MATEO 25
25
Chunka donsellakunawan tinkutsikiy
1»Tseynam syelukunapa reynun kanqa chunka donsellakunanow niraq lamparankunata tsarirkur, yarquyarqan qowa chaskeq. 2Peykunapita pitsqa kaq kayarqan alkábu i pitsqa kaq dejádakuna. 3Dejádakunaqa, lamparinninkunata tsarirnin, apayarqantsu peykunawan aseytita; 4alkábu kaqkunaqa, tsariyarqan aseytita winanankunaman, lamparankunatawan juntu. 5I qowa unámuptin, llapankuna awenqáriyarqan i punukáriyarqan. 6I pullan paqasnam wiyakorqan juk qayakiy: “¡Keymi qowa shamun; yarquyey chaskeqnin!” 7Tseynam llapan donsellakuna sharkuriyarqan, i altsayarqan lamparankunata. 8I dejádakuna niyarqan alkábu kaqkunata: “Qoyámey aseytikikunata; lamparákunam upikurin.” 9Peru alkábu kaqkuna yaskiyarqan nirnin: “Noqakunapaq i qamkunapaq mana pishinanpaq, eywayey rantikoqkunaman, i rantiyey kikikikunapaq.” 10Peru peykuna ranteq eywayanqanyaq, shamorqan qowa; i alistakushqa kaqkuna yeykuyarqan peywan kasamyentuman i punku wichqakárerqan. 11Tseypitanam shayámorqan wakin donsellakunapis, nirnin: “¡Señor, señor, kichapuyamey!” 12Peynam, yaskirnin nerqan: “Tseqeypam niyaq manam reqiyaqtsu.” 13Riwakuyey, manam musyayankitsu junaqta ni órata Nunapa Tsurin shamunanta.
Talentukunawan tinkutsikiy
14»Syelukunapa reynunqa juk nuna karuta eywakoqnowmi, qayarqan sirweqninkunata i qoykorqan kapoqninkunata. 15Jukta qorqan pitsqa talentukunata, i jukninta ishkeyta, i juknintana juklleyllata, kada únuta yacheyninkunamannow; i tseypita ewkorqan karuta. 16I pitsqa talentukunata chaskishqa kaq eywar negosyarqan tseykunawan, i ganarqan mas pitsqa talentukunata. 17Jina tseynow ishkeyta chaskeqpis, ganarqan ishkey masta. 18Peru juklleylla chaskishqa kaqqa eywarqan i patsata uchkurerqan, i pakeykorqan señorninpa qelleyninta.
19»Tseypita uneytana taqey sirwikoqkunapa señornin shamorqan, i kwentakunata arreglarqan peykunawan. 20I pitsqa talentukunata chaskeq chárir, apamorqan pitsqa mas talentukunata, nirnin: “Señor, pitsqa talentukunatam qomarqeyki; i kaq key, ganarqó pitsqa talentu mastam tseykunaman.” 21I señornin peyta nerqan: “Allim, alli i fyel sirwikoq ichikllachowmi fyel karqonki, atskamanmi churashqeyki; yeykiy señornikipa kushikiyninman.” 22Ishkey talentu chaskeqpis chárir, nerqan: “Señor, ishkey talentutam qomarqeyki; kaq key ganarqó ishkey talentu mastam tseykunaman.” 23Señorninnam nerqan: “Allim, alli i fyel sirwikoq; ichikllachowmi fyel karqonki, atskamanmi churashqeyki; yeykiy señornikipa kushikiyninman.” 24Peru juk talentu chaskeqpis chárir, nerqan: “Señor, reqerqaqmi wápu nuna kanqeykita, seganki mana murushqeykipita i eyllunki mana maqtsinqeykipita; 25tseyreykurmi karqan mantsakíniy, i eywar pakeykurqá allpaman talentiykita; keymi qampa kaq.” 26Señornin yaskir, nerqan: “Mana alli i qela sirwikoq, musyarqeykim mana muronqáchow seganqáta i mana maqtsinqápita eyllunqáta. 27Tseyreykur, bankuyoqkunata qelleyníta qonkiman karqa, i noqa shamurnin chaskíman karqa kikiypa kaqta wacheyninkunatawan. 28Qochiyey talentuta i qoyey chunka talentuyoq kaqta. 29Tseymi kapoqtaqa qoshqa kanqa, i masmi kaponqa; i mana kapoqtaqa, kapoqnintapis qochisqam kanqa. 30I mana báleq sirwikoqta jitariyey jaqpa ampinkunaman.” Tseychowmi kanqa waqakiy i kiru ruchuchiy.
Nasyonkunapaq fisyu
31»Nunapa Tsurin gloryanchow shamuptin i llapan santu angelkuna peywan, tseynam tákurenqa glorya tronunchow, 32peypa nowpanmanmi eyllushqa kayanqa llapan nasyonkuna; i rakenqa jukninta, imanowmi mitseq rakin úshakunata chiwakunapita. 33I churanqa úshakunata deréchanman, i chiwakunata itsoqninman.
34»Tseynam Rey nenqa deréchanchow kaqkunata: “Shayámi, Teytápa benditunkuna, eredayey qamkunapaq alistashqa reynuta mundu qallananpita. 35Mallaqaptiymi, mikuná qoyámarqeyki; yakunarqá, i uputsiyámarqeyki; jorasteru karqá, i eylluyámarqeyki; 36qalapáchu keykarqá, i bistitsiyamarqeyki, qeshyaptiy, watukayámarqeyki; karselchow, noqaman shayámorqeyki.” 37Tseynam justukuna yaskiyanqa nirnin: “Señor, ¿imeytaq rikáyarqoq mallaqeykaqta, mikatsiyarqoq ó yakuneykaqta, i qoyarqoq upuneykipaq? 38¿I imeytaq jorasteruta rikáyarqoq, i eylluyarqoq, ó qalapáchuta, i bistitsiyarqoq? 39¿Ó imeytaq qeshyeykaqta rikáyarqoq, ó karselchow, i qanman shayámorqó?” 40I Rey yaskirnin, nenqa: “Tseqeypam niyaq imanowmi rurayarqonki mas takshakaq wawqíkunata, noqatam rurayámarqeyki.”
41»Tseynam nenqa itsoqninchow kaqkunatapis: “Witikuyey noqapita malditukuna wiñey nina rawreykaqman, dyablupa i angelninkunapaq alistashqaman. 42Mallaqaptiy, mikiyta qoyámarqeykitsu; yakunaptiy, upunápaq qoyámarqeykitsu; 43jorasteru kaptiy eylluyámarqeykitsu; qalapáchu keykarqá, i bistitsiyámarqeykitsu, qeshyeykar i karselchow, i watukayámarqeykitsu.” 44Tseynam peykunapis peyta yaskiyanqa nirnin: “Señor, ¿imeytaq rikáyarqoq mallaqeykaqta, yakuneykaqta, jorasteruta, qalapáchuta, qeshyeykaqta, ó karselchow, i mana sirwiyarqoqtsu?” 45Tseynam yaskinqa peykunata nirnin: “Tseqeypam niyaq key mas ichik kaqkunata mana rurashqa karnin, noqawanpis manam rurayarqonkitsu.” 46Keykunam eywayanqa wiñey kastíguman, i justukunanam wiñey kaweyman.
Currently Selected:
MATEO 25: QUEAN
Highlight
Share
Copy
Want to have your highlights saved across all your devices? Sign up or sign in
Quechua Ancash New Testament © Peruvian Bible Society, 1992.
