Jénesii̱s 9

Bi̱ tsꞌén Néná índajo̱ ngo ni Noee̱

1Néná katsꞌénchikonñé Noee̱ ko̱jo ndií, kó bi̱ katsoó:

«Mejénna nga kꞌuiéjnú kjín ndí, kó xota̱ tji̱e̱jnú xi ngasꞌikitsieni tꞌananguii̱. 2Ngu̱i̱ya ndsa̱jnú tjítsꞌenkꞌasꞌien an tsi̱ꞌe̱ nga ko̱tixomájnúu̱ ngayeje cho̱ xi tjín tꞌananguii̱, ko̱jo ngayeje ni̱sie xi tjín nkꞌaján, ko̱jo ngayeje cho̱ xi ꞌbifé yojoo̱, ko̱jo ngayeje cho̱ xi tjín ngu̱i̱jin ndáchíkoón. Nguindyikónjnú kjo̱tsié ndikón má ngayeje kui cho̱o̱. 3An tjítsꞌenkꞌasꞌienjnúꞌun ngayeje cho̱ ko̱jo ngayeje xka̱ xi ma chinie tsi̱ꞌe̱ nga xi̱ni̱e̱jnú. 4Ta̱nga ka̱májín xi̱ni̱e̱jnú yojoo̱ cho̱ xi to̱kó tjiín jín, ngatꞌa̱ jiín boá xi kjo̱a̱mindyioo̱n.

5-6»Xikó kjiꞌi an, bo̱a̱ tsꞌén katsꞌenda an xota̱ nga̱sondiee̱, kuíni nga tsi ngo cho̱ sa̱ꞌínkꞌiénjnú jún, chjiéngá ko̱ya kuí cho̱o̱ nga, kó tsi tjín jún xi si̱ꞌankꞌiénjnú ngo xota̱, ti̱ chjiéngá ko̱ya kuí xi bo̱a̱ katsꞌeén nga.

7»Kó mejénna nga jún kjín ndí ngatꞌiéjnú, kó ngasꞌikitsieni xota̱ tji̱e̱jnú ngayeje tꞌananguii̱».

8Kó Néná ti̱ bi̱ ti̱ katsoó Noee̱ nga:

9«Ngotꞌe̱ ꞌne̱ kꞌi̱e̱ tsꞌénꞌbindajo̱jnúꞌun ngo ni, jún ko̱jo xota̱ tji̱e̱jnú, 10ko̱jo ngayeje cho̱ xi tjiín tsja̱nga̱, ko̱jo cho̱ xi ma ꞌbítji̱e̱, ko̱jo cho̱ xi tamá xi tjín tꞌananguii̱ kui xi kisꞌińdojo̱jnú ngu̱i̱ya tjotso xi ta̱nisién ꞌniú jee̱. 11Kó kuí bí kjo̱a̱ꞌbíndana xi tjítsꞌenjo̱jnúꞌun: Nguinijánjín sa̱ꞌinkjié an tꞌananguii̱ nga ndójoaa̱ stsé xí ta̱nisién ꞌniú sa̱ꞌinkjién án».

12-13Kó ti̱ bi̱ ti̱ katsó ngase Néná:

«Jè indajo̱jnúꞌun ngo ni jún ko̱jo ngayeje xi síndo nga̱són tꞌananguii̱, ko̱jo xota̱ xi kji̱e̱ tsenjiín nga. Kó chi̱bo̱a̱a̱ kui kjo̱a̱ꞌbíndaa̱ kuí boá xi ndi̱ꞌya̱na. 14Kjiꞌa nga sanguiya an ṉdi̱ nga̱són tꞌananguii̱, kjiꞌa boá nga xcha̱ ndi̱ꞌya̱na. 15-17Kó kjiꞌa boá nga kjo̱a̱ꞌátsjienna ni xi indajo̱jnúꞌun. Kó nga nguinijánjín kꞌuié ngo stsé xí ta̱nisién ꞌniú xi sa̱ꞌínkjié ngayeje xi síndo xi tjín nga̱sondiee̱. Kó ndi̱ꞌya̱a̱ kuí boá xi chi̱bo̱a̱a̱ kui kjo̱a̱ꞌbíndaa̱».

Bi̱ tsꞌén kamáchꞌi̱ Noee̱

18Bi̱ kiꞌmí nga ján jaá Noee̱ xi nijan jatjajenni tjotso xi ta̱nisién ꞌniú jee̱: See̱n, ko̱jo Kaa̱n ko̱jo Jafee̱t. Kaa̱n kuí boá xi kisꞌiee̱ ngo ndí xí kiꞌmí Kanaa̱n. 19Xota̱ tji̱e̱e̱ nga ján jaá Noee̱ boá xi kisꞌikitsie nguiní tꞌananguii̱.

20Noee̱ xá jno̱ katsꞌén, kó kuí boá xi ítsꞌi̱yanii̱ nga ítji̱e̱ tostsi̱je. 21Ngo ndi̱ya katsꞌe binoo̱ tostsi̱je xí ítji̱e̱, sꞌe̱ kamáchꞌi̱, kó kisꞌie kjiꞌixtí ngu̱i̱yaa̱ ndiꞌa xi tji̱xi̱ín cho̱ kiniꞌándanii̱. 22Kó Kaa̱n nga kamábe nga kjiꞌixtí Noee̱, kijítsáyaá ntsꞌi̱e̱ xi ingui joó xi síndo ndi̱tsee̱n. Xota̱ tji̱e̱e̱ Kaa̱n kuí boá xi xota̱ Kanaa̱n. 23Kósꞌe̱ See̱n ko̱jo Jafee̱t iskjíbé ngo ńjñotjibé tsi̱ꞌe̱ nga ko̱óꞌmá na̱ꞌmii̱, kó tsi̱ꞌe̱ nga sku̱i̱e̱jín yojo kjiꞌixtií na̱ꞌmii̱, kuíni nga kui jaá nga̱xto̱n nga̱xto̱n kijí nga ndyi̱yaꞌa kui ńjñotjibeé, sꞌe̱ yíꞌmá yojoo̱ na̱ꞌmii̱.

24Nguije jaꞌaá Noee̱, nguije nguiti̱ chꞌi̱jín, kó nga kiꞌmíyaá ni xi katsꞌén Kaa̱n, 25Noee̱ bi̱ katsó:

«Ngatꞌíko̱jonii̱ xota̱ Kanaa̱n,

kui xi ndíi̱,

kuí boá xi moso̱ xi ꞌniú nguindie xaá

xi tsi̱ꞌe̱ xota̱ tji̱e̱e̱ See̱n ko̱jo Jafee̱t ngatama».

26Kó bi̱ katsó ngase:

«Néná xi tsꞌenchíkonñéná, kui xi Ne tsa̱ꞌa̱n, ngatama Nee̱ See̱n nga,

kó xota̱ Kanaa̱n kuí boá xi ngatama mosoo̱ See̱n.

27»Néná ngatsjaá

tsie tꞌanangui Jafee̱t,

kó ndiꞌa xi tji̱xi̱ín cho̱ kiniꞌándani xi tsi̱ꞌe̱ See̱n ngatꞌíjñá Jafee̱t,

kó xota̱ Kanaa̱n xi ngatama mosoo̱ Jafee̱t».

28Kó nguije kamá stsé xí ta̱nisién ꞌniuú ngui ján úchán ichítié nó kisꞌijña ngase Noee̱. 29Kó nijan úchán ichítié nó kamaá Noee̱ nga kisꞌijña nga̱sondie.

Currently Selected:

Jénesii̱s 9: MAIX

Highlight

Copy