MARKUS 11
11
Biktoryosu yeykiy Jerusalenman
1Jerusalenman cheykarninnam, Betfageypa i Betaniapa, ládunpa Olíbus jirka frentinman, Jesús kacharqan ishkaq disípulunkunata: 2i nerqan: —Eywayey tsinpeykikuna tunaman, i tseyman yeykurirna tariyanki juk malta ashnu watareykaqtam mana pí nuna montashqan. Paskarir apayámi. 3Pipis niyashuptikeqa: “¿Imanirtaq rurayanki keyta?”, niyanki: “Señormi wanan, tseypitanam kutiratsimonqa keyman.”
4Peykuna eywar tariyarqan malta ashnuta jaq punkuchow watarekaqta, ishkey kallikunapa eskiynanchow; i paskariyarqan. 5Tseychow wakin keykaqkunanam niyarqan: —¿Imatataq rurayanki malta ashnuta paskarnin?
6Peykunanam niyarqan Jesús nishqannowlla, i jaqiriyarqan ewkuyánanta.
7Jesusman apayámorqan malta ashnuta i ashnuman churayarqan aqshunankunata, i ashnuman tarkorqan. 8I atskaqkunam mashtayarqan aqshunankunata nániman, i wakinnam walluyarqan montikunapa rámankunata. 9Nowpanta eywaqkuna i qateqninkunapis sumátsiyaq: ¡Hosanna! ¡Benditum Señorpa jutinchow shamoq! 10¡Benditum shamoq reynun teytantsik Dabidpa! ¡Hosanna rarakunachow!
11Jesús Jerusalenman yeykorqan templuman, llapan jiruroqninta rikachakurir, tardinakaptin, yarqurerqan Betaniaman chunka ishkeykunawan.
Jesús maldisin igus yurata
12Warárinnam, Betaniapita yarquriyaptin, mallaqarqan. 13Igus yurata raprayoqta karupita rikeykur, witerqan peychow imallatapis tarinampaq. Ládunman chárir, imatapis tarinaqtsu, sinowqa raprankunallata, mana igus tyempu kaptin. 14Tseynam Jesús nerqan igus yurata: “¡Ama imeypis qampa wayínikita ni pipis mikutsuntsu!” i wiyayarqan disípulunkuna.
Jesús limpyan templuta
15Jerusalenman cháriyarqan, i Jesús templuman yeykorqan. I qalleykorqan jaqman qarqur qatoqkunata i templuchow rantipakoqkunata i trokapakoqkunapa mesankunata tikrakacharkorqan i paluma qatoqkunapa silletankunatapis, 16micharqan imatapis aparnin templupa puriyananta. 17I yachatsikorqan nishpa: “¿Manaku qellqareykan wayiyqa Dyos mañakuna wayim kanqa llapan markapaq? Peru qamkunaqa rurayarqonki suwakunapa macheynin.”
18Wiyayarqan prinsipal saserdotikuna i judyukunapa leynin yachatseqkuna i ashiyarqan imanow wanutsita munar; mantsayarnin, llapan nunakuna yachatsikiyninpita almirashqa kayarqan. 19Ampíriptinnam, Jesús i peypa kaqkuna markapita yarquyarqan.
Tsakishqa igus yurawan yachatsikiy
20Qoyánin, tseypa pasareykarna rikáriyarqan igus yura watsinpita tsakishqatana. 21Tseynam Pedru, yarpárir, nerqan: —Rabí, maldisishqeyki igus yura tsakirishqa.
22Jesusnam yaskirnin nerqan: —Kreyikiynikikuna katsun Dyoschow. 23Tseqeypam niyaq meyqampis nitsun key jirkata: “Witikiy lamarman jeqey” i shonqunchow anawanqatsu, sinowqa kreyitsun nishqannow rurakánanta, nishqannowmi rurashqa kanqa. 24Keyreykurmi niyaq Dyosman llapan mañakuyashqeyki, kreyiyey chaskiyaneykita, i rurashqam kanqa. 25Sharkur Dyosman mañakur qalleykuyaptiki, si kayápuyashunkiman píwampis ofendinakushqeykita, perdonayey, syeluchow keykaq Teyteykikuna perdonayashuneykipaq ofendinakuyashqeykita. 26Qamkunatsun mana perdonayanki, syeluchow Teyteykikunapis manam perdonayashunkitsu ofendinakuyashqeykita.
Jesuspa awtoridánin
27Kutiyarqan Jerusalenman. Tseynam, pey templupa purireykaptin, shayámorqan peyman prinsipal saserdotikuna, judyukunapa leynin yachatsikoqkuna i awkinkuna, 28i niyarqan: —¿Ima awtoridáwantaq ruranki key kosaskunata? ó ¿Pitaq qoshorqonki key awtoridáta key kosaskunata ruraneykipaq?
29Tseynam Jesús nerqan: —Noqapis tapuriyashqeyki jukta. Yaskiyámey, i noqa niyashqeykim ima awtoridáwan key kosaskuna ruranqáta. 30Juanpa Bawtismun ¿syélupita o nunakunapitaku karqan? Yaskiyamey.
31Tseynam kikinkunapura ninakuyarqan: —“Syelupitam” nishqaqa, “¿Imanirtaq kreyiyarqeykitsu?” Nimáshunmi. 32“Nunakunapita. . .” nishqaqa. Nunakunatanam mantsayarqan, Juanta llapankuna reqiyar profeta rasonpa kashqanta. 33Tseynam Jesusta yaskirnin niyarqan: —Manam musyayátsu.
Jesús nerqan: —Noqapis manam niyaqtsu ima awtoridáwan key kosaskuna ruranqáta.
Currently Selected:
MARKUS 11: QUEAN
Highlight
Share
Copy
Want to have your highlights saved across all your devices? Sign up or sign in
Quechua Ancash New Testament © Peruvian Bible Society, 1992.
