LUKAS 9
9
Chunka ishkeypa rurayánan
1Chunka ishkey disípulunkunata eyllurirna, qorqan podernin i awtoridánin llapan demoniyukunata qarkuyánanpaq, i qeshyakunata kachakátsinanpaq. 2I kacharqan Dyospa reynunta predikaq i qeshyayoqkunata kachakátseq. 3I nerqannam: —Ama imata tsariyeytsu nánipaq, ni bastonta, ni alporjata, ni tantata, ni qelleyta; ni apayeytsu ishkey tuníkakunata. 4I meyqan wayiman yeykuyanqeykichow, keydakuyey tseychow, i tseypita yarquyey. 5I meychowpis mana chaskiyáshuptikeqa yarquyey tsey markapita, i chakikikunapa polbunta tapsikuriyey peykunapa kontran willakiypaq.
6I yarqurirnam, pasayarqan llapan tunankunapa, ebangelyuta willakurnin i kachakátsikur jinantinkunapa.
Juan Bawtistapa wanínin
7Gobernador Eródis wiyarqan llapan kosaskuna Jesús rurashqanta; i aturdishqa keykarqan, wakinkuna niyaptin: Juanmi kawarimushqa wanushqakunapita. 8Wakinnam: Eliasmi yurimushqa; i wakinkunana. Uney profetakunapita jukninchi kawarimushqa. 9I Eródis nerqan: “Juantaqa noqam roqutserqá; ¿pitaq key, peypita tukiykuna wiyanqá?” I rikeyta munaq.
Jesús mikutsin pitsqa waranqata
10Apostulkuna kutirirnam, willayarqan llapan rurayashqanta. I pusharkur, witikurerqan, Betsayda pweblupa chusyaqninman. 11I nunakuna musyarirnam, qatiyarqan; i peynam chaskerqan, i parlaparqan Dyospa reynunpita, i kachakátseq kachakey wanaqkunata.
12Peru junaq qalleykorqan tardiyarnin; i chunka ishkaqkuna witiykur, niyarqan: —Nunakunata despidikiy, ewkuyánanpaq, jiruroqnin tunakunaman i kampukunaman; i posadakuyánanpaq i mikiyninkuna tariyánanpaq; keychowqa chusyaqchowmi keykantsik.
13Peynam nerqan: —Qamkuna mikiyta qoyey.
I peykuna niyarqan: —Kayápaman pitsqa tanta i ishkey peskadullam, manatseyqa noqakunachi eywayashaq mikiyta ranteq keytsika nunakunapaq.
14I kayarqan pitsqa waranqanow ollqukuna. Tseynam nerqan disípulunkunata: —Tatsiyey purweypayan, pitsqa chunkapa.
15Tseynowmi rurayarqan, llapankunata tátsirnin. 16I pitsqa tantakunata i ishkey peskadukunata tsarirkur syeyluman rikarkur, bendiserqan, i pakirerqan, i qorqan disípulunkunata churayanampaq nunakunapa nowpanman. 17I llapankuna mikuyarqan, i teqñayanqanyaq; i eylluyarqan sobrakunata, chunka ishkey kanastaman pakipikunata.
Pedrupa willakiynin
18Susederqan, Jesús jaqpilla Dyosta mañakiykaptin, peywan disípulunkuna keykáyarqan; i tapur nerqan: —¿Nunakuna pí kanqátataq niyan?
19Peykunanam yaskiyarqan: —Wakinkuna, Juan Bawtistam; wakinnam, Eliaschi; i wakinkunanam, uney profetakunapita jukninchi kawarimushqa.
20Peynam nerqan: —¿I qamkunaqa, pí kanqátataq niyankiy?
Tseynam yaskerqan Pedru, nishpa: —Dyospa Kristunmi.
21Peynam atikarqan pitapis mana imata niyánanpaq keypita, alleqpa atikarqan, 22nishpa: —Wananmi Nunapa Tsurin jipanan tukiyláyakunapita, i awkinkunapa rechasashqa, prinsipal saserdotikunapa, i judyukunapa leynin yachatsikoqkunapa i wanushqa kanan, i kawarimunqa kima junaqta.
Kondisyonkuna Jesusta qatinapaq
23I llapankunata nerqan: —Meyqanpis qepáta shamiy munaqqa, negakutsun kikinta, kada junaq krusninta apatsun, i qatimátsun. 24Pipis kaweyninta salbey munaqqa, oqranqam; i llapan noqapaqreykur, kaweyninta oqraqqa, keyqa salbanqam. 25Tseyqa, ¿ima probeychuraq nunapaq, llapan munduta ganaptin, ushakátsikun ó kikin oqrakákurin? 26Noqapita i palabrákunapita penqakoqqa, peypitam Nunapa Tsurinpis penqakonqa gloryanchow shamur, i Teytapachow, i santu angelkunapachow. 27Rasonpam niyaq, wakin keychow keykaqkuna, manam wanuyanqaraqtsu Dyospa reynunta rikáyanqanyaq.
Trokakey
28Susederqan puwaq junaqtanow key palabrakunapita, aparqan Pedruta, Juanta i Jakobuta, i witsarqan jirkata Dyos mañakoq. 29I Dyosta mañakiykaptinnam, qaqllanpa rikeynin trokakárerqan jukman, i bestídunnam luyaq i chipapikaq. 30I kaq keymi ishkaq ollqukuna parleykáyarqan peywan, i peykuna kayarqan Moyses i Elias; 31peykuna yuririyarqan gloryapa jirurushqa, i parleykáyarqan ewkunanpita, Jesús Jerusalenchow kunplinan karqan. 32I Pedru i peywan keykaqkuna puniywan rendishqa keykáyarqan; peru riweykarnam, rikáyarqan Jesuspa gloryanta, i peywan ishkaq ollqukuna keykaqta. 33I susederqan peykuna peypita rakikárir, Pedru nerqan Jesusta: —Mayestru, allim keychow keykantsik; i rurayámushaq kima ramádakunata, jukta qanpaq, jukta Moysespaq i juktana Eliaspaq; nishqanta mana musyarnin.
34Pey keyta nikaptinraq, pukutey shamur tsapáriyarqan, i mantsayarqan pukuteyman yeykurnin. 35I juk bos shamorqan pukuteypita, nirnin: “Keymi kuyey Tsurí; peyta wiyayey.”
36I bos párariptinna, Jesús japallanna keykarqan; i peykuna upallákuyarqan, i tsey junaqkunapaq imatapis niyarqantsu ni pita rikáyashqanta.
Jesús kachakátsin juk jobinta
37Waránin junaq, jirkapita uráyamuptin, atskaq nunakuna yarqayámorqan tinkuyananpaq. 38I kaq keymi, atskaqkunapita juk nuna qaparerqan nishpa: —Mayestru, rowaqmi tsuriyta rikáneykipaq, pey japallanllam kallápaman. 39Juk espiritum tsarin, i illaqpita qaparikachan, i tapsikacharkun lluteypa, i jitatsin poshoqata, maltratarnin, mana muneytam peypita rakikan. 40I disípulikikunatam rowarqá jaqman qarquyánanpaq, i manam pwediyarqontsu.
41Jesús yaskirnam, nerqan: —¡Ó mana kreyikoq perbersu kastakuna! ¿Imeyyaqtaq qamkunawan keykáshaq, i awantayashqeyki? Apamí keyman tsurikita.
42I jobin witikaptinna, demoniyu seqirerqan i tapsirerqan sinchipa; i Jesusna piñaparqan rakcha espirituta, i kachakáratserqan jobinta, i kutíkatserqan Teytanman. 43I llapankunam almirakuyarqan Dyospa jatun keyninta.
Jesús willakun ushukiyninta
I llapan almirakurnin key kosaskuna ruraptin, disípulunkunata nerqan.
44—Rurayey key palabrakuna alleq rinrikikunaman yeykunanpaq; susedenqam Nunapa Tsurin entregashqa kanqa nunakunapa makinkunaman.
45Peykunaqa manam káyiyarqantsu key palabrakunata, turbashqa keykáyarqan mana káyiyánanpaq; i mantsayarqan key palabrakunapeq tapiyta.
Pitaq mas báleq
46Tseynam yeykuriyarqan liryakiman meyqanshi peykunachow mayor kanman. 47Jesusnam, shonqunkunapa yarpeyninta káyirir, juk wamrata tsarirkur churarqan ládunman, 48i nerqan: —Meyqanpis key wamrata jutíchow chaskeqqa noqatam chaskiman; i meyqanpis noqata chaskimaqqa, chaskin kachamaqniytam; pim mas úshukonqa llapeykikunapita, keymi key mas báleq.
Pitaq noqantsikwan keykan
49Tseynam yaskirnin Juan, nerqan: —Mayestru, rikáyarqó juktam jutikichow demoniyukuna qarqoqta; i micháyarqómi, noqantsikwan mana puriptin.
50Jesusnam nerqan: —Ama micháyeytsu; noqantsikpa mana kontrantseqqa, noqantsikpaqmi.
Jesús Jerusalenman eywan
51Pey rarachow chaskishqa keynin tyempu tinkuriptinna, churakarqan Jerusalenman eywananpaq.
52Willakoqkunata kacharqan peypa nowpanta, peykuna eywarnin yeykuriyarqan Samaritánukunapa tunankunaman alistapuyánanpaq. 53Manam chaskiyarqantsu, Jerusalenta eywaqnow kaptin. 54Disípulunkuna Jakobo i Juan keyta rikeykur, niyarqan: —Señor, ¿munankiku syelupita nina urámunanpaq mandayamunáta, Elias ruranqannow, i ushakátsiyanampaq?
55Tseynam pey tumeykur, piñaparqan, nirnin: Qamkuna manam musyayankitsu ima Espiritupa kayanqeykita; 56Nunapa Tsurinqa manam shamushqa nunakunapa almanta oqrananpaqtsu, sinowqa salbananpaqmi. I juk tunampa ewkuyarqan.
Jesusta sasam qati
57Peykuna eyweykar juk kaq nerqan nánichow: —¡Señor, qatishqeykim meyta eywaptikipis!
58I Jesusnam nerqan: —Atoqkunapa kayápummi macheyninkuna, i syelu pishqukunapa qeshunkuna; Nunapa Tsurimpaqa manam kapuntsu meychow peqanta tunaqátsinampaq.
59I jukninta nerqan: —Qatimey.
Peynam nerqan: —Señor, jaqimey puntata eywar Teytátaraq pampamushaq.
60Jesusnam nerqan: —Jaqi wanushqakuna wanushqankunata pampakuyatsun, ¡i qam eywey, i willakiy Dyospa reynunpaq!
61Tseynam jukninpis nerqan: —Qatishqeykim, Señor; jaqiymey puntata wayíchow kaqkunapita despidikaramushaq.
62I Jesusnam nerqan: —Meyqampis takllata tsarirkur qepaman rikaqqa, manam sirwintsu Dyospa reynunpaq.
Currently Selected:
LUKAS 9: QUEAN
Highlight
Share
Copy
Want to have your highlights saved across all your devices? Sign up or sign in
Quechua Ancash New Testament © Peruvian Bible Society, 1992.
