MARKUS 9

1Jinam nerqan: —Tseqeypam niyaq wakinnikikuna keychow keykaq manam wanuyanqatsu Dyospa reynun poderninwan shamoqta rikáyanankama.

Trokakey

2Joqta junaqpitanam, Jesús pusharqan Pedruta, Jakobuta i Juanta, i witsátserqan jaqpilla, japallankunallata juk jirkaman, i trokakárerqan peykunapa nowpankunachow. 3Bestidunkunapis rurakárerqan chipapikaq, allápa luyaq, key patsachow taqshaqkunapis pwediyantsu tseynow luyaqátsita. 4I yuriporqan Elias Moyseswan, i parleykáyarqan Jesuswan. 5Tseynam Pedru tseychow nerqan Jesusta: —Rabí; allim noqakuna keychow keykayá. Rurashun kima ramadakunata: Jukta qampaq, juktana Moysespaq i juktana Eliaspaq.

6Peynam musyarqatsu ni ima nita, mantsakashqa keykayarnin. 7Pukutey shamurqan wánirninkuna, i pukuteypita juk bos nimorqan: “Keymi key kuyey Tsurí; peyta wiyayey.”

8I jinallachow, jiruroqninta rikárir, pitapis rikáyarqannatsu peykunatawan, sinowqa Jesusllatana.

9Jirkapeq peykuna ureykayamuptinna, Jesús atikarqan mana pitapis willakuyánampaq rikáyashqanta, sinowqa Nunapa Tsurin wanushqakunapeq kawarimuptinraq; 10i peykunanam wardayarqan palabrata kikinkunallachow, liryayarnin ima ninanraq, wanushqakunapita kawarimiy. 11Tapuyarqan nishpa: —¿Imanirtaq judyukunapa leynin yachatsikoqkuna niyan wananmi puntata Elias shamunan?

12Peynam nerqan: —Rasonpam, Elias puntata shamun i llapan kosaskunata altsan. I ¿imanowtaq qellqareykan Nunapa Tsurinpaq allápa jipanampaq i despresyashqa kananpaq? 13Peru noqa niyaq, Elias shamushqanam; peywan rurayarqan llapan munayashqanta, peypaq qellqashqa kanqannow.

Jesús kachakátsin ollqu wamrata

14Disípulunkunaman chárirna, rikáriyarqan allápa nunakunata peykunapa jiruroqninchow, i wakin judyukunapa leynin yachatsikoqkunata peykunawan liryaqta. 15Tseyllana, llapan nunakuna rikárirnin, espantakuyarqan, i peyman eyqirnin saludariyarqan. 16I tapurerqan: —¿Imatataq liryayanki peykunawan?

17Atska nunakunapita juk yaskerqan: —Mayestru, apamorqó qanman tsuríta múdu espirituyoq kaptin, 18peyta meychowpis tsarenqanchow, seqirin. Poshuqakunatam jitan i kirunkunata ruchuchútsin, i tsakikiykannam. Disípuliykikunata nerqó qarquyánanpaq, peru manam pwediyashqatsu.

19Yaskirirnam nerqan: —¡Key kaweychow mana kreyikoqkuna! ¿Imeyaqtaq keykáshaq qamkunawan? ¿Imeyaqraq awantayashqeyki? ¡Apayámi!

20Apayápamurqan, espiritu rikeykur, tsey óra tapsikacharkorqan ollqu wamrata, peynam patsaman ishkirir qarishpeykacharqan, pushoqata jitar. 21Jesús taporqan wamrapa teytanta: —¿Imeypitanataq key tsarin?

Peynam nerqan ñushpi kanqanpitam. 22Atska kutinam jitan ninaman ó yakuman wanutsinampaq; imallatapis rureyta pwederqa ¡ankupeykayamey noqakunata! i ¡yanapeykayámey!

23Jesusnam nerqan: —“¿Pwedinkiku. . .?” ¡Kreyeqpaqqa imapis sasatsu!

24Tseyllana wamrapa teytan qaparipa rowarqan: —¡Kreyimi! ¡Mana kreyikiynita yanapeykiy!

25Jesús atska nunakuna purwakámoqta rikárir, piñaparqan rakcha espirituta nirnin: —Espiritu múdu i sordu, noqam mandaq, ¡peypita yarqiy i amana imeypis yeykiytsu peyman!

26Tseynam, qaparir i llutepa tapsikacharkurnin, espiritu yarqurerqan, wanushqanow wamra keydarerqan; tseynam atskaqkuna niyarqan: —¡Wanushqam!

27Jesusnam makinpita tsarirkur dericharkamorqan, i peyna sharkamorqan.

28Pey wayiman yeykuriptinnam disípulunkuna pakeyllapa tapuyarqan: —¿Imanirtaq noqakuna qarqiyta pwediyarqótsu?

29Peynam nerqan: —Keynow espirutaqa manam imawampis yarquntsu, sinowqa Dyos mañakiywanmi, i ayunuwan.

Jesús yapey willakun wanunanta

30Tseypita yarqurirnam purikáyarqan Galileyapa. Pey munarqantsu pipis musyananta, 31eyweykarqan disípulunkunata yachatsir, i nerqan: “Nunapa Tsurenqa entregashqam kanqa nunakunapa makinkunaman i wanutsiyanqa. Wanushqampita kawarimonqa kima junaqta.” 32Peru peykuna manam káyiyarqantsu key palabrata i mantsayarqan tapiyta.

Pitaq mas báleq

33Kapernaunman chárerqan i wayichow keykarna Jesús taporqan: —¿Imatataq kikikikunapura liryayarqeyki nánichow?

34Peykuna upállakuyarqan, nánichow kikinkunapura pí mas báleq kanqanta pleytushqa kayarnin. 35Tseynam tákurerqan, qayarqan chunka ishkeykunata i nerqan: —Pipis puntachow keyta munaqqa, llapampa qepanchowmi kanqa i sirwenqa llapankunatam.

36Juk wamrata jancharkur peykunapa chowpinman churarqan; mellqarkurninna, nerqan:

37—Pipis jutíchow chaskin meqantapis key wamratanow, noqatam chaskiman, i pipis noqata chaskimaqqa manam noqatatsu chaskiman sinowqa kachamaqnítam.

Pitaq noqantsikwan keykan

38Juanmi nerqan: —Mayestru, rikáyarqó jukta jutikichow demoniyukuna qarqoqta, i micháyarqó, mana qatiyámaptin.

39Jesusnam nerqan: —Ama micháyetsu, jutíchow milagrukunata ruraqqa manam kontrá parlanmantsu. 40Noqantsikpa mana kontrantsik kaqqa, noqantsikpam. 41Pipis jutíchow juk básu yakuta qoshoqniki, Kristupa kayaptiki, tseqeypam niyaq manam oqranqatsu págunta.

Jutsaman ishkina

42»Meyqanpis ishkitsinman noqaman kreyeq ñushpikunata, allim kanman mulinu rumita kunkanman watarkur lamarman jitarpushqa kanman.

43Sitsun makiki ishkitsishunkiman, roquriykiy. Mas allim kutumaki yeykunki kaweyman, ishkey makikiwanqa, infyernuman eywaneykita, mana upeq ninaman. 44Peypa kurun wanuntsu, i ninapis ni imey upintsu. 45Sitsun chakiki ishkitsishunki, roquriykiy. Mas allim juk chakikillawan yeykunki kaweyman ishkey chakikiwanqa infyernuman jitashqa kaneykita. 46Peypa kurun wanuntsu, ninapis ni imey upintsu. 47Sitsun nawiki ishkitsishunki, jorqurikiy. Mas allim juk nawillawan, yeykunki Dyospa reynunman ishkan nawikita keykátsir, jitashqa kanki infyernuman. 48Peypa kurun wanuntsu, ninapis ni imey upintsu.

49»Tseynowqa llapanmi kanqa kachitashqa ninawan. I llapan sakrifisyum kachitashqa kanqa kachiwan. 50Allim kachi; peru kachitsum qamlárenqa, ¿imawantaq kachitashqa kanqa? Kachiyoq kayey qamkunachow i kawakuyey yamey keychow juknikikuna wakinkunawan.

Currently Selected:

MARKUS 9: QUEAN

Highlight

Copy