiskukunam rikáyan, kójukunam puriyan, leprósukunam limpyashqa káyan, sordukunam wiyayan, wanushqakunam kawariyan i waktsakunamanmi willakan ebangelyu; 23i kushikiyoqmi taqey noqachow trompiseyta mana tareq.
Jesús willakun Juan Bawtistapaq
24Juanpa kachankuna eywakuyaptinnam, qalleykorqan nunakunata nirnin Juanpaq: —¿Ima rikaqtaq yarquyarqonkiy chusyaqman? ¿Juk shoqushta byentupa kuyutsishqataku? 25¿Ima rikaqtaq yarquyarqonkiy? ¿Juk nuna fínu bistikushqataku? Keymi key, alli shumaq bistikoqkunaqa kawayan kushikikunachow, reykunapa palasyunkunachowmi keykáyan. 26¿Ima rikaqtaq yarquyarqonkiy? ¿Juk profetataku? Awmi, niyaqmi, i profetapitapis masraq. 27Keymi key peypaqmi qellqashqa keykan:
Kaq key, nowpeykitam kachamú willakoqníta,
peymi alistanqa nowpeykichow qampa nánikita.
28Niyaqmi warmikunachow yurishqakunapita, manam kantsu mayor profeta Juan Bawtistanow; peru Dyospa reynunchow taksha kaqmi peypita mas mayor.
29I llapan nunakuna i publikánukuna, wiyarirnin, Dyosqa justum nirnin, bawtisakuyarqan Juanpa bawtismunwan. 30Farisewkuna i ley káyitsikoqkuna chaskiyarqantsu Dyos rurey munanqanta kikinkunapaq, Juanpa mana bawtisashqa karnin.
31I Señor nerqan: —¿Imawanraq, tinkutsishaq key kaweychow nunakunata, i imawanraq tinkun? 32Plásachow tákoq Jobinkunanow niraqmi kayan, qapariyan jukninkuna wakinkunata i niyan plawtata tokayámorqó i tushuyarqonkitsu; qotsupáyarqoq jiweyllapa i waqayarqonkitsu. 33Shamurqan Juan Bawtista, tantata mikoqtsu i bínuta upoqtsu i niyanki: “Demoniyuyoqmi.” 34Shamorqon, Nunapa Tsurin mikoq i upoq, i niyanki: “Keyqa allápa mikoq nunam i binu upoqmi, publikánukunapa i jutsasapakunapa amigun.” 35Dyospa yacheyninqa justifikashqam llapan tsurinkunapa.
Juk jutsasapa warmi chaskin perdonta
36Farisewkunapita juknin kaq rowarqan Jesusta peywan mikunanpaq. Farisewpa wayinman yeykurirna, tákurerqan mésaman. 37Tseynam juk warmi pweblupita, jutsasapa karqan, farisewpa wayinchow Jesús keykanqanta musyarir, apamorqan juk frasku alabastru pukutaqta; 38peypa chakinkunapa qepanchow keykar, waqarnin, qalleykurqan weqinkunawan chakinkunata tsaqtsur, i aqtsankunawan shupitserqan i chakinkunata mutsarqan; i pukutaqwan llushirqan. 39Keyta inbitaqnin farisew rikarna, nerqan kikimpaq: —Key profeta karqa, reqirinmanchi imanow warmi yatanqanta, keyqa jutsasapam.
40Tseynam yaskirnin Jesús, nerqan: —Simon, jukmi kan ninaqpaq.
I peynam nerqan: —Nimey, Mayestru.
41—Juk prestakoqpa ishkaq jaqatukoqninkuna kayarqan: Juknin deberqan pitsqa pachak denaryukuna, i jukninna pitsqa chunka; 42peykuna mana imawanpis pagayánan kaptin, perdoneykorqan ishkanta. Ní, ari, ¿Meyqanraq kuyanqa mas?
43Simonnam, yaskir nerqan: —Yarpeynípeq taqey meyqan mas perdonashqanmi.
I peynam nerqan: —Allim jusgarqonki.
44I warmiman tumeykurnam, Simonta nerqan: —¿Rikankiku key warmita? Yeykamorqá wayikiman, i manam qomarqeykitsu yakuta chakiykunapaq; keyqa tsaqtsushqa weyqikunawan chakiykunata, i aqtsankunawanmi shupitsishqa. 45Manam mutsamarqeykitsu; mas keyqa, yeykamushqampitam, manam jamashqatsu chakiykunata mutsar. 46Manam llushimarqeykitsu peqáta aseytiwan; peyqa chakiykunata llushimushqa pukutaqwanmi. 47Tseyreykurmi neq atska jutsankunapis perdonashqanam, allápa kuyakuptin; pitapis wallkalla perdonashqaqa, wallkallam kuyakun. 48—I warmitanam nerqan: —Perdonashqanam jutseykikuna.
49Mésachow juntulla teykaqkuna, qalleykuyarqan kikinkunapura ninakur: —¿Pitaq key, jutsakunatapis perdonan?
50Peru peynam nerqan warmita: —Kreyikiynikim salbashorqonki, ewkiy yamey keychow.
Currently Selected:
LUKAS 7: QUEAN
Highlight
Share
Copy
Want to have your highlights saved across all your devices? Sign up or sign in
Quechua Ancash New Testament © Peruvian Bible Society, 1992.
