MARKUS 12

Mana alli murukoqkunawan tinkutsikiy

1Tseynam qalleykorqan parlaparninkuna tinkutsikiykunapa: —Juk nuna plantarqan juk chakra ubasta. Jiruroqninta perqarqan, juk pósuta uchkurqan, sháritserqan juk torrita, muroqkunata arrendakiykur ewkorqan karuta. 2Tyempunchownam kacharqan juk sirweqninta muruqkunaman, ubaspa wayinin tokashqanta chaskinampaq muroqkunapita. 3Peru peykunaqa tsaríkur, maqakacharkuyarqan i kutitsiyarqan jineyllata. 4Yapey kacharqan jukninkaq sirweqninta, peytapis peqanchow tsaktayarqan i penqakatsiyarqan. 5I kacharqan jukta, i keytana wanutsiyarqan. Kacharqan atskaqkunata, peru peykunaqa jukkunata maqayarqan i wakinkunatana wanutsiyarqan.

6»Ultimuna, kacharqan juklleylla kuyey tsurinta, peykunaman: “Tsurítaqa respetayanqam; “nishpa”. 7Peru chakra muroqkuna niyarqan kikinkunapura: “Keymi key eredéruqa. Shayámi, waniykatsishun, i erensyan noqantsikpam kanqa.” 8I tsaririrna, wanutsiyarqan i jitariyarqan ubas chakrapa jaqninman.

9»¿Imananqaraq, ubas chakrayoq nuna? Shamorqa, ushakáratsenqa uryaqkunata i tsey ubas chakrata qoykonqa jukkunata. 10¿Manaku leyiyarqonki key Eskritúrata: Simyentu patsatseqkuna mana chaskiyashqan rumi keymi rurakashqa mayestra rumi. 11Señorpa partinpitam key susedishqa i shumaqmi nawintsikkunachow?

12Peykunanam prokurayarqan tsariyanampaq, peru nunakunatam mantsayarqan, tsey tinkutsikiywan peykunapaq nishqa kaptin. I jaqeriykur, ewkuyarqan.

Sésarpa kontribusyonninpaq tapukiy

13Tseynam kachayarqan peyman wakin farisewkunata i erodianukunata ima parlakiyninllachowpis tsapuyanampaq. 14I shamurnam niyarqan: —Mayestru, musyayámi rasonpa alli nuna kanqeykita i pipeqpis kuydakunkitsu; manam nunakunapa jananllatatsu rikanki, sinowqa rasonpawanmi yachatsikunki Dyospa náninta. ¿Alliku qoyáshaq Sésarpa kontribusyonninta, o manaku? ¿Qoyashaqku ó manaku qoyáshaq?

15Tseynam, pey káyirir peykunapa motolítu keyninkunata nerqan: —¿Imanirtaq probayámanki? Apayámi juk denaryuta rikánápaq.

16Tseynam apayápamorqan, i peynam nerqan: —¿Pipa retratuntaq i qellqantaq key?

Niyarqan: —Sésarpam.

17Tseynam Jesús nerqan: —Sésarta qoyey Sésarpa kaqta, i Dyosta, Dyospa kaqta.

Almirakuyarqan peypita.

Kawarimiypaq tapukiy

18Tseynam shayámorqan peyman juk sadusewkuna, peykunam niyan manam kawarimiy kantsu, i tapuyarqan nishpa:

19—Mayestru, Moysesmi qellqayámarqan juk nuna juk warmiwan kasadu keykar mana tsuriyoq wanuptenqa, wawqin kasakutsun biwdawan, i tseynowpa wanukoq wawqimpa kastanta sháritsinanpaq. 20Kayarqan qanchis wawqikuna. Mayorkaq kasakorqan juk warmiwan i wanukorqan manaraq tsurin kaptin. 21Qepanman shamoq wawqin peywan kasakorqan i wanukiykorqan manaraq tsurin kaptin. Kima kaq jina tseynolla. 22Tseynowlla qanchisnimpin, jaqiyarqantsu kastata. Llapanpitanam, warmipis, wanurerqan. 23Kawarimiychow, kawariyámuptin, qanchisnimpi katsiyarqan warminpaq, ¿meyqanparaq warmin kanqa?

24Tseynam Jesús nerqan: —¿Manaku keykunareykur pantayanki, Eskritúrakunata ni Dyospa pwedeq keyninta mana reqirnir? 25Wanushqakunapita kawarimur, manam kasakuyanqatsu ni kasashqa kayanqatsu, sinowqa syeluchow angelkunanowmi kayan. 26Wanoqkunapa kawarimiyninpaqqa ¿Manaku Moysespa librunchow leyishqa kayanki, imanowmi Dyos parlaparqan shirapita nishpa: Noqam ká Abrahampa Dyosnin, i Isakpa Dyosnin, i Jakobpa Dyosnin? 27Dyosqa manam wanushqakunapa Dyosnintsu, sinowqa kawaqkunapam. Qamkunaqa allápam pantakuyanki.

Jatun kamatsikiy

28Liryaqta wiyarna judyukunapa leynin yachatsikoq witerqan; Jesús alli yaskishqanta wiyarirna, tapurerqan: —¿Llapampita meyqantaq punta kaq kamatsikiy?

29Jesusnam yaskerqan: —Keymi punta kaq: Wiyey, Israyel: Señor, Dyosnintsikqa, Señorqa juklleyllam. 30Dyosnikita kuyanki llapan shonqiykiwan, llapan almeykiwan, llapan yarpeynikiwan i llapan kallpeykiwan. 31Ishkey kaq keymi: Kuyanki nuna mayikita kikikitanow. Manam kantsu juk kamatsikiy mas jatun key ishkampita.

32Tseynam judyukunapa leynin yachatseq nerqan: —Allim, Mayestru. Rasonpa kaqtam nerqonki: Dyosqa juklleyllam, i manam kantsu peypitaqa juk. 33I llapan shonquwan kuyarnin, llapan kayikíwan, i llapan kallpawan, i nuna mayita kuyar kikintsiktanow; keykunam bálin mas olokawustupeq i sakrifisyukunapita.

34I Jesús yacheyninwan alli yaskishqanta rikeykur, nerqan: —Dyospa reynunpita manam karunchowtsu kanki.

I mastaqa tapuyarqantsu.

Jesús, Dabidpa Tsurin i Señornin

35Templuchow yacheykatsir, Jesús yaskirnin nerqan: —¿Imanirtaq judyukunapa leynin yachatsikoqkuna niyan Kristuqa Dabidpa tsurinmi? 36Espiritu Santupa kikin Dabid nerqan: Señormi nerqan Señorníta: “Tákamiy derecháman, chikishoqnikikunata chakikikunapa jawanman churamonqáyaq.” 37Dabid kikinmi qayan “Señor”; ¿imanowtaq kanqa tsurin?

I atskaq nunakuna wiyayarqan kushishqalla.

Jesús denunsyan ley yachatsikoqkunata

38Yachatsikiyninchownam nerqan: —Kuydakuyey judyukunapa leynin yachatsikoqkunapita, peykunam gustayan largu bestidunkunawan purita i kuyayan plasakunachow saludayananta, 39eyllukana wayikunachow punta kaq tákunakunata, i qarakiykunachow punta kaq tákunakunata. 40Keykunam biwdakunapa wayinkunata ushapáyan i tsapakuyan mana ushakey mañakiykunawan, chaskiyanqam jatun kondenasyonta.

Waktsa biwdapa ofrendan

41Ofrenda eyllukuna arka frentinchow Jesús teykar, rikárqan imanow nunakuna ofrenda qelley winayanqanta. Atska kapoqyoqkuna winayaq atskapa, 42i juk waktsa biwda shamurnin winarqan ishkey luyaq qelleyninta, keymi bálin juk kwadranti. 43Peymi disípulunkunata qayarir nerqan: —Tseqeypam niyaq key waktsa biwdam winashqa mas atskata arkaman llapan winaqkunapita. 44Llapanmi winayashqa kapoqninkunapita katunkunallata, peru keyqa, waktsakeyninpita winashqa llapan kapoqninta, mikunanpaq kaqta.

Currently Selected:

MARKUS 12: QUEAN

Highlight

Copy