Gẹnẹsisi 21

1OKLUNỌ sọ dla Sala pọ́n dile é ko dọ, OKLUNỌ sọ wà hlan Sala dile é ko dọ do. 2Sala sọ mọhò, bo jivi sunnu dopo na Ablaham to yonho etọn mẹ, to ojlẹ he yè dè he Jiwheyẹwhe ko do nẹ mẹ.

3Ablaham sọ ylo oyín visunnu etọn he yè ji hlan ẹn, mehe Sala ji nẹ̃ tọn dọ Isaki. 4Ablaham sọ gbowhẹna Isaki visunnu etọn, whenuena é yí azán sinatòn do whẹ́n, kẹdẹdile Jiwheyẹwhe ko degbè nẹ̃ do. 5Ablaham sọ yín owhè kanweko mẹho, whenuena yè ji Isaki visunnu etọn hlan ẹn. 6Sala sọ dọmọ, Jiwheyẹwhe ko wleawu núkikò tọn na mi; mẹdepope he sè nasọ kònu hẹ mi. 7E sọ dọmọ, Mẹnu wẹ sọgan dọ hlan Ablaham dọmọ, Sala na na anó ovi nó? na yẹn ko ji visunnu de nẹ to yónho etọn mẹ.

8Ovi lọ whén, yè sọ dèanọ́ nẹ̃: Ablaham sọ da núdùdù daho to azán lọ gbè he yè dèanó na Isaki. 9Sala sọ mọ visunnu Hagali tọn, Egiptinu, he yè ji hlan Ablaham, to aihúnda. 10Enẹwutu wẹ é dọ hlan Ablaham, dọmọ, Yàn yọnnumẹglọnọ he jẹgbonu po visunnu etọn po; na visunnu yọnnumẹglọnọ he tọn ma na yín whedútọ hẹ visunnu ṣie, yèdọ hẹ Isaki gba.

11Ohó he sọ yín adinu talala to Ablaham nukunmẹ na visunnu etọn wutu. 12Jiwheyẹwhe sọ dọ hlan Ablaham, dọmọ, A dike é yín adinu to nukun towe mẹ na visunnu lọ tọn wutu blo, podọ na yọnnumẹglọnọ towe wutu blo; to ehe Sala dọ lẹpo mẹ dotó ogbè etọn; na Isaki mẹ wẹ yè na ylọ okún towe te. 13Visunnu yọnnumẹglọnọ tọn lọ mẹ ga wẹ yẹn na basi akọta de sọn, na okún towe wẹ é yín wutu.

14Ablaham sọ fọ́n to afọnnufu, bo yí akla po osìn ogo dopo po, bo yí i na Hagali, bo zé visunnu lọ do abó etọn ji, bo do e hlan jẹgbonu: ewọ sọ yì bo to dindanpé to ozùngbo Bẹeli-ṣeba tọn mẹ. 15Osìn lọ vò to ogò mẹ, é sọ ze ovi lọ dlan nukàn de glọ 16E sọ yi, bo sinai pànnukọn ẹn to aganu bobo, e sò ogá yinyin zọnlin dopo: na é dọmọ, A dike yẹn mọ oku ovi lọ tọn blo E sọ sinai bo pànnukọn ẹn; podọ visunnu lọ sọ zé ogbe etọn yìaga, bo viavi.

17Jiwheyẹwhe sọ sè ogbè visunnu lọ ton, angẹli Jiwheyẹwhe tọn sọn olọn ylọ Hagali bo dọ hlan ẹn, dọmọ, Etéwẹ wà we, Hagali? a dibú blo, na Jiwheyẹwhe ko sè ogbe visunnu lọ tọn, to fie é te. 18Fọ́n, zé visunnu lọ, bo zé e hẹn alọ towe mẹ, na yẹn na yí i do basi akọta daho.

19Jiwheyẹwhe hùn nukun etọn, é sọ mọ odòtọ osìn tọn de, bo so yì, bo yí osìn dogọ́ ogò lọ, bo yí na visunnu lọ nù. 20Jiwheyẹwhe sọ tin hẹ visunnu lọ, é sọ whén bo sinai to zùngbomẹ, podọ le é whẹ́n é lẹzùn gáyìntọ de. 21E sọ sinai to zùngbo Palani tọn mẹ: onọ etọn sọ mọ asi nẹ̃ sọn aigba Egipti tọn ji.

22E sọ wà jọ to ojlẹ nẹ mẹ, wẹ Abimẹlẹki po Fikoli awhàngán etọn po dọ hlan Ablaham, dọmọ, Jiwheyẹwhe tin hẹ we to onú lẹpo he hiẹ to wiwà mẹ: 23enẹwutu dinvie gbọn Jiwheyẹwhe dali whlé hlan mi to ofi dọ hiẹ ma na zán oklọ hẹ mi, kavi hẹ visunnu ṣie, kavi hẹ visunnu visunnu ṣie tọn: ṣigba kẹdẹdi dagbewanyi he yẹn wà hlan we, mọwẹ hiẹ nasọ wà hlan mi do, podọ hlan aigba he ji hiẹ ko wáwási te.

24Ablaham sọ dọmọ, Yẹn na whlé.

25Ablaham sọ wọhẹ Abimẹlẹki na osìn odotò lọ tọn wutu, ehe devi Abimẹlẹki tọn lẹ ko yí huhlọn do yí.

26Abimẹlẹki sọ dọmọ, Yẹn ma yọ́n mẹhe basi onú he gba: mọwẹ hiẹ ma dọ na mi, mọ yẹn ma sọ sè, adavo egbé he.

27Ablaham sọ yí lẹngbọ po oyìnsu po, bo yí yé na Abimẹlẹki; yé omẹ awe lẹ sọ nùalé dopọ. 28Ablaham sọ klán lẹngbọvú asi ṣinawe to kanlinpa mẹ dovo na yéde. 29Abimẹlẹki sọ dọ hlan Ablaham, dọmọ Etẹ́wẹ lẹngbọvú asi ṣinawe he hiẹ klán do awe na yéde helẹ yín. 30E sọ dọmọ, Lẹngbọvú asi ṣinawe helẹ wẹ hiẹ na yí sọn alọ sie mẹ, na yé nido yín kunnudenu hlan mi, dọ yẹn wẹ kùn odòtọ̀ he. 31Enẹwutu wẹ é ylọ finẹ lọ dọ Bẹeliẹeba, na finẹ wẹ yé omẹ awe lẹ whlédopọ te wutu. 32Mowẹ yé nùalé to Bẹeliseba: whenẹnu wẹ Abimẹleki fọ́n, po Fikoli awhàngán etọn po, yé sọ légọ́ yì aigba Filistinu lẹ tọn ji.

33Ablaham sọdó atin tamalisiki tọn de to Bẹeli-seba, finẹ wẹ é to avàleyàn oyín OKLUNỌ tọn te Jiwheyẹwhe Madopodo 34Ablaham sọ wáwási to aigba Filislinu lẹ tọn ji hò azán susu.

Currently Selected:

Gẹnẹsisi 21: BWL23

Highlight

Copy