LUKAS 8

Jesusta qateq warmikuna

1Tseypitanam suserderqan, Jesús eywarqan llapan markakunapa i tunakunapa, Dyospa reynunpa ebangelyunta predikar i willakur, i peywan chunka ishkeykuna, 2i wakin warmikuna mana alli espiritupita kachakashqa kaqkuna i qeshyakunapita: Marya, Magdalena jutiyoq, peypita yarqushqa karqan qanchis demoniyukuna, 3Juana, Eródispa mayordómun Chúsapa warmin, i Susana, i atskaqkuna sirwiyaq kapoqninkunapita.

Murukoqwan tinkutsikiy

4Atskaqkuna eyllukárir i jinantin markapita peyman shayámoqkunata, tinkutsikiypa nerqan: 5“Muroqmi yarqorqan murunta muroq; i muriykaptinnam, wakin shikwarqan náni kuchunman, i jarushqa karqan, i syelu pishqukuna ushpakurkuyarqan. 6Wakinnam shikwarqan ranraman; i jeqaramur, tsakirerqan, mana oqun kaptin. 7Wakinnam shikwarqan kashakunaman, i kashakunawan juntulla jeqaramurna, tsapariyarqan. 8I wakinkuna shikwayarqan alli allpaman, i jeqaramur wayínin karqan jukpita pachakkama.” Keykunata parlarnin, nerqan sinchipa: “Wiyananpaq rinriyoq kaqqa, wiyatsun.”

Muroqwan tinkutsikiy káyitsishqa

9I disípulunkuna tapuyarqan, nirnin: ¿Ima ninantaq key tinkutsikiy? 10I pey nerqan: “Qamkunatam qoshqa kayáshunki Dyospa reynunpita pakaraqkunata; peru wakinkunataqa tinkutsikiypa, rikeykar mana rikáyananpaq, i wiyeykar mana káyiyánanpaq.

11“Keymi key, tinkutsikiy: Muruqa Dyospa palabranmi. 12I náni kuchunchow keykaqkunam kayan wiyaqkuna, i tseypita dyablu shamur shonqunpita jorqurin palabrata, mana kreyiyánanpaq i mana salbakuyánanpaq. 13Ranrachow kaqkunam kayan wiyariykur, chaskiyan palabrata kushikiywan; peru keykunaqa watsinnaq karnin; ichik tyempulla kreyiyan, i prweba tyempuchow rakikákuriyan. 14I kashakunaman shikwaq, keykunam wiyaqkuna kayan, ewkurna, tsapakáriyan tukiyláya rureykunapa i rikeysakunapa i key kaweychow kushikiykunapa, i wayíta apayantsu. 15Alli allpaman shikwaqnam, kayan alli shonquwan tsarakatsiyan wiyashqa palabrata, i wayíta qoyan tsarakiywan.

Lamparinwan tinkutsikiy

16“Pipis aktsita sendirkur manam juk winanawan tsaparkuntsu, ní káma rurinman churantsu, sinowqa churan kandeléruman yeykoqkuna aktsita rikáyánanpaq. 17Manam imapis kantsu pakaraq, mana rikakámoqqa; ni pakashqa, mana reqishqa kananpaq, i aktsiman yarqamunanpaq.

18“Rikáyey, imanowmi wiyayanki; llapan kapoqyoqtam, qoyanqa; i llapan mana kapoqyoqtam, kapunanpaq munanqantapis qochiyanqam.

Jesuspa kastan

19Tseynam maman i wawqinkuna shayámorqan peyman; peru manam peyman cheyta pwediyarqantsu allápa atska nunakuna kayaptin. 20I willayarqan, nishpa: —Mameyki i wawqikikunam waqtachow keykáyan i rikáshiynikitam munayan.

21Tseynam pey yaskirnin, nerqan: —Mamáqa i wawqíkunaqa Dyospa palabran wiyaqkunam, i ruraqkunam kayan.

Jesús páratsin shukukiyta

22Juk junaqmi susederqan, juk barkaman yeykorqan disípulunkunawan, i nerqan: —Pasashun qochapa wak tsinpanman.

I ewkuyarqan. 23Barkawan eyweykáyaptinnam, pey puniykarqan. I yurikurkorqan shukukiy byentu qochachow, i yakupa juntakar peligrayarqan. 24I peyman shayámorqan i riwatsiyarqan, nishpa: —¡Mayestru, Mayestru, ushakárintsiknam!

Riwarkur pey, piñaparqan byentuta i laqcheqseyninkunatapis; i párariyarqan, i shumaqlla keydarerqan. 25I nerqan peykunata: —¿Meychowtaq keykan kreyikiynikikuna?

Mantsakeywan, almirakuyaq, i ninakuyaq jukninkuna jukninkunawan: —¿Pitaq key, yakukunata i byentukunata mandan, i kásuyan?

Jesús kachakátsin juk endemoniyaduta

26Eywayarqan gadareynukunapa markanta, Galileyapa wak tsinpanchow keykaqman. 27Patsaman pey cháriptin, shamorqan pweblupita peyman juk nuna, allápa uneypitana endemoniyadu kanaq, rópata yakakoqtsu, ni wayichow yachaqtsu, sinowqa sepultúrakunachow. 28Jesusta rikeykurnam, i chakinkunaman qonquriykur qaparerqan sinchipa: —¿Imanankitaq noqawan, Jesús, Dyos Altísimupa Tsurin? ¡Rowaqmi ama tormentameytsu!

29Nunapita rakcha espirituta yarqunanpaq mandaptin, allápa uneypitana tsararashqa kaptin; watayaq kadénakunawan i grilluskunawan, peru kadénakunata rachirir, demoniyupa apashqa kaq chusyaqkunaman.

30I Jesús taporqan, nishpa: —¿Imataq jutikiy?

I peynam nerqan: —Lejyonmi.

Atskaq demoniyukunam yeykushqa kayarqan peyman. 31I rowayarqan wanwareykaqman mana mandayánanpaq. 32Tseychow keykarqan purwanpin atska kuchikuna mikurnin jirkachow; i rowayarqan kuchikunaman yeykuyánanpaq; i permísun qorqan. 33I demoniyukunanam, nunapita yarqurir, yeykuriyarqan kuchikunaman, i purwanpin jeqakurkuyarqan juk jirka pachanpa qochaman, i awgakáriyarqan.

34I kuchi mitseqkunanam, susedikushqata rikeykur, eyqikuyarqan, i eywar willakuyarqan pwebluchow i tunakunachow. 35I yarquyarqan susedishqanta rikaq; i shayámorqan Jesusman, i tariyarqan nunata peypita demoniyukuna yarqushqatana, Jesuspa chakinchow teykaqta, bistishqata, i fisyunchowna; i mantsakáyarqan. 36I rikashqa kaqkunanam, willakuyarqan endemoniyadu imanow salbashqa kanqanta. 37Tseynam llapan atskaqkuna gadareynu marka jiruroqninpita rowarqan peykunapita ewkunanpaq, allápa mantsakeywan karnin. I Jesús, barkaman yeykurir, kutikorqan. 38I demoniyupita sanuyashqa nuna rowarqan peywan kayánanpaq, peru Jesusna dispidíkorqan, nirnin: 39—Kutikiy wayikita, i willakiy imanow jatun kosaskunatam Dyos rurashqa qanwan.

I pey ewkorqan, willakurnin llapan pweblupa imanow jatun kosaskunata Jesús peywan ruranqanta.

Jesús kachakátsin juk warmita

40Jesús kutiptin, atskaqkuna chaskiyarqan kushikiywan; llapan shuyayarqan. 41Tseynam shamorqan juk nuna Jayru jutiyoq, eyllukána wayichow mandakoq kaq, i Jesuspa chakinman qonqurikiykur, rowarqan wayinman yeykunanpaq 42kaporqan japallan juk warmi tsurin, chunka ishkey watayoqnowna, waníkarqan. Eywareykaptinna, atskaqkuna kichkitáyarqan.

43Juk warmi jiparqan chunka ishkey watana yawar apeywan i gastanaq médikukunachow llapan kapoqninta, ni meyqan pwedinaqtsu kachakátsita, 44qepanpa witiykur yateykorqan mantunpa kuchunta; tsey óra keydakárerqan yawarnin eywey. 45Tseynam Jesús nerqan: —¿Pitaq yatamarqon?

I llapankuna negayaptin nerqan: —Pédru i peywan keykaqkuna: Mayestru, atskaqkunam kichkitáyáshunki i lapiyáshunki i ninkiy: ¿Pitaq tsey yatamarqon?

46Jesusnam nerqan: —Pí karpis yatamarqonmi; noqam musyarerqó poder noqapita yarqushqanta.

47Tseynam, warmi ratakiyta mana kanqanta rikeykur, katateykar shamorqan, i chakinkunaman qonquriykur willarqan llapan nunakunapa nowpanchow imareykur yatashqanta, i imanow tsey óralla kachakashqanta. 48I peynam nerqan: —Tsuri kreyikiynikim salbashorqonkiy; eywakiy yameychow.

Jesús kawaritsin Jayrupa tsurinta

49Parleykáyaptinraq, shamorqan judyukunapa eyllukáyanan wayichow juk mandakoqpa wayinpita ninanpaq: —Tsuriki wanurishqanam; mayestruta ama piñatsinatsu.

50Jesús wiyarirna yaskerqan: —Ama mantseytsu, kreyikiylla, i salbashqam kanqa.

51Wayiman yeykurir, ni pita jaqirqantsu yeykunanta kikinwan, sinowqa Pedruta, Jakobuta, Juanta, i wamrapa teytanta i mamanllata. 52I llapankuna waqayarqan jiweyllapa peypaq. Peynam nerqan: —Ama waqayeytsu; manam wanushqatsu, puniykanllam.

53I peypita burlakuyarqan, wanushqa kanqanta musyar. 54Pey, makipeq tsarirkur, qayarqan sinchipa: —Shipash sharkiy.

55Tseynam espíritun kutirerqan, tseyllanam sharkurerqan; i peynam mandarqan mikiynin qoyánanpaq. 56I teytankuna keykáyarqan almirashqa; peru Jesusna mandarqan pitapis mana willakuyánanpaq key susedishqanta.

Currently Selected:

LUKAS 8: QUEAN

Highlight

Copy