MARKUS 2
2
Jesús kachakátsin juk paralítikuta
1Kapernaunman yapey yeykuriptin tsey junaqkunapita, wiyey karqan wayichow keykashqan. 2Atskaq eywayarqan peyman, punkuchowpis kichkikurkuyarqan; peynam parlaparqan palabrata.
3Tseynam shayámorqan peyman juk paralítikuta apamurnin chuskoqpa wantushqa. 4I peypa nowpanman chátsita mana pwedir allápa nunakuna kaptin, Jesús keykanqan wayipa jananta kichariyarqan i uchkurirna urátsiyarqan paralítikuta kirmachow iskareykaqta. 5Jesusnam peykunapa kreyikiyninta rikárir nerqan paralítikuta: —Tsuri, jutseykikuna perdonashqanam.
6Judyukunapa leynin yachatsikoqkunapita wakin tseychow teykáyarqan i shonqunkunachow yarpakachar:
7—¿Imanirtaq key parlan keynow? ¡Maldisin! ¿Pitaq pwedin jutsakuna perdoneyta, sinowqa juklleylla kaq, Dyos?
8Kikinkunallachow yarpakachayaptin Jesús espiritunchow mákurir nerqan: —¿Imanirtaq tseynow shonqiykikunachow yarpakachayanki? 9¿Imataq mas fasil, paralítikuta ni: “Jutseykikuna perdonashqanam” ó “sharkiy kirmeykita tsarirkur i ewkiy?” 10Peru, musyayaneykipaq Nunapa Tsurinpaqa kapunmi awtoridánin jutsakunata key patsachow perdonanampaq—paralítikuta nerqan—: 11Qamtam neq: ¡Sharkiy, kirmeykita tsararkur wayikita ewkiy!
12I sharkurqan, tseyllana kirmanta tsararkur ewkorqan llapanpa nowpanpita, tseynowpana llapankuna almirakuyarqan i Dyosta glorifikáyarqan nirnin: —¡Manam imeypis keytanowqa rikarqontsiktsu!
Lebípa qayeynin
13Yapeynam Jesús qocha kuchumpa yarqorqan, i llapan nunakuna peyman shayámoq, i peynam yachatserqan. 14I pasareykarnam, rikárerqan Alfeyupa tsurin Lebita, kontribusyon kobrakunachow teykaqta, i nerqan: “Qatimey.” Tseynam sharkur qaterqan.
15Susederqan Lebipa wayinchow Jesús mesachow teykaptin, atskaq publikánukuna i jutsasapakunapis teykayarqan mésachow Jesuswan i disípulunkunawan, atskaq qatiyashqa karnin. 16Farisewkunapa ley yachatsikoqninkuna rikáriyar publikánukunawan i jutsasapakunawan mikoqta, disípulunkunata niyarqan: —¿Imanirtaq mikun publikánukunawan i jutsasapakunawan?
17Wiyarirnam Jesús nerqan: —Sanukunaqa wanayantsu médikuta, sinowqa qeshyaqkunallam. Manam shamorqó justukunata qayaqtsu, sinowqa jutsayoqkunata.
Ayúnupaq tapukiykuna
18Juanpa disípulunkuna i farisewkuna ayuneykáyarqan. Jesusman eywar niyarqan: —¿Imanirtaq ayunayan Juanpa disípulunkuna i farisewkunapapis, peru disípuliykikunaqa ayunayantsu?
19Jesusnam nerqan: —¿Akasu ayuneyta pwediyanku kasamyentuchow nobyu peykunawan keykaptin? Nobyu peykunawanraq keykaptin, manam ayuneyta pwediyantsu. 20Peru shamonqam junaqkuna nobyu qochisqa kanqa. Tsey junaqnam ayunayanqa. 21Manam pipis churantsu mushoq remyenduta makwa trájiman. Juknowpaqa, mushoq remyendu makwata sutarnin, mas rachikáratsin. 22Manam pipis mushoq bínuta winantsu makwa qarabolsakunaman. Juknowpaqa binu rachiratsin qarabolsakunata, binu i qarabolsakunapis sirwiyanqanatsu. Mas alleqa, mushoq bínuta winantsik mushoq qarabolsakunaman.
Jesús: Sabadupa Señornin
23Susederqan Jesús jamakiy junaqchow paseykar murushqakunapa, i disípulunkuna eywareykar espigakunata kipchuyarqan. 24Farisewkuna niyárqan: —Rikey, ¿imanirtaq rurayan sabadukunachow mana ruranata?
25I peynam nerqan: —¿Manaku imeypis leyiyashqa kayanki Dabid i peywan kaqkuna mallaqáyarnin rurashqanta; 26imanowmi Dyospa wayinman yeykorqan, Abyatar apun saserdoti keykaptin, i mikorqan Dyospa Tantata, i qorqan peywan keykaqkunatapis; mana mikuna keykaptin, sinowqa saserdotikunallapaq? 27—Tseypitanam nerqan—: Jamakiy junaqqa rurashqa karqon nunapaqmi, i manam nunatsu jamakiy junaqpaq. 28Tseymi Nunapa Tsurinqa sabadupapis Señornin.
Currently Selected:
MARKUS 2: QUEAN
Highlight
Share
Copy
Want to have your highlights saved across all your devices? Sign up or sign in
Quechua Ancash New Testament © Peruvian Bible Society, 1992.
