MARKUS 10
10
Juk tapukiy kasadu keykar rakikaqpaq
1Tseypita sharkurnam, eywarqan Judea markakunata i Jordanpa mas washaninkunata. Atskaq nunakuna kutiyámorqan yapey peyman, pey kostumbrinmannow yapey yachatsikur qalleykorqan. 2Tseynam wakin farisewkuna witiyarqan probayananpaq, i tapuyarqan alliku juk nuna kasadu keykar rakikanman warminpita. 3Pey yaskirnam nerqan: —¿Imatataq Moyses mandayashorqeyki?
4Peykunanam niyarqan: —Moyses permiterqan diborsyu kartata qoykur despidiykunampaq.
5Jesusnam nerqan: —Key mandamyentuta qellqarqan, chukru shonqiykikunareykurmi. 6Peru qallananpitam, Dyos rurarqan ollquta i warmita. 7Key kawsareykurmi nuna jaqirenqa teytanta i mamanta, i juntakanqa warminman; 8I kayanqa ishkan juk eytsalla. Tseynowqa manam ishkeynatsu kayan sinowqa juk eytsallana. 9Tseyreykur, Dyos juntashqantaqa, nuna ama rakitsuntsu.
10Wayichownam disípulunkuna yapey tapuyarqan keypaq. 11Peynam nerqan: —Pipis warminpita rakikárir jukwan kasakur, olteron keytam ruran warminpa kontran. 12I warmi qowampita rakikárir jukwan kasakun, olterona keytam ruran.
Jesús bendisin wamrakunata
13I presentayarqan wamrakunata yatanampaq, peru disípulukunanam piñapáyarqan. 14Rikeykur, Jesús piñakorqan i nerqan: “Jaqiyey wamrakunata noqaman shayámunanpaq, i ama jarkáyeytsu; peykunapam Dyospa reynun. 15Tseqeypam niyaq pipis juk wamranow Dyospa reynunta mana chaskirqa, manam imeypis yeykonqatsu peyman.” 16Tseynam mellqarkur, peykunapa janankunaman makinta churarkur bendiserqan.
Jesús i kapoqyoq jobin
17Náninpa ewkunanpaq yarqureykaptinna, juk nuna shamorqan eyqillapa, peypa nowpanman qonquriykikur i taporqan: —Alli Mayestru, ¿imatataq rurashaq wiñey kaweyta tarinápaq?
18Jesusnam nerqan: —¿Imanirtaq qayamanki “alli”? Pipis manam alliqa kantsu, sinowqa Dyos japallanllam. 19Qamqa reqinkim kamatsikiykunata: Ama wanutsikitsu, ama olteron keytsu, ama suwakitsu, ama ulikurkur jukpaq willakitsu, ama engañeytsu, teyteykita i mameykita onrey.
20Peru peynam nerqan: —Mayestru, jobin keynípitam keykunata kumplirqó.
21Tseynam Jesús rikeykur, kuyar nerqan: —Jukkosallanam pishipushunkiy: Eywey, llapan kapushoqnikita rantikiykur waktsakunata rakipeyki; syeluchowmi kapushunki tesoríki. I Shamiy; qatimey.
22Peynam allápa llakinashqa key palabrareykur ewkorqan llakishqa, atska kapoqyoq kar.
Atska rikeysakunapa peligrun
23Tseynam Jesús, jiruroqninta rikachakurir, disípulunkunata nerqan: —¡Imanow sasatam yeykunqa Dyospa reynunman atska kapoqyoqkuna!
24Disípulukunanam espantakuyarqan parlakiyninkunapita; Jesusqa, yapey yaskirnin, nerqan: —Tsurikuna, ¡Imanow sasam Dyospa reynunman yeykiy! 25Mas alérim juk kamellu juk awjapa nawimpa pasarinman, juk atska kapoqyoq Dyospa reynunman yeykunanta.
26Peykuna keydariyarqan mas espantashqaraq kikinkunallachow ninakur: —¿Piraq salbashqa keyta pwedenqa?
27Tseynam Jesús, rikáriyarnin, nerqan: —Nunakunapaqqa sasam; Dyospaqqa manam. Dyospaqqa llapan kosaskunapis fásilllam.
28Pedrunam qalleykorqan nirnin: —Kaq key noqakuna llapanta jaqirikur qatiyarqoq.
29Jesusnam nerqan: —Tseqeypam niyaq manam pipis kantsu wayinta jaqireq, ó wawqinkunata, ó paninkunata, ó mamanta, ó teytanta, ó tsurinkunata, ó chakrankunata, noqapa kawsareykur i ebangelyureykur, 30chaskinqa pachak kuti mas key kaweychow: Wayinkuna, wawqinkuna, paninkuna, mamankuna, tsurinkuna i chakrankuna, qatikacheykunawan; i shamoq tyempuchow, wiñey kaweyta. 31Peru puntakaqkuna qepachow kayanqa; i qepakaqkuna, puntachow.
Jesús willakun waníninta i bensikiyninta
32Nánipa witsareykayarqan Jerusalenman, Jesusnam eywarqan peykunapa nowpanta. Keykayárqan almirashqa, i qateqninkunanam mantsayarqan. Tseynam, yapey chunka ishkeyninkunata rakirir, qalleykorqan musyatsirnin peyta imapis pasananta:
33—Kananmi witsantsik Jerusalenman, i Nunapa Tsurinmi entregashqa kanqa llapan prinsipal saserdotikunaman i judyukunapa leynin yachatsikoqkunaman. Kondenayanqa wanunampaq i entregayanqa gentilkunaman. 34Peypeq burlakuyanqa, toqapuyanqa, astayanqa i wanutsiyanqa; i kima junaqta kawarimonqa.
Sebedeopa tsurinkunapa mañakiynin
35Tseynam Jakobo i Juan Sebedeopa tsurinkuna, witiyarqan peyman i niyarqan: —Mayestru, munayámi qoyamáneykita mañayashqaqta.
36Peynam nerqan: —¿Imatataq munayanki qamkunapaq ruranáta?
37Peykunanam niyarqan: —Qoyámey gloryeykichow tákuyanápaq jukniy derécheykichow i jukniy itsoqnikichow.
38Tseynam Jesús nerqan: —Manam musyayankitsu mañakuyashqeykita. ¿Kopa uponqáta qamkuna pwediyankiku upiyta, o bawtisashqa keyta pwediyankiku noqa bawtisakonqáwan?
39Peykunanam niyarqan: —Pwediyámi.
Jesusnam nerqan: —Upuyankim noqa kopa uponqáta, i bawtisashqam kayanki noqa bawtisakonqáwan. 40Peru derécháman o itsoqníman tátsiqa manam noqapatsu qonápaq, sinowqa alistakushqakunallapaqmi.
41Chunka kaqkuna wiyarirnam, piñakurkuyarqan Jakobuwan i Juanwan. 42Jesús qayarirnam nerqan: —Musyayankim gentilkunapa prinsipinkunaqa dweñutukuyan peykunapita, i jatunninkuna pwedeq keyninwan rurayan munayashqanta peykunawan. 43Peru manam tseynowtsu qamkunachowqa. Mas allim, pipis qamkunachow jatunkeyta munaqqa sirweqnikikunam kanqa, 44i qamkunachow pipis puntachow key munaqqa llapampa sirweqninmi kanqa. 45Nunapa Tsurinqa shamushqa manam sirwishqa kanampaqtsu, sinowqa sirwikunampaq i kaweyninta llapampa rantinchow qonampaq.
Jesús kachakátsin wisku Bartimeuta
46Tseynam cháriyarqan Jerikóman. I pey disípulunkunawan i atska nunakunawan Jerikópita yarqureykayaptin, Timeopa tsurin, wisku Bartimeu, teykárqan náni kuchunchow llimushnakur. 47Jesús Nasarenu kashqanta wiyarir, qalleykorqan qaparir nishpa: —¡Jesús, Dabidpa tsurin, ankupeykallamey!
48Atskaqkuna piñapáyarqan upallákunampaq, peru peynam qaparerqan mas sinchipa: —¡Dabidpa tsurin, ankupeykallámey!
49Tseynam Jesús sharárir qayatsirqan. Wiskuta qayarayamorqan nishpa: —Markákiy. Sharkiy. Peymi qayashunki.
50Tseynam pey, aqshunanta jitarir, sharkur eywarqan Jesusman.
51Jesusnam yaskerqan nirnin: —¿Ima ruranaqtataq munanki?
Wiskunam nerqan: —Rabí, nawillá rikátsun.
52Jesús nerqan: —Ewkiy. Kreyikiynikim salbashorqonki.
Tseyllana nawin rikarqan, i qaterqan Jesusta nánipa.
Currently Selected:
MARKUS 10: QUEAN
Highlight
Share
Copy
Want to have your highlights saved across all your devices? Sign up or sign in
Quechua Ancash New Testament © Peruvian Bible Society, 1992.
