MATEO 24
24
Templupa ushakeynin
1Jesús templupita yarqurir i ewkureykaptin, witiyarqan disípulunkuna rikátsiyananpaq templupa perqashqakunata. 2Pey yaskirnin, nerqan: —¿Rikáyankiku key llapanta? Tseqeypam niyaq, manam keychow keydanqatsu rumi janawaránakushqa, llapanmi juchushqa kanqa.
Ushakeyta willakoq señalkuna
3I Olíbus jirkachow pey teykaptin, disípulunkuna witiriyarqan peyman jaqpilla, nirnin: —Niyámey, ¿imeyraq key kosaskuna kanqa, ima señaltaq kanqa shamínikipaq, i siglu usheyninpita?
4Yaskirninnam Jesús, nerqan: —Rikáyey ama pipis engañayáshitsu. 5Shayámonqam atskaqkuna jutíchow, nirnin: “Noqam Kristu ká”, i atskaqkunatam engañayanqa. 6I wiyayankim guerrakunapita i guerrapaq parlaqkunata; rikáyey ama turbakákuriyeytsu, wananmi key llapan susedinan; peru manam ushakeyraqtsu. 7Sharkuyanqam nasyon juk nasyonpa kontran, i reynu juk reynupa kontran; i kanqam pestikuna, i mallaqeykuna, i patsa kuyíkuna jinantinkunachow. 8I key llapanmi nanatsikiykunapa qallanan kanqa.
9»Tseynam entregayáshunki jipeykunaman, i wanutsiyáshunki, i chikishqam kayanki llapan nunakunapa jutíreykur. 10Tseynam atskaqkuna tronpisayanqa, i entreganakuyanqa jukninkuna wakinkunata, i jukninkuna wakinkunawan chikinakuyanqa. 11I atskaq uli profetakunam sháriyanqa, i engañayanqa atskaqkunata; 12i mana allikuna mirakashqanreykur, atskaqkunapa kuyakiynin elakurenqa. 13Peru ushéyaq tsarakoqqa, keymi salbashqa kanqa. 14I predikashqam kanqa key reynupa ebangelyun jinantin munduchow, willakiypaq llapan markakunaman; i tseynam shamonqa ushakey.
Melaneypaq ushakey
15»Tseyreykur, santu lugarchow rikáyaptiki melaneypaq ushakatsikoqta profeta Danyel tseypaq parlanqanta (leyeqqa, káyitsun), 16tseynam Judeachow keykaqkuna safakuyátsun jirkakunaman. 17Altuschow keykaqkuna, ama uráyátsuntsu imankunatapis tsariyanampaq wayinkunapita. 18I chakrachow keykaq, ama qepaman kutitsuntsu aqshunanta tsarinanpaq. 19Masqa ¡allaw qeshyaq keykaqkuna, i taqey junaqchow wamra wátaqkuna! 20Dyosta mañakuyey, safakiynikikuna tamya tyempuchow i jamakiy junaqchow mana kananpaq; 21tseynam kanqa jatun jipakiykuna, tseynowqa manam kashqatsu mundu qallananpita kananyaq, ni kanqatsu. 22I taqey junaqkunatsun mana wallkayátsishqa kanman, manachi pipis salbashqatsu kanman; akrashqakunareykurmi, taqey junaqkuna wallkayátsishqa kanqa.
Uli Kristukuna i uli profetakuna
23»Tseymi, si pipis niyáshunkiman: “Rikáyey, keychowmi keykan Kristu”, ó “rikáyey, tseychowmi keykan”, ama kreyiyeytsu. 24Sharkuyanqam uli Kristukuna, i uli profetakuna, i rurayanqa jatun señalkunata i milagrukunata, tseynowpam pantatsiyanqa, itsapis, akrashqakunatawan. 25Uneynam niyarqoq. 26Tseymi, si niyáshunkiman: “Rikáyey, tsunyaqchowmi keykan”, ama yarquyeytsu; ó “rikáyey, salakunachowmi keykan”, ama kreyiyeytsu. 27Imanowmi inti ullumunanpita tillapyar yarqamun, i inti jeqananyaq rikátsikun, tseynowmi kanqa Nunapa Tsurinpa shamiynin. 28Meychowmi keykan wanushqapa kwerpun, tseymanmi eyllukáyanqa wiskurkuna.
Nunapa Tsurinpa shamiynin
29»Tsey jipakiy junaqkuna pasariptinna, inti ampikurkonqa, i killa chipapanqanatsu, i qoyllurkuna ishkimonqa syelupita, i syelukunapa pwedeq keynin kuyutsishqa kanqa. 30Tseynam yurimonqa Nunapa Tsurinpa señalnin syeluchow; i tseynam llakikuyanqa patsachow llapan purwakuna, i rikáyanqa Nunapa Tsurinta syelu pukutey jananchow shamiykaqta, poderwan i jatun gloryawan. 31I kachanqa angelninkunata tronpetapa jatun boswan, i purwanqa akrashqankunata, chuskun ládukunapita, syelupa juknin kuchunpita jukninyaq.
32»Yachakuyey ígus yurapita tinkutsikiyta: Ráman poqtsiramuptin, i raprankuna tseqlliramuptin, musyayankim usya tyempu yeykareykamonqanta. 33Tseynow qamkunapis, key llapan kosaskunata rikarnin, reqiyey serkachowna kanqanta, punkullachowna. 34Tseqeypam niyaq key kastaqa manam pasanqatsu key llapan susedinqanyaq. 35Syelupis i patsapis pasariyanqam, peru palabrákunaqa manam pasanqatsu.
36»Peru junaqta i órata manam pí musyantsu, ni syelukunachow angelkunapis, sinowqa Teytállam. 37Nowépa junaqninkunachownow, tseynowmi Nunapa Tsurinpa shamiynin kanqa. 38Manaraq dilubyu junaqkuna kaptin keykáyarqan mikur i upur, kasakurnin kasatsikurnin, Nowé arkaman yeykonqan junaqyaq. 39I mana kayiyarqantsu dilubyu shamonqanyaq i llapankunata apakorqan, i tseynowmi Nunapa Tsurinpa shamiynin kanqa. 40Tseynam ishkaq keykayanqa chakrachow; juknin apashqa kanqa, i jukninnam jaqirishqa kanqa. 41Ishkaq warmikunam aqeykáyanqa juk mulinuchow; juk apashqa kanqa, i juknin jaqirishqa kanqa. 42Listu keykáyey, manam musyayankitsu imey óra Señornikikuna shamunanta. 43Peru keyta musyayey, si kastapa teytan musyanman imey óra suwa shamunanta, riyeykanmanchi, i manam wayin suwayananta jaqinmantsu. 44Tseyreykur, qamkunapis listulla keykáyey, Nunapa Tsurenqa shamonqa mana yarpáyanqeyki óram.
Mayordomukunawan tinkutsikiy
45»¿Pitaq, fyel sirwikoq i mákoqlla, Señor churashqan wayinman mikunan qonanpaq tyempunchow? 46Kushikíyoqmi taqey sirwikoq, señornin shamuptin, tseynow rureykaqta tarenqa. 47Tseqeypam niyaq llapan kapoqninmanmi churanqa. 48Peru si taqey mana alli sirwikoq ninman shonqunchow: “Señorní unámun shamiyta”; 49i qalleykunman sirwikoq mayinkunata maqar, i mikunman i upunman machakoqkunawan. 50Shamonqa taqey sirwikoqpa señornin mana shuyanqan junaq, i mana musyanqan órachow. 51I astanqam feyupa, i churanqa partinta motolítukunawan; tseychowmi kanqa waqakiy i kirukunapa ruchuchiynin.
Currently Selected:
MATEO 24: QUEAN
Highlight
Share
Copy
Want to have your highlights saved across all your devices? Sign up or sign in
Quechua Ancash New Testament © Peruvian Bible Society, 1992.
