MARKUS 1

1Qallanan ebangelyu Jesukristupa, Dyospa Tsurin.

Juan Bawtistapa ministeryun

2Profeta Isaias qellqashqanchow:

Keymi key Willakoqnítam kachamú nowpékita,

peymi nánikita alistamonqa.

3Chusyaqchow willakoqpa bosnin:

“Señorpa náninta alistayey;

derechayey purinankunata.”

4Tseynow Juan Bawtista yurimorqan chusyaqchow bawtismu wanakiyta predikarnin jutsakunapa perdonninpaq. 5Peyman yarquyaq i llapan Judea marka Jerusalenpeq; i peypa bawtisashqa kayarqan Jordan mayuchow, jutsankunata willakuyaptin. 6Juan bistishqa karqan kaméllupa millwampeq i tseqllanchow qarapita wachukuyoq, i mikoq langostakunata i tuna mishkita. 7I predikarqan nishpa: “Qepátam shamun, noqapita mas pwedeq, i puktirkur peypa llanqinpa watunta, manam paskeyllatapis meresitsu. 8Noqa bawtisayarqoq yakuchow, peru peyqa bawtisayashunki Espiritu Santuwanmi.”

Jesuspa bawtisakiynin

9Susederqan tsey junaqkunachow Jesús shamorqan Nasaret Galileyapita i bawtisashqa karqan Jordanchow Juanpa. 10I tseypitana, yakupita yarqiykaptin, syelukuna kichakaqta rikarqan i Espiritu urámoqta peyman palumanow. 11I juk bosmi wiyakamorqan syelupita: “Qanmi kanki kuyey Tsuriy; i qamchowmi kapaman kushikiyniy.”

Jesús prwebaman churashqa

12Tseypitanam Dyospa Espiritun aparqan chusyaqman, 13i chusyaqchow karqan chusku chunka junaq, Satanaspa tentashqa. Chukaru animalkunawan keykarqan i angelkunam sirwiyaq.

Jesús qallan ministeryunta

14Juanta karsilayashqanchownam, Jesús shamorqan Dyospa ebangelyunta predikarnin Galileyaman, 15nishpa: “Tyempu tinkuramushqanam, i Dyospa mandakiynin cháramushqanam. ¡Wanakuyey i kreyikuyey ebangelyuman!”

Jesús qayan punta disípulukunata

16I Galileya lamar kuchumpa pasareykar, rikárqan Simonta i wawqin Andresta, lamarman mállankuna jiteykaqta; peskadorkunam kayarqan. 17Jesusmi nerqan: “Qepáta shayámi, nunakuna peskaqmi rurayashqeyki.” 18Jinallachow mállankunata jaqiriyarqan i qatiyarqan.

19Ichiklla nowpárir, rikarqan Jakobuta i Sebedeopa tsurinta wawqin Juanta. Peykunam keykáyarqan barkanchow mállankunata altsarnin. 20Tseyllana qayarqan; i peykuna teytan Sebedeota barkachow uryaqninkunatawan jaqeriykur, peypa qepanta ewkuyarqan.

Kapernaunpeq endemoniyadu

21Kapernaunman yeykuriyarqan. I tseyllana, pey yeykurir eyllukánan wayichow jamakiy junaqkunapa, yachatsikorqan. 22I almirakuyarqan yachatsikiyninpita, awtoridánin kapoqyoqnow, i manam ley yachatsikoqkunanowtsu.

23Tsey óra juk nuna rakcha espirituyoq keykarqan peykunapa eyllukánan wayichow, i qaparerqan 24nishpa: —¿Imata munanki noqakunawan Nasaretpita, Jesús? ¿Shamorqonki ushakatsiyamaqku? Musyámi pí kanqeykita: ¡Dyospa santun!

25Jesusnam piñaparqan nishpa: —¡Upálla key i yarqiy peypita!

26Rakcha espiritunam tapsikacharkur, qapariykorqan feyupa i yarqurerqan peypita. 27Llapankunam almirakuyarqan tseynowpa kikinkunapura liryakurkuyarqan nirnin: —¿Imataq key? ¡Juk mushoq yachatsikiy awtoridáwan! Rakcha espiritukunatapis pey mandan i kásuyan.

28I raslla witsirerqan reqishqa keynin jinantinpa, llapan Galileya ládunpa.

Jesús kachakátsin Pedrupa swegranta

29Tseypitana eyllukánan wayipita yarqurir, eywayarqan Jakobuwan i Juanwan, Simonpa i Andrespa wayinman. 30Simonpa swegran kámachow keykarqan fiebriwan; i tsey óra peypaq willariyarqan. 31Pey witiykurqan peyman, makipita tsarirkur sharkatsimorqan. I fiebri jaqirerqan, i pey sirwirninkuna qalleykurqan.

32Tardiyáriptin, inti jeqarkuptin, apayámorqan llapan qeshyayoqkunata i endemoniyadukunata. 33Llapan nunakuna punkuchow purwakashqa keykáyarqan. 34Peymi kachakátserqan llapan tukiyláya qeshyawan jipakoqkunata i atska demoniyukunata jaqman qarqorqan. I demoniyukunata parlanantapis munarqantsu, reqiyaptin.

Jesús predikan Galileyachow

35Ampillaraq manaraq patsa waraptin, Jesús yarqurir, ewkorqan chusyaqta i tseychow Dyosta mañakoq. 36Simon yanaqinkunawan eywayarqan peyta asheq. 37Taririrna niyarqan: —Llapankunam ashiyáshunki.

38Peynam yaskerqan: —Eywashun juk láduta besínu markakunata, tseychowpis predikanápaq. Tseypaqmi shamushqa ká.

39Eywarqan predikarnin peykunapa eyllukáyanan wayíkunachow llapan Galileyapa, i demoniyukunata jaqman qarqur.

Jesús juk leprosuta kachakátsin

40Peyman shamorqan juk leprósu rowakurnin, qonquríykur nerqan: —Munarqa, pwedinkim limpyameyta.

41Jesusnam, allápa ankuparnin, makinta makyarir yateykurqan i nerqan: —Munámi; limpyu key.”

42Juklla ushakárerqan peypita lepra, i limpyu keydarerqan. 43Tseyllanam alleq willapeykur despacheykorqan 44i nerqan: —Pitapis ama ima nitsu. Mas alleqa eywey i rikátsikiy saserdotiman i Moyses mandanqanta qoy limpyu keynikipaq, peykuna rikáyánampaq.

45Yarqurirnam, pey qalleykorqan willakur i allápa witsitsir key rureyta, tseynowpana Jesús llapan rikey yeykita pwedirqantsu ni meyqan markaman, sinowqa keydakurqan jaqninkunallachow. I shayámorqan peyman jinantinkunapita.

Currently Selected:

MARKUS 1: QUEAN

Highlight

Copy